پاتشالار 2-جازبا 22:1—20
22 جوسيا+ سەگىز جاسىندا پاتشا بولىپ، يەرۋساليمدە 31 جىل بيلىك ەتتى+. ونىڭ اناسى بوسقاتتىق+ اداياحتىڭ قىزى ەديدا بولاتىن.
2 جوسيا ەحوبانىڭ الدىندا ۇنامدى ىستەر جاساپ، ارعى اتاسى ٴداۋىتتىڭ جولىمەن ٴجۇردى+، ٵرى ودان وڭعا دا، سولعا دا اۋىتقىمادى.
3 پاتشالىق قۇرۋىنىڭ ون سەگىزىنشى جىلى جوسيا پاتشا ٶزىنىڭ حاتشىسى مەشۋلامنىڭ ۇرپاعى اسالياح ۇلى شافاندى ەحوبانىڭ ۇيىنە جىبەرىپ+، بىلاي دەدى:
4 «باس ٴدىني قىزمەتكەر حەلكياعا+ بارىپ ايت، جۇرت ەحوبانىڭ ۇيىنە اكەلىپ، قاقپا كۇزەتشىلەرى جيناپ+ تاپسىرعان بارلىق اقشانى ساناسىن+.
5 جينالعان اقشا ەحوبانىڭ ۇيىندەگى جوندەۋ جۇمىسىن باسقارۋشىلارعا بەرىلسىن. ولار سول اقشادان ەحوبانىڭ ۇيىندەگى بۇزىلعان جەرلەردى جوندەپ جاتقان جۇمىسشىلاردىڭ+،
6 ياعني ۇستالار، قۇرىلىسشىلار مەن تاس قالاۋشىلاردىڭ اقىسىن تولەسىن. جوندەۋ جۇمىستارىنا قاجەتتى اعاشتار مەن قاشالعان تاستار دا وسى اقشاعا الىنسىن+.
7 اقشانى جۇمساپ جاتقاندار سەنىمدى ادامدار، سوندىقتان ولاردان ەسەپ تالاپ ەتۋدىڭ قاجەتى جوق+».
8 كەيىنىرەك باس ٴدىني قىزمەتكەر حەلكيا حاتشى شافانعا+: «مەن ەحوبانىڭ ۇيىنەن زاڭ كىتابىن+ تاۋىپ الدىم»،— دەدى دە، كىتاپتى سوعان بەردى. ال ول زاڭدى وقي باستادى+.
9 بۇدان كەيىن حاتشى شافان پاتشاعا بارىپ: «قىزمەتشىلەرىڭىز ەحوبانىڭ ۇيىندەگى جاشىكتەردەن اقشانى الىپ، جوندەۋ جۇمىستارىن باسقارۋشىلاردىڭ قولىنا تاپسىردى»،— دەدى+.
10 سوسىن ول: «ٴدىني قىزمەتكەر حەلكيا ماعان مىنا كىتاپتى+ بەردى»،— دەپ قوستى دا، پاتشانىڭ الدىندا كىتاپتى وقي باستادى.
11 پاتشا زاڭ كىتابىندا نە جازىلعانىن ەستىگەن بويدا، كيىمىنىڭ ٶڭىرىن ايىرىپ جىبەردى+.
12 بۇدان كەيىن ٴدىني قىزمەتكەر حەلكياعا، شافان ۇلى احيقامعا+، ميحايا ۇلى احبورعا، حاتشى شافانعا جانە قىزمەتشىسى اساياعا بىلاي دەپ تاپسىردى:
13 «بارىپ، ەحوبادان مەنىڭ اتىمنان جانە مىنا حالىق پەن بۇكىل ياھۋدانىڭ اتىنان تابىلعان كىتاپتاعى سوزدەر تۋرالى سۇراپ كەلىڭدەر. ويتكەنى اتا-بابامىز وسى كىتاپتا بىزگە قاتىستى جازىلعان نۇسقاۋلاردى ورىنداماي، ونداعى سوزدەرگە مويىنسۇنبادى. سوندىقتان ەحوبا بىزگە قاھارىن توگىپ جاتىر+».
14 سودان ٴدىني قىزمەتكەر حەلكيا، احيقام، احبور، شافان مەن اسايا ولداما پايعامبارعا+ باردى. ول كيىم قويماسىنىڭ باسقارۋشىسى حاسرانىڭ نەمەرەسى، تيقۋا ۇلى شالۋمنىڭ ايەلى ەدى. ولداما يەرۋساليم قالاسىنىڭ ەكىنشى اۋدانىندا تۇراتىن. پاتشا جىبەرگەن كىسىلەر سول جەرگە كەلىپ، وعان بۇيىمتايلارىن ايتتى+.
15 پايعامبار ايەلدىڭ جاۋابى مىناۋ بولدى: «يسرايلدىڭ قۇدايى ەحوبا بىلاي دەيدى: —سەندەردى ماعان جىبەرگەن كىسىگە ايتىڭدار.
16 ەحوبا بىلاي دەيدى: «مەن وسى جەردى جانە ونىڭ تۇرعىندارىن اپاتقا ۇشىراتامىن. ياھۋدا پاتشاسى سول كىتاپتان وقىعان+ سوزدەردىڭ ٴبارىن باستارىنا تۇسىرەمىن.
17 ويتكەنى ولار مەنەن بەزىپ، ٶز قولدارىمەن جاساعان بوتەن قۇدايلارعا+ قۇرباندىق ٴتۇتىنىن تۇتەتىپ+، مەنى قورلاۋدا. سوندىقتان مەن وسى جەرگە قاھارىمدى لاۋلاتامىن، ٵرى ول ەش سونبەيدى+».
18 سوسىن ولداما پايعامبار بىلاي دەپ ٴسوزىن جالعادى: «ال سەندەردى ەحوبانىڭ ەركىن سۇراۋعا جىبەرگەن ياھۋدا پاتشاسىنا مىنانى ايتىڭدار: —يسرايل قۇدايى ەحوبا ٶزىڭ ەستىگەن سوزدەر جايلى بىلاي دەيدى:
19 «سەن مەنىڭ «وسى جەر مەن ونىڭ تۇرعىندارى وزگەلەردە ۇرەي تۋدىراتىنداي كۇيگە ۇشىرايدى ٵرى قارعىسقا قالادى» دەگەن سوزدەرىمدى ەستىگەندە، جۇرەگىڭدى قاسارىستىرماي، قايتا، ەحوبانىڭ الدىندا كىشىرەيىپ+، كيىمىڭنىڭ ٶڭىرىن ايىردىڭ+. سول ٷشىن مەن دە سەنىڭ سوزدەرىڭدى ەستىدىم. مۇنى ايتىپ وتىرعان — ەحوبا.
20 سوندىقتان دا سەنى اتا-بابالارىڭا قوسامىن دا، تىنىشتىقتا قابىرگە قويىلاسىڭ. وسىلاي مەن وسى جەرگە جىبەرەتىن اپاتتى كورمەيسىڭ». سودان جىبەرگەن كىسىلەرى پاتشاعا وسىنداي جاۋاپ الىپ كەلدى.