پەتىردىڭ 1-حاتى 1:1—25
1 مەن، يسا ٴماسىحتىڭ ەلشىسى+ پەتىر، پونت، عالاتيا، كاپادوكيا+، ازيا* مەن ٴبۇتىنيا ايماقتارىنا شاشىراپ كەتىپ، سوندا ۋاقىتشا تۇرىپ جاتقان قۇدايدىڭ تاڭداپ العاندارىنا جازىپ وتىرمىن.
2 سەندەر مويىنسۇنعىش بولىپ، يسا ٴماسىحتىڭ قانىمەن بۇركىلۋلەرىڭ ٷشىن+، قۇداي اكەنىڭ الدىن الا بىلدىرۋىمەن تاڭداپ الىنىپ+، رۋح ارقىلى قاسيەتتى بولدىڭدار+.
سەندەرگە قۇدايدىڭ راقىمى مەن تىنىشتىعى مولىنان جاۋا بەرسىن!
3 يەمىز يسا ٴماسىحتىڭ قۇدايى ٵرى اكەسى ماداقتالسىن! ول بىزگە زور مەيىرىم كورسەتىپ، يسا ٴماسىحتى ولىمنەن قايتا ٴتىرىلتۋ+ ارقىلى ٴبىزدى جاڭادان تۋعىزىپ+، ٴتىرى ٷمىت بەردى+،
4 سونداي-اق شىرىمەس، ارامدالماعان، سولمايتىن مۇرا سيلادى+. بۇل مۇرا سەندەر ٷشىن كوكتە ساقتاۋلى+.
5 سوڭعى ۋاقىتتا ايقىن كورىنەتىن قۇتقارىلۋعا يە بولۋلارىڭ ٷشىن، قۇداي وزىنە سەنۋشى سەندەردى ٶز كۇشىمەن قورعاپ وتىر.
6 سوندىقتان دا ٵرتۇرلى سىناقتارعا كەزىگىپ، از ۋاقىت قايعىرۋعا تۋرا كەلسە دە، مەيلىنشە قۋانىپ جۇرسىڭدەر+.
7 ويتكەنى يسا ٴماسىح اشىق كورىنگەندە، وتپەن سىنالسا* دا+، جويىلىپ كەتەتىن التىننان الدەقايدا باعالى ٵرى سىنالعان سەنىمدەرىڭ ارقىلى ماداق، ۇلىلىق پەن قۇرمەتكە بولەنەسىڭدەر+.
8 سەندەر ونى ەشقاشان كورمەسەڭدەر دە، سۇيەسىڭدەر. قازىر دە كورىپ جۇرگەن جوقسىڭدار، سوندا دا وعان سەنىپ، سوزبەن جەتكىزە المايتىن زور قۋانىشپەن شاتتانۋداسىڭدار.
9 ويتكەنى سەنىمدەرىڭ ٷشىن سي رەتىندە جاندارىڭنىڭ قۇتقارىلاتىنىنا سەنىمدىسىڭدەر+.
10 سەندەرگە كورسەتىلەتىن راقىم جونىندە الدىن الا ايتقان پايعامبارلاردىڭ ىنتالى ىزدەنىستەرى مەن مۇقيات زەرتتەۋلەرى ٴدال وسى قۇتقارىلۋ جايىندا بولاتىن+.
11 ولار وزدەرىندەگى كيەلى رۋحتان ٴماسىحتىڭ شەگەتىن ازابى+، سونداي-اق ارتىنان بولەنەتىن ۇلىلىعى جونىندە الدىن الا كۋالىك الىپ، بۇلاردىڭ ناقتى قاشان نەمەسە قانداي ۋاقىتتا بولاتىنىنا+ نۇسقايتىنىن تىنىمسىز زەرتتەۋمەن بولدى.
12 ولارعا وزدەرىنە ەمەس، سەندەرگە قىزمەت ەتكەندەرى اشىلدى: ولار كوكتەن كەلگەن كيەلى رۋحتىڭ كومەگىمەن+ ىزگى حاباردى جاريالاپ جۇرگەندەر ارقىلى سەندەرگە قازىر وزدەرىڭە جاريالانىپ جاتقان نارسەلەردى جەتكىزدى. بۇلاردى ٴتۇسىنۋدى ٴتىپتى پەرىشتەلەر دە قاتتى قالايدى.
13 سوندىقتان اقىل-ويلارىڭدى ٸس-ارەكەتكە دايىن ۇستاڭدار+! سانالارىڭ بارىنشا سەرگەك بولسىن+! يسا ٴماسىح اشىق كورىنەتىن كەزدە وزدەرىڭە كورسەتىلەتىن راقىمعا ٷمىت ارتىڭدار.
14 ٴتىلالعىش بالالارداي بولىپ، قۇدايدى بىلمەي تۇرعان كەزدەرىڭدەگى قالاۋلارىڭ بويىنشا ٶمىر ٴسۇرۋدى قويىڭدار.
15 قايتا، وزدەرىڭدى شاقىرعان كيەلى قۇداي سياقتى، سەندەر دە بارلىق ٸس-ارەكەتتەرىڭدە كيەلى بولىڭدار+.
16 ويتكەنى جازبادا: «كيەلى بولىڭدار، سەبەبى مەن كيەلىمىن»+،— دەلىنگەن عوي.
17 ەشكىمدى الالاماي+، اركىمدى ىسىنە قاراي سوتتايتىن اكەگە دۇعا ەتىپ جۇرسەڭدەر، ۋاقىتشا تۇرىپ جاتقان وسى دۇنيەدە ودان قورقىپ ارەكەت ەتىڭدەر+.
18 ويتكەنى سەندەر مىنانى بىلەسىڭدەر: اتا-بابالارىڭنان جەتكەن پايداسىز ٶمىر سالتىنان كۇمىس نە التىن سياقتى قۇرىپ جوق بولاتىن نارسەلەرمەن ازات ەتىلگەن جوقسىڭدار+،
19 قايتا، ەش كەمىستىگى جوق ٵرى كىرشىكسىز توقتىنىڭ+ قانى ىسپەتتى ٴماسىحتىڭ+ اسا باعالى قانىمەن ازات ەتىلدىڭدەر*+.
20 راس، قۇداي ونى دۇنيەنىڭ نەگىزى قالانعاننان* بۇرىن تاڭداپ العان ەدى+، ٴبىراق سەندەردىڭ يگىلىكتەرىڭ ٷشىن ول اقىرعى ۋاقىتتا اشىق كورىندى+،
21 سونداي-اق ول ارقىلى سەندەر قۇدايعا سەندىڭدەر+. قۇداي ونى ولىمنەن قايتا ٴتىرىلتىپ+، ۇلىلىققا بولەدى+. وسىنىڭ ارقاسىندا سەندەر قۇدايعا سەنىپ، ٵرى وعان ٷمىت ارتا الاسىڭدار.
22 شىندىققا مويىنسۇنىپ وزدەرىڭدى* تازارتقاندىقتان، باۋىرلاستارعا دەگەن شىنايى سۇيىسپەنشىلىككە+ يە بولدىڭدار. سوندىقتان ەندى ٴبىر-ٴبىرىڭدى بارىنشا جاقسى كورىڭدەر+.
23 ويتكەنى سەندەر ٴشىريتىن ەمەس، شىرىمەيتىن تۇقىمنان+ — ٴتىرى ٵرى ماڭگى قۇدايدىڭ ٴسوزى+ ارقىلى جاڭادان تۋىلدىڭدار+.
24 «پەندە اتاۋلى ٴشوپ ىسپەتتى، ونىڭ بار ٴسان-سالتاناتى دالا گۇلىندەي. ٴشوپ قۋراپ، گۇلى تۇسەدى،
25 ال ەحوبانىڭ* ٴسوزى ماڭگى قالادى+!» سەندەرگە ىزگى حابار رەتىندە جاريالانعان، مىنە، وسى «ٴسوز»+.
سىلتەمەلەر
^ «ازيا» دەپ ريم يمپەرياسىنىڭ پروۆينسياسى جونىندە ايتىلىپ تۇر.
^ نەمەسە «تازارتىلسا».
^ سوزبە-ٴسوز «قۇندارىڭ وتەلىپ الىندى».
^ بۇل ادام اتا مەن حاۋا انانىڭ بالالارى تۋىلعان كەزگە نۇسقايدى.
^ نەمەسە «جاندارىڭدى».
^ بۇل — قۇدايدىڭ ەسىمى. تۇسىندىرمەنى قاراڭىز.
