ەرەميا 4:1—31
4 «قايتىپ ورالساڭ عوي، ۋا، يسرايل،— دەيدى ەحوبا.
—ماعان قايتىپ ورالساڭ عوي،جيىركەنىشتى پۇتتارىڭدى مەنىڭ الدىمنان قۇرتساڭ عوي،سوندا قاشقىن بولمايسىڭ+.
2 ەگەر سەن شىندىقپەن، ادىلەتپەن جانە ادىلدىكپەن«بۇل — ەحوبانىڭ ٴتىرى ەكەنىندەي حاق!» دەپ انت ەتسەڭ،حالىقتار ونىڭ باتاسىنا كەنەلىپ،ونى ماقتان تۇتاتىن بولادى+».
3 ەحوبا ياھۋدا مەن يەرۋساليمنىڭ ادامدارىنا مىنانى ايتادى:
«تۇقىمدارىڭدى تىكەن اراسىنا ەگە بەرمەي،وڭدەلمەگەن تاناپتى جىرتىڭدار+.
4 ياھۋدا حالقى مەن يەرۋساليم تۇرعىندارى،سۇندەتتەۋ ٴتاندى ارام نارسەدەن تازارتاتىنى سياقتى،ەحوبانىڭ الدىندا جۇرەكتەرىڭدى سۇندەتتەپ،ارام نارسەدەن تازارتىڭدار+.
ايتپەسە زۇلىم ىستەرىڭ ٷشىنقاھارىم وتتاي لاۋلاپ جانادى،ەشكىم ونى سوندىرە المايدى+».
5 مىنانى ياھۋدا ەلىندە حابارلاپ،يەرۋساليمدە جاريالاڭدار،بۇكىل ەلدە ايعايلاپ، ٴمۇيىز كەرنەي تارتىڭدار+.
قاتتى داۋىستاپ، بىلاي دەڭدەر: «جينالىڭدار،بەكىنىستى قالالارعا قاشىپ، باسساۋعالايىق+.
6 سيونعا باعىتتاپ بەلگى كوتەرىپ قويىڭدار.
بوسقا تۇرماي، پانا ىزدەڭدەر».
ويتكەنى مەن سولتۇستىكتەن جويقىن الاپات اكەلە جاتىرمىن+.
7 جاۋ قالىڭ بۇتانىڭ اراسىنان شىققان ارىستانداي شىعا كەلدى+.
حالىقتاردى قىرىپ-جويۋشى جولعا شىقتى+.
ەلىڭدى قورقىنىشتى جەرگە اينالدىرۋ ٷشىن، ول ٶز مەكەنىنەن اتتاندى.
قالالارىڭ ۇيىندىگە اينالىپ، بىردە-ٴبىر تۇرعىنى قالمايدى+.
8 سوندىقتان ازالى كيىم كيىپ+،قايعىرىپ*، زار ەڭىرەڭدەر،ويتكەنى ەحوبانىڭ بىزگە لاۋلاعان قاھارى باسىلعان جوق.
9 «سول كۇنى،— دەيدى ەحوبا،— پاتشانىڭ جۇرەگى ۇشادى+،امىرشىلەردىڭ دە زارە-قۇتى قالمايدى.
ٴدىني قىزمەتكەرلەر شوشىپ، پايعامبارلار ۇرەيلەنەدى+».
10 سوندا مەن: «و، الەمنىڭ ٵمىرشىسى ەحوبا! مىنا حالىق پەن يەرۋساليم تۇرعىندارىنىڭ «سەندەردە تىنىشتىق بولادى»+ دەگەن سوزدەرگە قاتتى الدانۋىنا جول بەردىڭ*+. ال، شىن مانىندە، تاماعىمىزعا سەمسەر تاقالىپ تۇر عوي»،— دەدىم.
11 سول ۋاقىتتا مىنا حالىق پەن يەرۋساليم تۇرعىندارىنا بىلاي دەلىنەدى:
«اڭىزاق جەل ٴشولدىڭ تاقىر توبەلەرىنەن
حالقىمنىڭ قىزىنا* قاراي قاتتى سوعاتىن بولادى.
بۇل جەل استىقتى ۇشىرۋ نە تازالاۋ ٷشىن سوقپايدى.
12 بۇل كۇشتى جەل مەنىڭ بۇيرىعىممەن سول جاقتان سوعادى.
سوندا مەن ولارعا شىعارعان ۇكىمدەرىمدى جاريالايمىن.
13 مىنە، كەلە جاتىر جاۋ قارا بۇلتتاي ٴتونىپ،سوعىس اربالارى داۋىلداي زىمىراپ+.
ال اتتارى ولاردىڭ بۇركىتتەن دە جىلدام+.
سورلادىق، قۇرىعان جەرىمىز وسى!
14 ۋا، يەرۋساليم، امان قالۋىڭ ٷشىن جۇرەگىڭدى زۇلىمدىقتان تازارت+.
زۇلىم ويلاردى ىشىڭدە قاشانعى ساقتاماقسىڭ؟
15 دان جاقتان ٴبىر داۋىس ەستىلەدى+،ول ەفرەمنىڭ تاۋلارىنان اپات كەلەتىنىن جاريالايدى.
16 وسىنى حالىقتارعا جەتكىزىپ،يەرۋساليمگە جاريالا».
«الىستاعى ەلدەن بارلاۋشىلار كەلە جاتىر،ولار ياھۋدانىڭ قالالارىنا قاراي اتوي سالادى.
17 ولار تاناپتىڭ قاراۋىلدارى ىسپەتتى يەرۋساليمدى قورشاپ الادى+،ويتكەنى ول ماعان قارسى كوتەرىلدى+،— دەيدى ەحوبا.
18 —جولدارىڭ مەن ٸس-ارەكەتتەرىڭ ٷشىن جاۋاپ بەرەسىڭ+.
باسىڭا تۇسكەن اپات اشتى بولادى،ويتكەنى بۇلىكتەرىڭ باسىڭنان اسادى!»
19 وي، جانىم-اي*، جانىم-اي!
جۇرەگىم قاتتى سىزدايدى.
جۇرەگىم ٴدۇرسىل قاعادى.
ٴمۇيىز كەرنەيدىڭ ٷنى قۇلاعىما جەتىپ،سوعىس دابىلىن* ەستىدىم+،سوندىقتان ٷنسىز قالا المايمىن.
20 ٷستى-ۇستىنە اپات تۋرالى حابار كەلۋدە،بۇكىل ەل قىرعىنعا ۇشىراۋدا.
جويىلدى اياقاستىنان ٶز شاتىرلارىم،ٴبىر ساتتە-اق شاتىر جابىندارىم+.
21 قاشانعى سيونعا باعىتتالعان بەلگىنى كورىپ،ٴمۇيىز كەرنەيدىڭ ٷنىن ەستىپ تۇرماقپىن+؟
22 «مەنىڭ حالقىم تۇيسىكسىز+،ولار مەنى ەش ەلەمەيدى.
ولار تۇسىنىكتەن جۇرداي اقىماق ۇلدار.
جاماندىققا كەلگەندە شەبەر-اق*،ال جاقسىلىققا كەلگەندە تۇك بىلمەس».
23 جەرگە كوز تاستاسام، قاڭىراپ بوس جاتىر+.
اسپانعا قاراسام، جارىعى سونگەن ەكەن+.
24 تاۋلارعا قاراسام، سىلكىنىپ جاتىر،توبەلەر بولسا دىرىلدەپ تۇر+.
25 قاراسام، بىردە-ٴبىر ادام بالاسى جوق،قۇس اتاۋلى ۇشىپ كەتكەن+.
26 تاعى ٴبىر كوز تاستاسام، باق شولگە اينالىپتى،ونىڭ كۇللى قالاسى جەرمەن-جەكسەن بولىپتى+.
مۇنىڭ ٴبارى ەحوبادان،ونىڭ لاۋلاعان قاھارىنان بولدى.
27 ويتكەنى ەحوبا بىلاي دەيدى:
«بۇكىل ەل قاڭىراپ قالادى+،ٴبىراق ونى تۇگەلدەي قىرىپ-جويمايمىن!
28 سوندىقتان دا جەر قايعىرىپ جىلايدى+،اسپاندى قاراڭعى تۇنەك باسادى+.
ويتكەنى مەن ايتتىم، وسىلاي شەشتىم،ويىمدى وزگەرتپەيمىن، العان بەتىمنەن قايتپايمىن+.
29 اتتى اسكەر مەن ساداقشىلاردىڭ داۋسىنانبۇكىل قالا تۇرا قاشتى+.
بىرەۋلەر قالىڭ بۇتالار اراسىنا جاسىرىنسا،وزگەلەرى تاۋ-تاسقا ورمەلەدى+.
قالالاردىڭ بارلىعى بوس قالدى،وندا تۇرىپ جاتقان ٴبىر پەندە جوق».
30 مىنە، جاۋ سەنى كۇيرەتىپ جاتىر، ەندى نە ىستەمەكسىڭ؟
سەن ال قىزىل كيىم كيىپ،التىن اشەكەي تاعۋشى ەڭ،سۇرمەمەن كوزىڭدى ۇلكەيتىپ بوياۋشى ەڭ.
ٶزىڭدى ارلەپ-ساندەگەنىڭ بەكەر بولدى+،ويتكەنى سەنى قۇمارتقاندار تاستاپ كەتتى.
ەندى ٴتىپتى جانىڭدى الماقشى+.
31 قۇلاعىما ٴبىر داۋىس كەلەدى، قينالعان ايەلدىڭ داۋسىنداي،العاش بوسانىپ، ازاپتانعان ايەلدىڭ ايقايىنداي.
دەمىككەن سيون قىزىنىڭ ٷنىن ەستيمىن.
ول قولىن جايىپ، بىلاي دەيدى+:
«قاسىرەتكە قالدىم-اۋ، كىسى ولتىرۋشىلەر جانىمدى ازاپقا سالدى عوي!»
سىلتەمەلەر
^ نەمەسە «كوكىرەكتەرىڭدى ۇرعىلاپ».
^ سوزبە-ٴسوز «قاتتى الدادىڭ».
^ بۇل — بەينەلى ٴسوز، ول اياۋشىلىقتى، جاناشىرلىقتى بىلدىرسە كەرەك.
^ سوزبە-ٴسوز «ىشەكتەرىم-اي».
^ مۇمكىن: «اتوي سالعان داۋىستار».
^ نەمەسە «اقىلدى؛ زەرەك».
