نەحەميا 8:1—18
8 سودان كۇللى جۇرت سۋ قاقپاسىنىڭ+ الدىنداعى الاڭعا ٴبىر كىسىدەي جينالىپ، كوشىرمەشى ەزرادان+ مۇسا زاڭى جازىلعان كىتاپتى+، ەحوبانىڭ يسرايلگە بەرگەن زاڭدارىن+، اكەلۋىن سۇرادى.
2 ٴدىني قىزمەتكەر ەزرا جينالعان ەرلەر مەن ايەلدەردىڭ جانە تىڭداپ، تۇسىنە الاتىن بالالاردىڭ الدىنا زاڭ كىتابىن الىپ شىقتى+. بۇل جەتىنشى ايدىڭ ٴبىرىنشى كۇنى بولاتىن+.
3 سۋ قاقپاسىنىڭ الدىنداعى الاڭدا ەزرا زاڭ كىتابىن كۇن شىققاننان تال تۇسكە دەيىن ەركەكتەر مەن ايەلدەرگە جانە تۇسىنە الاتىن بالالارعا وقىدى+. جۇرت وقىلعاندى مۇقيات تىڭدادى+.
4 كوشىرمەشى ەزرا ارنايى جاسالعان اعاش مىنبەنىڭ ۇستىندە تۇردى. ونىڭ وڭ جاعىندا ماتەتياح، شەما، اناياح، ۇريا، حەلكيا جانە ماعاسەياح تۇرسا، سول جاعىندا پەداياح، ميشاەل، مالحياح+، حاشۋم، حاشبادان، زاكاريا جانە مەشۋلام تۇردى.
5 ەزرا جوعارى تۇرعاندىقتان، جۇرت ونىڭ كىتاپتى اشقانىن كوردى. ول كىتاپتى اشقاندا، ٴبارى ورىندارىنان تۇردى.
6 ەزرا شىنايى ٵرى ۇلى قۇداي ەحوبانى ماداقتادى، سوندا كۇللى جۇرت قولدارىن كوككە جايىپ: «اۋمين! اۋمين!»— دەستى+. سوسىن ولار جەرگە باس ۇرىپ، ەحوباعا تاعزىم ەتتى.
7 ەشۋا، باني، شەرەبياح+، يامين، اقۇپ، شابەتاي، حودياح، ماعاسەياح، كەليتا، احارياح، جوزاباد+، حانان، پەلاياح دەگەن لەۋىلىكتەر سول جەردە تۇرعان حالىققا زاڭدى ٴتۇسىندىردى+.
8 ولار قۇداي زاڭى جازىلعان كىتاپتى داۋىستاپ وقىپ، انىق ەتىپ ٴتۇسىندىرىپ، ٴمانىن اشىپ بەرىپ تۇردى. وسىلاي ادامدارعا وقىلىپ جاتقان سوزدەردى ۇعىنۋعا كومەكتەستى+.
9 سول ۋاقىتتا ٵمىرشى بولعان نەحەميا، ٴدىني قىزمەتكەر ٵرى كوشىرمەشى ەزرا+ جانە حالىقتى ۇيرەتىپ جاتقان لەۋىلىكتەر جينالعان جۇرتقا: «بۇل — ەحوبا قۇدايلارىڭا ارنالعان قاسيەتتى كۇن+. قايعىرىپ، جىلاماڭدار»،— دەدى. ويتكەنى ولار زاڭنىڭ سوزدەرىن ەستىپ، جىلاپ تۇرعان ەدى.
10 ول حالىققا بىلاي دەدى: «بارىڭدار دا، ەڭ جاقسى* تاعامدار جەپ، ٴتاتتى سۋسىندار ىشىڭدەر. ەشتەڭە دايىنداماعان ادامدارعا اس-اۋقاتتارىڭنان بەرىڭدەر+. بۇل — يەمىزگە ارنالعان قاسيەتتى كۇن. قايعىرماڭدار، ەحوبا سيلايتىن قۋانىش — سەندەر ٷشىن بەرىك قورعان*».
11 لەۋىلىكتەر دە جۇرتتى تىنىشتاندىرىپ: «قويىڭدار، جىلاماڭدار! ويتكەنى بۇل — قاسيەتتى كۇن»،— دەدى.
12 سودان ٴبارى تاراپ كەتتى. ولار ٸشىپ-جەپ، اس-اۋقاتتارىمەن ٴبولىسىپ، زور قۋانىشقا بولەندى+. سەبەبى وزدەرىنە ايتىلعان سوزدەردىڭ ٴمانىن تۇسىنگەن ەدى+.
13 ەكىنشى كۇنى حالىقتىڭ اۋلەتباسىلارى، ٴدىني قىزمەتكەرلەر مەن لەۋىلىكتەر زاڭدا جازىلعان سوزدەردى تەرەڭىرەك ٴتۇسىنۋ ٷشىن، كوشىرمەشى ەزرانىڭ قاسىنا جينالدى.
14 سوندا ولار ەحوبانىڭ مۇسا ارقىلى بەرگەن زاڭىنان جەتىنشى ايدا وتكىزىلەتىن مەيرام كەزىندە يسرايلدىكتەردىڭ كۇركەلەردە* تۇرۋ كەرەكتىگىن ٴبىلدى+.
15 سونداي-اق بارلىق قالالارىندا جانە كۇللى يەرۋساليمدە: «زاڭدا جازىلعانعا ساي، كۇركەلەر جاساۋ ٷشىن، تاۋلى وڭىرگە بارىپ، ٴزايتۇن، سامىرسىن، ميرتا مەن پالما اعاشتارىنىڭ جانە باسقا دا اعاشتاردىڭ جاپىراقتى بۇتاقتارىن اكەلىڭدەر»،— دەپ جاريالانۋ كەرەكتىگىن ٴبىلدى+.
16 ٴسۇيتىپ، جۇرت بارىپ، ٶز ۇيلەرىنىڭ توبەسىنە، اۋلالارىنا، قۇداي ٷيىنىڭ اۋلالارىنا+ جانە سۋ قاقپاسى+ مەن ەفرەم قاقپاسىنىڭ+ الدىنداعى الاڭعا كۇركەلەر جاساۋ ٷشىن، بۇتاقتار الىپ كەلدى.
17 وسىلاي تۇتقىننان ورالعان بۇكىل قاۋىم كۇركەلەر جاساپ، سولاردا تۇردى. نۇن ۇلى ەشۋانىڭ+ كۇنىنەن بەرى يسرايلدىكتەر زور قۋانىشقا بولەنىپ، مەيرامدى وسىلاي تويلاماعان ەدى+.
18 مەيرامنىڭ العاشقى كۇنىنەن سوڭىنا دەيىن، قۇداي زاڭى جازىلعان كىتاپ كۇن سايىن وقىلىپ تۇردى+. ولار مەيرامدى جەتى كۇن تويلاپ، سەگىزىنشى كۇنى، ەرەجەگە ساي، سالتاناتتى جيىن وتكىزدى+.
سىلتەمەلەر
^ سوزبە-ٴسوز «مايلى».
^ نەمەسە «سەندەردى نىعايتادى».
^ نەمەسە «ۋاقىتشا باسپانالاردا».
