پاتشالار 1-جازبا 10:1—29
10 شەبا ەلىنىڭ پاتشايىمى ەحوبانىڭ ەسىمى ارقىلى سۇلەيمەننىڭ داڭقى ارتقانىن ەستىدى+. سودان سۇلەيمەندى قيىن ساۋالدارمەن* سىناماق بولىپ جولعا شىقتى+.
2 ول نوكەرلەرىن ەرتىپ، ىرعالىپ-جىرعالىپ يەرۋساليمگە كەلدى+. پاتشايىم تۇيەلەرىنە حوش ٴيىستى ماي+، وتە كوپ التىن، اسىل تاستار ارتىپ كەلگەن ەدى. ول سۇلەيمەن پاتشامەن كوڭىلىندە جۇرگەننىڭ ٴبارى تۋرالى اڭگىمەلەستى.
3 سۇلەيمەن ونىڭ بارلىق سۇراقتارىنا جاۋاپ بەردى. ول تۇسىندىرە الماعان ساۋال بولمادى.
4 شەبا پاتشايىمى سۇلەيمەننىڭ دانالىعىن+، سالعان ٷيىن+،
5 داستارقانىنداعى تاماعىن+، قىزمەتشىلەرىنىڭ داستارقان باسىنا قالاي وتىرعىزىلعانىن، داياشىلارىنىڭ قىزمەتى مەن كيىمدەرىن، سونداي-اق شاراپشىلارىنىڭ قىزمەتىن، ەحوبانىڭ ۇيىندە شالاتىن قۇرباندىقتارىن كورگەندە، دەمىن ىشىنە تارتىپ، قايران قالدى.
6 سوندا ول پاتشاعا بىلاي دەدى: «ٴسىزدىڭ جەتىستىكتەرىڭىز بەن دانالىعىڭىز تۋرالى ەلىمدە ٴجۇرىپ ەستىگەنىمنىڭ ٴبارى راس ەكەن.
7 ٶز كوزىممەن كورمەيىنشە بۇعان سەنبەگەن ەدىم. سويتسەم، مەن تەك شەت جاعاسىن عانا ەستىپپىن. ٴسىزدىڭ دانالىعىڭىز بەن داۋلەتىڭىز مەن ەستىگەننەن الدەقايدا زور ەكەن.
8 مىنا ادامدارىڭىز نەتكەن باقىتتى! ۇنەمى الدىڭىزدا ٴجۇرىپ، دانالىعىڭىزدى تىڭداي الاتىن قىزمەتشىلەرىڭىز نەتكەن باقىتتى+!
9 ٴسىزدى يسرايلدىڭ تاعىنا وتىرعىزۋدى ۇيعارعان قۇدايىڭىز ەحوبا ماداقتالسىن+! ەحوبانىڭ يسرايلگە دەگەن سۇيىسپەنشىلىگى ماڭگىلىك. سوندىقتان ول ٴسىزدى ٵدىل ٵرى تۋراشىلدىقپەن بيلىك ەتسىن دەپ پاتشا ەتىپ تاعايىندادى».
10 سوسىن شەبا پاتشايىمى سۇلەيمەنگە 120 تالانت* التىن، وتە كوپ مولشەردە حوش ٴيىستى ماي+ جانە اسىل تاستار سيلادى+. سۇلەيمەن پاتشاعا وسىنشا كوپ حوش ٴيىستى مايدى بۇدان كەيىن ەشكىم اكەلگەن ەمەس.
11 حيرامنىڭ وپىردان التىن تاسيتىن كەمەلەرى+ وتە كوپ ساندال اعاشىنىڭ* بورەنەلەرى+ مەن قىمبات تاستار دا اكەلەتىن+.
12 سۇلەيمەن ساندال اعاشىنان ەحوبانىڭ ٷيى مەن پاتشا سارايىنا تىرەۋىشتەر ىستەتتى، سونداي-اق انشىلەر ٷشىن ارفالار، ىشەكتى اسپاپتار+ جاساتتى. يسرايلگە كۇنى بۇگىنگە دەيىن وسىنشاما ساندال اعاشى اكەلىنگەن ەمەس.
13 سۇلەيمەن جومارتتىقپەن بەرگەن سيلارىنا قوسا، شەبا پاتشايىمىنىڭ قالاعانى مەن سۇراعانىنىڭ ٴبارىن بەردى. بۇدان كەيىن پاتشايىم بۇكىل قىزمەتشىلەرىمەن ەلىنە قايتتى+.
14 سۇلەيمەن پاتشانىڭ قازىناسىنا جىل سايىن 666 تالانت التىن تۇسەتىن+.
15 وعان ٴتۇرلى ساۋداگەرلەردەن، ارابيالىق پاتشالار مەن ەلدىڭ ايماق اكىمدەرىنەن كەلەتىن كىرىستى قوسپاعاندا، سونشا التىن تۇسەتىن.
16 سۇلەيمەن پاتشا التىن قوسپاسىنان 200 ۇلكەن قالقان جاساتتى+، ولاردىڭ ٵرقايسىسىنا 600 شەكەل* التىن جۇمسالدى+.
17 سونداي-اق 300 شاعىن قالقان جاساتتى، ولاردىڭ ٵرقايسىسىنا 3 مينا* التىن جۇمسالدى. قالقاندار «ليۆان ورمانى» دەپ اتالعان ۇيگە+ قويىلدى.
18 بۇعان قوسا، پاتشا ٴپىل سۇيەگىنەن ۇلكەن تاق+ جاساتىپ، ساف التىنمەن قاپتاتتى+.
19 تاقتىڭ الدىندا التى باسپالداعى، ۇستىندە كۇمبەزى بولدى. ال ەكى جاعىنا شىنتاق سۇيەنىشتەر جاسالدى، ولاردىڭ ٵرقايسىسىنىڭ جانىندا ٴبىر-ٴبىر ارىستان+ ٴمۇسىنى تۇردى.
20 التى باسپالداقتىڭ ەكى جاعىنا 12 ارىستان ٴمۇسىنى قويىلدى. ەشبىر پاتشالىقتا بۇنداي نارسە جاسالىپ كورمەگەن ەدى.
21 سۇلەيمەن پاتشانىڭ سۋسىن ىشەتىن ىدىستارىنىڭ ٴبارى التىننان، ال «ليۆان ورمانى» دەگەن ۇيدەگى+ بۇيىمدارى ساف التىننان جاسالدى. ەشبىر بۇيىم كۇمىستەن جاسالمادى، ويتكەنى ونىڭ زامانىندا كۇمىس قۇنسىز بولىپ سانالاتىن+.
22 سۇلەيمەن پاتشانىڭ حيرام پاتشانىڭ كەمەلەرىمەن بىرگە ساپارعا جىبەرەتىن تارسيستىك+ كەمەلەرى بولدى. ٵر ٷش جىلدا ولار ساپاردان التىن، كۇمىس، ٴپىل سۇيەگىن+، مايمىلدار مەن تاۋىس قۇستارىن اكەلەتىن.
23 سۇلەيمەننىڭ بايلىعى+ مەن دانالىعى جەر بەتىندەگى كۇللى پاتشالاردىكىنەن اسىپ ٴتۇستى+.
24 دۇنيەجۇزىنىڭ ادامدارى سۇلەيمەننىڭ قۇداي دارىتقان دانالىعىن+ ەستۋ ٷشىن، ونىمەن كەزدەسۋدى قالايتىن.
25 پاتشانىڭ الدىنا كەلەتىندەر كۇمىس پەن التىن بۇيىمدار، كيىم-كەشەك، ساۋىت-سايمان، حوش ٴيىستى ماي، جىلقى مەن قاشىرلاردى سيعا تارتاتىن. بۇل جىلدان-جىلعا جالعاسا بەردى.
26 سۇلەيمەن اربالار مەن جىلقىنى* كوپتەپ جينادى. ونىڭ 1400 ارباسى جانە 12000 جىلقىسى* بولدى+. پاتشا ولاردى اربالارعا ارنالعان قالالاردا جانە ٶزىنىڭ قاسىندا، يەرۋساليمدە ۇستادى+.
27 سۇلەيمەن يەرۋساليمدە كۇمىستى كادىمگى تاس سياقتى كوپ قىلدى، قاراعاي اعاشتارىن دا شەفەلاداعى ٸنجىر اعاشتارى سياقتى مول ەتتى+.
28 سۇلەيمەن جىلقىنى مىسىردان الدىرتىپ وتىردى. پاتشانىڭ ساۋداگەرلەرى ولاردى ٷيىر-ۇيىرىمەن ساتىپ الاتىن*+.
29 ولار ٵربىر اربانى 600، ال ٵربىر جىلقىنى 150 كۇمىس اقشاعا اكەلەتىن. پاتشانىڭ ساۋداگەرلەرى بۇلاردى حەتتىك+ جانە سيريالىق پاتشالارعا دا اكەلىپ بەرەتىن.
سىلتەمەلەر
^ نەمەسە «جۇمباقتارمەن».
^ 1 تالانت 2.34 كيلوگرامعا تەڭ. B14 قوسىمشاسىن قاراڭىز.
^ جوعارى ساپالى بۇيىمدار جاسالاتىن باعالى اعاش.
^ 1 شەكەل 4.11 گرامعا تەڭ. B14 قوسىمشاسىن قاراڭىز.
^ ەۆرەي جازبالارىندا 1 مينا 570 گرامعا تەڭ. B14 قوسىمشاسىن قاراڭىز.
^ نەمەسە «سالت اتتىلاردى».
^ نەمەسە «سالت اتتى جىگىتى».
^ مۇمكىن: «مىسىر مەن قۋادان الدىرىپ وتىردى. پاتشانىڭ ساۋداگەرلەرى ولاردى قۋادان ساتىپ اكەلەتىن». بۇل جەردەگى قۋا كيليكياعا نۇسقاسا كەرەك.
