ەزەكيەل 16:1—63
-
قۇدايدىڭ يەرۋساليمگە دەگەن سۇيىسپەنشىلىگى (1—63)
-
يەرۋساليمنىڭ تاستاندى بالاعا تەڭەلۋى (1—7)
-
قۇدايدىڭ ونى اشەكەيلەرمەن ساندەۋى، نەكەلىك كەلىسىم جاساسۋى (8—14)
-
يەرۋساليمنىڭ وپاسىز بولىپ كەتۋى (15—34)
-
ونىڭ نەكە ادالدىعىن بۇزعانى ٷشىن جازالانۋى (35—43)
-
يەرۋساليمدى ساماريا جانە سودوممەن سالىستىرۋ (44—58)
-
قۇدايدىڭ ٶز كەلىسىمىن ەسىنە الۋى (59—63)
-
16 ەحوبا تاعى دا ماعان ٴسوزىن ارناپ بىلاي دەدى:
2 «ادام ۇلى، يەرۋساليمنىڭ جەركەنىشتى ىستەرىن جاريا ەتىپ+،
3 حابارىمدى جەتكىز! الەمنىڭ ٵمىرشىسى ەحوبا يەرۋساليمگە مىنانى ايتادى: —سەنىڭ شىققان جەرىڭ مەن اتاتەگىڭ — قاناحان ەلى. سەنىڭ اكەڭ — امورلىق+، شەشەڭ — حەتتىك+.
4 جارىق دۇنيەگە كەلگەنىڭدە كىندىگىڭ كەسىلمەدى، ەشكىم سەنى شومىلدىرىپ تازارتپادى، ۇستىڭە تۇز جاعىپ، جورگەككە دە ورامادى.
5 سەنى اياپ، وسىنىڭ ٴبارىن ىستەيتىن ادام بولمادى. ەشكىمنىڭ ساعان جانى اشىمادى، قايتا، تۋىلا سالىسىڭمەن جەككورىنىشتى بولىپ، اشىق دالاعا تاستالدىڭ.
6 مەن سول جەرمەن ٶتىپ بارا جاتىپ، قان-قان بولىپ ەربەڭدەپ جاتقان بەيشارا كۇيىڭدى كورىپ، «ٶمىر ٴسۇر!» دەدىم. ٴيا، قان-قان كۇيىڭدە ەربەڭدەپ جاتقان ساعان «ٶمىر ٴسۇر!» دەدىم.
7 دالا وسىمدىگىندەي جايقالسىن دەپ، مەن سەنى ٶسىرىپ-ٶندىردىم. سەن بويجەتىپ، كەرەمەت اشەكەيلەر تاعىندىڭ. قوس انارىڭ تولىستى، شاشىڭ دا ٶستى، ٴبىراق ٵلى دە كيىمسىز جالاڭاش ەدىڭ.
8 بىردە سول جەردەن ٶتىپ بارا جاتقانىمدا سەنى كوردىم دە، كەمەلىڭە جەتىپ، ماحابباتقا دايىن بولعانىڭدى بايقادىم. سوندىقتان شاپانىمنىڭ شەتىمەن+ جالاڭاش ٴتانىڭدى جاپتىم دا، انت بەرىپ، سەنىمەن كەلىسىم جاساستىم. وسىلاي سەن مەندىك بولدىڭ. مۇنى ايتىپ وتىرعان — الەمنىڭ ٵمىرشىسى ەحوبا.
9 مەن سەنى شومىلدىرىپ، قانىڭدى جۋىپ تازارتتىم، دەنەڭدى مايمەن سىلادىم+.
10 ۇستىڭە كەستەلى كويلەك، اياعىڭا بىلعارى ساندال كيگىزدىم. كەرەمەت باتەسكە وراپ، ۇستىڭە قىمبات ماتا جاپتىم.
11 سەنى اشەكەيلەرمەن ساندەدىم، قولىڭا بىلەزىك، موينىڭا القا تاقتىم.
12 مۇرنىڭ مەن قۇلاعىڭا سىرعا سالىپ، باسىڭا ادەمى ٴتاج دە كيگىزدىم.
13 سەن ٶزىڭدى التىنمەن اپتاپ، كۇمىسپەن كۇپتەدىڭ، كەرەمەت باتەس پەن قىمبات ماتادان كەستەلى كويلەك كيدىڭ. ال جەگەن تاماعىڭ تاڭداۋلى ۇننان، بال مەن مايدان دايىندالدى. سەن پاتشايىم بولۋعا لايىق ەرەكشە سۇلۋ بولىپ ٶستىڭ+.
14 سۇلۋلىعىڭنىڭ ارقاسىندا اتاعىڭ حالىقتار اراسىنا كەڭ جايىلدى+. سەبەبى مەن ساعان ٶز سالتاناتىمدى بەرىپ، سۇلۋلىعىڭدى كەمەلىنە كەلتىرگەن ەدىم+. مۇنى ايتىپ وتىرعان مەن — الەمنىڭ ٵمىرشىسى ەحوبا.
15 ٴبىراق سەن كوركىڭە سەنىپ+، اتاعىڭدى جەزوكشەلىككە پايدالاندىڭ+. وتكەن-كەتكەنگە بەرىلە سالىپ+، كوركىڭ سولاردىڭ مەنشىگىنە اينالدى.
16 سەن ٴتۇرلى ٴتۇستى كيىمدەرىڭنىڭ كەيبىرىن الىپ، سولارمەن عيبادات توبەلەرىن ساندەپ، سول جەرلەردە جەزوكشەلىكپەن اينالىستىڭ+. مۇنداي نارسە بۇرىن-سوڭدى بولعان ەمەس، ٵرى بولماۋى دا كەرەك.
17 مەن بەرگەن التىن-كۇمىستەن جاسالعان ادەمى اشەكەيلەرىڭدى دە الىپ، ەركەكتەردىڭ مۇسىندەرىن جاساپ، سولارمەن جەزوكشەلىككە سالىندىڭ+.
18 كەستەلى كيىمدەرىڭدى ۇستەرىنە جاۋىپ، مەنىڭ مايىم مەن حوش ٴيىستى زاتتارىمدى سولارعا* ۇسىندىڭ+.
19 سەن جەسىن دەپ بەرگەن تاڭداۋلى ۇننان، ماي مەن بالدان جاسالعان نانىمدى دا سولارعا تىنىشتاندىراتىن حوش ٴيىستى قۇرباندىق رەتىندە ۇسىندىڭ+. ٴيا، سەن سولاي ەتتىڭ. مۇنى ايتىپ وتىرعان — الەمنىڭ ٵمىرشىسى ەحوبا.
20 جەزوكشەلىككە سالىنعانىڭ از بولعانداي، ماعان تۋىپ بەرگەن ۇل-قىزدارىڭدى+ پۇتتارعا قۇرباندىققا بەرىپ+، سولارعا جالماتتىڭ.
21 مەنىڭ ۇلدارىمدى ٶلتىردىڭ، ولاردى وتقا جاعىپ، قۇرباندىققا شالدىڭ+.
22 وسى جەركەنىشتى ىستەرمەن جانە جەزوكشەلىكپەن اينالىسىپ جاتقانىڭدا، كەزىندە كيىمسىز جالاڭاش، قان-قان بولىپ ەربەڭدەپ جاتقان بالا كۇنىڭدى ەسكە المادىڭ.
23 جاساعان بارلىق زۇلىمدىقتارىڭنان كەيىن سەن قاسىرەتكە، ٴيا، قاسىرەتكە قالاسىڭ+! مۇنى ايتىپ وتىرعان — الەمنىڭ ٵمىرشىسى ەحوبا.
24 سەن ٵربىر الاڭدا تابىناتىن ورىندار مەن عيبادات توبەلەرىن جاساپ الدىڭ.
25 ٵر كوشەنىڭ قيىلىسىندا عيبادات توبەلەرىن جاساپ الىپ، ٶزىڭدى وتكەن-كەتكەننىڭ بارىنە ۇسىندىڭ+. وسىلاي جەزوكشەلىككە ابدەن بەرىلىپ، كوركىڭدى جەركەنىشتى ەتتىڭ+.
26 سەن ٴناپسىقۇمار كورشىلەرىڭ — مىسىرلىقتارعا+ اشىنا بولىپ، ابدەن جەزوكشەلىككە سالىنىپ، مەنى قورلادىڭ.
27 سول ٷشىن ساعان قولىمدى سوزىپ، ازىق-تۇلىك تاپشىلىعىنا ۇشىراتامىن دا+، ٶزىڭدى جەك كورەتىن ٴفىلىستىر قىزدارىنىڭ ەركىنە بەرەمىن+. ٴتىپتى سولاردىڭ ٶزى سەنىڭ سوراقى قىلىقتارىڭدى كورىپ شوشىعان ەدى+.
28 ويتكەنى سەن توياتتانۋ دەگەندى بىلمەي، اسسيريالىقتارعا بەرىلدىڭ+. ٴبىراق ولارمەن جەزوكشەلىك جاساعاننان كەيىن دە قۇمارىڭنان شىقپادىڭ.
29 سوندىقتان جەزوكشەلىگىڭدى ساۋداگەرلەر ەلى* مەن حالدەيلەرگە+ دەيىن جايلاتتىڭ، سوندا دا تويىمدى بىلمەدىڭ.
30 بەيباستاق جەزوكشەدەي وسىنىڭ ٴبارىن ىستەگەندە، جۇرەگىڭ قانداي بۇزىق بولعان دەسەڭشى*+! مۇنى ايتىپ وتىرعان — الەمنىڭ ٵمىرشىسى ەحوبا.
31 ٵربىر كوشەنىڭ قيىلىسىندا تابىناتىن ورىندار مەن ٵربىر الاڭدا عيبادات توبەلەرىن جاساعانىڭدا، اقى دا المادىڭ، وسىلاي جەزوكشەدەن بەتەر بولدىڭ.
32 سەن كۇيەۋىنىڭ ورنىنا بوتەن ەركەكپەن بولىپ، ويناس جاسايتىن ايەلسىڭ+.
33 ادەتتە جۇرت جەزوكشەلەرگە سيلىق بەرەدى+، ال سەن قۇمارتىپ سوڭىڭنان جۇرگەندەردىڭ بارىنە ٶزىڭ سيلىق بەرەسىڭ+. جان-جاقتان كەلىپ وزىڭمەن ويناس جاساسىن دەپ، اشىنالارىڭدى ساتىپ الاسىڭ+.
34 سەن وزگە جەزوكشەلەرگە ۇقسامايسىڭ. ەشكىم جەزوكشەلىكپەن سەن سياقتى اينالىسپايدى: وزگەلەر ساعان ەمەس، سەن ولارعا اقى تولەيسىڭ. سەن ٴبارىن كەرىسىنشە ىستەيسىڭ.
35 سوندىقتان، ەي، جەزوكشە+، ەحوبانىڭ سوزىنە قۇلاق سال!
36 الەمنىڭ ٵمىرشىسى ەحوبا مىنانى ايتادى: —سەن اشىنالارىڭمەن جانە جەركەنىشتى پۇتتارمەن+ جەزوكشەلىكپەن اينالىسقاندا، ٴناپسىڭدى جۇگەندەمەگەنىڭ ٷشىن، ٴتانىڭدى جالاڭاشتاعانىڭ ٷشىن، سونداي-اق ۇلدارىڭنىڭ قانىن سول پۇتتارعا قۇرباندىققا بەرگەنىڭ ٷشىن+،
37 ٶزىڭ قۇمارىن قاندىرعان اشىنالارىڭنىڭ ٴبارىن — ٶزىڭ سۇيگەندەردى دە، جەك كورگەندەردى دە — ساعان قارسى جيناپ اكەلەمىن. مەن ولاردى جان-جاقتان جيناپ اكەلىپ، جالاڭاش ٴتانىڭدى كورسەتەمىن. ولار سەنى تىرداي جالاڭاش كۇيىڭدە كورەدى+.
38 مەن ساعان نەكە ادالدىعىن بۇزعان+ ٵرى قان توككەن+ ايەلدەرگە ٴتيىستى ۇكىم شىعارىپ، سەنى قاھارىممەن، كۇيىنىپ قاتتى جازالايمىن+.
39 سەنى اشىنالارىڭنىڭ قولىنا بەرەمىن دە، ولار تابىناتىن ورىندارىڭ مەن عيبادات توبەلەرىڭدى جەرمەن-جەكسەن ەتەدى+. ۇستىڭدەگى كيىمدەرىڭ+ مەن ادەمى اشەكەيلەرىڭدى سىپىرىپ الىپ+، ٶزىڭدى تىرداي جالاڭاش قالدىرادى.
40 ولار ساعان قارسى ٴبىر توپ اداممەن شىعىپ+، سەنى تاسپەن اتقىلاپ+، سەمسەرمەن شاۋىپ ولتىرەدى+.
41 ۇيلەرىڭدى ورتەپ+، كوپتەگەن ايەلدەردىڭ كوزىنشە مەنىڭ ۇكىمىمدى جۇزەگە اسىرادى. وسىلاي جەزوكشەلىگىڭدى تىيامىن+، ەندى قايتىپ ەشكىمگە اقى تولەمەيتىن بولاسىڭ.
42 سوندا ساعان دەگەن قاھارىم+ مەن اشۋىم باسىلادى+. جانىم جاي تاۋىپ، بۇدان بىلاي قورلانبايتىن بولامىن.
43 بالالىق شاعىڭدى ەسكە الماي+، وسىنداي قىلىقتارىڭمەن قاھارىمدى تۇتاتقانىڭ ٷشىن ىستەرىڭنىڭ زاردابىن تارتقىزامىن. سەن سوراقى، جەركەنىشتى قىلىقتارىڭدى دوعاراسىڭ. مۇنى ايتىپ وتىرعان — الەمنىڭ ٵمىرشىسى ەحوبا.
44 ماقالداپ سويلەيتىندەر سەن تۋرالى «قىز شەشەسىنە قاراپ وسەر» دەيتىن بولادى+.
45 سەن ٶز كۇيەۋى مەن ۇلدارىنان جيرەنگەن شەشەڭ سياقتىسىڭ. ٶزىنىڭ كۇيەۋلەرى مەن بالالارىنان جيرەنگەن اپكە-سىڭلىلەرىڭ سياقتىسىڭ. سەندەردىڭ شەشەلەرىڭ حەتتىك، اكەلەرىڭ امورلىق ەدى+.
46 سەنىڭ اپكەڭ — سولتۇستىك جاعىڭدا قىزدارىمەن*+ تۇرىپ جاتقان ساماريا+، ٴسىڭلىڭ — وڭتۇستىك جاعىڭدا قىزدارىمەن+ تۇرىپ جاتقان سودوم+.
47 سەن ولاردىڭ جولىنا ٴتۇسىپ، جەركەنىشتى ىستەرىن قايتالاپ قانا قويعان جوقسىڭ، ازعانا ۋاقىتتىڭ ىشىندە ولاردان بەتەر بۇزىلىپ كەتتىڭ+.
48 الەمنىڭ ٵمىرشىسى ەحوبا مىنانى ايتادى: —ٶزىمنىڭ ٴتىرى ەكەنىمدەي حاق ٴسوزىم — سەن جانە قىزدارىڭ ىستەگەن قىلىقتى سودوم مەن ونىڭ قىزدارى ىستەمەگەن ەدى.
49 ٴسىڭلىڭ سودومنىڭ ىستەگەن كۇناسى مىناۋ — ونىڭ ٶزى دە، قىزدارى+ دا وركوكىرەك ەدى+، تويىنا ٸشىپ-جەپ+، بەيجاي ٶمىر كەشىپ جاتسا دا+، بەيشارا مەن جارلى-جاقىبايعا قول ۇشىن بەرمەيتىن+.
50 ولار تاكاپپارلىقتارىنان اينىماي+، مەنىڭ كوز الدىمدا جەركەنىشتى ىستەرىن جاساي بەردى+. سوندىقتان ولاردى قۇرتىپ جىبەرۋدى دۇرىس دەپ تاپتىم+.
51 اپكەڭ ساماريا+ سەنىڭ كۇنالارىڭنىڭ جارتىسىن دا جاساعان جوق. كۇللى جەركەنىشتى قىلىقتارىڭمەن سەن اپكەڭ مەن سىڭلىڭنەن دە اسىپ ٴتۇستىڭ. ولار سەنىڭ قاسىڭدا ٴتىپتى ٵدىل بولىپ كورىنەدى+.
52 اپكەڭ مەن ٴسىڭلىڭنىڭ اقتالۋىنا سەبەپشى بولعاندىقتان، ەندى ماسقاراڭدى موينىڭمەن كوتەر! كۇنا جاساعانىڭدا، ولاردان بەتەر جەركەنىشتى ٸس ىستەدىڭ، سوندىقتان ولار سەنەن ادىلىرەك. اپكەڭ مەن ٴسىڭلىڭدى وزىڭنەن ادىلىرەك ەتىپ كورسەتەتىندەي قىلىق جاساعاندىقتان، ەندى قارابەت بولىپ، ماسقاراڭدى موينىڭمەن كوتەر!
53 مەن ولاردىڭ — سودوم مەن قىزدارىنىڭ جانە ساماريا مەن قىزدارىنىڭ — ايداۋدا جۇرگەن حالقىن جيناپ الامىن. سولارمەن قوسا، سەنىڭ دە ايداۋدا جۇرگەن حالقىڭدى جيناپ الامىن+.
54 مۇنى ماسقاراڭدى موينىڭمەن كوتەرتۋ ٷشىن ىستەيمىن. جەركەنىشتى ىستەرىڭمەن سولارعا جۇبانىش بولعانىڭ ٷشىن ماسقاراڭ شىعادى.
55 ٴسىڭلىڭ سودوم مەن اپكەڭ ساماريا قىزدارىمەن قوسا، بۇرىنعى قالىپتارىنا كەلەدى. سەن دە قىزدارىڭمەن قوسا، بۇرىنعى قالپىڭا كەلەسىڭ+.
56 وركوكىرەك كەزىڭدە ٴسىڭلىڭ سودوم جايىندا ەشتەڭە تىڭداعىڭ دا كەلمەۋشى ەدى.
57 سەن ٶز زۇلىمدىعىڭ اشىلعانشا سولاي ەتتىڭ+. ال ەندى سيريانىڭ قىزدارى مەن كورشىلەرى جانە ٴفىلىستىر+ قىزدارى — اينالاڭداعىلاردىڭ ٴبارى سەنى مازاق قىلادى.
58 سەن سوراقى قىلىقتارىڭ مەن جەركەنىشتى ىستەرىڭنىڭ زاردابىن تارتاسىڭ. مۇنى ايتىپ وتىرعان — ەحوبا.
59 الەمنىڭ ٵمىرشىسى ەحوبا مىنانى ايتادى: —كەلىسىمىمدى بۇزىپ، انتىمدى اياقاستى ەتكەنىڭ ٷشىن+، ساعان لايىقتى جازاڭدى تارتقىزامىن+.
60 سويتسە دە مەن سەنىمەن جاستىق شاعىڭدا جاساسقان كەلىسىمىمدى ەسىمە الىپ، سول كەلىسىمدى مىزعىماستاي ەتىپ بەكىتەمىن+.
61 اپكەڭ مەن ٴسىڭلىڭدى قارسى العاندا، جاساعان قىلىقتارىڭ ەسىڭە ٴتۇسىپ ۇيالاسىڭ+. مەن ولاردى ساعان قىز قىلىپ بەرەمىن، ٴبىراق مۇنى سەنىمەن كەلىسىم جاساسقاندىقتان ىستەمەيمىن.
62 سەنىمەن جاساسقان كەلىسىمىمدى قايتا بەكىتەمىن. سوندا مەنىڭ ەحوبا ەكەنىمدى بىلەتىن بولاسىڭ.
63 نە ىستەگەنىڭە قاراماستان، سەنى كەشىرگەنىمدە+، قىلىقتارىڭنىڭ ٴبارىن ەسىڭە الىپ، ماسقارا بولعاندىقتان اۋزىڭدى دا اشپايسىڭ+. مۇنى ايتىپ وتىرعان — الەمنىڭ ٵمىرشىسى ەحوبا».
سىلتەمەلەر
^ ياعني ەركەك پۇتتارعا.
^ سوزبە-ٴسوز «قاناحان ەلى».
^ مۇمكىن: «ساعان قالاي قاھارىم قاينادى دەسەڭشى».
^ قاراماعىنداعى قالاشىقتار جايىندا ايتىلىپ تۇرسا كەرەك.
