پاتشالار 2-جازبا 25:1—30
25 ياھۋدا پاتشاسى سەدەكيانىڭ بيلىك قۇرۋىنىڭ توعىزىنشى جىلى، ونىنشى ايدىڭ ونىنشى كۇنى بابىل پاتشاسى ناۆۋحودونوسور+ بۇكىل اسكەرىمەن يەرۋساليمگە قارسى اتتاندى+. ول قالاعا قارسى قوس تىگىپ، ونى قورشاۋعا الۋ ٷشىن اينالدىرا دۋال تۇرعىزدى+.
2 قالا سەدەكيا پاتشانىڭ بيلىگىنىڭ ون ٴبىرىنشى جىلىنا دەيىن قورشاۋدا بولدى.
3 ٴتورتىنشى ايدىڭ توعىزىنشى كۇنى قالادا اشتىق ۇدەپ تۇردى+. ەلدە ازىق-تۇلىك تاۋسىلعان ەدى+.
4 وسى كەزدە حالدەيلەر قالا قابىرعاسىنىڭ ٴبىر جەرىن بۇزدى+. سوندا ياھۋدي ساربازدارىنىڭ ٴبارى ٴتۇن جامىلىپ قاشىپ كەتپەك بولدى. ولار قالانى حالدەيلەر قورشاپ تۇرعانىنا قاراماي، پاتشا باعىنىڭ ماڭىنداعى ەكى دۋالدىڭ اراسىندا ورنالاسقان قاقپا ارقىلى قاشتى. پاتشا اراباعا قاراي بەت الدى+.
5 الايدا حالدەي اسكەرى پاتشانىڭ سوڭىنا ٴتۇسىپ، يەريحوننىڭ ٴشول دالاسىندا قۋىپ جەتتى. سوندا بۇكىل جاساعى ونى تاستاي سالا، جان-جاققا قاشىپ كەتتى.
6 حالدەيلەر سەدەكيانى ۇستاپ الىپ+، ريبلاداعى بابىل پاتشاسىنىڭ الدىنا اپاردى. پاتشا وعان سول جەردە ۇكىم شىعاردى.
7 حالدەيلەر سەدەكيانىڭ ۇلدارىن ونىڭ كوز الدىندا شاۋىپ ٶلتىردى. سوسىن ناۆۋحودونوسور سەدەكيانىڭ كوزىن ويىپ الدى دا، ونى مىس كىسەنمەن بۇعاۋلاپ، بابىلعا اكەتتى+.
8 بەسىنشى ايدىڭ جەتىنشى كۇنى، ياعني بابىل پاتشاسى ناۆۋحودونوسوردىڭ بيلىك قۇرۋىنىڭ ون توعىزىنشى جىلى، باس قورعاۋشى ٵرى بابىل پاتشاسىنىڭ قىزمەتشىسى نابۋزاردان+ يەرۋساليمگە كەلدى+.
9 ول ەحوبانىڭ ۇيىنە+، پاتشا سارايىنا+ جانە قالاداعى ۇيلەردىڭ بارىنە وت قويدى+. سونداي-اق بارلىق بەدەلدى ادامداردىڭ ۇيلەرىن ورتەپ جىبەردى+.
10 باس قورعاۋشىمەن كەلگەن كۇللى حالدەي اسكەرى يەرۋساليمدى قورشاعان قابىرعانى قيراتتى+.
11 باس قورعاۋشى نابۋزاردان قالادا قالعان حالىقتى جانە بابىل پاتشاسىنىڭ جاعىنا شىققاندار مەن قالعان جۇرتتىڭ ٴبارىن جەر اۋداردى+.
12 الايدا باس قورعاۋشى تاقىر كەدەيلەردىڭ كەيبىرىن جۇزىمدىكتەردە جانە باسقا دا جۇمىستاردى ىستەۋ ٷشىن ەلدە قالدىرىپ كەتتى+.
13 حالدەيلەر ەحوبانىڭ ۇيىندەگى مىس باعانالاردى+، ەحوبانىڭ ۇيىندەگى كەبەجە اربالار+ مەن مىس تەڭىزدى+ بولشەكتەپ سىندىرىپ، مىستى بابىلعا الىپ كەتتى+.
14 سونداي-اق ولار عيباداتحاناداعى قىزمەت كەزىندە قولداناتىن كۇل شىعاراتىن شەلەكتەر، كۇرەكتەر، شام سوندىرگىشتەر، توستاعاندار مەن باسقا دا مىس بۇيىمداردىڭ ٴبارىن اكەتتى.
15 باس قورعاۋشى ساف التىن مەن تازا كۇمىستەن جاسالعان كۇلسالعىشتار مەن تاباقتاردى+ دا الدى+.
16 سۇلەيمەن پاتشا ەحوبانىڭ ۇيىنە ارناپ جاساتقان ەكى باعاناداعى، مىس تەڭىز بەن كەبەجە اربالارداعى مىستىڭ سالماعىن ولشەۋ مۇمكىن ەمەس ەدى+.
17 باعانانىڭ ٵرقايسىسىنىڭ بيىكتىگى 18 شىنتاق*+، ال توبەسىندەگى مىستان جاسالعان ٴتاجدىڭ بيىكتىگى 3 شىنتاق بولاتىن. ٴتاجدى بەزەندىرگەن تور مەن اينالدىرا كومكەرگەن انار جەمىستەرى تۇگەل مىستان جاسالعان ەدى+. ەكىنشى باعانا مەن ونداعى ورنەكتەر دە ٴدال وسىنداي بولاتىن.
18 بۇعان قوسا، باس قورعاۋشى وزىمەن بىرگە جوعارعى ٴدىني قىزمەتكەر سەراياحتى+، ودان كەيىنگى ٴدىني قىزمەتكەر سافونيانى+ جانە ٷش قاقپا كۇزەتشىسىن الىپ كەتتى+.
19 سونداي-اق ول قالادان ساربازداردىڭ ۇستىنەن قويىلعان ٴبىر ساراي قىزمەتكەرىن، پاتشانىڭ بەس جەكە كەڭەسشىسىن، قولباسشىنىڭ حاتشىسىن، ونىڭ مىندەتىنە اسكەر جيناۋ كىرەتىن، سونداي-اق قالانىڭ 60 قاراپايىم ادامىن اكەتتى.
20 باس قورعاۋشى نابۋزاردان+ ولاردىڭ ٴبارىن ريبلاداعى بابىل پاتشاسىنا اپاردى+.
21 پاتشا ولاردى حامات جەرىندەگى+ ريبلادا ولىمگە كەسىپ، مەرت قىلدى. وسىلاي ياھۋدا حالقى ٶز ەلىنەن باسقا جاققا جەر اۋدارىلىپ كەتتى+.
22 بابىل پاتشاسى ناۆۋحودونوسور ٶزى ياھۋدا جەرىندە قالدىرعان حالىقتى شافاننىڭ+ نەمەرەسى احيقام+ ۇلى عودالياحتىڭ+ قاراۋىنا تاپسىردى+.
23 بابىل پاتشاسىنىڭ وسىلاي ەتكەنىن ەستىگەن كۇللى قولباسىلار مەن ولاردىڭ ادامدارى دەرەۋ ميسپاداعى عودالياحقا كەلدى. وعان كەلگەن مىنا كىسىلەر ەدى: نەتانياح ۇلى ىسماعۇل، قارەياح ۇلى جوحانان، نەتوپالىق تانحۋمەت ۇلى سەراياح، ماعاقاتتىق كىسىنىڭ ۇلى يازانياح جانە سولارعا ەرگەن ادامدار+.
24 عودالياح ولارعا جانە قاسىنداعى ادامدارىنا انت بەرىپ، بىلاي دەدى: «حالدەيلەرگە قىزمەت ەتۋدەن قورىقپاڭدار. وسى ەلدە تۇرىپ، بابىل پاتشاسىنا قىزمەت ەتىڭدەر، سوندا جاعدايلارىڭ جاقسى بولادى»+.
25 جەتىنشى ايدا پاتشا تۇقىمىنان شىققان ەليشامانىڭ نەمەرەسى نەتانياح ۇلى ىسماعۇل+ ون ادامىمەن ميسپاعا كەلدى. ولار عودالياحتى ٶلتىرىپ كەتتى، قاسىندا بولعان ياھۋديلەر مەن حالدەيلەردى دە ٴتىرى قالدىرمادى+.
26 بۇدان كەيىن ۇلكەندى-كىشىلى كۇللى جۇرت، اسكەرباسىلارىمەن قوسا، حالدەيلەردەن قورقىپ، مىسىرعا قاشىپ كەتتى+.
27 ياھۋدا پاتشاسى ەحونيا+ جەر اۋدارىلعاننان كەيىن وتىز جەتىنشى جىلدىڭ ون ەكىنشى ايىنىڭ جيىرما جەتىنشى كۇنى بابىل پاتشاسى ەبىل-مەروداح ياھۋدا پاتشاسى ەحونيانى قاماۋدان بوساتتى. بۇل ەبىل-مەروداحتىڭ بيلىك قۇرۋىنىڭ ٴبىرىنشى جىلى بولاتىن+.
28 ول ەحونيامەن جىلى سويلەسىپ، ونىڭ تاعىن بابىلدا ٶز قاسىندا بولعان باسقا پاتشالاردىكىنەن دە جوعارى قويدى.
29 ەحونيا قاماۋدا كيگەن كيىمدەرىن تاستاپ، ٶمىرىنىڭ سوڭىنا دەيىن پاتشا داستارقانىنان تاماقتانىپ ٴجۇردى.
30 وسىلاي بابىل پاتشاسى ەحونياعا كۇن سايىن، عۇمىر بويى قاجەتتى ازىق-اۋقاتىن بەرىپ وتىردى.
سىلتەمەلەر
^ 1 شىنتاق 5.44 سانتيمەترگە تەڭ. B14 قوسىمشاسىن قاراڭىز.
