پاتشالار 1-جازبا 6:1—38
6 يسرايلدىكتەر مىسىر ەلىنەن شىققاننان كەيىنگى 480 ٸنشى جىلى+، سۇلەيمەننىڭ يسرايلگە پاتشالىق ەتكەن ٴتورتىنشى جىلىنىڭ زيۆ* ايىندا+، ياعني ەكىنشى ايدا، ول ەحوباعا ارناپ كيەلى ٷي* سالا باستادى+.
2 سۇلەيمەن ەحوباعا ارناپ سالعان ٷيدىڭ ۇزىندىعى 60، ەنى 20، بيىكتىگى 30 شىنتاق* ەدى+.
3 قاسيەتتى بولمەنىڭ* الدىنداعى كىرەبەرىستىڭ+ ەنى كيەلى ٷيدىڭ ەنىندەي، ياعني 20 شىنتاق، ال ۇزىندىعى 10 شىنتاق بولدى.
4 سۇلەيمەن كيەلى ٷيدىڭ تەرەزەلەرىن سىرتقا قاراعان جاعىن تارلاۋ+، ىشكى جاعىن كەڭدەۋ ەتىپ جاسادى.
5 سوسىن ٷيدى اينالدىرا، ەكى جاعى مەن ارت جاعىن بويلاي، جاناما بولمەلەر سالدى+.
6 تومەنگى قاباتتاعى بولمەلەردىڭ ەنى 5، ورتاڭعى قاباتتاعىلاردىكى 6، ال جوعارعى قاباتتاعىلاردىكى 7 شىنتاق ەدى. ارقالىقتارمەن بىرىكتىرىلەتىن قابىرعالاردى تەسپەۋ ٷشىن، كيەلى ٷيدىڭ سىرتقى قابىرعالارىن اينالدىرا كەرتپەشتەر جاسالدى+.
7 كيەلى ٷيدىڭ ٶزى بولسا قاشالىپ اكەلىنگەن دايىن تاستاردان تۇرعىزىلدى+. سوندىقتان قۇرىلىس كەزىندە بالعا، بالتا سياقتى تەمىر قۇرالداردىڭ دىبىسى ەستىلمەدى.
8 جاناما بولمەلەردىڭ تومەنگى قاباتىنىڭ كىرەتىن جەرى كيەلى ٷيدىڭ وڭتۇستىك جاعىندا بولدى+. سول جەردەن اينالما باسپالداق ارقىلى ەكىنشى جانە ٷشىنشى قاباتتارعا دا كوتەرىلۋگە بولاتىن.
9 سۇلەيمەن قۇرىلىستىڭ وسى بولىگىن بىتىرگەن سوڭ+، كيەلى ٷيدىڭ توبەسىن بورەنەلەرمەن جانە قاراعاي تاقتايلارمەن+ جاپتى.
10 ال كيەلى ٷيدى اينالدىرا ٵرقايسىسىنىڭ بيىكتىگى 5 شىنتاق جاناما بولمەلەر سالىپ+، ولاردى قاراعايدان جاسالعان ارقالىقتار ارقىلى كيەلى ۇيمەن بىرىكتىردى.
11 وسى كەزدەرى ەحوبا سۇلەيمەنگە ٴسوزىن ارناپ مىنانى ايتتى:
12 «مەنىڭ جارلىقتارىمدى ورىنداپ، شەشىمدەرىم مەن بارلىق بۇيرىقتارىمدى ۇستانىپ جۇرسەڭ+، ساعان جانە ٶزىڭ سوعىپ جاتقان وسى ۇيگە قاتىستى اكەڭ داۋىتكە بەرگەن ۋادەمدى ورىندايمىن+.
13 مەن يسرايلدىكتەردىڭ اراسىندا تۇراتىن بولامىن+، حالقىم يسرايلدى ەشقاشان تاستاپ كەتپەيمىن+».
14 سۇلەيمەن كيەلى ٷيدىڭ قۇرىلىسىن جالعاستىرىپ،
15 قابىرعالارىنىڭ ىشكى جاعىن قاراعاي تاقتايلارمەن قاپتادى. ول قابىرعالاردىڭ ىشكى جاعىن ەدەننەن توبەسىنە دەيىن اعاشپەن قاپتاپ شىقتى. ال ەدەنگە ارشا تاقتايلارىن+ توسەدى.
16 سوسىن كيەلى ٷيدىڭ ٴتور جاعىنان 20 شىنتاق ولشەپ الىپ، سول جەردى ەدەننەن توبەسىنە دەيىن قاراعاي تاقتايلارمەن ٴبولىپ، تۇپكى بولمە+، ياعني ەڭ قاسيەتتى بولمە جاسادى+.
17 ەڭ قاسيەتتى بولمەنىڭ الدىنداعى قاسيەتتى بولمەنىڭ+ ۇزىندىعى 40 شىنتاق بولدى.
18 كيەلى ٷيدى قاپتاعان قاراعاي تاقتايلارعا جابايى قاربىزدار+ مەن اشىلعان گۇلدەردىڭ+ ورنەكتەرى ويىپ سالىندى. ٷيدىڭ ٸشى ەشبىر تاسى كورىنبەيتىندەي ەتىپ قاراعاي تاقتايلارمەن قاپتالدى.
19 سۇلەيمەن كيەلى ٷيدىڭ تۇپكى بولمەسىن+ ەحوبانىڭ كەلىسىم ساندىعىن قويۋ ٷشىن جاسادى+.
20 بولمەنىڭ ۇزىندىعى دا، بيىكتىگى مەن ەنى دە 20 شىنتاق بولدى+. پاتشا بولمەنىڭ ٸشىن ساف التىنمەن، ال قۇرباندىق ۇستەلىن+ قاراعاي تاقتايلارمەن قاپتادى.
21 ول كيەلى ٷيدىڭ ٸشىن تۇگەل التىنمەن قاپتادى+، سوسىن تۇپكى بولمەنىڭ+ (ول دا التىنمەن قاپتالعان ەدى) الدىنا التىن شىنجىر تارتىپ قويدى.
22 سۇلەيمەن كيەلى ٷيدىڭ ٸشىن تۇگەل التىنمەن قاپتادى. تۇپكى بولمەنىڭ الدىنداعى قۇرباندىق ۇستەلىن دە تولىقتاي التىنمەن قاپتادى+.
23 بۇدان كەيىن تۇپكى بولمەگە قويۋ ٷشىن سامىرسىننان* ەكى كەرۋب+ جاسادى، ولاردىڭ ٵرقايسىسىنىڭ بيىكتىگى 10 شىنتاق بولدى+.
24 ٴبىرىنشى كەرۋبتىڭ ٵر قاناتىنىڭ ۇزىندىعى 5 شىنتاقتان، ٴبىر قاناتىنىڭ ۇشىنان ەكىنشىسىنىڭ ۇشىنا دەيىن 10 شىنتاق ەدى.
25 ەكىنشى كەرۋبتىكى دە 10 شىنتاق بولدى. ەكى كەرۋبتىڭ دە كولەمدەرى مەن سىرت پىشىندەرى بىردەي ەدى.
26 ەكەۋىنىڭ دە بيىكتىگى 10 شىنتاقتان بولاتىن.
27 سۇلەيمەن كەرۋبتەردى+ تۇپكى بولمەگە قويدى. ولاردىڭ جايىلعان قاناتتارىنىڭ ٴبىر ۇشى بولمەنىڭ ورتاسىندا ٶزارا ٴتۇيىسىپ، ەكىنشى ۇشى ەكى جاقتاعى قابىرعاعا ٴتيىپ تۇردى.
28 ول كەرۋبتەردى دە التىنمەن قاپتادى.
29 كيەلى ٷيدىڭ ىشكى جانە تۇپكى بولمەلەرىنىڭ قابىرعالارىنا اينالدىرا كەرۋبتىڭ بەينەلەرى+، پالما اعاشى+ مەن اشىلعان گۇلدىڭ+ ورنەكتەرى ويىپ سالىندى.
30 ال بولمەلەردىڭ ەدەنى التىنمەن قاپتالدى.
31 پاتشا تۇپكى بولمەنىڭ قابىرعاسىنىڭ بەستەن ٴبىر بولىگىنە* ەسىك ويىعىن ىستەدى، سوسىن وعان سامىرسىننان جارما ەسىك، ەكى جاعىنا ەكى باعانا، سونداي-اق جاقتاۋلارىن جاسادى.
32 ول سامىرسىن ەسىكتەرگە كەرۋب بەينەلەرىن، پالمالار مەن اشىلعان گۇلدەردىڭ ورنەكتەرىن ويىپ سالدى دا، التىنمەن كۇپتەپ، كەرۋبتەر مەن پالما اعاشتارىنىڭ ٷستىن بەدەرلەدى.
33 سۇلەيمەن قاسيەتتى بولمەنىڭ قابىرعاسىنىڭ تورتتەن ٴبىر بولىگىنە* دە ەسىك ويىعىن جاساپ، جاقتاۋلارىن سامىرسىننان ىستەدى.
34 ول ارشادان ەكى ەسىك جاسادى. ٵر ەسىكتىڭ ەكى جاعىنداعى بۇكتەمەلى جارمالارى اينالمالى توپسالارعا ٸلىندى+.
35 ەسىكتەرگە كەرۋب بەينەلەرىن، پالما اعاشتارى مەن اشىلعان گۇلدەردىڭ ورنەكتەرىن ويىپ سالىپ، التىنمەن قاپتادى.
36 بۇدان كەيىن سۇلەيمەن ٷش قاتار قاشالعان تاستار مەن ٴبىر قاتار قاراعاي بورەنەلەردەن ىشكى اۋلانىڭ+ دۋالىن سالدى+.
37 سۇلەيمەن پاتشالىق قۇرعان ٴتورتىنشى جىلدىڭ زيۆ* ايىندا ەحوباعا ارنالعان كيەلى ٷيدىڭ ىرگەسى قالاندى+.
38 ال ون ٴبىرىنشى جىلدىڭ بۋل* ايىندا، ياعني سەگىزىنشى ايدا، كيەلى ٷيدىڭ جوسپاردا+ كورسەتىلگەن بولىكتەرىنىڭ ٴبارى مايدا-شۇيدەسىنە دەيىن سالىنىپ ٴبىتتى. وسىلايشا ول كيەلى ٷيدىڭ قۇرىلىسىنا جەتى جىل جۇمسادى.
سىلتەمەلەر
^ B8 قوسىمشاسىن قاراڭىز.
^ B15 قوسىمشاسىن قاراڭىز.
^ 1 شىنتاق 5.44 سانتيمەترگە تەڭ. B14 قوسىمشاسىن قاراڭىز.
^ پ1ج 6:3، 5، 17، 33 تە سوزبە-ٴسوز «عيباداتحانا».
^ سوزبە-ٴسوز «ماي اعاشىنان». الەپپو سامىرسىنى بولسا كەرەك.
^ مۇندا جاقتاۋلاردىڭ قالاي جاسالعانى نە ەسىكتىڭ كولەمى جونىندە ايتىلىپ تۇرسا كەرەك.
^ مۇندا جاقتاۋلاردىڭ قالاي جاسالعانى نە ەسىكتىڭ كولەمى جونىندە ايتىلىپ تۇرسا كەرەك.
^ B15 قوسىمشاسىن قاراڭىز.
^ B15 قوسىمشاسىن قاراڭىز.
