ەرەميا 36:1—32
36 ياھۋدانىڭ پاتشاسى جوسيا ۇلى ەحوياكىمنىڭ+ بيلىك قۇرۋىنىڭ ٴتورتىنشى جىلى ەحوبا ەرەمياعا ٴسوزىن ارناپ بىلاي دەدى:
2 «شيىرشىق* ال دا، وعان جوسيانىڭ تۇسىندا وزىڭە العاش رەت سويلەگەن كۇننەن باستاپ بۇگىنگە دەيىن يسرايلگە، ياھۋداعا+ جانە بارلىق حالىقتارعا+ قارسى ايتقان سوزدەرىمدى تۇگەل جازىپ قوي+.
3 بالكىم، ياھۋدانىڭ ۇيىندەگىلەر مەن جىبەرگەلى جاتقان بارلىق اپات جايلى ەستىگەندە، زۇلىم جولدارىنان قايتار. سوندا مەن ولاردىڭ قىلمىسى مەن كۇناسىن كەشىرەمىن+».
4 ەرەميا نەرياح ۇلى بارۋحتى+ شاقىردى. ٴسۇيتىپ، وعان ەحوبادان العان سوزدەردى ٴبىرىن قالدىرماي ايتىپ وتىردى، ال بارۋح ونى شيىرشىققا جازىپ الدى+.
5 سوسىن ەرەميا بارۋحقا بىلاي دەپ بۇيىردى: «مەن قاماۋدا وتىرمىن. ەحوبانىڭ ۇيىنە كىرە المايمىن.
6 سوندىقتان سەن سول جەرگە بارىپ، مەنىڭ ايتۋىممەن شيىرشىققا جازىپ العان ەحوبانىڭ سوزدەرىن داۋىستاپ وقى. ونى ورازا كۇنى ەحوبانىڭ ۇيىنە كەلگەن جۇرتقا ەستىرتىپ وقى. وسىلاي مۇنى ٶز قالالارىنان كەلگەن بۇكىل ياھۋدا حالقى ەستيتىن بولادى.
7 بالكىم، ولاردىڭ راقىم ەتۋىن سۇراعان دۇعالارى ەحوبانىڭ قۇلاعىنا جەتەر. ٴسۇيتىپ، بەت بۇرىپ، ٴارقايسىسى زۇلىم جولىنان قايتار. ويتكەنى ەحوبانىڭ بۇل حالىققا توككەلى تۇرعان اشۋى مەن قاھارى وتە زور».
8 سودان نەرياح ۇلى بارۋح ەرەميا پايعامباردىڭ بۇيىرعاندارىن تۇگەل ورىنداپ، ەحوبانىڭ شيىرشىققا جازىلعان سوزدەرىن ەحوبانىڭ ۇيىندە داۋىستاپ وقىپ بەردى+.
9 ياھۋدانىڭ پاتشاسى جوسيا ۇلى ەحوياكىمنىڭ+ بيلىك قۇرۋىنىڭ بەسىنشى جىلىنىڭ توعىزىنشى ايىندا يەرۋساليمنىڭ بۇكىل تۇرعىنىنا جانە سول جەرگە ياھۋدانىڭ قالالارىنان كەلگەن كۇللى حالىققا ەحوبانىڭ الدىندا ورازا ۇستاۋ جاريالاندى+.
10 سوندا بارۋح ەرەميانىڭ شيىرشىققا جازدىرعان سوزدەرىن ەحوبانىڭ ۇيىندە، كوشىرمەشى شافان+ ۇلى گەمارياحتىڭ+ بولمەسىندە كۇللى جۇرتقا داۋىستاپ وقىپ بەردى. بۇل بولمە جوعارعى اۋلادا، ەحوبانىڭ ٷيىنىڭ جاڭا قاقپاسىنىڭ ماڭىندا ورنالاسقان ەدى+.
11 شافاننىڭ نەمەرەسى، گەمارياحتىڭ ۇلى ميحايا شيىرشىقتان وقىلعان ەحوبانىڭ بارلىق ٴسوزىن ەستىگەندە،
12 پاتشا سارايىنداعى حاتشىنىڭ بولمەسىنە باردى. ول جەردە امىرشىلەردىڭ* ٴبارى: حاتشى ەليشاما+، شەماياح ۇلى دەلاياح، احبور+ ۇلى ەلناتان+، شافان ۇلى گەمارياح، حانانياح ۇلى سەدەكيا جانە باسقا دا امىرشىلەر — وتىرعان ەدى.
13 ميحايا ولارعا بارۋحتىڭ كۇللى جۇرتقا شيىرشىقتان داۋىستاپ وقىعان سوزدەرىنىڭ ٴبارىن ايتىپ بەردى.
14 سوندا امىرشىلەر قۇشيدىڭ شوبەرەسى، شەلەمياحتىڭ نەمەرەسى، نەتانياحتىڭ ۇلى ەحۋديدى بارۋحقا جىبەرىپ: «جۇرتقا داۋىستاپ وقىپ بەرگەن شيىرشىقتى الىپ، بىزگە كەل»،— دەپ ايتقىزدى. نەرياح ۇلى بارۋح شيىرشىقتى الىپ، امىرشىلەردىڭ الدىنا كەلدى.
15 ولار وعان: «كەل، وتىرشى. شيىرشىقتى بىزگە وقىپ بەرشى»،— دەدى. بارۋح وقىپ بەردى.
16 بۇل سوزدەردى ەستىگەندە، ولار ٴبىر-بىرىنە ۇرەيلەنە قارادى دا، بارۋحقا: «بۇل سوزدەردىڭ ٴبارىن مىندەتتى تۇردە پاتشاعا جەتكىزەمىز»،— دەدى.
17 كەيىن بارۋحتان: «مۇنىڭ ٴبارىن قالاي جازعانىڭدى ايتشى. ونىڭ ٶز اۋزىنان ەستىپ جازدىڭ با؟»— دەپ سۇرادى.
18 بۇعان بارۋح: «ول ماعان وسى سوزدەردىڭ ٴبارىن ايتىپ وتىردى، مەن سيامەن شيىرشىققا ٴتۇسىرىپ وتىردىم»،— دەپ جاۋاپ قاتتى.
19 سوندا امىرشىلەر: «بار دا، ەرەميا ەكەۋىڭ ٴبىر جەرگە جاسىرىنىڭدار. قايدا ەكەندەرىڭدى ەشبىر جان بىلمەسىن»،— دەپ ەسكەرتتى+.
20 سودان وزدەرى ساراي اۋلاسىنا، پاتشانىڭ الدىنا باردى، ال شيىرشىقتى حاتشى ەليشامانىڭ بولمەسىنە قالدىرىپ كەتتى. ٴسۇيتىپ، ولار ەستىگەن سوزدەرىن پاتشاعا تۇگەل ايتىپ بەردى.
21 پاتشا ەحۋديدى+ جىبەرىپ، حاتشى ەليشامانىڭ بولمەسىندەگى شيىرشىقتى الدىرتتى. ەحۋدي ونى پاتشاعا جانە ونىڭ جانىندا تۇرعان امىرشىلەرگە ەستىرتىپ وقي باستادى.
22 بۇل توعىزىنشى اي* بولاتىن. پاتشا قىسقى سارايىندا وتىرعان، ال الدىندا اشىق پەشتە وت جانىپ تۇرعان ەدى.
23 ەحۋدي شيىرشىقتا جازىلعاننىڭ ٷش-ٴتورت باعاناسىن وقىپ بولعان سايىن، پاتشا ونى حاتشىنىڭ پىشاعىمەن كەسىپ الىپ، پەشتەگى وتقا تاستاپ وتىردى. وسىلاي بۇكىل شيىرشىق جانىپ كەتتى.
24 مۇنى ەستىگەندەردىڭ ەشقايسىسى — پاتشا دا، ونىڭ قىزمەتشىلەرى دە قورىققان جوق، كيىمدەرىنىڭ ٶڭىرىن جىرتقان جوق.
25 ەلناتان+، دەلاياح+ پەن گەمارياح+ شيىرشىقتى ورتەمەۋىن سۇراپ جالىنسا دا، پاتشا ولارعا قۇلاق اسپادى.
26 سوسىن ول پاتشا ۇلى ەراحمەلگە، ازرييل ۇلى سەراياحقا جانە ٵبدىل ۇلى شەلەمياحقا حاتشى بارۋح پەن ەرەميا پايعامباردى تۇتقىنعا الۋدى تاپسىردى. ٴبىراق ەحوبا ولاردى جاسىرىپ قويدى+.
27 ەرەميانىڭ ايتۋىمەن بارۋح جازعان شيىرشىقتى+ پاتشا ورتەپ جىبەرگەننەن كەيىن، ەحوبا ەرەمياعا تاعى دا ٴسوزىن ارناپ بىلاي دەدى:
28 «باسقا ٴبىر شيىرشىق ال دا، وعان ياھۋدا پاتشاسى ەحوياكىم ورتەپ جىبەرگەن+ العاشقى شيىرشىقتاعى سوزدەردى تۇگەل جازىپ قوي.
29 ياھۋدانىڭ پاتشاسى ەحوياكىمگە ەحوبا ايتتى دەپ بىلاي دە: —سەن شيىرشىقتى ورتەپ «بابىل پاتشاسى ٴسوزسىز كەلەدى دە، وسى ەلدى جويىپ، ادامدى دا، اڭدى دا قالدىرمايدى دەگەندى نەگە جازاسىڭ؟» دەپسىڭ+.
30 سول ٷشىن ەحوبا ياھۋدا پاتشاسى ەحوياكىم تۋرالى بىلاي دەيدى: —ونىڭ ۇرپاعىنان ٴداۋىتتىڭ تاعىنا وتىراتىن ەشكىم بولمايدى+. ونىڭ ٴمايىتى كۇندىزگى اپتاپ پەن تۇنگى سۋىققا قالادى+.
31 مەن ونىڭ ٶزىن، ٷرىم-بۇتاعىن جانە قىزمەتشىلەرىن كۇناسى ٷشىن جاۋاپقا تارتامىن. ولارعا، يەرۋساليم تۇرعىندارى مەن ياھۋدانىڭ ادامدارىنا ٶزىم ايتقان اپاتتاردىڭ ٴبارىن جىبەرەمىن. بۇلار جايلى ەسكەرتسەم دە+، قۇلاق اسپادى+».
32 سودان ەرەميا باسقا ٴبىر شيىرشىقتى الىپ، حاتشى نەرياح ۇلى بارۋحقا بەردى+. ەرەميا ياھۋدا پاتشاسى ەحوياكىم ورتەپ جىبەرگەن+ شيىرشىقتاعى سوزدەردىڭ ٴبارىن قايتادان ايتىپ شىقتى، ال بارۋح ولاردى جازىپ الدى. سونداي-اق وسىعان ۇقساس باسقا دا كوپتەگەن سوزدەردى جازىپ قويدى.
سىلتەمەلەر
^ سوزبە-ٴسوز «شيىرشىق كىتاپ».
^ نەمەسە «ساراي قىزمەتكەرلەرىنىڭ».
^ بۇل كەز قاراشانىڭ ەكىنشى جارتىسى نە جەلتوقساننىڭ ٴبىرىنشى جارتىسى بولۋى مۇمكىن. B15 قوسىمشاسىن قاراڭىز.
