ەرەميا 40:1—16
40 باس قورعاۋشى نابۋزاردان+ ەرەميانى راماقتا+ بوساتىپ جىبەرگەن سوڭ، ەحوبا وعان ٴسوزىن ارنادى. نابۋزاردان قولى كىسەندەۋلى ەرەميانى يەرۋساليم مەن ياھۋدادان بابىلعا جەر اۋدارىلىپ بارا جاتقانداردىڭ اراسىنان شىعارىپ العان ەدى.
2 ول ەرەميانى بىلايىراق اپارىپ، مىنانى ايتتى: «سەنىڭ قۇدايىڭ ەحوبا بۇل ەلدە وسىنداي اپات بولاتىنىن الدىن الا ايتقان ەدى.
3 ەندى ەحوبا ٶزىنىڭ ايتقانىن ورىنداپ وتىر، ويتكەنى حالىق ەحوباعا قارسى كۇنا جاسادى ٵرى ونىڭ ايتقانىنا مويىنسۇنبادى. مىنە، سوندىقتان دا وسىنىڭ ٴبارى باستارىڭا ٴتۇسىپ وتىر+.
4 قازىر قولىڭداعى كىسەندى شەشىپ، سەنى بوساتامىن. ەگەر مەنىمەن بىرگە بابىلعا بارعىڭ كەلسە، ٴجۇر، سەنى ٶز قامقورلىعىما الامىن. ال ەگەر بارعىڭ كەلمەسە، بارماي-اق قوي. مىنە، بۇكىل ەل الدىڭدا جاتىر. قالاعان جاعىڭا بارا بەر+».
5 ەرەميا كەرى قايتار-قايتپاسىن شەشپەي تۇرعاندا، نابۋزاردان وعان: «بابىل پاتشاسى ياھۋدانىڭ قالالارىنا باسشى ەتىپ تاعايىنداعان شافاننىڭ+ نەمەرەسى، احيقامنىڭ+ ۇلى عودالياحقا+ بارىپ، سونىمەن بىرگە حالىقتىڭ اراسىندا تۇر، يا بولماسا ٶزىڭ قالاعان جاققا بار»،— دەدى.
ٴسۇيتىپ، باس قورعاۋشى وعان ازىق-تۇلىك پەن سيلىق بەرىپ، قويا بەردى.
6 ەرەميا ميسپاداعى+ احيقام ۇلى عودالياحقا بارىپ، ەلدە قالعان حالىقتىڭ اراسىندا تۇردى.
7 اشىق دالادا جۇرگەن اسكەر باسشىلارى مەن ولاردىڭ ادامدارى بابىلدىڭ پاتشاسى احيقام ۇلى عودالياحتى ەلگە باسشى ەتىپ تاعايىنداعانىن، بابىلعا جەر اۋدارىلماعان كەدەي-كەپشىكتەردىڭ — ەركەكتەر مەن ايەلدەردىڭ، بالا-شاعانىڭ — ۇستىنەن قويعانىن ەستىدى+.
8 ٴسۇيتىپ، ولار، اتاپ ايتقاندا: نەتانياح ۇلى ىسماعۇل+، قارەياحتىڭ ۇلدارى جوحانان+ مەن جوناتان، تانحۋمەت ۇلى سەراياح، نەتوپالىق ەفايدىڭ ۇلدارى، ماعاقاتتىق كىسىنىڭ ۇلى ەزانياح+ جانە سولارعا ەرگەن ادامدار — ميسپاداعى عودالياحقا كەلدى+.
9 شافاننىڭ نەمەرەسى، احيقامنىڭ ۇلى عودالياح ولارعا جانە قاسىنداعى ادامدارىنا انت بەرىپ، بىلاي دەدى: «حالدەيلەرگە قىزمەت ەتۋدەن قورىقپاڭدار. وسى ەلدە تۇرىپ، بابىل پاتشاسىنا قىزمەت ەتىڭدەر، سوندا جاعدايلارىڭ جاقسى بولادى+.
10 ال مەن ميسپادا قالىپ، وسىندا كەلگەن حالدەيلەردىڭ الدىندا مۇددەلەرىڭدى قورعايمىن. سەندەر شاراپ پەن ماي جاساپ، جازعى جەمىستەردى جيناپ، قويمالارىڭا ساقتاڭدار. يەمدەنگەن قالالارىڭا قونىستانىڭدار+».
11 مواب، اممون، ەدوم جانە باسقا ەلدەردەگى ياھۋديلەر دە بابىلدىڭ پاتشاسى ياھۋدا جەرىندە ازعانا جۇرت قالدىرعانىن، سونداي-اق ولارعا باسشى ەتىپ شافاننىڭ نەمەرەسى، احيقامنىڭ ۇلى عودالياحتى تاعايىنداعانىن ەستىدى.
12 سودان جەر-جەرگە بىتىراپ كەتكەن ياھۋديلەر ٶز ەلىنە، ميسپاداعى عودالياحقا كەلە باستادى. ولار دا شاراپ جاسادى جانە جازعى جەمىستەردى وتە مول ەتىپ جيناپ الدى.
13 قارەياح ۇلى جوحانان مەن اشىق دالادا جۇرگەن بارلىق اسكەر باسشىلارى ميسپاداعى عودالياحتىڭ الدىنا كەلىپ،
14 وعان: «اممون+ پاتشاسى باعالىس نەتانياحتىڭ ۇلى ىسماعۇلدى ٴسىزدى ٶلتىرۋ ٷشىن جىبەرگەنىن بىلمەيسىز بە+؟»— دەدى. ٴبىراق احيقام ۇلى عودالياح ولارعا سەنبەدى.
15 ميسپادا قارەياح ۇلى جوحانان عودالياحپەن جاسىرىن سويلەسىپ: «مەن قازىر بارىپ، نەتانياح ۇلى ىسماعۇلدى ولتىرەيىن. مۇنى ەشكىم بىلمەيتىن بولادى. وعان ٴسىزدى ولتىرۋگە جول بەرىپ قايتەمىز؟ ٴسىز ولسەڭىز، اينالاڭىزعا جينالعان ياھۋديلەر بىتىراپ، ياھۋدانىڭ تامتىعى قۇرىپ كەتەدى عوي»،— دەدى.
16 الايدا احيقام ۇلى عودالياح+ قارەياحتىڭ ۇلى جوحانانعا: «ولاي ەتپە، ىسماعۇل تۋرالى ايتىپ تۇرعانىڭ وتىرىك!»— دەپ قارسىلىق ٴبىلدىردى.
