مۇسانىڭ 5-جازباسى 27:1—26
27 بۇدان كەيىن مۇسا يسرايل اقساقالدارىمەن بىرگە حالىقتىڭ الدىندا تۇرىپ، بىلاي دەدى: «بۇگىن مەن سەندەرگە بۇيىرعاندارىمنىڭ ٴبارىن ورىنداڭدار.
2 يورداننان ٶتىپ، ەحوبا قۇدايلارىڭ بەرگەلى جاتقان جەرگە جەتكەندە، ۇلكەن تاستار ورناتىپ، ولاردى اكتەڭدەر+.
3 سوسىن ولارعا وسى بۇكىل زاڭدا ايتىلعان سوزدەردى جازىپ قويىڭدار. مۇنى وزەننەن ٶتىپ، ەحوبا قۇدايلارىڭ اتا-بابالارىڭا بەرگەن ۋادەسى بويىنشا، ەحوبا قۇدايلارىڭ يەلىكتەرىڭە بەرەتىن اعى مەن بالى اعىل-تەگىل مول ولكەگە كىرگەندە ىستەيتىن بولىڭدار+.
4 يورداننىڭ ارعى بەتىنە وتكەن سوڭ، بۇگىن بەرگەن بۇيرىعىما ساي، ۇلكەن تاستاردى ەۆال تاۋىنا+ ورناتىپ، اكتەپ قويىڭدار.
5 سونىمەن قاتار ەحوبا قۇدايلارىڭا ارناپ سول جەردە تاستان قۇرباندىق ورنىن تۇرعىزىڭدار. تاستارعا تەمىر قۇرال-سايمان تيمەسىن+.
6 ەحوبا قۇدايلارىڭا ارنالعان قۇرباندىق ورنىن قاشالماعان ٴبۇتىن تاستاردان تۇرعىزىڭدار. ونىڭ ۇستىندە ەحوبا قۇدايلارىڭا تۇگەل ورتەلەتىن قۇرباندىقتار ۇسىنىڭدار.
7 سول جەرگە تاتۋلىق قۇرباندىقتارىن+ دا اكەلىپ، ەتىن جەپ+، ەحوبا قۇدايلارىڭنىڭ الدىندا قۋانىڭدار+.
8 ال تاستارعا وسى بۇكىل زاڭدا ايتىلعان سوزدەردىڭ ٴبارىن انىق ەتىپ جازىپ قويىڭدار+».
9 سوسىن مۇسا مەن لەۋىلىك ٴدىني قىزمەتكەرلەر كۇللى يسرايل حالقىنا ٴسوز جولداپ: «ۋا، يسرايل، ۇندەمەي تۇرىپ، تىڭداپ الىڭدار! بۇگىن سەندەر ەحوبا قۇدايلارىڭنىڭ حالقى بولدىڭدار+.
10 ەحوبا قۇدايلارىڭنىڭ سوزىنە قۇلاق اسىپ، بۇگىن مەن ارقىلى بەرىپ تۇرعان زاڭدارى+ مەن نۇسقاۋلارىن ورىندايتىن بولىڭدار»،— دەدى.
11 سول كۇنى مۇسا حالىققا بىلاي دەپ بۇيىردى:
12 «يورداننىڭ ارعى بەتىنە وتكەن سوڭ، حالىققا باتا بەرۋ ٷشىن گاريزيم تاۋىنىڭ+ ەتەگىندە تۇراتىن رۋلار مىنالار: شيمون، لەۋى، ياھۋدا، يساحار، ٴجۇسىپ، بەنيامين.
13 ال قارعىس ايتۋ ٷشىن ەۆال تاۋىنىڭ+ ەتەگىندە تۇراتىن رۋلار مىنالار: رۋبەن، عاد، اشير، زابۋلون، دان، نافتاليم.
14 لەۋىلىكتەر يسرايلدىڭ كۇللى حالقىنا قاتتى داۋىسپەن بىلاي دەسىن+:
15 —ەحوباعا جەركەنىشتى+ ٴتاڭىردىڭ ٴمۇسىنىن نە بەينەسىن قاشاپ نە بالقىتىپ قۇيىپ+، ۇستانىڭ قولىنان شىققان وسى نارسەنى قۇپيا جەرگە ورناتىپ قوياتىن ادامدى قارعىس اتسىن! (سوندا كۇللى حالىق: «اۋمين!»— دەسىن.)
16 اكە-شەشەسىن قورلاعان ادامدى قارعىس اتسىن+! (سوندا كۇللى حالىق: «اۋمين!»— دەسىن.)
17 كورشىسىنىڭ مۇرالىق جەرىنىڭ شەگارا بەلگىسىن جىلجىتقان ادامدى قارعىس اتسىن+! (سوندا كۇللى حالىق: «اۋمين!»— دەسىن.)
18 سوقىردى جولىنان اداستىرعان ادامدى قارعىس اتسىن+! (سوندا كۇللى حالىق: «اۋمين!»— دەسىن.)
19 جاتجەرلىكتىڭ، جەتىم-جەسىردىڭ+ ٸسىن قاراستىرعاندا، ادىلدىكتى بۇرمالاعان ادامدى قارعىس اتسىن+! (سوندا كۇللى حالىق: «اۋمين!»— دەسىن.)
20 اكەسىنىڭ ايەلىمەن جاقىنداسقان ادامدى قارعىس اتسىن، ويتكەنى ول اكەسىنىڭ ابىرويىن توكتى+! (سوندا كۇللى حالىق: «اۋمين!»— دەسىن.)
21 جانۋارمەن جاقىنداسقان ادامدى قارعىس اتسىن+! (سوندا كۇللى حالىق: «اۋمين!»— دەسىن.)
22 اپكەسىمەن نە قارىنداسىمەن، اكەسىنىڭ نەمەسە اناسىنىڭ قىزىمەن جاقىنداسقان ادامدى قارعىس اتسىن+! (سوندا كۇللى حالىق: «اۋمين!»— دەسىن.)
23 قايىن ەنەسىمەن جاقىنداسقان ادامدى قارعىس اتسىن+! (سوندا كۇللى حالىق: «اۋمين!»— دەسىن.)
24 تاسادان تاپ بەرىپ، بىرەۋدى ولتىرگەن ادامدى قارعىس اتسىن+! (سوندا كۇللى حالىق: «اۋمين!»— دەسىن.)
25 اقشا الىپ، جازىقسىز جاننىڭ قانىن توككەن ادامدى قارعىس اتسىن+! (سوندا كۇللى حالىق: «اۋمين!»— دەسىن.)
26 وسى زاڭنىڭ سوزدەرىن ورىنداماي، ەلەۋسىز قالدىرعان ادامدى قارعىس اتسىن+! (سوندا كۇللى حالىق: «اۋمين!»— دەسىن.)
