مۇسانىڭ 5-جازباسى 29:1—29
29 حوريبتەگى كەلىسىمنەن باسقا، ەحوبا مۇساعا مواب جەرىندە يسرايل حالقىمەن كەلىسىم جاساۋدى بۇيىردى+. ونىڭ شارتتارى كەلەسىدەي بولدى.
2 مۇسا كۇللى يسرايل حالقىن شاقىرىپ، بىلاي دەدى: «سەندەر ەحوبانىڭ مىسىر ەلىندە پەرعاۋىنعا، ونىڭ بارلىق قىزمەتشىلەرى مەن بۇكىل ەلىنە نە ىستەگەنىن ٶز كوزدەرىڭمەن كوردىڭدەر+.
3 سونداي-اق زور سوت جۇرگىزىپ، بەلگىلەر مەن كەرەمەتتەر جاساعانىنا كۋا بولدىڭدار+.
4 الايدا ەحوبا سەندەرگە وسى كۇنگە دەيىن ۇعاتىن سانا*، كورەتىن كوز، ەستيتىن قۇلاق بەرگەن جوق+.
5 «مەن سەندەردى 40 جىل بويى ٴشول دالامەن الىپ ٴجۇردىم+. سوندا كيىم-كەشەكتەرىڭ دە، اياقكيىمدەرىڭ دە توزعان جوق+.
6 جول-جونەكەي سەندەر نان جەگەن جوقسىڭدار، شاراپ نە باسقا ىشىمدىك تە ىشپەدىڭدەر. ايتسە دە مەنىڭ ەحوبا قۇدايلارىڭ ەكەنىمدى بىلۋلەرىڭ ٷشىن، سەندەردى قامقورلاپ كەلدىم».
7 اقىرىندا، وسى جەرگە كەلىپ جەتتىڭدەر. الدىمىزدان حەشبون پاتشاسى سيحون+ مەن باشان پاتشاسى وگ+ شايقاسۋعا شىقتى، ٴبىراق ٴبىز ولاردى ويسىراتا جەڭدىك+.
8 ٴسۇيتىپ، جەرلەرىن باسىپ الىپ، ولاردى رۋبەن، عاد رۋىنا جانە ماناسا رۋىنىڭ جارتىسىنا يەلىككە بەردىك+.
9 ەندەشە وسى كەلىسىمنىڭ شارتتارىن ورىنداڭدار. سوندا نە ىستەسەڭدەر دە، تابىستى بولاسىڭدار+.
10 مىنە، بۇگىن سەندەر ەحوبا قۇدايلارىڭنىڭ الدىندا تۇرسىڭدار. رۋباسىلارىڭ، اقساقالدارىڭ، باسشىلارىڭ، يسرايلدىڭ كۇللى ەر كىسىلەرى،
11 بالالارىڭ مەن ايەلدەرىڭ+، سونداي-اق قوستارىڭداعى جاتجەرلىكتەر+، وتىن جيناۋشىلارىنان باستاپ سۋ تاسيتىندارىنا دەيىن — ٴبارىڭ جينالىپ،
12 ەحوبا قۇدايلارىڭمەن كەلىسىم جاساسىپ، ونى انتپەن بەكىتۋ ٷشىن تۇرسىڭدار. ەحوبا قۇدايلارىڭ بۇل كەلىسىمدى بۇگىن بەكىتىپ+،
13 سەندەردى ٶزىنىڭ حالقى ەتپەك+، ال ٶزى سەندەردىڭ قۇدايلارىڭ بولماق+. مۇنى ول سەندەرگە جانە اتا-بابالارىڭ ىبىرايىمعا+، ىسقاق+ پەن جاقىپقا+ ۋادە ەتىپ ەدى.
14 انتپەن بەكىتىلەتىن بۇل كەلىسىمدى مەن سەندەرمەن عانا ەمەس،
15 بىزبەن بىرگە وسى جەردە، ەحوبا قۇدايىمىزدىڭ الدىندا، تۇرعاندارمەن جانە كەلەشەك ۇرپاقتارمەن دە جاساسامىن.
16 (مىسىردا قالاي ٶمىر سۇرگەنىمىزدى، جول-جونەكەي ٴتۇرلى حالىقتاردىڭ اراسىنان قالاي وتكەنىمىزدى جاقسى بىلەسىڭدەر عوي+.
17 سەندەر ولاردىڭ جەكسۇرىن نارسەلەرىن، سونداي-اق اعاشتان، تاستان، التىن-كۇمىستەن جاسالعان جەركەنىشتى پۇتتارىن+ كوردىڭدەر.)
18 اباي بولىڭدار، ارالارىڭدا ەحوبا قۇدايىمىزدان تەرىس اينالىپ، سول حالىقتاردىڭ تاڭىرلەرىنە قۇلشىلىق ەتەتىن ەشبىر ەركەك، ايەل، اۋلەت نە رۋ بولماسىن+. مۇندايلار ۋلى جانە جۋسانداي اشتى ٴشوپتىڭ تامىرىنا ۇقسايدى+.
19 ەگەر الدەبىرەۋ وسى انتتىڭ سوزدەرىن ەستىپ، ىشتەي: «جۇرەگىمنىڭ قالاۋىمەن جۇرسەم دە، ٴبارى جاقسى بولادى»،— دەپ ماقتانىپ، جولىنداعىنىڭ ٴبارىن جايپاپ سالسا،
20 ەحوبا ونداي ادامدى كەشىرمەيدى+. قايتا، ەحوبا وعان اشۋلانىپ، قاھارىن توگەدى، سوندا وسى كىتاپتا جازىلعان قارعىستىڭ ٴبارى باسىنا كەلەدى+. ەحوبا جەر بەتىنەن ونىڭ ەسىمىن وشىرەدى.
21 يسرايلدىڭ بارلىق رۋىنىڭ ىشىنەن ەحوبا ونى ٴبولىپ الىپ، وسى زاڭ كىتابىندا جازىلعان كەلىسىمدە ەسكەرتىلگەن قارعىستارعا ساي، اپاتقا ۇشىراتادى.
22 كەلەر ۇرپاقتارىڭ جانە الىستان كەلگەن جاتجەرلىكتەر ەحوبانىڭ سول جەرگە قانداي اپاتتار مەن قارعىستار جىبەرگەنىن كورگەندە،
23 كەزىندە ەحوبا اشۋى مەن قاھارىن توگىپ، قۇرتىپ جىبەرگەن سودوم مەن عومورا+، ادما مەن زەبويمنىڭ+ جەرىندەي، سول جەردىڭ دە كۇكىرت، سور مەن وتتىڭ كەسىرىنەن ەگىن ەگۋگە جارامسىز بولىپ، ەشتەڭە كوكتەپ شىقپاي قالعانىن كورگەندە،
24 ولار دا، باسقا حالىقتار دا: «ەحوبا بۇل ەلگە نەلىكتەن وسىلاي ىستەدى+؟ نە ٷشىن سونشاما قاھارىن توكتى؟»— دەپ سۇرايدى.
25 سوندا ولاردىڭ ەستيتىن جاۋابى مىناۋ بولماق: «ويتكەنى ولار اتا-بابالارىنىڭ قۇدايى ەحوبانىڭ مىسىردان الىپ شىققان كەزدە وزدەرىمەن جاساسقان كەلىسىمىنىڭ شارتتارىن ورىنداماي قويدى+.
26 ٴسۇيتىپ، وزدەرى تانىمايتىن جانە تابىنۋعا تيىم سالىنعان باسقا تاڭىرلەرگە باس ٴيىپ، قۇلشىلىق ەتىپ كەتتى+.
27 سوندا بۇل ەلگە ەحوبانىڭ اشۋ-ىزاسى كەلىپ، وسى كىتاپتا جازىلعان قارعىستىڭ ٴبارىن باسىنا كەلتىردى+.
28 نارازى بولىپ، قاتتى اشۋلانعان جانە قاھارىنا مىنگەن ەحوبا ولاردى بۇل جەردەن تۇپتامىرىمەن جۇلىپ الىپ+، بوتەن جەرگە، ياعني قازىر تۇرىپ جاتقان جەرگە، تاستادى+».
29 جاسىرىن نارسەلەر ەحوبا قۇدايىمىزعا+، ال اشىلعاندارى بىزگە جانە ۇرپاقتارىمىزعا ماڭگىلىك تيەسىلى. سوندىقتان دا ٴبىز وسى زاڭنىڭ سوزدەرىن ورىنداۋىمىز كەرەك+.
سىلتەمەلەر
^ سوزبە-ٴسوز «جۇرەك».
