پاتشالار 1-جازبا 22:1—53
22 سيريا مەن يسرايل ەلىنىڭ اراسىندا ٷش جىل سوعىس بولمادى.
2 ال ٷشىنشى جىلى ياھۋدا پاتشاسى جوسافات+ يسرايل پاتشاسى احابقا كەلدى+.
3 يسرايل پاتشاسى قىزمەتشىلەرىنە: «راموت-عالاقاتتىڭ+ بىزدىكى ەكەنىن بىلەسىڭدەر مە؟ ٴبىز بولساق ونى سيريالىقتاردان تارتىپ الماي قاراپ وتىرمىز»،— دەدى.
4 سوسىن جوسافاتتان: «مەنىمەن بىرگە راموت-عالاقاتتى قايتارىپ الۋعا باراسىڭ با؟»— دەپ سۇرادى. ول يسرايل پاتشاسىنا: «ەكەۋمىز ٴبىرمىز: مەنىڭ حالقىم — سەنىڭ حالقىڭ، مەنىڭ جىلقىم — سەنىڭ جىلقىڭ»،— دەپ جاۋاپ بەردى+.
5 ٴبىراق بۇدان كەيىن: «ەحوبا نە دەر ەكەن، الدىمەن سونى سۇراپ ٴبىلشى+»،— دەدى+.
6 سودان يسرايل پاتشاسى 400 دەي پايعامباردى شاقىرتىپ، ولاردان: «راموت-عالاقاتتى قايتارىپ الۋ ٷشىن سوعىسايىن با، جوق پا؟»— دەپ سۇرادى. ولار: «ورلەپ بارىپ، سوعىسىڭىز، ەحوبا ونى پاتشامىزعا بەرەدى»،— دەدى.
7 جوسافات بولسا: «مۇندا ەحوبانىڭ پايعامبارى بار ما ەكەن؟ سول ارقىلى دا سۇراپ كورەيىك»،— دەپ ۇسىندى+.
8 بۇعان يسرايل پاتشاسى: «ەحوبادان سۇراپ بىلۋگە بولاتىن تاعى ٴبىر پايعامبار بار+. ونىڭ اتى يملاح ۇلى ميحايا. ٴبىراق مەن ونى جەك كورەمىن+. ول ەشقاشان مەن تۋرالى جاقسى پايعامبارلىق ايتپايدى، ايتاتىنى — تەك جاماندىق+،— دەگەن ەدى، جوسافات: —پاتشا، ولاي دەمە»،— دەپ قارسىلىق ٴبىلدىردى.
9 سوندا احاب ساراي قىزمەتكەرلەرىنىڭ ٴبىرىن شاقىرىپ الىپ: «تەزدەتىپ يملاح ۇلى ميحايانى الىپ كەل»،— دەپ تاپسىردى+.
10 يسرايل پاتشاسى احاب پەن ياھۋدا پاتشاسى جوسافات پاتشا كيىمىن كيىپ، ساماريا قاقپاسىنىڭ الدىنداعى قىرماندا ٶز تاقتارىندا وتىرعان ەدى. ال الگى پايعامبارلاردىڭ ٴبارى ولاردىڭ الدىندا پايعامبارلىق ەتىپ جاتتى+.
11 ٴبىر ۋاقىتتا كەناناح ۇلى سەدەكيا تەمىر مۇيىزدەر جاساپ الىپ: «ەحوبا مىنانى ايتادى: —سيريالىقتاردى مىنا مۇيىزدەرمەن سۇزگىلەپ، جويىپ جىبەرەسىڭ»،— دەدى.
12 قالعاندارىنىڭ ٴبارى دە تاپ سولاي پايعامبارلىق ەتىپ: «راموت-عالاقاتقا كوتەرىلىپ، جەڭىسكە جەتەسىز. ەحوبا ونى پاتشامىزعا بەرەدى!»— دەپ جاتتى.
13 ميحايانى شاقىرۋعا كەلگەن حابارشى وعان: «پايعامبارلاردىڭ ٴبارى پاتشاعا تەك جاقسى حابار ايتۋدا. سەنىڭ سوزدەرىڭ دە سولاردىڭ بىرىنىكىندەي بولسىنشى. سەن دە جاقسى حابار ايت»،— دەدى+.
14 ٴبىراق ول: «ٴتىرى قۇداي ەحوبانىڭ الدىندا شىن ايتامىن*، ەحوبا نە ايت دەسە، مەن سونى ايتامىن»،— دەپ جاۋاپ بەردى.
15 ول پاتشانىڭ الدىنا كەلگەندە، پاتشا ودان: «ميحايا، راموت-عالاقاتتى قايتارىپ الۋ ٷشىن سوعىسايىق پا، جوق پا؟»— دەپ سۇرادى. ٵ دەگەننەن ول: «ٴيا، سوعىس، جەڭىسكە جەتەسىڭ. ەحوبا ونى پاتشاعا بەرەدى»،— دەپ جاۋاپ بەردى.
16 پاتشا وعان: «ەحوبانىڭ اتىنان ماعان تەك شىندىقتى ايت دەپ قانشا رەت ساعان انت-سۋ ىشكىزۋىم كەرەك؟»— دەدى.
17 سوندا ول بىلاي دەدى: «كۇللى يسرايلدىڭ باعۋشىسى جوق قويلارداي تاۋ-تاۋلاردا بىتىراپ جۇرگەنىن كورىپ تۇرمىن+. ەحوبا مىنانى ايتادى: —بۇلاردىڭ قوجايىنى جوق، تىنىشتىقپەن ٴبارى ٷيدى-ۇيىنە قايتسىن».
18 مۇنى ەستىگەندە، يسرايل پاتشاسى جوسافاتقا: «ول مەن تۋرالى جاقسى پايعامبارلىق ايتپايدى، ايتاتىنى تەك جاماندىق دەمەپ پە ەدىم؟»— دەدى+.
19 ميحايا بىلاي دەپ قوستى: «ەندەشە، ەحوبانىڭ ٴسوزىن تىڭدا، مەن تاقتا وتىرعان ەحوبانى+ جانە ونىڭ وڭ جاعى مەن سول جاعىنداعى كۇللى كوك اسكەرىن كوردىم+.
20 ەحوبا: —احاب راموت-عالاقاتقا بارىپ، سول جەردە قازا بولۋ ٷشىن ونى قايسىسىڭ الدايسىڭ؟— دەپ سۇراپ ەدى، بىرەۋى مىنانى، ەكىنشىسى انانى ۇسىنىپ جاتتى.
21 اقىرىندا ەحوبانىڭ الدىنا ٴبىر رۋح*+ كەلدى دە: —ونى مەن الدايمىن،— دەدى. ەحوبا: —قالاي؟— دەپ سۇراعاندا،
22 ول: —مەن بارىپ، پايعامبارلارىنىڭ اۋزىنداعى الدامشى رۋح بولامىن+،— دەدى. سوندا ول: —سەن ونى الداپ، ٸسىڭ العا باسادى. بار دا، ايتقانىڭدى ىستە،— دەپ تاپسىردى.
23 وسىلاي ەحوبا سول الدامشى رۋح ارقىلى مىنا پايعامبارلارىڭنىڭ ٴبارىنىڭ جالعان سويلەۋىنە جول بەرىپ وتىر+. ٴبىراق ەحوبا سەنى پالەگە ۇشىراتۋدى شەشىپ قويعان+».
24 سوندا كەناناح ۇلى سەدەكيا ميحايانىڭ قاسىنا بارىپ، جاعىنان سالىپ جىبەردى دە: «ەحوبانىڭ رۋحى مەنى تاستاپ، قالاي ساعان بارىپ قوندى ەكەن؟!»— دەدى+.
25 بۇعان ول: «قالاي ەكەنىن تۇپكى بولمەگە كىرىپ جاسىرىنعانىڭدا بىلەسىڭ»،— دەپ جاۋاپ بەردى.
26 سوندا يسرايل پاتشاسى بىلاي دەدى: «ميحايانى قالا اكىمى امون مەن پاتشا ۇلى جوعاشقا الىپ بارىڭدار دا:
27 —پاتشا مىنانى بۇيىردى: «مىنا كىسىنى تۇرمەگە جابىڭدار+. مەن امان-ەسەن ورالعانشا، وعان نان مەن سۋدى تيىستىسىنەن از بەرىڭدەر!» دەڭدەر».
28 بۇعان ميحايا: «ەگەر سەن امان-ەسەن كەلسەڭ، مەن ارقىلى ەحوبانىڭ سويلەمەگەنى+!— دەدى دە: —ۋا، حالايىق، ٴبارىڭ دە تىڭداپ الىڭدار!»— دەپ قوستى.
29 سونىمەن، يسرايل پاتشاسى مەن ياھۋدا پاتشاسى جوسافات راموت-عالاقاتقا اتتاندى+.
30 يسرايل پاتشاسى جوسافاتقا: «مەن كيىمىمدى اۋىستىرىپ، ۇرىسقا ارالاسامىن. ال سەن پاتشا كيىمىڭمەن شىق»،— دەدى. ٴسۇيتىپ، يسرايل پاتشاسى كيىمىن اۋىستىرىپ+، ۇرىسقا ارالاستى.
31 سيريا پاتشاسى بولسا سوعىس اربالارىنىڭ ۇستىنەن قويىلعان 32 باسشىعا+: «كىشىگىنە دە، ۇلىعىنا دا الاڭداۋشى بولماڭدار! تەك يسرايل پاتشاسىمەن شايقاسىڭدار!»— دەپ بۇيىردى.
32 جوسافاتتى كورىپ، ولار: «داۋ جوق، مىناۋ — يسرايل پاتشاسى»،— دەپ ويلاپ، ات باسىن سوعان قاراي بۇردى دا، وعان باس سالماق بولدى. جوسافات بولسا ايعايلاپ، كومەك سۇراي باستادى.
33 سوعىس اربالارىنىڭ باسشىلارى ونىڭ يسرايل پاتشاسى ەمەس ەكەنىن تۇسىنگەندە، بىردەن كەرى بۇرىلدى.
34 سول كەزدە بىرەۋ ساداعىن كەرىپ، اتا سالىپ ەدى، جەبە ٴدال يسرايل پاتشاسىنا ٴتيىپ، ساۋىتىنىڭ قاتپارلارى قوسىلعان جەردەن كىرىپ، دەنەسىنە قادالدى. سوندا ول ارباكەشىنە: «ات باسىن كەرى بۇرىپ، مەنى شايقاستان الىپ شىق! مەن قاتتى جارالاندىم!»— دەدى+.
35 ٴبىراق سول كۇنى شايقاس ۋشىعىپ، احاب ارباسىن سيريالىقتارعا قاراما-قارسى قويىپ، ىشىندە تىك تۇرۋعا ٴماجبۇر بولدى. كەشقۇرىم ول كوز جۇمدى+، ال جاراسىنان اققان قان سوعىس ارباسىندا كىلكىپ جاتتى.
36 كۇن باتاردا يسرايلدىكتەردىڭ قوسىندا «اركىم ٶز قالاسىنا، ٶز جەرىنە قايتسىن!» دەگەن ايقاي ەستىلدى+.
37 وسىلاي پاتشا قازا بولدى. ونىڭ سۇيەگى سامارياعا اكەلىنىپ، سوندا قويىلدى.
38 پاتشانىڭ سوعىس ارباسى سامارياداعى حاۋىزدا جۋىلدى، ال قانىن يتتەر جالادى. بۇل كەزدە حاۋىزدا جەزوكشەلەر شومىلىپ جاتقان ەدى*. وسىلاي ەحوبانىڭ ٴسوزى جۇزەگە استى+.
39 احابتىڭ باسقا دا ىستەرى، ٴپىل سۇيەگىمەن+ قاپتالعان سارايى، سالعان قالالارى جايلى يسرايل پاتشالارىنىڭ تاريحى باياندالعان كىتاپتا جازىلعان.
40 اقىرىندا احاب اتا-بابالارىنا قوسىلدى دا+، ورنىنا ۇلى احازيا+ تاققا وتىردى.
41 اسا ۇلى جوسافات+ يسرايل پاتشاسى احابتىڭ بيلىك قۇرۋىنىڭ ٴتورتىنشى جىلى ياھۋدا ەلىنىڭ تاعىنا وتىرعان ەدى.
42 ول 35 جاسىندا پاتشا بولىپ، يەرۋساليمدە 25 جىل بيلىك ەتتى. ونىڭ اناسى شيلكيدىڭ قىزى ازۋبا ەدى.
43 جوسافات اكەسى اسانىڭ+ جولىنان تايماي، ەحوباعا ۇنامدىنى ىستەپ ٴجۇردى+. ٴبىراق ونىڭ تۇسىندا عيبادات توبەلەرى جويىلعان جوق. حالىق بۇرىنعىسىنشا سول جەرلەردە قۇرباندىق شالىپ، قۇرباندىق ٴتۇتىنىن تۇتەتە بەردى+.
44 جوسافات يسرايل پاتشاسىمەن بەيبىت قارىم-قاتىناستا بولدى+.
45 ونىڭ باسقا دا ىستەرى، ەرلىكتەرى مەن جۇرگىزگەن سوعىستارى جايلى ياھۋدا پاتشالارىنىڭ تاريحى باياندالعان كىتاپتا جازىلعان.
46 ول اكەسى اسانىڭ زامانىنان قالىپ قويعان عيباداتحانالارداعى بۇزىلعان ەركەكتەردىڭ*+ كوزىن قۇرتىپ، ەلدى تازارتتى+.
47 سول ۋاقىتتا ەدوم+ جەرىندە پاتشا بولمايتىن، ەلدى ايماق اكىمى باسقاراتىن+.
48 جوسافات وپىردان التىن اكەلۋ ٷشىن تارسيس كەمەلەرىن جاساتتى+. ٴبىراق ولار ەسيون-گەبەردە اپاتقا ۇشىراپ، سول كۇيى ساپارعا شىقپادى+.
49 سول جولى احاب ۇلى احازيا جوسافاتقا: «سەنىڭ كەمەلەرىڭمەن مەنىڭ دە قىزمەتشىلەرىم بارسىن»،— دەپ ۇسىنعان ەدى. ٴبىراق ول كەلىسپەگەن بولاتىن.
50 اقىرىندا جوسافات اتا-بابالارىنا قوسىلدى دا+، سۇيەگى سولاردىڭ قاسىنا، ارعى اتاسى ٴداۋىتتىڭ قالاسىنا قويىلدى. ونىڭ ورنىنا ۇلى جورام+ تاققا وتىردى.
51 احاب ۇلى احازيا+ ياھۋدا پاتشاسى جوسافاتتىڭ بيلىك قۇرۋىنىڭ ون جەتىنشى جىلى يسرايل تاعىنا وتىرىپ، ساماريادا يسرايل ەلىنە ەكى جىل بيلىك ەتتى.
52 ول ەحوبانىڭ الدىندا قايتپاي زۇلىمدىق جاساپ، اكەسى+ مەن شەشەسىنىڭ+ جانە يسرايل ەلىن كۇناعا باتىرعان نابات ۇلى ەروبوعامنىڭ+ جولىمەن ٴجۇردى.
53 ول اكەسىنىڭ ىستەرىنەن ايىرىلماي، باعالعا قىزمەت ەتىپ+، سوعان باس ۇرۋىمەن ەحوبانى قورلاي بەردى+.
سىلتەمەلەر
^ نەمەسە «ەحوبانىڭ ٴتىرى ەكەنىندەي حاق ٴسوزىم».
^ نەمەسە «پەرىشتە».
^ مۇمكىن: «پاتشانىڭ سوعىس ارباسى جەزوكشەلەر شومىلاتىن سامارياداعى حاۋىزدا جۋىلدى، ال قانىن يتتەر جالادى».
^ عيباداتحانالاردا ەركەكتەرمەن ازعىندىق جاسايتىن ەركەكتەر.
