ٵيۇپ 29:1—25
29 ٵيۇپ ٴسوزىن جالعاپ بىلاي دەدى:
2 «شىركىن، وتكەن ايلار قايتا اينالىپ كەلسە عوي!
ول كەزدە قۇداي ماعان كوز قىرىن سالىپ ٴجۇرۋشى ەدى.
3 توبەمنەن شىراعىنىڭ جارىعى ٴتۇسىپ تۇراتىن،نۇرىنىڭ ارقاسىندا تۇنەكتە دە جۇرە بەرەتىنمىن+.
4 بۇل مەنىڭ ٶمىرىمنىڭ ەڭ جارقىن كەزدەرى ەدى،قۇداي جاقىن دوسىم رەتىندە شاتىرىمدا بولۋشى ەدى+.
5 بۇل قۇدىرەت يەسى* مەنەن باس تارتپاعان،بالالارىم دا كوز الدىمدا جۇرگەن كەز بولاتىن.
6 اياعىمدى قايماققا جۋاتىنمىن،مەن ٷشىن جارتاستاردان ٴزايتۇن مايى اعىپ تۇراتىن+.
7 شىركىن، قالا قاقپاسىنىڭ الدىنا شىعىپ+،الاڭداعى ورنىمدا وتىراتىن كەزدەردى ايتساڭشى+!
8 مەنى كورگەندە، جاستار جول بەرەتىن،ٴتىپتى قارتتار دا ورىندارىنان تۇرەگەلىپ تۇراتىن+.
9 بەكزادالار سوزدەرىن تىيىپ،الاقاندارىمەن اۋىزدارىن جاباتىن.
10 بەدەلدى كىسىلەردىڭ ٷنى شىقپاي،تىلدەرى تاڭدايلارىنا جابىسىپ قالاتىن.
11 ٴسوزىم قۇلاعىنا جەتكەندەر جىلى لەبىزىن بىلدىرەتىن،ٶزىمدى كوزىمەن كورگەندەر قولپاشتاپ سويلەيتىن.
12 ويتكەنى مەن كومەككە ٴزارۋ جارلىنى،جەتىم مەن قامقورشىسى جوق بەيشارانى قورعايتىنمىن+.
13 پالەدەن امان قالعان ادام ماعان باتاسىن بەرەتىن+؛مەن جەسىردى دە قۋانىشقا بولەيتىنمىن+.
14 ادىلدىكتى كيىم قىلدىم،ادىلەتتىكتى ۇستىمە شاپان، باسىما شالما ەتىپ كيدىم.
15 زاعيپقا كوز،اقساققا اياق بولدىم.
16 جارلى-جاقىبايعا اكە بولدىم+.
بەيتانىس ادامداردىڭ ٸسىن قاراپ، تورەلىك ەتتىم+.
17 قىلمىسكەردىڭ جاعىن سىندىرىپ+،جەمتىگىن اۋزىنان جۇلىپ الاتىنمىن.
18 وزىمە بىلاي دەيتىنمىن: «مەن ۇزاق جاساپ*،ٶز ۇيىمدە ولەمىن+.
19 تەرەڭدەگى سۋلارعا دەيىن تامىر جايامىن،بۇتاقتارىمدا ٴتۇنى بويى شىق تۇرادى.
20 اتاق-داڭقىم ەش وشپەيدى،قولىمداعى ساداعىم دا ۇزدىكسىز اتا بەرەدى».
21 جۇرت مەنى دەن قويىپ تىڭداپ،كەڭەس بەرگەنىمشە ٷنسىز كۇتەتىن+.
22 مەنىڭ سوزىمنەن كەيىن ەشكىمنىڭ الىپ-قوسارى بولمايتىن،ويتكەنى ايتقاندارىم قۇلاقتارىنا مايداي جاعاتىن.
23 ولار مەنى جاڭبىردى كۇتكەندەي كۇتەتىن،سوزدەرىمدى كوكتەمگى جاۋىننىڭ سۋىنداي سىمىرەتىن+.
24 كۇلىمسىرەي قاراسام، ٶز كوزدەرىنە وزدەرى سەنبەيتىن،جۇزىمدەگى نۇر ولارعا سەنىمدىلىك بەرەتىن*.
25 باسشىلارى سياقتى، جۇرتقا جول كورسەتتىم؛مەن جاساقتارىنىڭ اراسىنداعى پاتشاداي ٶمىر ٴسۇردىم+،قايعىرعاندارعا جۇبانىش بەرەتىن ادام ىسپەتتى بولدىم+.
سىلتەمەلەر
^ نەمەسە «قۇدىرەتى شەكسىز قۇداي».
^ نەمەسە «كۇندەرىم قۇم قيىرشىقتارىنداي كوپ بولادى».
^ مۇمكىن: «ولار جۇزىمدەگى نۇردى كومەسكىلەمەيتىن».
