ەرەميا 26:1—24
26 ياھۋدانىڭ پاتشاسى جوسيا ۇلى ەحوياكىمنىڭ+ بيلىگىنىڭ باسىندا ەحوبا ەرەمياعا مىنا ٴسوزىن ارنادى:
2 «ەحوبا بىلاي دەيدى: —ەحوبانىڭ ٷيىنىڭ اۋلاسىندا تۇرىپ، ياھۋدا قالالارىنان ەحوبانىڭ ۇيىنە عيبادات ەتۋگە كەلىپ جاتقان بارشا جۇرتقا قاتىستى* بۇيىرعاندارىمدى تۇگەل، ٴبىر ٴسوزىن دە قالدىرماي جەتكىز.
3 بالكىم، ولار تىڭداپ، ٴارقايسىسى زۇلىم جولىنان قايتار، سوندا مەن دە زۇلىم ىستەرى ٷشىن اپات جىبەرەمىن دەگەن رايىمنان قايتامىن+.
4 ولارعا ەحوبا مىنانى ايتىپ جاتىر دە: —ەگەر مەنىڭ ايتقانىمدى تىڭداماساڭدار، وزدەرىڭە بەرگەن زاڭدارىمدى ۇستانباساڭدار،
5 سەندەرگە قايتا-قايتا جىبەرىپ وتىرعان قىزمەتشىلەرىم — پايعامبارلاردىڭ ايتقاندارىنا قۇلاق اسپاساڭدار (ولارعا وسى ۋاقىتقا دەيىن قۇلاق اسپاي كەلدىڭدەر)+،
6 وندا وسى ۇيگە شيلوعا+ جاساعانىمدى جاسايمىن، ال مىنا قالانى جەر بەتىندەگى بارلىق حالىقتاردىڭ قارعىسىنا قالدىرامىن+».
7 ەرەميا ەحوبانىڭ ۇيىندە وسى سوزدەردى ايتىپ جاتقاندا، ٴدىني قىزمەتكەرلەر، پايعامبارلار مەن كۇللى جۇرت تىڭداپ تۇردى+.
8 ەرەميا ەحوبانىڭ بۇكىل جۇرتقا ايت دەگەن سوزدەرىن تۇگەل ايتىپ بولعاندا، ٴدىني قىزمەتكەرلەر، پايعامبارلار مەن جۇرت ونى ۇستاپ الىپ: «سەن ولۋگە ٴتيىسسىڭ.
9 نەلىكتەن «مىنا ٷي شيلو سياقتى بولادى، ال مىنا قالا تالان-تاراجعا ٴتۇسىپ، بىردە-ٴبىر تۇرعىنى قالمايدى» دەپ ەحوبانىڭ اتىنان پايعامبارلىق ەتەسىڭ؟»— دەدى. ەحوبانىڭ ۇيىندە تۇرعان ەرەميانىڭ اينالاسىنا قالىڭ جۇرت جينالىپ قالدى.
10 ياھۋدانىڭ امىرشىلەرى وسى سوزدەردى ەستىگەندە، پاتشا سارايىنان شىعىپ، ەحوبانىڭ ۇيىنە كەلدى. ولار ەحوبانىڭ ۇيىندەگى جاڭا قاقپانىڭ كىرەبەرىسىنە بارىپ وتىردى+.
11 سوندا ٴدىني قىزمەتكەرلەر مەن پايعامبارلار امىرشىلەرگە جانە كۇللى جۇرتقا: «مىنا كىسى ولىمگە لايىق+، ويتكەنى ول وسى قالاعا قارسى پايعامبارلىق ايتتى. بۇنى ٶز قۇلاقتارىڭمەن ەستىدىڭدەر»،— دەدى+.
12 سوندا ەرەميا بارلىق امىرشىلەر مەن جينالعان جۇرتقا مىنانى ايتتى: «مىنا ۇيگە جانە مىنا قالاعا قارسى ايتىلعان پايعامبارلىقتى، وزدەرىڭ ەستىگەن سوزدەردى ايتۋعا مەنى ەحوبا جىبەردى+.
13 سوندىقتان ٶز جولدارىڭ مەن ٸس-ارەكەتتەرىڭدى دۇرىستاڭدار، ەحوبا قۇدايلارىڭنىڭ داۋسىنا قۇلاق اسىڭدار. سوندا ەحوبا سەندەرگە اپات جىبەرەمىن دەگەن رايىنان قايتادى+.
14 ال مەن بولسام سەندەردىڭ قولدارىڭدامىن. نەنى دۇرىس ٵرى ٵدىل دەپ تاپساڭدار، سونى ىستەي بەرىڭدەر.
15 ٴبىراق مىنانى ٴبىلىپ قويىڭدار: ەگەر مەنى ولتىرسەڭدەر، ٶز مويىندارىڭا جانە مىنا قالا مەن ونىڭ تۇرعىندارىنا كۇناسىز ادامنىڭ قانىن جۇكتەيسىڭدەر. ويتكەنى وزدەرىڭ ەستىگەن سوزدەردى ايتۋعا مەنى شىنىمەن ەحوبا جىبەردى».
16 سوندا امىرشىلەر جانە كۇللى حالىق ٴدىني قىزمەتكەرلەر مەن پايعامبارلارعا: «بۇل ادامدى ولتىرۋگە بولمايدى، سەبەبى ول بىزگە قۇدايىمىز ەحوبانىڭ اتىنان سويلەدى عوي»،— دەدى.
17 بۇعان قوسا، ەلدىڭ كەيبىر اقساقالدارى ورىندارىنان تۇرىپ، جينالعان بۇكىل قاۋىمعا بىلاي دەدى:
18 «ياھۋدا پاتشاسى ەزەكيانىڭ+ تۇسىندا مورەشەتتىك ميحا+ پايعامبارلىق ەتىپ، ياھۋدانىڭ كۇللى حالقىنا اسكەرباسى ەحوبانىڭ ٴسوزىن جەتكىزىپ:
—سيون تاناپ سياقتى جىرتىلادى،يەرۋساليم قيراپ، ۇيىندىگە اينالادى+،عيباداتحانا تۇرعان تاۋ قالىڭ توعاي باسقان قىراتتاي بولادى+،— دەگەن ەدى.
19 سوندا ياھۋدا پاتشاسى ەزەكيا مەن كۇللى ياھۋدا حالقى ونى ٶلتىردى مە؟ قايتا، پاتشا ەحوبادان قورقىپ، ەحوبانىڭ راقىم ەتۋىن ٶتىندى ەمەس پە؟! سول كەزدە ەحوبا ولارعا اپات جىبەرەمىن دەگەن رايىنان قايتقان ەدى+. ال قازىر ٴبىز ٶز باسىمىزعا ٶزىمىز زور اپات تىلەپ تۇرمىز.
20 ەحوبانىڭ اتىنان پايعامبارلىق ەتكەن تاعى ٴبىر كىسى بولعان. ول كيريات-ەعاريمنەن+ شىققان شەماياح ۇلى ۇرياح ەدى. ەرەميانىكىندەي سوزدەرمەن ول دا وسى قالاعا جانە وسى ەلگە قارسى پايعامبارلىق ەتكەن بولاتىن.
21 ەحوياكىم+ پاتشا مەن ونىڭ مىقتى ساربازدارى جانە بارلىق امىرشىلەر ۇرياحتىڭ ٴسوزىن ەستىگەندە، پاتشا ونى ولتىرمەك بولىپ، ىزدەستىردى+. مۇنى ەستىگەندە، ۇرياح قورقىپ، بىردەن مىسىرعا قاشىپ كەتتى.
22 سوندا ەحوياكىم پاتشا احبوردىڭ ۇلى ەلناتان+ مەن وزگە ادامدارىن مىسىرعا جىبەردى.
23 ولار ۇرياحتى مىسىردا ۇستاپ الىپ، ەحوياكىم پاتشاعا اكەلدى. پاتشا ونى سەمسەرمەن ٶلتىرىپ+، ٴمايىتىن قاراپايىم حالىقتىڭ مولاسىنا لاقتىرىپ تاستادى».
24 شافان+ ۇلى احيقام+ ەرەميانى قولداپ، حالىقتىڭ ونى ولتىرۋىنە جول بەرمەدى+.
سىلتەمەلەر
^ مۇمكىن «جۇرتقا».
