ەزرا 4:1—24
4 ياھۋدا مەن بەنياميننىڭ جاۋلارى+ ەلىنە ورالعانداردىڭ+ يسرايل قۇدايى ەحوبانىڭ عيباداتحاناسىن سالىپ جاتقانىن ەستىگەندە،
2 دەرەۋ زوروبابەل مەن اۋلەتباسىلارىنا كەلىپ: «ٴبىز دە وسى قۇرىلىسقا قاتىسايىق. ويتكەنى سەندەر سياقتى، ٴبىز دە قۇدايلارىڭا سيىنامىز+ جانە وسى جەرگە كوشىرگەن اسسيريا پاتشاسى+ اسارحاددوننىڭ+ كۇنىنەن بەرى وعان قۇرباندىق شالىپ كەلەمىز»،— دەدى.
3 ٴبىراق زوروبابەل مەن ەشۋا جانە يسرايلدىڭ اۋلەتباسىلارى ولارعا: «سەندەر بىزبەن بىرگە قۇدايىمىزدىڭ ٷيىن سوقپايسىڭدار+. پەرسيا پاتشاسى كيردىڭ بۇيىرعانىنداي، يسرايلدىڭ قۇدايى ەحوبانىڭ ٷيىن تەك ٶزىمىز سالامىز+»،— دەپ جاۋاپ قايتاردى.
4 سوندا توڭىرەكتەگى حالىقتار قۇرىلىس ٸسىن توقتاتۋ ٷشىن، ياھۋدا حالقىنىڭ جىگەرىن جاسىتىپ، ساعىن سىندىرۋعا تىرىسىپ باقتى+.
5 ولاردىڭ جوسپارلارىن بۇزۋ ٷشىن كەڭەسشىلەر جالدادى+. بۇل ارەكەتتەرى پەرسيا پاتشاسى كيردىڭ كۇندەرىنەن باستالىپ، پەرسيا پاتشاسى ٴدارييدىڭ+ كۇندەرىنە دەيىن جالعاستى.
6 احاشۆەروش بيلىك قۇرا باستاعاندا، ولار ياھۋدا مەن يەرۋساليمنىڭ تۇرعىندارىنىڭ ۇستىنەن شاعىم جازدى.
7 پەرسيا پاتشاسى ارتاكسەركستىڭ تۇسىندا دا بيشلام، ميترەدات، تابيەل مەن ونىڭ ارىپتەستەرى ارتاكسەركس پاتشاعا حات جازدى. حاتتى ولار ارامەي تىلىنە اۋدارىپ+، ارامەيشە جازعان ەدى*.
8 * باس مەملەكەت قىزمەتكەرى رەحۋم مەن كوشىرمەشى شيمشاي ارتاكسەركس پاتشاعا يەرۋساليمنىڭ ۇستىنەن شاعىمدانىپ، مىناداي حات جازدى:
9 (بۇل حات باس مەملەكەت قىزمەتكەرى رەحۋمنان، كوشىرمەشى شيمشاي مەن ولاردىڭ ارىپتەستەرىنەن، اتاپ ايتقاندا: بيلەردەن، كىشى امىرشىلەردەن، حاتشىلاردان، ەرەحتىكتەردەن+، بابىلدىقتاردان، سۋزىنىڭ+ تۇرعىندارىنان (ياعني ەلامدىقتاردان+)،
10 سونداي-اق كەزىندە ۇلى مارتەبەلى اسنافار* پاتشا جەر اۋدارىپ، ساماريا قالالارى مەن ەۆفراتتىڭ باتىس ولكەسىنە* قونىستاندىرعان باسقا ۇلتتاردان+.
11 بۇل — جىبەرىلگەن حاتتىڭ كوشىرمەسى.)
«ارتاكسەركس پاتشا اعزامعا ەۆفراتتىڭ باتىس ولكەسىندەگى قىزمەتشىلەرىنەن.
12 پاتشانى مىنا جايتتان حاباردار ەتكىمىز كەلەدى: ٴسىز جاقتان ٴبىز جاققا كوشكەن ياھۋديلەر يەرۋساليمگە كەلىپ جەتتى. ولار بۇلىكشىل دە زۇلىم قالانى قايتا سوعۋعا كىرىستى. قالانىڭ قابىرعالارىن تۇرعىزىپ+، ىرگەتاستارىن جوندەپ جاتىر.
13 پاتشا مىنادان دا قۇلاعدار بولسا ەكەن: ەگەر قالا قايتا سوعىلىپ، قابىرعالارى تۇرعىزىلىپ بىتسە، ولار الىم-سالىق+ پەن باج سالىعىن تولەۋدى قويادى، ٴسۇيتىپ، پاتشا قازىناسىنىڭ كىرىسى ازايادى.
14 سارايدىڭ نانىن* جەپ وتىرعاندىقتان، پاتشا مۇددەسىنە زيان كەلۋى مۇمكىن ەكەنىن كورە تۇرا، ۇندەمەي قالعانىمىز دۇرىس بولماس. سوندىقتان پاتشاعا وسى جايتتى مالىمدەۋ ٷشىن حات جازىپ وتىرمىز.
15 اتا-بابالارىڭىزدىڭ جازبالارىن+ قاراپ شىقساڭىز، بۇل قالانىڭ پاتشالار مەن ايماقتارعا زيان كەلتىرگەن بۇلىكشىل قالا ەكەنىن، وندا ەجەلدەن بەرى كوتەرىلىسشىلەر تۇرعانىن بىلەر ەدىڭىز. سول سەبەپتەن قالا كۇيرەتىلگەن بولاتىن+.
16 ەگەر قالا قايتا سوعىلىپ، قابىرعالارى تۇرعىزىلىپ بىتسە، ەۆفراتتىڭ+ باتىس ولكەسى قول استىڭىزدان شىعىپ قالادى. پاتشا اعزام وسىنى بىلسە ەكەن دەيمىز».
17 سوندا پاتشا باس مەملەكەت قىزمەتكەرى رەحۋمعا، كوشىرمەشى شيمشايعا جانە ساماريا مەن ەۆفراتتىڭ باتىس ولكەسىندە تۇرىپ جاتقان ولاردىڭ ارىپتەستەرىنە مىناداي جاۋاپ جولدادى:
«بارىڭە اماندىق تىلەيمىن!
18 بىزگە جىبەرگەن حاتتارىڭ مەنىڭ الدىمدا انىق ەتىپ وقىلدى*.
19 سودان ٵمىرىم بويىنشا تەكسەرۋ جۇرگىزىلىپ، سول قالانىڭ بۇرىننان بەرى پاتشالارعا قارسى شىعىپ، كوتەرىلىستەر مەن بۇلىكتەر جاساپ كەلگەنى انىقتالدى+.
20 يەرۋساليمدە ەۆفراتتىڭ باتىسىنداعى بۇكىل ولكەنى باسقارعان قۇدىرەتتى پاتشالار بولعان ەكەن، ولارعا الىم-سالىق پەن باج سالىعى تولەنىپ تۇرىپتى.
21 ەندى الگىلەرگە جۇمىستى توقتاتۋدى بۇيىرىڭدار. مەنىڭ جارلىعىم شىقپايىنشا، قالانى قايتا تۇرعىزباسىن.
22 پاتشانىڭ مۇددەسىنە بۇدان بىلاي دا نۇقسان كەلمەس ٷشىن+، بۇعان نەمكەتتى قاراۋشى بولماڭدار».
23 ارتاكسەركس پاتشانىڭ جارلىعى جازىلعان وسى حاتتىڭ كوشىرمەسى رەحۋمنىڭ، كوشىرمەشى شيمشاي مەن ولاردىڭ ارىپتەستەرىنىڭ الدىندا وقىلعاننان كەيىن، ولار دەرەۋ يەرۋساليمدەگى ياھۋديلەرگە بارىپ، قۇرىلىستى كۇشتەپ توقتاتتى.
24 سودان يەرۋساليمدەگى قۇدايدىڭ ٷيىن سوعۋ جۇمىسى تۇرىپ قالدى. ول پەرسيا پاتشاسى ٴدارييدىڭ بيلىك ەتۋىنىڭ ەكىنشى جىلىنا دەيىن قولعا الىنبادى+.
سىلتەمەلەر
^ مۇمكىن: «حات ارامەيشە جازىلىپ، كەيىن اۋدارىلدى».
^ ەزر 4:8—6:18 تارماقتار ٴتۇپنۇسقادا ارامەي تىلىندە جازىلعان.
^ ياعني اششۋربانيپال.
^ سوزبە-ٴسوز «وزەننىڭ ارعى بەتى».
^ سوزبە-ٴسوز «تۇزىن».
^ مۇمكىن: «اۋدارىلىپ، وقىلدى».
