ەزرا 8:1—36
8 ارتاكسەركس پاتشانىڭ بيلىگىنىڭ تۇسىندا+ بابىلدان مەنىمەن بىرگە شىققان اۋلەتباسىلارى جانە اۋلەتتەرى بويىنشا تىزىمگە الىنعاندار مىنالار:
2 پىنەحەستىڭ+ ۇرپاعىنان گەرشوم، يتاماردىڭ+ ۇرپاعىنان دانيال، ٴداۋىتتىڭ ۇرپاعىنان حاتۋش،
3 پاروشتان تاراعان شەحانيانىڭ ۇرپاعىنان زاكاريا جانە ونىمەن بىرگە تىزىمگە ەنگەن 150 ەر ادام،
4 پاحات-موابتىڭ ۇرپاعىنان+ ەليحو-حەناي ۇلى زاراقيا جانە ونىمەن بىرگە 200 ەر ادام،
5 زاتۋدىڭ ۇرپاعىنان+ جاحازيەل ۇلى شەحانيا جانە ونىمەن بىرگە 300 ەر ادام،
6 ادەننىڭ ۇرپاعىنان+ جوناتان ۇلى ەبەد جانە ونىمەن بىرگە 50 ەر ادام،
7 ەلامنىڭ ۇرپاعىنان+ اتاليانىڭ ۇلى ەشاياح جانە ونىمەن بىرگە 70 ەر ادام،
8 شافاتياحتىڭ ۇرپاعىنان+ ميكايل ۇلى زاباديا جانە ونىمەن بىرگە 80 ەر ادام،
9 جوعابتىڭ ۇرپاعىنان ەحيەل ۇلى اباديا جانە ونىمەن بىرگە 218 ەر ادام،
10 ٴبانيدىڭ ۇرپاعىنان جوسىپياح ۇلى شەلوميت جانە ونىمەن بىرگە 160 ەر ادام،
11 بەبايدىڭ ۇرپاعىنان+ بەباي ۇلى زاكاريا جانە ونىمەن بىرگە 28 ەر ادام،
12 ازعاتتىڭ ۇرپاعىنان+ حاكاتان ۇلى جوحانان جانە ونىمەن بىرگە 110 ەر ادام،
13 ادونيقامنىڭ ۇرپاعىنان+ سوڭعى بولىپ ورالعاندار ەليپەلەت، جەيەل، شەماياح جانە ولارمەن بىرگە 60 ەر ادام،
14 بيگۋايدىڭ ۇرپاعىنان+ ۇتاي مەن زابۋت جانە ولارمەن بىرگە 70 ەر ادام.
15 مەن ولاردى احاۋاعا+ قاراي اعاتىن وزەننىڭ ماڭىنا جينادىم. سول جەرگە قوس تىگىپ، ٷش كۇن بولدىق. حالىق پەن ٴدىني قىزمەتكەرلەردى قاراپ شىققانىمدا، ارالارىنان بىردە-ٴبىر لەۋىلىكتى تاپپادىم.
16 سوندا مەن كىسى جىبەرىپ، ەليەزەر، اريەل، شەماياح، ەلناتان، ياريب، ەلناتان، ناتان، زاكاريا، مەشۋلام دەگەن باسشىلاردى جانە جوحاريب پەن ەلناتان دەگەن تالىمگەرلەردى شاقىرتتىم.
17 سوسىن ولارعا كاسيفيا دەپ اتالاتىن جەردىڭ باسشىسى يددوعا بارۋدى بۇيىردىم. ٴسۇيتىپ، يددو جانە كاسيفياداعى ونىڭ باۋىرلارىنا (بۇلار عيباداتحانا قىزمەتشىلەرىنىڭ* اۋلەتىنەن شىققان) بىزگە قۇدايىمىزدىڭ ۇيىندە قىزمەت ەتەتىن ادامدار جىبەرسىن دەدىم.
18 قۇدايىمىز جار بولعاندىقتان، ولار يسرايلدىڭ ۇلى لەۋىنىڭ نەمەرەسى ٴماحليدىڭ+ ۇرپاعىنان شىققان شەرەبياح+ اتتى ٴبىر اقىلدى كىسىنى، ونىڭ ۇلدارى مەن باۋىرلارىن، بارلىعى 18 ەر ادامدى ەرتىپ كەلدى.
19 سونداي-اق حاشابياحتى جانە ونىمەن بىرگە مەراريدىڭ+ ۇرپاعىنان شىققان ەشاياحتى، ونىڭ باۋىرلارىن جانە ولاردىڭ ۇلدارىن، بارلىعى 20 ەر ادامدى ەرتىپ كەلدى.
20 عيباداتحانا قىزمەتشىلەرىنىڭ اراسىنان ەسىمى بويىنشا تىركەلگەن 220 قىزمەتشى دە كەلدى. بۇلاردى كەزىندە ٴداۋىت پەن باسشىلار لەۋىلىكتەرگە قىزمەت ەتۋگە بەرگەن بولاتىن.
21 سودان كەيىن مەن احاۋا وزەنىنىڭ بويىندا حالىققا ورازا ۇستاۋدى جاريالادىم. وسىلايشا قۇدايىمىزدىڭ الدىندا كىشىپەيىلدىلىك تانىتىپ، جولىمىز قاۋىپسىز بولىپ، بالا-شاعامىزبەن، مال-مۇلكىمىزبەن امان-ەسەن جەتۋىمىزدى سۇراماق بولدىق.
22 پاتشادان ٴبىزدى جول-جونەكەي جاۋلاردان قورعايتىن جاساقشىلار مەن اتتى اسكەر سۇراۋعا ۇيالدىم، ويتكەنى مۇنىڭ الدىندا وعان: «قۇدايىمىز ٶزىن ىزدەگەندەردىڭ بارىنە جار بولادى+، ال وزىنەن باس تارتقانداردىڭ بارىنە قۇدىرەتىن كورسەتىپ، قاھارىن توگەدى+»،— دەپ ايتقان ەدىك.
23 سوندىقتان ورازا ۇستاپ، قۇدايىمىزدان وسى جايلى سۇرادىق. ول ٴبىزدىڭ وتىنىشىمىزگە قۇلاق استى+.
24 سودان مەن ٴدىني قىزمەتكەرلەردىڭ باسشىلارىنان ون ەكىسىن، اتاپ ايتقاندا: شەرەبياحتى، حاشابياحتى+ جانە ولاردىڭ ون باۋىرىن — تاڭداپ الدىم.
25 ٴسۇيتىپ، پاتشا مەن ونىڭ ۋازىرلەرى جانە امىرشىلەرى، سونداي-اق سول وڭىردەگى كۇللى يسرايلدىكتەر قۇدايىمىزدىڭ ۇيىنە ارناپ تارتۋ ەتكەن التىن-كۇمىس پەن بۇيىمداردى تارازىعا ولشەپ، ولارعا تابىس ەتتىم+.
26 وسىلايشا ولاردىڭ قولىنا 650 تالانت* كۇمىس، جالپى سالماعى 2 تالانت بولاتىن 100 كۇمىس بۇيىم، 100 تالانت التىن،
27 جالپى قۇنى 1000 داريك* بولاتىن 20 كىشكەنتاي التىن تاباق، قۇنى التىنعا تەڭ كەلەتىن ٵرى ساپالى جىلتىراعان قىزىل مىستان جاسالعان 2 بۇيىم بەردىم.
28 سوسىن ولارعا بىلاي دەدىم: «سەندەر ەحوبا ٷشىن قاسيەتتىسىڭدەر+، بۇيىمدار دا قاسيەتتى، ال التىن مەن كۇمىس — اتا-بابالارىڭنىڭ قۇدايى ەحوباعا ارنالعان ەرىكتى سي-تارتۋ.
29 وسى زاتتارعا مۇقيات بولىڭدار. ويتكەنى ولاردى يەرۋساليمدە — ەحوبانىڭ ۇيىندەگى قويما بولمەلەردە — ٴدىني قىزمەتكەرلەر مەن لەۋىلىكتەردىڭ باسشىلارىنىڭ جانە يسرايل اۋلەتباسىلارىنىڭ الدىندا تارازىعا تارتىپ وتكىزەسىڭدەر+».
30 سوندا ٴدىني قىزمەتكەرلەر مەن لەۋىلىكتەر يەرۋساليمدەگى قۇدايىمىزدىڭ ۇيىنە جەتكىزۋ ٷشىن، وزدەرىنە ولشەنىپ بەرىلگەن التىن-كۇمىستى جانە بۇيىمداردى قابىلداپ الدى.
31 ٴسۇيتىپ، ٴبىرىنشى ايدىڭ+ ون ەكىنشى كۇنى ٴبىز احاۋا+ وزەنىنەن يەرۋساليمگە جول تارتتىق. قۇدايىمىز جار بولىپ، ٴبىزدى جول بويى جاۋلاردان جانە تورۋىلداپ جاتقان قاراقشىلاردان امان ساقتادى.
32 ٴبىز يەرۋساليمگە جەتىپ+، سول جەردە ٷش كۇن بولدىق.
33 ٴتورتىنشى كۇنى قۇدايىمىزدىڭ ۇيىندە التىن-كۇمىس پەن بۇيىمداردى تارازىعا تارتىپ+، ۇرياحتىڭ ٴدىني قىزمەتكەر ۇلى مەرەموتقا+ تابىستادىق. ونىڭ قاسىندا پىنەحەس ۇلى ەلازار تۇردى. ولارمەن بىرگە ەشۋا ۇلى جوزاباد+ پەن بينۋي+ ۇلى نوعاديا اتتى لەۋىلىكتەر دە بولدى.
34 اكەلىنگەن زاتتاردىڭ ٴبارى سانالىپ، تارازىعا تارتىلدى دا، جالپى سالماعى جازىپ قويىلدى.
35 تۇتقىننان بوساپ كەلگەندەر، ياعني جەر اۋدارىلۋدان ورالعاندار، يسرايل قۇدايىنا ارناپ تۇگەل ورتەلەتىن قۇرباندىقتار اكەلدى: بۇكىل يسرايل ٷشىن 12 بۇقا+، 96 قوشقار+، 77 ەركەك توقتى جانە كۇنا ٷشىن قۇرباندىققا 12 تەكە+. بۇنىڭ ٴبارى ەحوباعا تۇگەل ورتەلىپ ۇسىنىلدى+.
36 سودان كەيىن ٴبىز پاتشانىڭ جارلىقتارىن+ ونىڭ ساتراپتارىنا* جانە ەۆفراتتىڭ+ باتىس ولكەسىندەگى امىرشىلەرگە تابىستادىق. ولار حالىققا جانە قۇداي ۇيىنە قولداۋ كورسەتتى+.
سىلتەمەلەر
^ نەمەسە «نەتيندەر». سوزبە-ٴسوز «بەرىلگەندەر».
^ 1 تالانت 2.34 كيلوگرامعا تەڭ. B14 قوسىمشاسىن قاراڭىز.
^ داريك — پارسىلاردىڭ التىن تيىنى. B14 قوسىمشاسىن قاراڭىز.
^ ماعىناسى «پاتشالىقتى قورعاۋشىلار». تۇسىندىرمەنى قاراڭىز.
