پاتشالار 1-جازبا 1:1—53
1 ٴداۋىت پاتشا جاسى ۇلعايىپ+، قارتايعان شاعىندا ۇستىنە قانشا كورپە جاپسا دا، دەنەسى جىلىمايتىن بولدى.
2 سوندا قىزمەتشىلەرى وعان: «پاتشامىزعا قىزمەت كورسەتىپ، كۇتىم جاسايتىن ٴبىر پاك قىز تاۋىپ اكەلىنسىن. ول تاقسىر يەمىزدىڭ قاسىنا جاتىپ، بويىن جىلىتسىن»،— دەدى.
3 سودان ولار كۇللى يسرايل ەلىنەن سۇلۋ قىز ىزدەپ، اقىرى ٵبيشا+ دەگەن ٴبىر شۋنەمدىك+ قىزدى تاۋىپ، پاتشاعا اكەلدى.
4 ٵبيشا ەرەكشە سۇلۋ قىز ەكەن. ول پاتشاعا كۇتىم جاساپ، قىزمەت كورسەتتى، ٴبىراق پاتشا ونىمەن جاقىنداسپادى.
5 سول كەزدەرى ٴداۋىتتىڭ حاگيتتەن تۋعان بالاسى ادونياح+: «ەندى مەن پاتشا بولامىن!»— دەپ اسقاقتاپ ٴجۇردى. ول وزىنە اربا جاساتىپ، قاسىنا سالت اتتىلار جينادى، الدىندا جۇگىرىپ جۇرەتىن 50 ادامى دا بولدى+.
6 ٴبىراق اكەسى ونى: «سەن نەگە بۇلاي ىستەيسىڭ؟»— دەپ، ەشقاشان جازعىرعان ەمەس*. ادونياح وتە كەلبەتتى جىگىت بولاتىن. اناسى ونى ابەسسالومنان كەيىن تۋعان ەدى.
7 ادونياح سارۇيانىڭ ۇلى جوعابپەن جانە ٴدىني قىزمەتكەر ابياتارمەن+ ٴسوز بايلاستى. ٴسۇيتىپ، ەكەۋى سونىڭ جاعىنا شىعىپ، وعان قولداۋ كورسەتتى+.
8 ال ٴدىني قىزمەتكەر سادىق+، ەحوداي ۇلى بەناياح+، ناتان پايعامبار+، شيمەي+، رەي جانە ٴداۋىتتىڭ باتىر ساربازدارى+ ادونياحتى قولدامادى.
9 بىردە ادونياح ەن-روگەلدىڭ ماڭىنداعى زوحەلەت تاسىنىڭ تۇسىندا قۇرباندىققا قوي، ٸرى قارا مەن بورداقىلانعان مال شالماق بولىپ+، بارلىق باۋىرلارىن، پاتشا ۇلدارىن، سونداي-اق پاتشا قىزمەتىندەگى بارلىق ياھۋدالىقتاردى شاقىردى.
10 ال ناتان پايعامباردى، بەناياح پەن باتىر ساربازداردى جانە باۋىرى سۇلەيمەندى شاقىرمادى.
11 سوندا ناتان پايعامبار+ سۇلەيمەننىڭ اناسى بارسابياعا+ مىنانى ايتتى: «حاگيتتىڭ بالاسى ادونياح+ پاتشا بولعانىن ەستىدىڭ بە؟ ال يەمىز ٴداۋىت بۇدان بەيحابار.
12 ەندەشە، ٶزىڭنىڭ دە، ۇلىڭ سۇلەيمەننىڭ دە جانى امان قالۋ ٷشىن+، ساعان ٴبىر كەڭەس بەرەيىن.
13 ٴداۋىت پاتشاعا بارىپ: —پاتشا يەم، كۇڭىڭىزگە «وزىمنەن كەيىن سەنىڭ ۇلىڭ سۇلەيمەن پاتشا بولادى. مەنىڭ تاعىما وتىراتىن — سول!»+ دەپ انت ەتكەن ەدىڭىز عوي! وندا نەگە ادونياح پاتشا بولىپ الدى؟— دەپ ايت.
14 سەن پاتشامەن سويلەسىپ تۇرعاندا، مەن كەلىپ، ٴسوزىڭدى راستايمىن».
15 سودان بارسابيا پاتشا جاتقان بولمەگە كىردى. ابدەن قارتايعان پاتشاعا شۋنەمدىك ٵبيشا+ قىزمەت كورسەتىپ ٴجۇردى.
16 بارسابيا جەرگە دەيىن ٴيىلىپ تاعزىم ەتكەندە، پاتشا ودان: «قانداي ٶتىنىشىڭ بار؟»— دەپ سۇرادى.
17 ول: «تاقسىر، قۇدايىڭىز ەحوبانىڭ* اتىمەن كۇڭىڭىزگە انت ەتىپ، «وزىمنەن كەيىن سەنىڭ ۇلىڭ سۇلەيمەن پاتشا بولادى. مەنىڭ تاعىما وتىراتىن — سول!» دەگەن ەدىڭىز عوي+.
18 ٴبىراق ادونياح پاتشا بولىپ الدى، ال تاقسىر يەم بۇل تۋرالى بىلمەيدى دە+.
19 ول بۇقالار، بورداقىلانعان مال مەن قويلاردى قۇرباندىققا شالىپ، پاتشانىڭ بار ۇلدارىمەن قوسا، ٴدىني قىزمەتكەر ٵبياتار مەن قولباسشى جوعابتى شاقىرىپتى+. ال قىزمەتشىڭىز سۇلەيمەندى شاقىرمادى+.
20 پاتشا يەم، كۇللى يسرايل حالقى سىزگە كوز تىگىپ، وزىڭىزدەن كەيىن تاققا كىم وتىراتىنىن ايتقانىڭىزدى كۇتىپ وتىر.
21 مۇنى ايتپاساڭىز، تاقسىر يەم اتا-بابالارىنا قوسىلعاننان كەيىن، ٶزىمدى دە، ۇلىم سۇلەيمەندى دە جۇرت جاۋ سانايتىن بولادى».
22 بارسابيا ٵلى سويلەپ تۇرعاندا، ناتان پايعامبار كەلدى+.
23 سول زاماتتا پاتشاعا: «ناتان پايعامبار كەلدى!»— دەپ حابارلاندى. ول بولمەگە كىرىپ، جەرگە دەيىن ٴيىلىپ تاعزىم ەتتى دە،
24 بىلاي دەدى: «پاتشا اعزام، سەن «مەنەن كەيىن ادونياح پاتشا بولادى. مەنىڭ تاعىما وتىراتىن — سول!» دەگەن بە ەدىڭ+؟
25 ويتكەنى ول قۇرباندىققا بۇقا، بورداقىلانعان مال مەن قويدى كوپتەپ شالىپ+، پاتشانىڭ بار ۇلدارىن، قولباسىلار مەن ٴدىني قىزمەتكەر ٵبياتاردى شاقىرىپتى+. بارلىعى ونىمەن بىرگە ٸشىپ-جەپ، «ادونياح پاتشا مىڭ جاساسىن!» دەپ جاتىر.
26 ال مەندەي قىزمەتشىڭدى، ٴدىني قىزمەتكەر سادىق پەن ەحوداي ۇلى بەناياحتى+ جانە قىزمەتشىڭ سۇلەيمەندى شاقىرمادى.
27 بۇل پاتشا اعزامنىڭ قالاۋىمەن بولىپ جاتسا، وندا ونىڭ وزىنەن كەيىن تاققا كىمدى وتىرعىزاتىنىن قىزمەتشىسىنە ايتپاعانى ما؟»
28 سوندا ٴداۋىت پاتشا: «ماعان بارسابيانى شاقىرىڭدار»،— دەدى. ول قايتا كىرىپ، پاتشانىڭ الدىنا كەلىپ تۇردى.
29 ٴداۋىت وعان انت ەتىپ بىلاي دەدى: «مەنى بارلىق ازابىمنان قۇتقارعان* ٴتىرى قۇداي ەحوبانىڭ+ الدىندا شىن ايتامىن*،
30 ساعان يسرايل قۇدايى ەحوبانىڭ اتىمەن «وزىمنەن كەيىن سەنىڭ ۇلىڭ سۇلەيمەن پاتشا بولادى. مەنىڭ تاعىما وتىراتىن — سول!» دەپ انت بەرگەنىمدەي، ونى بۇگىن ٶز تاعىما وتىرعىزامىن!»
31 مۇنى ەستىگەندە، بارسابيا جەرگە دەيىن ٴيىلىپ تاعزىم ەتتى دە: «تاقسىر يەم ٴداۋىت ماڭگى جاساسىن!»— دەدى.
32 ٴداۋىت بولسا بىردەن: «ماعان ٴدىني قىزمەتكەر سادىقتى، ناتان پايعامبار مەن ەحوداي ۇلى+ بەناياحتى+ شاقىرىڭدار»،— دەدى. ولار الدىنا كەلگەندە،
33 پاتشا بىلاي دەپ تاپسىردى: «قاستارىڭا يەلەرىڭنىڭ قىزمەتشىلەرىن ەرتىپ الىڭدار دا، ۇلىم سۇلەيمەندى مەنىڭ قاشىرىما مىنگىزىپ+، گيحونعا+ قاراي تۇسىڭدەر.
34 ٴدىني قىزمەتكەر سادىق پەن ناتان پايعامبار سول جەردە وعان ماي جاعىپ+، يسرايلدىڭ پاتشاسى ەتىپ تاعايىنداسىن. سوسىن كەرنەي تارتىپ، «سۇلەيمەن پاتشا مىڭ جاساسىن!» دەپ جار سالىڭدار+.
35 بۇدان كەيىن ونىڭ سوڭىنان ەرىپ، قالاعا كەلىڭدەر. ول مەنىڭ تاعىما وتىرىپ، مەنىڭ ورنىما پاتشا بولادى. مەن ونى يسرايل مەن ياھۋدانىڭ كوسەمى ەتىپ تاعايىندايمىن».
36 سوندا ەحوداي ۇلى بەناياح پاتشاعا: «اۋمين! پاتشا يەمنىڭ سوزدەرىن قۇدايى ەحوبا جۇزەگە اسىرسىن!
37 ەحوبا پاتشا يەمە جار بولعانداي، سۇلەيمەنگە دە جار بولسىن+. ونىڭ تاعىنىڭ ۇلىلىعى پاتشا اعزام داۋىتتىكىنەن دە جوعارى بولسىن+!»— دەدى.
38 سودان ٴدىني قىزمەتكەر سادىق، ناتان پايعامبار، ەحوداي ۇلى بەناياح+، كەرەتتىكتەر مەن پەلەتتىكتەر+ سۇلەيمەندى پاتشانىڭ قاشىرىنا مىنگىزىپ+، گيحونعا+ قاراي ٴتۇستى.
39 ٴدىني قىزمەتكەر سادىق كيەلى شاتىردان+ مۇيىزگە قۇيىپ اكەلگەن مايدى الىپ+، سۇلەيمەنگە ماي جاعۋ ٴراسىمىن جاسادى+. بۇدان كەيىن كەرنەي تارتىلدى، ال كۇللى جۇرت «سۇلەيمەن پاتشا مىڭ جاساسىن!» دەپ جار سالدى.
40 سوسىن بارلىعى سۇلەيمەننىڭ سوڭىنان ەرىپ، جوعارى ورلەدى. ولار سىبىزعى تارتىپ، شات-شادىمان بولىپ قۋانعاندارى سونشالىق — داۋىستارى جەر جاردى+.
41 ادونياح پەن ونىڭ شاقىرعان كىسىلەرى تاماقتانىپ بولا بەرگەندە، وسى شۋدى ەستىدى+. جوعاب كەرنەي داۋسىن ەستىپ: «قالادان شىعىپ جاتقان بۇل نە شۋ؟»— دەدى.
42 ول اۋزىن جيىپ ۇلگەرمەي جاتىپ، ٴدىني قىزمەتكەر ٵبياتاردىڭ ۇلى جوناتان+ كەلدى. ادونياح وعان: «كەل، كىر. سەن جاقسى ادامسىڭ، اكەلگەن حابارىڭ دا جاقسى بولار»،— دەدى.
43 ٴبىراق ول مىنانى ايتتى: «جوق، ولاي ەمەس. تاقسىر يەمىز ٴداۋىت سۇلەيمەندى پاتشا ەتىپ قويدى!
44 پاتشا ونىمەن بىرگە ٴدىني قىزمەتكەر سادىقتى، ناتان پايعامباردى، ەحوداي ۇلى بەناياحتى، كەرەتتىكتەر مەن پەلەتتىكتەردى جىبەرىپتى. ولار سۇلەيمەندى پاتشانىڭ قاشىرىنا مىنگىزىپ الىپ+،
45 گيحونعا اپارىپتى. سول جەردە ٴدىني قىزمەتكەر سادىق پەن ناتان پايعامبار ونى پاتشا ەتىپ مايلاپتى. سوسىن ٴبارى قۋانا كەرى قايتىپ، بۇكىل قالا سودان دۇرلىگىپ جاتىر. سەندەر ەستىگەن ۋ-شۋ سولاردىكى.
46 ال سۇلەيمەن قازىر پاتشا تاعىندا وتىر ەكەن.
47 پاتشانىڭ قىزمەتشىلەرى بولسا تاقسىر يەمىز ٴداۋىتتى: —قۇدايىڭىز سۇلەيمەننىڭ اتاعىن سىزدىكىنەن دە كەڭ جايسىن! تاعىنىڭ ۇلىلىعى سىزدىكىنەن دە جوعارى بولسىن!— دەپ قۇتتىقتاپ كەلىپتى. ال پاتشا توسەگىندە وتىرىپ، باس ٴيىپ تاعزىم ەتىپتى.
48 ونىڭ ۇستىنە، پاتشا: —يسرايلدىڭ قۇدايى ەحوبا ماداقتالسىن! ول بۇگىن ۇلىمدى مەنىڭ تاعىما وتىرعىزىپ، مۇنى ٶز كوزىممەن كورۋگە مۇمكىندىك بەردى!— دەپتى».
49 مۇنى ەستىگەندە، ادونياحتىڭ قوناقتارى قورىققاندارىنان قالتىراپ، ورىندارىنان تۇردى دا، ٵرقايسىسى ٶز جونىنە كەتتى.
50 ادونياحتىڭ ٶزى دە سۇلەيمەننەن قورقىپ، كيەلى شاتىرعا باردى دا، قۇرباندىق وشاعىنىڭ مۇيىزدەرىنەن جابىسا ۇستاپ الدى+.
51 سۇلەيمەنگە مىناداي حابار جەتتى: «ادونياح سۇلەيمەن پاتشادان قورقىپ، قۇرباندىق وشاعىنىڭ مۇيىزدەرىنەن ۇستاپ الىپتى. ول «الدىمەن سۇلەيمەن پاتشا قىزمەتشىسىن سەمسەرمەن ولتىرمەيمىن دەپ انت ەتسىن» دەپ جاتىر ەكەن».
52 سوندا سۇلەيمەن: «ەگەر ول ادال ادام ەكەنىن كورسەتسە، باسىنان ٴبىر تال شاش تا تۇسپەيدى. ال بويىنان ٴبىر ارامدىق تابىلسا+، ٶلىم قۇشادى»،— دەدى.
53 ٴسۇيتىپ، پاتشا ادام جىبەرىپ، ونى قۇرباندىق وشاعىنان الدىرتتى. ادونياح سۇلەيمەننىڭ الدىنا كەلىپ، تاعزىم ەتكەندە، ول: «ۇيىڭە قايتا بەر»،— دەدى.
سىلتەمەلەر
^ نەمەسە «سەزىمىن جارالاعان ەمەس؛ تىيعان ەمەس».
^ بۇل — قۇدايدىڭ ەسىمى. تۇسىندىرمەنى قاراڭىز.
^ نەمەسە «جانىمنىڭ قۇنىن وتەپ العان».
^ نەمەسە «ەحوبانىڭ ٴتىرى ەكەنىندەي حاق ٴسوزىم».
