ٵيۇپ 41:1—34
-
قۇدايدىڭ زور لەۆيافاندى سۋرەتتەۋى (1—34)
41 لەۆيافاندى*+ قارماقپەن ۇستاپ،ٴتىلىن جىپپەن بايلاپ قويا الاسىڭ با؟
2 تاناۋىنان ٴجىپ وتكىزىپ،جاعىن قارماقپەن تەسە الاسىڭ با؟
3 ول ساعان جالىنىپ-جالبارىنا ما؟
الدە جۇمساق سويلەسە مە؟
4 ماڭگىلىك قۇلىڭ بولۋ ٷشىنسەنىمەن كەلىسىم جاساسا ما؟
5 ونىمەن قۇسپەن ويناعانداي وينايسىڭ با؟
قىزدارىڭنىڭ كوڭىلىن اۋلاۋ ٷشىن بايلاپ بەرەسىڭ بە؟
6 جۇرت ونى بىردەڭەگە ايىرباستاي ما؟
ساۋداگەرلەردىڭ بولىسىنە سالا ما؟
7 تەرىسىن گارپۋنمەن*+،باسىن بالىقشىنىڭ نايزاسىمەن اتقىلاپ تاستاي الاسىڭ با؟
8 كانە، وعان قولىڭدى تيگىزشى،كۇرەسكەنىڭدى ەش ۇمىتپايسىڭ، ەندى قايتىپ قايتالامايسىڭ دا!
9 ونى باعىندىرامىن دەگەن ويدىڭ ٶزى بوس اۋرە،تۇرىنەن-اق زارەڭ قالماي قورقاسىڭ.
10 ونىڭ مازاسىن الۋعا ەشكىمنىڭ ٴداتى بارمايدى.
ەندەشە مەنىڭ الدىمدا كىم تۇرا الادى+؟
11 مەن قايتارىپ بەرەتىندەي، كىم ماعان الدىمەن بىردەڭە بەرگەن ەدى+؟
اسپان استىنداعىنىڭ ٴبارى دە مەنىكى+.
12 لەۆيافاننىڭ اياقتارى،ەرەن كۇشى مەن دەنە ٴبىتىمى جونىندە دە ايتايىن.
13 ونىڭ سىرت كيىمىن سىپىرىپ الۋ كىمنىڭ قولىنان كەلەدى؟
اشىق تۇرعان ارانىنا كىم ەنە الادى؟
14 ونىڭ اپانداي ارانىن اشقان ادام بار ما؟
قاز-قاتار تىستەرى ۇرەيىڭدى ۇشىرادى.
15 ارقاسى مۇيىزشە قالقاندارمەن قاپتالعان*،ولار ٶزارا تىعىز بىرىكتىرىلگەن.
16 تىعىز ورنالاسقانى سونشا —ارالارىنان ٴتىپتى اۋا دا وتپەيدى.
17 ولار ٴبىر-بىرىنە بەرىك بەكىتىلگەن،ٶزارا قاپسىرا جاپسىرىلىپ، ەش اجىرامايدى.
18 ول پىسقىرعاندا، جالىن شاشادى،كوزى تاڭ شاپاعىنداي ۇشقىن اتادى.
19 ارانىنان نايزاعاي جارقىلدايدى،وت ۇشقىنى شاشىرايدى.
20 قامىس ورتەگەن پەشتەن شىققانداي،تاناۋىنان ٴتۇتىن بۇرقىرايدى.
21 دەمىنەن كومىر تۇتانادى،اۋزىنان جالىنداپ وت شىعادى.
22 موينىنىڭ كۇشى عالامات زور،وزىنە تاپ بولعانداردىڭ زارەسىن ۇشىرادى.
23 دەنەسىنىڭ قاتپارلارى بىتە جابىسقان،تەمىردەن بالقىتىپ قۇيعانداي قاتتى ٵرى جىلجىمايدى.
24 جۇرەگى ٴزىل قارا تاستاي،ٴيا، ديىرمەننىڭ استىڭعى تاسىنداي قاتتى.
25 ول تۇرەگەلگەندە، مىقتىلاردى دا ۇرەي بيلەيدى،ايبارلى قيمىلىنان ەستەرى كەتىپ، كەرى شەگىنشەكتەيدى.
26 وعان سەمسەر دە وتپەيدى،ونى نايزا، سۇڭگى، ساداق تا المايدى+.
27 ول تەمىردى سابان قۇرلى،مىستى شىرىگەن اعاش قۇرلى كورمەيدى.
28 اتىلعان جەبەدەن قاشپايدى،ساقپان تاستارىن قاۋىزداي كورەدى.
29 سويىل وعان سابانمەن بىردەي،ىسقىرا ۇشقان سۇڭگىگە كۇلە قارايدى.
30 باۋىرىنداعى قابىرشاقتار كوزە سىنىقتارىنداي وتكىر،ول استىق باستىراتىن اعاشتاي، بالشىقتا كوسىلىپ جاتادى+.
31 تۇڭعيىقتى قازانداي قايناتادى،تەڭىزدى ماي قايناپ جاتقان قازانداي بۇرقىلداتادى.
32 جۇزگەندە ارتىنان جالتىراعان ٸز قالدىرادى،مۇنى كورگەندەر تۇڭعيىقتىڭ اق شاشى بار ەكەن دەپ قالادى.
33 جەر بەتىندە ول سياقتى حايۋان جوق،ول قورقۋ دەگەندى بىلمەيدى.
34 كەز كەلگەن تاكاپپار حايۋانعا تايسالماي قارايدى،ول — كۇللى جابايى اڭداردىڭ پاتشاسى!»
سىلتەمەلەر
^ قولتىراۋىن تۋرالى ايتىلىپ تۇرسا كەرەك.
^ نايزاعا ۇقساس قۇرال، ال ۇشىندا قارماقتىكىندەي ىلمەگى بولسا كەرەك.
^ مۇمكىن: «ونىڭ ماقتانىشى — مۇيىزشە قالقاندارى».
