نەحەميا 13:1—31
13 سول كۇنى جۇرت الدىندا مۇسانىڭ كىتابى داۋىستاپ وقىلىپ+، ودان ەشبىر امموندىق نە موابتىق+ ادام قۇداي قاۋىمىنىڭ قاتارىنا قوسىلا المايدى دەپ جازىلعانى بەلگىلى بولدى+.
2 ويتكەنى ولار كەزىندە يسرايلدىكتەردى نانمەن جانە سۋمەن قارسى المادى. قايتا، ولارعا قارعىس ايتقىزۋ ٷشىن بالاعامدى جالدادى+. ٴبىراق قۇدايىمىز ونىڭ قارعىسىن باتاعا اينالدىرعان ەدى+.
3 زاڭدا جازىلعاندى ەستي سالىسىمەن، ولار جاتجەرلىكتەردى ٶز ارالارىنان ٴبولىپ شىعارا باستادى+.
4 مۇنىڭ الدىندا قۇدايىمىزدىڭ ۇيىندەگى قويما بولمەلەرگە+ جاۋاپتى ٴدىني قىزمەتكەر ەلياسىپ+ بولاتىن، ول توبيانىڭ+ تۋىسى ەدى.
5 ەلياسىپ توبياعا ٴبىر ۇلكەن بولمەنى پايدالانۋعا بەرىپ قويعان ەكەن. بۇرىن وندا استىق تارتۋى، لادان، بۇيىمدار، سونداي-اق استىقتىڭ، جاڭا شاراپ پەن مايدىڭ+ وننان ٴبىر بولىگى — ياعني لەۋىلىكتەرگە+، انشىلەر مەن قاقپا كۇزەتشىلەرىنە تيەسىلى بولىك — سونىمەن قاتار ٴدىني قىزمەتكەرلەرگە ارنالعان تارتۋلار ساقتالاتىن+.
6 بۇل ۋاقىتتا مەن يەرۋساليمدە ەمەس ەدىم. ويتكەنى بابىلعا پاتشا بولعان ارتاكسەركستىڭ+ بيلىك قۇرۋىنىڭ وتىز ەكىنشى جىلى+ پاتشانىڭ قاسىنا قايتىپ كەتكەن بولاتىنمىن. ٴبىراز ۋاقىت وتكەننەن كەيىن پاتشادان سۇرانىپ،
7 يەرۋساليمگە كەلدىم. سوندا ەلياسىپتىڭ+ توبياعا+ قۇداي ٷيىنىڭ اۋلاسىنان ٴبىر بولمە بەرىپ، سوراقى ٸس جاساعانى جايلى ٴبىلدىم.
8 ونىڭ بۇل ىسىنە قاتتى نارازى بولدىم. ٴسۇيتىپ، بولمەدەن توبيانىڭ بار مۇلكىن سىرتقا لاقتىرىپ تاستادىم.
9 سوسىن بۇيرىق بەرىپ، قويما بولمەلەردى تازالاتتىم دا، قۇداي ٷيىنىڭ بۇيىمدارىن+، استىق تارتۋى مەن لاداندى+ قايتادان كىرگىزىپ قويدىم.
10 سونداي-اق لەۋىلىكتەرگە تيەسىلى ۇلەس+ بەرىلمەي جاتىر ەكەن+، سوندىقتان ولار دا، انشىلەر دە قىزمەتتەرىن تاستاپ، ٴارقايسىسى ٶز ەگىستىكتەرىنە كەتىپ قالىپتى+.
11 مەن باسقارۋشىلاردى+: «قۇدايدىڭ ٷيىن نەگە قاراۋسىز قالدىردىڭدار؟»+— دەپ سوكتىم. سودان لەۋىلىكتەردى جيناپ الىپ، ٶز مىندەتتەرىن اتقارۋعا قايتادان قويدىم.
12 كۇللى ياھۋدا حالقى استىقتىڭ، جاڭا شاراپ پەن مايدىڭ وننان ٴبىر بولىگىن+ قويمالارعا اكەلە باستادى+.
13 مەن ٴدىني قىزمەتكەر شەلەمياحتى، كوشىرمەشى سادىقتى، لەۋىلىك پەداياحتى قويمالارعا جاۋاپتى ەتىپ تاعايىندادىم. ال ماتانياحتىڭ نەمەرەسى، زاكۋردىڭ ۇلى حاناندى ولارعا كومەكشى ەتىپ بەردىم. ويتكەنى بۇلار سەنىمدى كىسىلەر ەدى. اعايىندارىنا تيەسىلى بولىكتى ۇلەستىرۋ وسىلاردىڭ جاۋاپكەرشىلىگىندە بولدى.
14 ۋا، قۇدايىم، وسى ىستەگەنىمدى ەسىڭە الا كور+! قۇدايىمنىڭ ٷيى ٷشىن جانە ونداعى قىزمەت* ٷشىن اينىماس سۇيىسپەنشىلىكپەن جاساعان ٸسىمدى ۇمىتا كورمە+!
15 سول كۇندەرى مەن ياھۋدادا جۇرتتىڭ دەمالىس كۇنى ٴجۇزىم سىققانىن+، سونداي-اق ەسەكتەرىنە استىق، شاراپ، ٴجۇزىم، ٸنجىر جانە باسقا دا ٵرتۇرلى جۇك ارتىپ، يەرۋساليمگە اكەلىپ جاتقانىن بايقادىم+. مەن ولارعا بۇل كۇنى ەشتەڭە ساتپاڭدار دەپ ەسكەرتتىم*.
16 سونىمەن قاتار يەرۋساليمدە تۇرىپ جاتقان تيرلىكتەر قالاعا بالىق پەن ٵرتۇرلى زاتتار اكەلىپ، دەمالىس كۇنى ياھۋديلەرگە ساتىپ ٴجۇردى+.
17 سوندا ياھۋدانىڭ بەدەلدى ادامدارىن سوگىپ، بىلاي دەدىم: «دەمالىس كۇنىن ارامداپ، مۇنداي سوراقى ىسكە قالاي باردىڭدار؟
18 اتا-بابالارىڭ دا وسىلاي ىستەگەندىكتەن، قۇدايىمىز ٴبىزدىڭ باسىمىزعا جانە مىنا قالاعا وسى اپاتتاردىڭ ٴبارىن جىبەردى ەمەس پە؟ ال ەندى سەندەر دەمالىس كۇنىن ارامداپ+، ونىڭ يسرايلگە دەگەن قاھارىن ٶرشىتىپ جاتىرسىڭدار».
19 سوندىقتان دەمالىس كۇنىنىڭ الدىندا يەرۋساليم قاقپالارىنا كەشكى كولەڭكە تۇسە باستاعاندا، ەسىكتەردى جاۋىپ، دەمالىس كۇنى بىتپەيىنشە، ولاردى اشپاۋدى بۇيىردىم. سول كۇنى ەشكىم ەشقانداي جۇك الىپ كىرمەس ٷشىن، ٶز قىزمەتشىلەرىمنىڭ كەيبىرىن قاقپالاردىڭ اۋزىنا قويدىم.
20 سودان ساۋداگەرلەر جانە ٵرتۇرلى زات ساتۋشىلار يەرۋساليمنىڭ سىرتىندا ٴبىر-ەكى رەت تۇنەپ شىقتى.
21 مەن ولارعا: «نەگە قالا قابىرعاسىنىڭ الدىندا تۇنەپ جۇرسىڭدەر؟ ەگەر تاعى وسىلاي ىستەسەڭدەر، كۇش قولدانامىن»،— دەپ ەسكەرتتىم. سول ۋاقىتتان باستاپ ولار دەمالىس كۇنى كەلمەيتىن بولدى.
22 سوسىن مەن لەۋىلىكتەرگە دەمالىس كۇنىن قاسيەتتى تۇتۋ ٷشىن+، وزدەرىن ۇنەمى تازارتىپ تۇرۋدى جانە قاقپالارعا بارىپ، ولاردى كۇزەتۋدى تاپسىردىم. ۋا، قۇدايىم، مەنىڭ بۇل ٸسىمدى دە ەسىڭە الا كور! اينىماس سۇيىسپەنشىلىگىڭ مول بولعاندىقتان، ماعان راقىم ەتە كور+!
23 سول كۇندەرى ياھۋديلەردىڭ اراسىندا ازوتتىق+، امموندىق جانە موابتىق+ ايەلدەرگە ۇيلەنگەندەرى بار ەكەنىن دە ٴبىلدىم+.
24 بالالارىنىڭ جارتىسى ازوتتىقتاردىڭ تىلىندە، ال جارتىسى باسقا حالىقتاردىڭ تىلىندە سويلەپ ٴجۇر ەكەن. ٴبىراق ەشقايسىسى ياھۋدي ٴتىلىن بىلمەيدى ەكەن. ولار تەك باسقا حالىقتاردىڭ تىلىندە سويلەپ ٴجۇر ەكەن.
25 سوندىقتان ولاردى سوگىپ، قۇدايدىڭ قارعىسىن ەستەرىنە ٴتۇسىردىم. كەيبىرەۋلەرىن ۇرىپ+، شاشتارىن جۇلىپ، قۇدايدىڭ الدىندا انت بەرگىزىپ، بىلاي دەدىم: «قىزدارىڭدى ولاردىڭ ۇلدارىنا ۇزاتپاڭدار! ۇلدارىڭ دا، وزدەرىڭ دە ولاردىڭ قىزدارىنا ۇيلەنۋشى بولماڭدار+!
26 يسرايلدىڭ پاتشاسى سۇلەيمەن وسىنداي ٸسىنىڭ كەسىرىنەن كۇناعا باتتى ەمەس پە؟! وزگە حالىقتاردىڭ اراسىندا ول سياقتى پاتشا بولعان ەمەس+. قۇداي ونى جاقسى كورىپ+، بۇكىل يسرايلدىڭ ۇستىنەن پاتشا ەتىپ تاعايىنداعان بولاتىن. الايدا جاتجەرلىك ايەلدەر ٴتىپتى ونىڭ ٶزىن كۇنا جاساۋعا ەلىكتىردى+.
27 ەندى سەندەر جاتجەرلىك ايەلدەرگە ۇيلەنىپ، قۇدايىمىزعا وپاسىزدىق جاساپ جاتىرسىڭدار. بۇلارىڭ بارىپ تۇرعان سوراقىلىق قوي+؟!»
28 ٴتىپتى باس ٴدىني قىزمەتكەر ەلياسىپتىڭ+ ۇلى جويادانىڭ+ ٴبىر بالاسى حوروندىق سانبالاتتىڭ+ كۇيەۋبالاسى ەكەن. سوندىقتان مەن ونى قاسىمنان قۋىپ جىبەردىم.
29 ۋا، قۇدايىم، ولاردىڭ ٴدىني قىزمەتتى دە، ٴدىني قىزمەتكەرلەرمەن جانە لەۋىلىكتەرمەن جاساعان كەلىسىمدى+ دە ارامداعانىن ەسىڭنەن شىعارا كورمە.
30 ٴسۇيتىپ، مەن حالىقتى جاتجەرلىكتەردىڭ ارام ىقپالىنان تازارتىپ، ٴدىني قىزمەتكەرلەر مەن لەۋىلىكتەرگە مىندەتتەر جۇكتەپ، ٴارقايسىسىن ٶز قىزمەتىنە قايتاردىم+.
31 سونداي-اق ٶز ۋاقىتىندا وتىن مەن العاشقى ٶنىم اكەلىنىپ تۇرۋ ٷشىن+، شارالار جاسادىم.
ۋا، قۇدايىم، مەنى ەسىڭە الىپ، جاقسىلىق جاساي كور+!
سىلتەمەلەر
^ نەمەسە «كۇزەتشىلىك».
^ مۇمكىن: «مەن ولارعا ەشتەڭە ساتپاڭدار دەپ سول كۇنى ەسكەرتتىم».