پاتشالار 2-جازبا 21:1—26
21 ماناسا+ 12 جاسىندا پاتشا بولىپ، يەرۋساليمدە 55 جىل بيلىك ەتتى+. ونىڭ اناسىنىڭ اتى حەپسيبا بولاتىن.
2 ماناسا كەزىندە ەحوبا يسرايلدىكتەردىڭ الدىنان قۋىپ شىققان حالىقتاردىڭ جەركەنىشتى ىستەرىن قايتالاپ+، ەحوبانىڭ الدىندا ۇنامسىز ىستەر ىستەدى+.
3 ول اكەسى ەزەكيا قۇرتىپ جىبەرگەن عيبادات توبەلەرىن+ قايتا سوقتى، باعالعا ارناپ قۇرباندىق ورىندارىن جانە قاسيەتتى باعانا*+ دا جاسادى. وسىلاي يسرايل پاتشاسى احابتىڭ ىستەرىنە ەلىكتەدى+. بۇنىمەن قويماي، بۇكىل كوك اسكەرىنە تابىنىپ، سولارعا قىزمەت ەتتى+.
4 ەرتەرەكتە ەحوبا: «مەن ٶز ەسىمىمدى يەرۋساليمدە ورنىقتىرامىن»،— دەگەن ەدى+. ال ماناسا ەحوبانىڭ ۇيىندە قۇرباندىق ورىندارىن جاسادى+.
5 ول ەحوبانىڭ ٷيىنىڭ ەكى اۋلاسىندا+ كۇللى كوك اسكەرىنە+ ارناپ قۇرباندىق ورىندارىن جاسادى.
6 سونىمەن قاتار ول ٶز ۇلىن قۇرباندىققا شالىپ، وتقا ورتەدى، سيقىرلىقپەن اينالىستى، بەلگىلەرگە قاراپ، بولاشاقتى بولجادى+، ارۋاق شاقىرۋشىلار مەن كورىپكەلدەر تاعايىندادى+. وسىلاي ەحوباعا ۇنامايتىن ىستەردى كوپتەپ ىستەپ، ونى قورلادى.
7 ماناسا ٶزى جاساتقان قاسيەتتى باعانا*+ ٴمۇسىنىن ەحوبانىڭ ۇيىنە قويىپ قويدى. ال وسى ٷي جونىندە قۇداي ٴداۋىت پەن ونىڭ ۇلى سۇلەيمەنگە بىلاي دەگەن ەدى: «مەن وسى ۇيدە، سونداي-اق كۇللى يسرايل رۋلارىنىڭ اراسىنان تاڭداپ العان يەرۋساليم قالاسىندا ٶز ەسىمىمدى ماڭگىگە ورنىقتىرامىن+.
8 يسرايل حالقى ٶز قىزمەتشىم مۇسا ارقىلى بەرگەن زاڭىمدى تولىقتاي ۇستانىپ، بۇيرىقتارىمنىڭ ٴبارىن مۇقيات ورىنداپ جۇرسە+، مەن ەندى قايتىپ ەشقاشان ولاردى اتا-بابالارىنا بەرگەن وسى جەردەن الاستاتىپ، قاڭعىرتىپ جىبەرمەيمىن+».
9 ٴبىراق جۇرت تىڭدامادى. ماناسا ولاردى تەرىس جولعا ٴتۇسىرىپ، ابدەن اداستىردى. ولار كەزىندە ەحوبا يسرايلدىكتەردىڭ الدىنان قۇرتىپ جىبەرگەن حالىقتاردان+ دا بەتەر زۇلىمدىق جاسادى.
10 ەحوبا مىناداي حابارمەن تالاي رەت پايعامبارلارىن جىبەردى+:
11 «ماناسا پاتشا وسىنداي جيرەنىشتى ىستەر ىستەپ، وزىنە دەيىن وسىندا ٶمىر سۇرگەن امورلىقتاردان+ دا اسىپ ٴتۇستى+. ول جەركەنىشتى پۇتتارىمەن ياھۋدانى كۇناعا باتىردى.
12 سوندىقتان يسرايلدىڭ قۇدايى ەحوبا مىنانى ايتادى: —مەن يەرۋساليم قالاسى مەن ياھۋدا ەلىن زور پالەگە ۇشىراتامىن+. سول تۋرالى ەستىگەن ادامنىڭ قۇلاعى شىڭىلدايتىن بولادى+.
13 مەن يەرۋساليمنىڭ ۇستىنەن سامارياعا+ قولدانعان ولشەۋىش ٴجىپتى كەرەمىن+، احابتىڭ ۇيىنە قولدانعان تىكتەگىشتى قولدانامىن+. جۇرتتىڭ بوساعان تاباقتى ٴسۇرتىپ، توڭكەرىپ قوياتىنىنداي، مەن دە يەرۋساليمنىڭ حالقىن تىپ-تيپىل ەتىپ قۇرتىپ جىبەرەمىن+.
14 مەنشىكتى حالقىمنىڭ تامتىعىن تاستاپ كەتىپ+، جاۋلارىنىڭ قولىنا بەرەمىن. بارلىق جاۋلارى ولاردى تالان-تاراج ەتىپ، ولجالايدى+.
15 ويتكەنى ولار ماعان ۇنامسىز ىستەر ىستەپ، اتا-بابالارى مىسىردان شىققاننان كۇنى بۇگىنگە دەيىن مەنى قورلاۋدى قويار ەمەس+».
16 ماناسانىڭ ياھۋدا حالقىنىڭ ەحوباعا ۇنامسىز ىستەر ىستەۋىنە تۇرتكى بولىپ، كۇناعا باتقانى ٶز الدىنا، ول يەرۋساليمدى و شەتىنەن بۇ شەتىنە دەيىن كىناسىز ادامداردىڭ قانىنا تولتىردى+.
17 ماناسانىڭ باسقا دا ىستەرى مەن جاساعان كۇنالارى ياھۋدا پاتشالارىنىڭ تاريحى باياندالعان كىتاپتا جازىلعان.
18 اقىرىندا ول اتا-بابالارىنا قوسىلدى دا، سۇيەگى ٶز ۇيىندەگى باققا، ۇزانىڭ باعىنا قويىلدى+. ال ورنىنا ۇلى امون تاققا وتىردى.
19 امون+ 22 جاسىندا پاتشا بولىپ، يەرۋساليمدە ەكى جىل بيلىك ەتتى+. ونىڭ اناسى جوتپالىق حارۋزدىڭ قىزى مەشۋلەمەت بولاتىن.
20 امون اكەسى ماناسا سياقتى، ەحوبانىڭ الدىندا ۇنامسىز ىستەر ىستەدى+.
21 ول اكەسى جۇرگەن جولداردان تايماي، اكەسى قىزمەت ەتكەن جەركەنىشتى پۇتتارعا قىزمەت ەتىپ، سولارعا تابىندى+.
22 وسىلاي اتا-بابالارىنىڭ قۇدايى ەحوبادان بەزىپ كەتتى، ول ەحوبانىڭ جولىمەن جۇرمەدى+.
23 اقىرى قىزمەتشىلەرى امونعا قاستاندىق جاساپ، پاتشانى ٶز ۇيىندە ٶلتىرىپ كەتتى.
24 ٴبىراق حالىق امون پاتشاعا قاستاندىق جاساعانداردىڭ ٴبارىن ٶلتىرىپ، اكەسىنىڭ ورنىنا ۇلى جوسيانى پاتشا ەتىپ قويدى+.
25 اموننىڭ باسقا دا ىستەرى ياھۋدا پاتشالارىنىڭ تاريحى باياندالعان كىتاپتا جازىلعان.
26 ونىڭ دەنەسى ۇزانىڭ باعىنا قويىلدى+، ال ورنىنا ۇلى جوسيا+ پاتشا بولدى.
سىلتەمەلەر
^ تۇسىندىرمەدەگى «قاسيەتتى اعاش باعانانى» قاراڭىز.
^ تۇسىندىرمەدەگى «قاسيەتتى اعاش باعانانى» قاراڭىز.