ەزەكيەل 13:1—23
13 ەحوبا تاعى دا ماعان ٴسوزىن ارناپ بىلاي دەدى:
2 «ادام ۇلى، ويدان شىعارىپ، پايعامبارلىق ەتىپ جۇرگەن+ يسرايل پايعامبارلارىنا+ بىلاي دە: —ەحوبانىڭ ٴسوزىن تىڭداپ الىڭدار!
3 الەمنىڭ ٵمىرشىسى ەحوبا بىلاي دەيدى: —ەشقانداي ايان كورمەسە دە، ٶز قيالىنان شىققان ويلارىنىڭ جەتەگىندە جۇرگەن اقىماق پايعامبارلار قاسىرەتكە قالادى+!
4 ەي، يسرايل، سەنىڭ پايعامبارلارىڭ ۇيىندىلەر اراسىندا جۇرگەن تۇلكىلەر سياقتى.
5 ولار ەحوبانىڭ كۇنى+ كەلگەندە، يسرايل حالقى شايقاستا توتەپ بەرە الۋ ٷشىن قابىرعانىڭ جارىقتارىن جوندەۋگە كەلمەيدى+.
6 ولاردىڭ كورگەن اياندارى جالعان، ايتقان پايعامبارلىقتارى وتىرىك. ەحوبا جىبەرمەسە دە، ولار «ەحوبا بىلاي دەيدى» دەپ جاريالايدى، ٵرى ايتقاندارى جۇزەگە اسادى دەپ كۇتەدى+.
7 مەن ەشتەڭە ايتپاسام دا، ولار «ەحوبا بىلاي دەيدى» دەپ جاريالاپ جۇرسە، كورگەن اياندارى جالعان، ايتقان پايعامبارلىقتارى وتىرىك ەمەس پە؟
8 سوندىقتان الەمنىڭ ٵمىرشىسى ەحوبا بىلاي دەيدى: —سوزدەرى وتىرىك، اياندارى جالعان بولعاندىقتان، مەن ولاردى جازالايمىن. مۇنى ايتقان مەن — الەمنىڭ ٵمىرشىسى ەحوبا+.
9 مەن جالعان ايان الىپ، وتىرىك سويلەيتىن پايعامبارلاردى جازالايمىن+. ولار ٶزىم سەنىم ارتاتىنداردىڭ قاتارىنا جاتپايدى، يسرايل ٷيىنىڭ تىزىمىنە دە ەنبەيدى، يسرايل ەلىنە قايتا ورالمايدى. سوندا مەنىڭ الەمنىڭ ٵمىرشىسى ەحوبا ەكەنىمدى بىلەتىن بولاسىڭدار+.
10 مەن مۇنى ولاردىڭ تىنىشتىق جوق كەزدە «تىنىشتىق ورنادى!» دەپ حالقىمدى اداستىرىپ جۇرگەندەرى ٷشىن ىستەيمىن+. بىرەۋى ٵلسىز دۋال تۇرعىزسا، ەكىنشىسى ونى اكتەپ جاتىر+.
11 دۋالدى اكتەپ جاتقاندارعا ونىڭ قيراپ قالاتىنىن ايت. قاتتى نوسەر قۇيىپ، بۇرشاق جاۋىپ، الاي-تۇلەي داۋىل تۇرادى دا، ونى تاس-تالقان ەتەدى+.
12 دۋال قۇلاپ قالعاندا، جۇرت ولاردان: «دۋالدى اكتەگەندەرىڭ قايدا؟»— دەپ سۇرايدى+.
13 سوندىقتان الەمنىڭ ٵمىرشىسى ەحوبا بىلاي دەيدى: —مەن الاي-تۇلەي داۋىل تۇرعىزامىن، قاتتى نوسەر مەن بۇرشاق جاۋدىرىپ، قاھارىمدى توگەمىن.
14 اكتەگەن دۋالدارىڭدى قيراتىپ، جەرمەن-جەكسەن ەتەمىن دە، ونىڭ ىرگەتاسى كورىنىپ قالادى. قالا قۇلاعاندا، سەندەر سونىمەن بىرگە قۇريسىڭدار. سوندا مەنىڭ ەحوبا ەكەنىمدى بىلەتىن بولاسىڭدار.
15 مەن دۋالعا دا، ونى اكتەگەندەرگە دە قاھارىمدى توگەمىن. سول كەزدە سەندەرگە مىنانى ايتامىن: —دۋال دا، ونى اكتەگەندەر دە قۇرىدى+.
16 يەرۋساليم تۋرالى پايعامبارلىق ەتىپ، تىنىشتىق بولماسا دا، اياندا تىنىشتىق ورناعانىن كورەتىن يسرايل پايعامبارلارى قۇرىدى+. مۇنى ايتقان مەن — الەمنىڭ ٵمىرشىسى ەحوبا.
17 ال سەن، ادام ۇلى، حالقىڭنىڭ قىزدارىنا قارسى شىق. ويدان شىعارىلعان پايعامبارلىقتار ايتىپ جۇرگەنى ٷشىن ولارعا قارسى بىلاي دەپ پايعامبارلىق ەت:
18 —الەمنىڭ ٵمىرشىسى ەحوبا مىنانى ايتادى: —ادامداردىڭ جانىن تورعا ٴتۇسىرۋ ٷشىن، قولعا تاعاتىن تاسپالار جانە بويى ٵرتۇرلى ادامداردىڭ باسىنا جاباتىن ورامالدار تىگەتىن ايەلدەر، سەندەر قاسىرەتكە قالاسىڭدار! مەنىڭ حالقىمنىڭ جاندارىن تۇزاققا ٴتۇسىرىپ، ٶز جاندارىڭدى ساقتاپ قالعىلارىڭ كەلە مە؟
19 سەندەر ٴبىرۋىس ارپا مەن ٴبىرۇزىم نان ٷشىن حالقىمنىڭ الدىندا مەنى قورلايسىڭدار+: وتىرىكتەرىڭدى تىڭداپ جۇرگەن حالقىمدى سوزدەرىڭە يلاندىرىپ، ولمەۋگە تيىستىلەردى ولىمگە دۋشار ەتىپ، ال ٶمىر سۇرمەۋگە تيىستىلەردى امان قالدىراسىڭدار+.
20 سوندىقتان الەمنىڭ ٵمىرشىسى ەحوبا بىلاي دەيدى: —ەي، ايەلدەر، مەن حالىقتى قۇستار سياقتى تۇزاققا تۇسىرەتىن تاسپالارىڭا قاراپ قول قۋسىرىپ وتىرمايمىن! قولدارىڭداعى تاسپالاردى جۇلىپ تاستاپ، تۇزاقتارىڭا قۇس سياقتى ٴتۇسىپ قالعانداردى بوساتىپ جىبەرەمىن.
21 ورامالدارىڭدى دا جۇلىپ تاستاپ، حالقىمدى قولدارىڭنان قۇتقارىپ الامىن. بۇدان بىلاي ولار سەندەردىڭ تۇزاققا تۇسىرەتىن جەمتىكتەرىڭ بولمايدى. سوندا مەنىڭ ەحوبا ەكەنىمدى بىلەتىن بولاسىڭدار+.
22 مەن ٵدىلدى قاسىرەتكە ۇشىراتپاسام دا، سەندەر وتىرىكتەرىڭمەن+ ونىڭ جىگەرىن قۇم قىلدىڭدار. ال زۇلىم ادامنىڭ قولتىعىنا سۋ بۇركىپ+، جامان جولىنان قايتىپ، ٴتىرى قالۋىنا كەدەرگى جاسادىڭدار+.
23 سوندىقتان، ەي، ايەلدەر، بۇدان بىلاي جالعان ايان دا كورمەيسىڭدەر، بولاشاقتى دا جورىمايسىڭدار+. مەن حالقىمدى ۋىستارىڭنان شىعارىپ الامىن. سوندا مەنىڭ ەحوبا ەكەنىمدى بىلەتىن بولاسىڭدار».