ەرەميا 34:1—22
34 بابىل پاتشاسى ناۆۋحودونوسور مەن كۇللى اسكەرى، ونىڭ قول استىنداعى بارلىق پاتشالىقتار مەن حالىقتار يەرۋساليمگە جانە ونىڭ قالالارىنا شابۋىلداپ جاتقان كەزدە+، ەحوبا ەرەمياعا مىنا ٴسوزىن ارنادى:
2 «يسرايلدىڭ قۇدايى ەحوبا ياھۋدا پاتشاسى سەدەكياعا+ بار دا، ەحوبا ساعان مىنانى ايتادى دە: —مىنە، بۇل قالانى بابىل پاتشاسىنىڭ قولىنا بەرگەلى جاتىرمىن، ول ونى ورتكە ورايدى+.
3 سەن ودان قاشىپ قۇتىلا المايسىڭ، ٴسوزسىز ۇستالىپ، قولىنا تۇسەسىڭ+. بابىل پاتشاسىن ٶز كوزىڭمەن كورىپ، بەتپە-بەت سويلەسەسىڭ، سودان بابىلعا اكەتىلەسىڭ+.
4 دەگەنمەن، ۋا، ياھۋدا پاتشاسى سەدەكيا، ەحوبانىڭ ٴسوزىن تىڭدا! سەن تۋرالى ەحوبا بىلاي دەيدى: —سەن سەمسەردەن ولمەيسىڭ،
5 ٶز اجالىڭنان ولەسىڭ+. جۇرت وزىڭە دەيىن پاتشا بولعان اتا-بابالارىڭا حوش ٴيىستى زات تۇتەتكەندەي، ساعان دا تۇتەتەدى. سونداي-اق ولار «قايران، قوجايىنىمىز-اي!» دەپ جوقتاۋ ايتادى. بۇل سوزدەردى ايتقان — مەن، ەحوبا».
6 ەرەميا پايعامبار وسىنىڭ ٴبارىن يەرۋساليمدەگى ياھۋدا پاتشاسى سەدەكياعا تۇگەل جەتكىزدى.
7 بۇل كەزدە بابىل پاتشاسىنىڭ اسكەرى يەرۋساليمگە جانە ياھۋدانىڭ ٵلى باسىپ الىنباعان قالالارى+ لاحيش+ پەن ازەككە+ قارسى سوعىسىپ جاتتى. ياھۋدانىڭ بەكىنىستى قالالارىنان جاۋ قولىنا تۇسپەگەنى وسىلار عانا ەدى.
8 سەدەكيا پاتشا يەرۋساليمدەگى كۇللى حالىقپەن كەلىسىم جاساسىپ، قۇلدارعا بوستاندىق بەرۋدى+ جاريالاعاننان كەيىن، ەحوبا ەرەمياعا ٴسوزىن ارنادى.
9 سول كەلىسىم بويىنشا، اركىم ٶزىنىڭ ەۆرەي قۇلىنا، ەركەك نە ايەل بولسىن، باس بوستاندىعىن بەرۋ قاجەت ەدى. وسىلاي ەشكىم ياھۋدي باۋىرىن قۇل ەتىپ ۇستاماۋى كەرەك بولدى.
10 مۇنى امىرشىلەردىڭ ٴبارى جانە بارشا جۇرت قولداپ، ٴارقايسىسى ٶزىنىڭ قۇل-كۇڭىن بوساتىپ، بۇدان بىلاي ولاردى قۇل ەتپەۋ جايلى كەلىسىمگە تۇردى. ولار وسىعان ساي ارەكەت ەتىپ، قۇلدارىن قويا بەردى.
11 ٴبىراق كەيىنىرەك ولار باس بوستاندىعىن بەرگەن قۇل-كۇڭدەرىن كەرى قايتارىپ، قايتادان قۇلدىققا سالىپ قويدى.
12 سوندا ەحوبا ەرەمياعا ٶز ٴسوزىن ارنادى. ەحوبا بىلاي دەدى:
13 «يسرايلدىڭ قۇدايى ەحوبا مىنانى ايتادى: —مەن اتا-بابالارىڭدى مىسىر ەلىنەن، قۇلدىق ۇيىنەن، الىپ شىققانىمدا+، ولارمەن كەلىسىم جاساسىپ+،
14 ٵربىر جەتىنشى جىلى ٴارقايسىسى ٶزىن قۇلدىققا ساتقان ٵرى التى جىل قىزمەت ەتكەن ەۆرەي باۋىرىنا باس بوستاندىعىن بەرۋدى بۇيىردىم+. ٴبىراق اتا-بابالارىڭ مەنى تىڭداعان دا، سوزىمە قۇلاق اسقان دا جوق.
15 ال جاقىندا سەندەر وزگەرىپ، كوز الدىمدا دۇرىس نارسە جاساپ، باۋىرلارىڭا ازاتتىق جاريالادىڭدار. وسىلايشا مەنىڭ ەسىمىممەن اتالاتىن ۇيدە، مەنىڭ الدىمدا كەلىسىم جاسادىڭدار.
16 ٴبىراق قايتادان اينىپ، مەنىڭ اتىما كىر كەلتىردىڭدەر+. ويتكەنى بوستاندىقتى قالاعان قۇل-كۇڭدەرىڭە ەركىندىك بەرىپ الىپ، ەندى قايتادان كۇشتەپ قۇل ەتىپ وتىرسىڭدار.
17 سوندىقتان ەحوبا مىنانى ايتادى: —سەندەر اركىم ٶز باۋىرىنا، جەرلەسىنە ازاتتىق جاريالاسىن دەگەن نۇسقاۋىما+ مويىنسۇنبادىڭدار. سول سەبەپتەن وزدەرىڭە سەمسەردەن، ىندەت پەن اشتىقتان+ ٶلۋ «ازاتتىعىن» جاريالايمىن،— دەيدى ەحوبا.— مەن سەندەردى جەر بەتىندەگى بارلىق پاتشالىقتار شوشىناتىن كۇيگە تۇسىرەمىن+.
18 بۇزاۋدى ەكىگە ٴبولىپ، اراسىنان ٶتىپ+ مەنىڭ الدىمدا جاساعان كەلىسىمنىڭ شارتتارىن ورىنداماي، مەنىڭ كەلىسىمىمدى بۇزعان ادامداردى،
19 اتاپ ايتقاندا: بۇزاۋدىڭ ەكى بولىگىنىڭ اراسىنان وتكەن ياھۋدانىڭ امىرشىلەرىن، يەرۋساليمنىڭ امىرشىلەرىن، ساراي قىزمەتكەرلەرىن، ٴدىني قىزمەتكەرلەر مەن وسى ەلدىڭ كۇللى حالقىن — جازالايمىن.
20 ولاردى جاندارىن الماق بولعان جاۋلارىنىڭ قولىنا بەرەمىن. مايىتتەرى اسپانداعى قۇستار مەن جەردەگى اڭدارعا جەم بولادى+.
21 ياھۋدا پاتشاسى سەدەكيا مەن ونىڭ امىرشىلەرىن ولاردىڭ جانىن الماق بولعان جاۋلارىنىڭ قولىنا، كەرى شەگىنىپ جاتقان+ بابىل پاتشاسىنىڭ اسكەرىنىڭ قولىنا تاپسىرامىن+.
22 مىنە، مەن بۇيرىق بەرەمىن،— دەيدى ەحوبا.— ولار وسى قالاعا قايتىپ كەلىپ، وعان شابۋىل جاسايدى. ونى باسىپ الىپ، ورتكە ورايدى+. مەن ياھۋدانىڭ قالالارىن ەل-جۇرتسىز، قاڭىراتىپ بوس قالدىرامىن+».