پاتشالار 2-جازبا 17:1—41
17 ياھۋدا پاتشاسى احازدىڭ بيلىك قۇرۋىنىڭ ون ەكىنشى جىلى ەلاح ۇلى حوشيا+ ساماريادا پاتشا بولىپ، يسرايل ەلىنە 9 جىل بيلىك ەتتى.
2 ول ەحوبانىڭ الدىندا ۇنامسىز ىستەر ىستەدى، ٴبىراق يسرايلدىڭ بۇرىنعى پاتشالارى سياقتى ەمەس.
3 اسسيريا پاتشاسى سالماناسار وعان قارسى اتتاندى+، سودان حوشيا وعان قىزمەت ەتىپ، الىم تولەيتىن بولدى+.
4 ٴبىراق اسسيريا پاتشاسى حوشيانىڭ قاستاندىق جاساماق ويى بار ەكەنىن ٴبىلدى. ويتكەنى حوشيا مىسىر پاتشاسى سوعا حابارشىلار جىبەرگەن ەدى+، ونىڭ ۇستىنە، جىلداعىداي الىم تولەمەي قويعان بولاتىن. سوندىقتان اسسيريا پاتشاسى ونى بايلاپ، تۇرمەگە جاۋىپ تاستادى.
5 سودان اسسيريا پاتشاسى بۇكىل ەلگە قارسى سوعىسقا اتتاندى. ول سامارياعا كەلىپ، قالانى ٷش جىل بويى قورشاۋدا ۇستادى.
6 حوشيانىڭ بيلىك قۇرۋىنىڭ توعىزىنشى جىلى اسسيريا پاتشاسى ساماريانى جاۋلاپ الدى+. ول يسرايل حالقىن اسسيرياعا جەر اۋدارىپ+، ولاردى حالاحقا، عوزان وزەنىنىڭ بويىنداعى حابورعا+ جانە ميديالىقتاردىڭ قالالارىنا قونىستاندىردى+.
7 بۇنىڭ ٴبارى يسرايل حالقى وزدەرىن مىسىر پاتشاسى پەرعاۋىننىڭ قولىنان ازات ەتىپ، مىسىر ەلىنەن الىپ شىققان قۇدايلارى ەحوباعا+ قارسى كۇنا جاساعاندىقتان وسىلاي بولدى. ولار باسقا قۇدايلارعا قۇلشىلىق ەتىپ*+،
8 قۇدايلارى ەحوبا يسرايلدىكتەردىڭ الدىنان قۋىپ شىققان حالىقتاردىڭ داستۇرلەرىن، سونداي-اق يسرايل پاتشالارى ەندىرگەن داستۇرلەردى ۇستاندى.
9 يسرايلدىكتەر قۇدايلارى ەحوباعا ۇنامايتىن ىستەرگە قۇمار بولدى. ولار بارلىق قالالارىندا، كۇزەت مۇنارالارىنان بەكىنىستى قالاعا دەيىن*، عيبادات توبەلەرىن سالا بەردى+.
10 ٵربىر قىردىڭ باسى مەن ٵربىر جايقالعان اعاشتىڭ تۇبىندە+ قاسيەتتى تاس باعانالار مەن اعاش باعانالار* ورناتتى+.
11 سونداي-اق ولار قۇدايلارى ەحوبا الدارىنان قۋىپ شىعىپ، الاستاتقان حالىقتارعا ەلىكتەپ، عيبادات توبەلەرىنىڭ بارىندە قۇرباندىق ٴتۇتىنىن تۇتەتتى+. وسىلاي زۇلىمدىق جاساپ، ەحوبانى قورلاۋدى قويمادى.
12 ولار جەركەنىشتى پۇتتارعا تابىنۋدى جالعاستىرا بەردى+. ال ەحوبا سول پۇتتارعا قاتىستى: «ولارعا تابىنباڭدار!»— دەگەن ەدى+.
13 ەحوبا بارلىق پايعامبارلارى مەن ايان كورەتىن قىزمەتشىلەرى ارقىلى يسرايل مەن ياھۋدا ەلىن: «زۇلىم ىستەرىڭنەن باس تارتىڭدار+! اتا-بابالارىڭا بەرگەن زاڭدا جازىلعان، سونداي-اق پايعامبارلارىم ارقىلى ايتقان وسيەتتەرىم مەن جارلىقتارىمدى ۇستانىڭدار!»— دەپ تالاي ەسكەرتتى+.
14 ٴبىراق ولار تىڭداماي، قۇدايلارى ەحوباعا سەنبەگەن اتا-بابالارى ىسپەتتى قاسارىسۋلارىن قويمادى+.
15 ولار قۇدايلارىنىڭ جارلىقتارى مەن اتا-بابالارىمەن جاساسقان ونىڭ كەلىسىمىنەن+ باس تارتتى، ەسكەرتۋلەرىن دە تىڭدامادى+. قايتا، اينالاسىنداعى حالىقتارعا ەلىكتەپ، تۇككە تۇرعىسىز پۇتتارعا تابىنىپ+، وزدەرى دە تۇككە تۇرعىسىز بولىپ كەتتى+. ال ەحوبا: «ولارعا ەلىكتەمەڭدەر!»— دەپ بۇيىرعان ەدى+.
16 ولار قۇدايلارى ەحوبانىڭ وسيەتتەرىنىڭ ٴبارىن تاستاپ، وزدەرىنە تەمىردەن بۇزاۋدىڭ ەكى ٴمۇسىنىن+، سونداي-اق قاسيەتتى باعانا* جاساپ الدى+. بۇعان قوسا، كۇللى كوك اسكەرىنە تابىندى+، باعالعا دا قىزمەت ەتتى+.
17 ولار ٴتىپتى ۇلدارى مەن قىزدارىن قۇرباندىققا شالىپ، وتقا ورتەدى+، ساۋەگەيلىكپەن اينالىستى+، بەلگىلەرگە قاراپ بولاشاقتى بولجادى. ەحوبانىڭ الدىندا ۇنامسىز ىستەردى بەرىلە ىستەپ، ونى قورلادى.
18 سوندىقتان ەحوبا يسرايلگە قاتتى قاھارلانىپ، ٶزىنىڭ كوز الدىنان الاستاتتى+. ول ياھۋدا رۋىنان باسقا ەشكىمدى قالدىرمادى.
19 ٴبىراق ياھۋدا حالقى دا قۇدايلارى ەحوبانىڭ وسيەتتەرىن ۇستانبادى+. ولار دا يسرايل ۇستانعان داستۇرگە ەلىكتەدى+.
20 سول سەبەپتى ەحوبا يسرايلدىڭ بارلىق ۇرپاعىنان باس تارتىپ، ولاردى ماسقارا قىلدى. ٶزىنىڭ كوز الدىنان قۇرىپ كەتكەندەرىنشە، ولاردى توناۋشىلارعا تالاتىپ قويدى.
21 ول ٴداۋىت ٷيىنىڭ قول استىنان يسرايلدى ٴبولىپ تاستادى، ال ولار وزدەرىنە نابات ۇلى ەروبوعامدى پاتشا ەتىپ قويدى+. ٴبىراق ەروبوعام يسرايلدى ەحوبانىڭ جولىنان تايدىرىپ، زور كۇناعا باتىردى.
22 سودان يسرايل حالقى ەروبوعامنىڭ كۇناكار جولىمەن جۇرەتىن بولدى+. سول كۇناكار ىستەردەن ايىرىلمادى.
23 ەحوبا پايعامبارلارى ارقىلى ٶزى ايتقانداي، يسرايلدى كوز الدىنان الاستاتىپ جىبەرگەنشە+، ولار العان بەتتەرىنەن قايتپادى. سوندىقتان يسرايل ٶز جەرىنەن اسسيرياعا جەر اۋدارىلىپ+، كۇنى بۇگىنگە دەيىن سوندا تۇرىپ جاتىر.
24 كەيىنىرەك اسسيريا پاتشاسى بابىلدىڭ، قۇت، اببا، حامات پەن سەفارايمنىڭ+ حالقىن اكەلىپ، يسرايلدىكتەردىڭ ورنىنا ساماريا قالالارىنا قونىستاندىردى. ولار ساماريانى يەمدەنىپ، قالالارىندا تۇراتىن بولدى.
25 سول جەرگە جاڭادان قونىستانعان كەزدە، بۇل حالىقتار ەحوبادان قورىقپايتىن*. سوندىقتان ەحوبا ارىستاندار+ جىبەرىپ، ولار جۇرتتىڭ ٴبىرازىن مەرت قىلدى.
26 سوندا اسسيريا پاتشاسىنا: «ٶزىڭىز جەر اۋدارىپ، ساماريا قالالارىنا قونىستاندىرعان حالىقتار سول ەلدىڭ قۇدايىنا قالاي تابىنۋ كەرەك ەكەنىن بىلمەيدى*. سوندىقتان ول ارىستاندار جىبەرىپ، جىرتقىشتار جۇرتتى قىرىپ جاتىر. ويتكەنى ولاردىڭ ەشقايسىسى سول ەلدىڭ قۇدايىنا قالاي تابىنۋ كەرەكتىگىن بىلمەيدى»،— دەگەن حابار جىبەرىلدى.
27 اسسيريا پاتشاسى: «سول ەلدەن جەر اۋدارىلعان ٴدىني قىزمەتكەرلەردىڭ ٴبىرىن ەلىنە قايتارىڭدار. ول سوندا تۇرىپ، جۇرتتى سول ەلدىڭ قۇدايىنا قالاي تابىنۋ كەرەكتىگىن ۇيرەتسىن»،— دەپ بۇيىردى.
28 وسىلاي ساماريادان جەر اۋدارىلعان ٴدىني قىزمەتكەرلەردىڭ ٴبىرى قايتا ورالىپ، بەتەلگە+ قونىستاندى. ول سوندا كوشىپ كەلگەن جۇرتقا ەحوبادان قورقۋدى* ۇيرەتەتىن بولدى+.
29 ٴبىراق ٵر حالىق ٶز قۇدايىنىڭ ٴمۇسىنىن جاساپ الىپ، كەزىندە ساماريالىقتار جاساعان عيبادات توبەلەرىندەگى ۇيلەرگە قويىپ قويدى. ٵربىر حالىق وزدەرى قونىستانعان قالالاردا سولاي ەتتى.
30 وسىلاي بابىلدىقتار سيكۋت-بەنوتتىڭ، قۇتتىقتار — نەرگالدىڭ، حاماتتىقتار+ — اشيمانىڭ،
31 اببالىقتار — نيبحاز بەن تارتاكتىڭ ٴمۇسىنىن جاساپ الدى. ال سەفارايمدىكتەر سەفارايم تاڭىرلەرى+ ادرامەلەح پەن انامەلەحكە ارناپ ۇلدارىن قۇرباندىققا شالىپ، وتقا ورتەيتىن.
32 ولار ەحوبادان قورقاتىن، ايتسە دە ٶز ارالارىنان عيبادات توبەلەرىندە قىزمەت ەتەتىن ٴدىني قىزمەتكەرلەر تاعايىندادى. سول ٴدىني قىزمەتكەرلەر عيبادات توبەلەرىندەگى ۇيلەردە قىزمەت اتقارىپ ٴجۇردى+.
33 وسىلايشا ولار ەحوبادان قورقاتىن، سويتە تۇرا وزدەرى جەر اۋدارىلىپ كەلگەن ەلدىڭ داستۇرىنە ساي، ٶز قۇدايلارىنا دا تابىناتىن+.
34 كۇنى بۇگىنگە دەيىن سول حالىقتار ٶز دىندەرىن ۇستانىپ كەلەدى. ولاردىڭ ەشقايسىسى ەحوباعا عيبادات ەتىپ*، ونىڭ جارلىقتارىنا، شەشىمدەرى مەن زاڭىنا ساي ٶمىر سۇرمەدى. ەحوبانىڭ جاقىپتىڭ (ال ونىڭ اتىن ٶزى يسرايل دەپ وزگەرتكەن بولاتىن+) ۇلدارىنا بەرگەن وسيەتتەرىن دە ۇستانبادى.
35 ەحوبا يسرايلدىكتەرمەن كەلىسىم جاساسقاندا+، ولارعا مىنانى بۇيىرعان بولاتىن: «باسقا قۇدايلاردى قاستەرلەپ، ولارعا تابىنباڭدار، قىزمەت تە ەتپەڭدەر، قۇرباندىق تا شالماڭدار+.
36 قايتا، قولىن سوزىپ، زور قۇدىرەتپەن وزدەرىڭدى مىسىر ەلىنەن الىپ شىققان ەحوبانى+ قاستەرلەڭدەر+، سوعان باس ۇرىپ، سوعان ارناپ قۇرباندىق شالىڭدار.
37 سونىڭ جازىپ بەرگەن جارلىقتارىن، شەشىمدەرىن، زاڭى مەن وسيەتتەرىن+ مۇقيات ورىنداڭدار. ودان باسقا ەشقانداي قۇدايدى قاستەرلەۋشى بولماڭدار.
38 مەنىڭ وزدەرىڭمەن جاساسقان كەلىسىمىمدى ۇمىتپاڭدار+. باسقا ەشقانداي قۇدايلاردى قاستەرلەۋشى بولماڭدار.
39 قايتا، قۇدايلارىڭ ەحوبانى قاستەرلەڭدەر. ويتكەنى سەندەردى بار جاۋلارىڭنان قۇتقاراتىن — سول».
40 ٴبىراق ولار قۇلاق اسپاي، وزدەرىنىڭ بۇرىنعى دىندەرىن ۇستانا بەردى+.
41 سول حالىقتار ەحوبادان قورقاتىن+، سويتە تۇرا وزدەرىنىڭ جاساپ العان مۇسىندەرىنە دە تابىنا بەردى. ولاردىڭ ۇلدارى مەن نەمەرەلەرى دە اتا-بابالارى ىسپەتتى، كۇنى بۇگىنگە دەيىن سولاي ەتىپ كەلەدى.
سىلتەمەلەر
^ سوزبە-ٴسوز «باسقا قۇدايلاردان قورقىپ».
^ ياعني ادام از نە كوپ تۇراتىنىنا قاراماي، كەز كەلگەن جەردە.
^ تۇسىندىرمەدەگى «قاسيەتتى اعاش باعانانى» قاراڭىز.
^ تۇسىندىرمەدەگى «قاسيەتتى اعاش باعانانى» قاراڭىز.
^ نەمەسە «ەحوباعا عيبادات ەتپەيتىن».
^ نەمەسە «ٴدىني جورالارىن بىلمەيدى».
^ نەمەسە «ەحوباعا عيبادات ەتۋدى».
^ سوزبە-ٴسوز «ەحوبادان قورقىپ».
