ەزرا 3:1—13
3 جەتىنشى ايدا+ ٶز قالالارىندا تۇرىپ جاتقان يسرايلدىكتەر يەرۋساليمگە ٴبىر كىسىدەي جينالدى.
2 ەحوسادىقتىڭ ۇلى ەشۋا+ مەن ونىڭ ٴدىني قىزمەتكەر اعايىندارى، سالاتەلدىڭ+ ۇلى زوروبابەل+ مەن ونىڭ باۋىرلارى يسرايلدىڭ قۇدايىنا ارناپ قۇرباندىق شالاتىن وشاق جاسادى. ٴسۇيتىپ، قۇدايدىڭ ادامى مۇسانىڭ زاڭىندا جازىلعانعا ساي، تۇگەل ورتەلەتىن قۇرباندىقتار ۇسىنباق بولدى+.
3 اينالاسىنداعى حالىقتاردان قورىققاندارىنا قاراماستان+، ولار قۇرباندىق وشاعىن بۇرىنعى جەرىنە قايتا ورناتىپ، ەحوباعا ارناپ تۇگەل ورتەلەتىن قۇرباندىقتاردى تاڭەرتەڭ جانە كەشكە ۇسىنا باستادى+.
4 سوسىن، زاڭدا جازىلعانعا سايكەس، كۇركەلەر* مەيرامىن وتكىزىپ+، كۇن سايىن تۇگەل ورتەلەتىن قۇرباندىقتاردىڭ تالاپ ەتىلەتىن سانىن اكەلىپ وتىردى+.
5 سول كەزدەن باستاپ ولار كۇندەلىكتى تۇگەل ورتەلەتىن قۇرباندىقتاردى+، جاڭا تۋعان اي+ مەن ەحوباعا ارنالعان قاسيەتتى مەيرامداردىڭ بارىندە+ ۇسىنىلاتىن قۇرباندىقتاردى، سونداي-اق ٵربىر ادام ەحوباعا ارناپ شىن جۇرەكتەن ەرىكتى قۇرباندىقتاردى+ اكەلەتىن بولدى.
6 ەحوبانىڭ عيباداتحاناسىنىڭ ىرگەتاسى ٵلى قالانباسا دا، حالىق جەتىنشى ايدىڭ ٴبىرىنشى كۇنىنەن+ باستاپ ەحوباعا تۇگەل ورتەلەتىن قۇرباندىقتار ۇسىندى.
7 حالىق تاس كەسەتىندەر+ مەن ۇستالارعا+ اقشا بەردى. سونىمەن قاتار پەرسيا پاتشاسى كيردىڭ جارلىعىنا ساي+، ليۆاننان يوپپەگە تەڭىز ارقىلى قاراعاي بورەنەلەر تاسىپ تۇراتىن سيدوندىقتار مەن تيرلىكتەرگە ازىق-تۇلىك، سۋسىن جانە ماي بەرىپ تۇردى+.
8 يەرۋساليمدەگى قۇدايدىڭ ۇيىنە ورالعاننان كەيىنگى ەكىنشى جىلدىڭ ەكىنشى ايىندا سالاتەل ۇلى زوروبابەل، ەحوسادىق ۇلى ەشۋا، ولاردىڭ ٴدىني قىزمەتكەر جانە لەۋىلىك باۋىرلارى، سونداي-اق تۇتقىننان بوساپ، يەرۋساليمگە ورالعانداردىڭ بارلىعى+ قۇرىلىس جۇمىسىنا كىرىستى. ولار جاسى جيىرماعا كەلگەن جانە ودان اسقان لەۋىلىكتەردى ەحوبانىڭ ۇيىندەگى جۇمىستاردى باسقارۋعا تاعايىندادى.
9 وسىلاي ياھۋدانىڭ* ۇرپاعى — ەشۋا مەن ونىڭ ۇلدارى جانە باۋىرلارى، كادميەل مەن ونىڭ ۇلدارى بىرىگىپ، قۇداي ٷيىن سوعىپ جاتقان جۇمىسشىلارعا باسشىلىق ەتتى. بۇلارعا حەنادادتىڭ+ ۇرپاقتارى — ولاردىڭ ۇلدارى جانە اعايىندارى (بۇلار دا لەۋىلىكتەر) قوسىلدى.
10 قۇرىلىسشىلار ەحوبانىڭ عيباداتحاناسىنىڭ ىرگەتاسىن قالاپ بىتكەندە+، ارنايى كيىمدەرىن كيگەن ٴدىني قىزمەتكەرلەر كەرنەيلەرىن+، ال لەۋىلىك اساپتىڭ ۇلدارى شىڭدارىن الىپ، ەحوبانى ماداقتاۋ ٷشىن، يسرايل پاتشاسى ٴداۋىت ورناتقان ٴتارتىپ بويىنشا تۇردى+.
11 ولار ەحوبانى دارىپتەپ+، ريزاشىلىق ٴبىلدىرىپ: «ول ىزگى، يسرايلگە دەگەن اينىماس سۇيىسپەنشىلىگى ماڭگى»+،— دەپ كەزەك-كەزەك جىرلادى. سوندا بۇكىل حالىق قاتتى داۋىستاپ ەحوبانى دارىپتەدى، ويتكەنى ەحوبانىڭ ٷيىنىڭ ىرگەتاسى قالانعان ەدى.
12 بۇرىنعى كيەلى ٷيدى كورگەن قارت ٴدىني قىزمەتكەرلەر، لەۋىلىكتەر مەن اۋلەتباسىلارىنىڭ كوبىسى+ جاڭا ٷيدىڭ ىرگەتاسى قالانعانىن كورگەندە، داۋىستاپ قاتتى جىلادى. ال باسقالارى قۋانىشتان ايعاي سالدى+.
13 جۇرت قۋانعاندار مەن جىلاعانداردىڭ داۋسىن اجىراتا الماي قالدى. ولاردىڭ قاتتى ايعايلاعانى سونشا — داۋىستارى الىسقا جەتىپ جاتتى.
