ەرەميا 37:1—21
37 جوسيانىڭ ۇلى سەدەكيا+ ەحوياكىمنىڭ ۇلى قونيانىڭ*+ ورنىنا بيلىك ەتە باستادى. ويتكەنى بابىل پاتشاسى ناۆۋحودونوسور ونى ياھۋدا ەلىنە پاتشا ەتىپ قويدى+.
2 الايدا ول دا، ونىڭ قىزمەتشىلەرى دە، ەلدەگى جۇرت تا ەحوبانىڭ ەرەميا پايعامبار ارقىلى ايتقان سوزدەرىن تىڭدامادى.
3 سەدەكيا پاتشا شەلەمياح ۇلى ەحۋحال+ مەن ٴدىني قىزمەتكەر ماعاسەياح ۇلى سافونيانى+ ەرەميا پايعامبارعا جىبەرىپ: «ٴبىز ٷشىن ەحوبا قۇدايىمىزعا دۇعا ەتشى»،— دەگىزدى.
4 ەرەميا حالىقتىڭ اراسىندا ەركىن تۇرىپ جاتقان بولاتىن، ويتكەنى ول ٵلى تۇرمەگە جابىلماعان ەدى+.
5 سول ۋاقىتتا پەرعاۋىننىڭ اسكەرى مىسىردان+ جورىققا اتتاندى. بۇل حابار يەرۋساليمدى قورشاۋعا الىپ تۇرعان حالدەيلەرگە جەتكەندە، ولار يەرۋساليمدى قالدىرىپ كەرى كەتتى+.
6 سوندا ەحوبا ەرەميا پايعامبارعا ٴسوزىن ارناپ بىلاي دەدى:
7 «يسرايلدىڭ قۇدايى ەحوبا مىنانى ايتادى: —مەنەن كەڭەس سۇراۋعا جىبەرگەن ياھۋدا پاتشاسىنا: «مىنە، ساعان كومەككە كەلە جاتقان پەرعاۋىننىڭ اسكەرى ٶز ەلىنە، مىسىرعا قايتۋعا ٴماجبۇر بولادى+.
8 حالدەيلەر بولسا قايتىپ كەلىپ، وسى قالاعا شابۋىلداپ، ونى باسىپ الىپ، ورتەپ جىبەرەدى+»،— دەڭدەر.
9 ەحوبا بىلاي دەيدى: —ٶز-وزدەرىڭدى «حالدەيلەر بىزگە ەندى قايتىپ كەلمەيدى» دەگەن سوزدەرمەن الداماڭدار، ويتكەنى ولار مىندەتتى تۇردە قايتىپ كەلەدى.
10 سەندەر وزدەرىڭمەن سوعىسىپ جاتقان حالدەيلەردىڭ بۇكىل اسكەرىن تاس-تالقان ەتىپ، شاتىرلارىندا تەك جارالانعاندارى قالعان كۇندە دە، سولار ورىندارىنان تۇرىپ، وسى قالانى ورتەپ جىبەرەدى+».
11 پەرعاۋىننىڭ اسكەرى كەلە جاتقاندىقتان، حالدەي اسكەرى يەرۋساليمدى تاستاپ كەتكەندە+،
12 ەرەميا ٶز جۇرتىنىڭ اراسىنان ٴتيىستى ۇلەسىن الۋ ٷشىن، يەرۋساليمنەن بەنيامين+ جەرىنە جول تارتپاق بولدى.
13 ٴبىراق ول بەنيامين قاقپاسىنا كەلگەندە، حانانياحتىڭ نەمەرەسى، شەلەمياحتىڭ ۇلى يريا ەسىمدى كۇزەتشىلەر باسشىسى ونى ۇستاپ الىپ: «سەن حالدەيلەرگە ٶتىپ كەتپەكسىڭ!»— دەدى.
14 ەرەميا: «بۇل جالعان! حالدەيلەرگە وتەيىن دەپ جاتقان جوقپىن!»— دەدى. ٴبىراق يريا ونى تىڭداماي، تۇتقىنداپ، امىرشىلەردىڭ الدىنا اپاردى.
15 ەرەمياعا ىزاسى كەلگەن امىرشىلەر+ ونى ۇرىپ-سوعىپ، حاتشى ەحوناتاننىڭ ۇيىنە قاماپ قويدى+. ونىڭ ٷيى تۇرمە رەتىندە قولدانىلاتىن.
16 ەرەميانى جەرتولەگە، ياعني زىندانعا تاستادى. ول زىنداندا كوپ كۇن بويى جاتتى.
17 سەدەكيا پاتشا ادام جىبەرىپ، ونى الدىرتتى دا، ٶز سارايىندا جاسىرىن تۇردە سۇراقتار قويدى+. پاتشا: «ەحوبادان قانداي دا ٴبىر ٴسوز بار ما؟»— دەپ سۇرادى. «ٴيا، بار»،— دەپ جاۋاپ بەردى ەرەميا. سوسىن: «ٴسىز بابىل پاتشاسىنىڭ قولىنا تۇسەسىز!»— دەپ قوستى+.
18 سونداي-اق ەرەميا سەدەكيا پاتشاعا: «مەنى تۇرمەگە قامايتىنداي ٴسىزدىڭ، قىزمەتشىلەرىڭىزدىڭ جانە مىنا حالىقتىڭ الدىندا قانداي كۇنا جاسادىم؟
19 «سىزگە جانە وسى ەلگە بابىل پاتشاسى شابۋىل جاسامايدى» دەگەن پايعامبارلارىڭىز قايدا+؟
20 پاتشا يەم، مەنى تىڭداڭىزشى! ماعان راقىم ەتىڭىز! حاتشى ەحوناتاننىڭ ۇيىنە+ قايتارا كورمەڭىز، ايتپەسە سول جەردە ٶلىپ كەتەرمىن+»،— دەدى.
21 سەدەكيا پاتشا ەرەميانى كۇزەتشى اۋلاسىنا+ اپارىپ، سول جەردە تۇتقىندا ۇستاۋدى بۇيىردى. سونداي-اق قالادا نان تاۋسىلعانشا+، ناۋبايشىلار كوشەسىنەن كۇن سايىن ٴبىر كۇلشە ناننان بەرىپ تۇرۋدى تاپسىردى+. ەرەميا كۇزەتشى اۋلاسىندا قالا بەردى.
سىلتەمەلەر
^ ەحونيا دەپ تە اتالادى.
