پاتشالار 2-جازبا 7:1—20
7 ەلىشە بىلاي دەدى: «ەحوبانىڭ سوزىنە قۇلاق تۇرىڭدەر! ەحوبا مىنانى ايتادى: —ەرتەڭ شامامەن وسى ۋاقىتتا ساماريا قاقپاسىنىڭ الدىندا* ٴبىر سەا* تاڭداۋلى ۇننىڭ قۇنى ٴبىر شەكەل* كۇمىسكە، ەكى سەا ارپانىڭ دا قۇنى ٴبىر شەكەل كۇمىسكە تەڭ بولادى+».
2 سول كەزدە پاتشانى دەمەپ جۇرەتىن كومەكشىسى شىنايى قۇداي ادامىنا: «ەحوبا كوك قاقپالارىن اشىپ جىبەرسە دە، بۇلاي بولۋى مۇمكىن ەمەس!»— دەدى+. ەلىشە وعان: «سەن مۇنى ٶز كوزىڭمەن كورەسىڭ+، ٴبىراق جەمەيسىڭ!»— دەپ جاۋاپ بەردى+.
3 قالا قاقپاسىنىڭ كىرەبەرىسىندە الاپەسپەن اۋىراتىن ٴتورت كىسى وتىراتىن+. ولار ٶزارا بىلاي دەستى: «وسىندا ٶلىم كۇتىپ وتىرا بەرەمىز بە؟
4 ەگەر قالاعا بارۋدى شەشسەك، سول جەردە اشتان+ ولەمىز. وسىندا وتىرا بەرسەك تە، ٴبارىبىر ولەمىز. سوندىقتان سيريالىقتاردىڭ قوسىنا بارايىق. ولار جانىمىزدى السا — ولەرمىز، الماسا — امان قالارمىز».
5 كەش تۇسكەندە تورتەۋى تۇرىپ، سيريالىقتاردىڭ قوسىنا بەت الدى. قوستىڭ شەتىنە تاياپ بارىپ قاراسا، وندا ٴتىرى جان جوق ەكەن.
6 ويتكەنى ەحوبا سيريا قوسىنا سوعىس اربالارىنىڭ ساتىرىن، اتتار مەن قالىڭ قولدىڭ ٴدۇبىرىن ەستىرتكەن ەدى+. سوندا ولار: «قۇرىدىق! يسرايل پاتشاسى بىزگە قارسى حەت پاتشالارى مەن مىسىر پاتشالارىن جالداپتى!»— دەستى.
7 ٴسۇيتىپ، ەكى كەشتىڭ اراسىندا ورىندارىنان تۇرا سالا، شاتىرلارىن، اتتارى مەن ەسەكتەرىن، بۇكىل قوستارىن سول كۇيى تاستاپ، باسساۋعالاپ قاشا جونەلدى.
8 قوستىڭ شەتىنە تاياپ كەلگەن الاپەس كىسىلەر بولسا شاتىرلاردىڭ بىرىنە كىرىپ، ٸشىپ-جەپ الدى دا، ونداعى التىن-كۇمىس پەن كيىم-كەشەكتى الىپ كەتىپ، تىعىپ قويدى. سوسىن قايتا ورالىپ، باسقا ٴبىر شاتىرعا كىردى دە، ونداعى زاتتاردى دا الىپ، جاسىرىپ قويدى.
9 اقىرىندا، ولار ٴبىر-بىرىنە: «مۇنىمىز دۇرىس ەمەس! مىنا جاقسى حاباردى جۇرتقا ايتۋ كەرەك! تاڭ اتقانشا جۇرتقا ايتپاي كۇتىپ وتىرا بەرسەك، جازاعا تارتىلامىز. جۇرىڭدەر، پاتشانىڭ ۇيىنە حابارلايىق»،— دەدى.
10 سودان ولار قالاعا بارىپ، قاقپا كۇزەتشىلەرىنە: «ٴبىز سيريالىقتاردىڭ قوسىنا بارىپ كەلدىك. وندا ٴتىرى جان جوق ەكەن، اينالا تىم-تىرىس. تەك بايلاۋلى تۇرعان اتتار مەن ەسەكتەردى عانا كوردىك، شاتىرلارى دا سول كۇيى قالىپتى!»— دەپ داۋىستادى.
11 سول-اق ەكەن قاقپا كۇزەتشىلەرى پاتشا ۇيىندەگى ادامدارعا داۋىستاپ، حاباردى جەتكىزدى.
12 پاتشا تۇندە توسەگىنەن تۇرىپ، قىزمەتشىلەرىنە مىنانى ايتتى: «سيريالىقتاردىڭ بىزگە نە ىستەگەندەرىن ٴتۇسىندىرىپ بەرەيىن: ولار ٴبىزدىڭ اشىعىپ جۇرگەنىمىزدى بىلەدى+. سوندىقتان «ولار قالادان شىعادى، سوندا وزدەرىن تىرىدەي ۇستاپ الايىق تا، قالالارىنا باسىپ كىرەيىك» دەگەن ويمەن قوستارىن تاستاپ، دالادا جاسىرىنىپ جاتىر+».
13 سوندا قىزمەتشىلەرىنىڭ ٴبىرى پاتشاعا: «بىرنەشە ادام قالادا قالعان بەس اتتى السىن دا، بولعان جايتتىڭ ٴمان-جايىن انىقتاپ كەلسىن. سول جاقتا قازا بولسا، ەش وكىنىش جوق. ويتكەنى وسىندا قالسا، كۇللى يسرايل جۇرتىمەن بىرگە ٴبارىبىر ولەدى. ەرتە مە، كەش پە — ٴبارىمىز اشتان قىرىلامىز. ودان دا ولاردى سوندا جىبەرەيىك»،— دەپ ۇسىندى.
14 وسىلاي ولار ەكى ارباعا ات جەگىپ، سيريالىقتاردىڭ قوسىنا ادامدار جىبەردى. پاتشا ولارعا: «بارىپ، ٴمان-جايدى ٴبىلىپ كەلىڭدەر»،— دەپ تاپسىردى.
15 الگىلەر سيريالىقتاردىڭ ىزىمەن يوردانعا دەيىن باردى. جول بويىندا ابدىراپ قاشقان جاۋدىڭ تاستاپ كەتكەن كيىم-كەشەكتەرى مەن جابدىقتارى كوپ ەكەن. حابارشىلار كورگەن-بىلگەندەرىن پاتشاعا ايتىپ كەلدى.
16 بۇدان كەيىن حالىق قالادان شىعىپ، سيريالىقتاردىڭ قوسىن تونادى. سوندا ەحوبانىڭ سوزىنە ساي، ٴبىر سەا تاڭداۋلى ۇننىڭ قۇنى ٴبىر شەكەل كۇمىسكە، ەكى سەا ارپانىڭ دا قۇنى ٴبىر شەكەل كۇمىسكە تەڭ بولدى+.
17 پاتشا ٶزىن دەمەپ جۇرگەن كومەكشىسىن قاقپا كۇزەتىن باسقارۋعا تاعايىندادى. ٴبىراق ول قاقپادان وتكەن جۇرتتىڭ اياعىنىڭ استىندا قالىپ، تاپتالىپ ٶلدى. وسىلاي شىنايى قۇداي ادامىنىڭ پاتشا وعان كەلگەندە ايتقان ٴسوزى جۇزەگە استى.
18 ٴبارى دە شىنايى قۇداي ادامىنىڭ پاتشاعا ايتقانىنداي بولدى. ول: «ەرتەڭ شامامەن وسى ۋاقىتتا ساماريا قاقپاسىنىڭ الدىندا ٴبىر سەا تاڭداۋلى ۇننىڭ قۇنى ٴبىر شەكەل كۇمىسكە، ەكى سەا ارپانىڭ دا قۇنى ٴبىر شەكەل كۇمىسكە تەڭ بولادى»،— دەگەن ەدى+.
19 سول كەزدە پاتشانىڭ كومەكشىسى: «ەحوبا كوك قاقپالارىن اشىپ جىبەرسە دە، بۇلاي بولۋى مۇمكىن ەمەس!»— دەگەن بولاتىن. ەلىشە بولسا: «سەن مۇنى ٶز كوزىڭمەن كورەسىڭ، ٴبىراق جەمەيسىڭ!»— دەپ جاۋاپ بەرگەن ەدى.
20 سولاي بولدى دا، ويتكەنى قاقپادان وتكەن جۇرت ونى تاپتاپ ٶلتىردى.
سىلتەمەلەر
^ نەمەسە «ساماريا بازارلارىندا».
^ 1 سەا 33.7 ليترگە تەڭ. B14 قوسىمشاسىن قاراڭىز.
^ 1 شەكەل 4.11 گرامعا تەڭ. B14 قوسىمشاسىن قاراڭىز.