ەرەميا 35:1—19
-
رەحاب اۋلەتىنىڭ مويىنسۇنۋشىلىق ۇلگىسىن كورسەتۋى (1—19)
35 ياھۋدانىڭ پاتشاسى جوسيا ۇلى ەحوياكىمنىڭ+ كۇندەرىندە ەحوبا ەرەمياعا ٴسوزىن ارناپ:
2 «رەحاب+ اۋلەتىنە بار دا، سويلەسىپ، ولاردى ەحوبانىڭ ۇيىنە ەرتىپ كەل. سوسىن اس بولمەلەردىڭ بىرىنە كىرگىزىپ، شاراپ ۇسىن»،— دەدى.
3 سودان مەن حاباتسينايدىڭ نەمەرەسى، ەرەميانىڭ ۇلى يازانياحتى، ونىڭ باۋىرلارى مەن بارلىق ۇلدارىن، جالپى، رەحابتىڭ بۇكىل اۋلەتىن ەرتىپ،
4 ەحوبانىڭ ۇيىنە اكەلدىم. ولاردى قۇدايدىڭ ادامى يعدالياح ۇلى حاناننىڭ ۇلدارىنىڭ اس بولمەسىنە كىرگىزدىم. بۇل بولمە قاقپا كۇزەتشىسى شالۋم ۇلى ماعاسەياحتىڭ اس بولمەسىنەن جوعارى ورنالاسقان باسشىلاردىڭ اس بولمەسىنىڭ جانىندا ەدى.
5 سوسىن رەحاب اۋلەتىنىڭ ادامدارىنىڭ الدىنا شاراپقا تولى توستاعاندار مەن كەسەلەر قويىپ: «شاراپ ىشىڭىزدەر»،— دەدىم.
6 ٴبىراق ولاردىڭ جاۋابى مىناۋ بولدى: «ٴبىز شاراپ ىشپەيمىز، ويتكەنى ارعى اتامىز رەحاب ۇلى ەحوناداب+ وسيەت ەتىپ: —وزدەرىڭ دە، بالالارىڭ دا اۋىزدارىڭا شاراپ الماڭدار.
7 سونداي-اق ٷي سوعىپ، ەگىن ەگىپ، جۇزىمدىك وتىرعىزۋشى نە ونى يەلەنۋشى بولماڭدار. قايتا، ارقاشان شاتىرلاردا تۇرىڭدار، سوندا جاتجەرلىك بولىپ تۇرىپ جاتقان جەرلەرىڭدە ۇزاق ٶمىر كەشەسىڭدەر،— دەگەن.
8 سوندىقتان ارعى اتامىز رەحاب ۇلى ەحونادابتىڭ بۇيىرعاندارىن تۇگەل ورىنداپ، ٶزىمىز دە، ايەلدەرىمىز دە، ۇل-قىزدارىمىز دا شاراپ ىشكەن ەمەسپىز.
9 سونداي-اق تۇرۋ ٷشىن ۇيلەر سالمايمىز، جۇزىمدىكتەرىمىز، تاناپتارىمىز بەن ەگەتىن ٴدانىمىز دە جوق.
10 شاتىرلاردا تۇرىپ، ارعى اتامىز ەحونادابتىڭ بۇيىرعاندارىن تۇگەل ۇستانىپ كەلەمىز.
11 الايدا ەلىمىزگە ناۆۋحودونوسور پاتشا شابۋىل جاسادى+، سوندىقتان ٴبىز حالدەيلەر مەن سيريالىقتاردىڭ اسكەرىنەن قاشىپ، يەرۋساليمدى پانالاۋدى شەشتىك. قازىر، مىنە، وسىندا تۇرىپ جاتىرمىز».
12 ەحوبا ەرەمياعا ٴسوزىن ارناپ بىلاي دەدى:
13 «ياھۋدا ادامدارى مەن يەرۋساليم تۇرعىندارىنا بارىپ، يسرايلدىڭ قۇدايى، اسكەرباسى ەحوبا مىنانى ايتادى دە: —مەن سەندەردى سوزىمە مويىنسۇنۋعا قايتا-قايتا شاقىرىپ كەلدىم ەمەس پە+؟— دەيدى ەحوبا.—
14 رەحاب ۇلى ەحوناداب ٶز ۇرپاعىنا شاراپ ىشپەۋدى بۇيىرعان ەدى. ولار ارعى اتالارىنىڭ وسيەتىنە مويىنسۇنىپ، وسى كۇنگە دەيىن شاراپ ىشپەي كەلەدى+. ال مەن سەندەرگە قايتا-قايتا* ايتسام دا، ماعان مويىنسۇنبايسىڭدار+.
15 مەن قىزمەتشىلەرىم — پايعامبارلاردى قايتا-قايتا جىبەرىپ+: —وتىنەمىن، ٴارقايسىسىڭ جامان جولدارىڭنان قايتىپ+، دۇرىس نارسەنى ىستەڭدەر! بوتەن تاڭىرلەرگە تابىنىپ، قۇلشىلىق ەتپەڭدەر. سوندا وزدەرىڭە جانە اتا-بابالارىڭا بەرگەن وسى ەلدە ۇزاق تۇراسىڭدار+،— دەپ ايتقىزدىم. ٴبىراق سەندەر تىڭدامادىڭدار، قۇلاق تا اسپادىڭدار.
16 رەحاب ۇلى ەحونادابتىڭ ۇرپاقتارى ارعى اتالارىنىڭ وسيەتىن ورىنداپ كەلەدى+، ال مىنا حالىق بولسا مەنى تىڭدار ەمەس.
17 سوندىقتان يسرايلدىڭ قۇدايى، اسكەرباسى ەحوبا بىلاي دەيدى: —مىنە، ياھۋدا مەن يەرۋساليم تۇرعىندارىنىڭ باسىنا الدىن الا ەسكەرتكەن اپاتتاردىڭ ٴبارىن جىبەرەمىن+. ويتكەنى ولار قانشا ايتسام دا، تىڭدامادى، قانشا شاقىرسام دا، جاۋاپ قاتپادى+».
18 ەرەميا رەحابتىڭ اۋلەتىنە بىلاي دەدى: «يسرايلدىڭ قۇدايى، اسكەرباسى ەحوبا مىنانى ايتادى: —ارعى اتالارىڭ ەحونادابتىڭ وسيەتىنە مويىنسۇنىپ، ونىڭ بەرگەن وسيەتتەرىنىڭ ٴبارىن بۇلجىتپاي ورىنداپ كەلە جاتقاندارىڭ ٷشىن،
19 رەحاب ۇلى ەحونادابتىڭ ۇرپاعى ٵردايىم مەنىڭ الدىمدا قىزمەت ەتەتىن بولادى،— دەيدى يسرايلدىڭ قۇدايى، اسكەرباسى ەحوبا».
سىلتەمەلەر
^ سوزبە-ٴسوز «ەرتە تۇرىپ».