ەزەكيەل 20:1—49
20 جەتىنشى جىلدىڭ بەسىنشى ايىنىڭ ونىنشى كۇنى يسرايلدىڭ بىرنەشە اقساقالى ەحوبادان باسشىلىق سۇراۋ ٷشىن، مەنىڭ الدىما كەلىپ وتىردى.
2 سوندا ەحوبا ماعان ٴسوزىن ارناپ بىلاي دەدى:
3 «ادام ۇلى، يسرايل اقساقالدارىنا حابارىمدى جەتكىز! الەمنىڭ ٵمىرشىسى ەحوبا بىلاي دەيدى: —سەندەر مەنەن باسشىلىق سۇراۋعا كەلىپ وتىرسىڭدار ما؟ ٶز اتىممەن انت ەتەمىن*، مەن سەندەرگە جاۋاپ بەرمەيمىن+. مۇنى ايتىپ وتىرعان — الەمنىڭ ٵمىرشىسى ەحوبا».
4 سوسىن تاعى دا ماعان ٴسوزىن ارناپ بىلاي دەدى: «سەن ولاردى ايىپتاۋعا دايىنسىڭ با؟ ادام ۇلى، ولاردى ايىپتاۋعا دايىنسىڭ با؟ ولارعا اتا-بابالارىنىڭ ىستەگەن جەركەنىشتى ىستەرى جونىندە ايتىپ+،
5 بىلاي دە: —الەمنىڭ ٵمىرشىسى ەحوبا مىنانى ايتادى: —يسرايلدى تاڭداعان كۇنى+ مەن جاقىپتىڭ ۇرپاعىنا انت بەردىم*، ٵرى مىسىر ەلىندە ولارعا ٶزىمدى تانىتتىم+. ٴيا، ولارعا «مەن قۇدايلارىڭ ەحوبامىن» دەپ انت ەتتىم.
6 سول كۇنى مەن ولارعا انت بەرىپ، مىسىر ەلىنەن الىپ شىعىپ، سولار ٷشىن ٶزىم بارلاپ كەلگەن، اعى مەن بالى اعىل-تەگىل مول جەرگە اپارۋدى ۋادە ەتتىم+. ول — جەر اتاۋلىنىڭ ەڭ شۇرايلىسى ەدى.
7 مەن ولارعا: —ٴارقايسىسىڭ كوز الدارىڭداعى جەكسۇرىن نارسەلەرىڭدى لاقتىرىپ تاستاڭدار! مىسىردىڭ جەكسۇرىن پۇتتارىمەن وزدەرىڭدى ارامداماڭدار+. مەن قۇدايلارىڭ ەحوبامىن+،— دەدىم.
8 ٴبىراق ولار ماعان قارسى بۇلىك شىعارىپ، مەنى تىڭداعىسى كەلمەدى. كوز الدارىنداعى جەكسۇرىن نارسەلەرىن لاقتىرىپ تاستامادى، مىسىردىڭ جەركەنىشتى پۇتتارىنان دا ارىلمادى+. سوندىقتان اشۋىمنىڭ تيەگىن اعىتىپ، ولارعا مىسىر ەلىندە بار قاھارىمدى توگەمىن دەپ انت ەتتىم.
9 ٴبىراق ولاردىڭ اينالاسىندا تۇرىپ جاتقان حالىقتاردىڭ الدىندا ەسىمىم ارامدالماۋ ٷشىن ولاي ەتپەدىم+. سەبەبى مىسىر ەلىنەن الىپ شىققاندا، مەن ولارعا* ٶزىمدى تانىتقان ەدىم+.
10 سونىمەن، ولاردى مىسىر ەلىنەن الىپ شىعىپ، ٴشول دالاعا باستاپ اكەلدىم+.
11 ولارعا جارلىقتارىمدى بەرىپ، شەشىمدەرىمدى دە ٴبىلدىردىم+، سەبەبى سولاردى ۇستانعان ادام ٶمىر سۇرسە ەكەن دەدىم+.
12 سونداي-اق وزدەرىن قاسيەتتى ەتىپ وتىرعان مەن، ەحوبا، ەكەنىمدى بىلۋلەرى ٷشىن، ارامىزداعى بەلگى بولسىن دەپ+، ولارعا دەمالىس كۇنىنە قاتىستى زاڭ بەردىم+.
13 ٴبىراق ٴشول دالادا ولار ماعان قارسى بۇلىك شىعارىپ+، جارلىقتارىمدى ورىندامادى، شەشىمدەرىمنەن دە باس تارتتى (سولاردى ورىنداعان ادام ٶمىر سۇرەر ەدى). ولار مەنىڭ دەمالىس كۇنىمدى ابدەن ارامدادى. سوندىقتان مەن بار اشۋىمدى توگىپ، ولاردى ٴشول دالادا قۇرتىپ جىبەرۋدى انت ەتتىم+.
14 ٴبىراق وزگە حالىقتاردىڭ الدىندا ەسىمىم ارامدالماۋ ٷشىن ولاي ەتپەدىم. ويتكەنى حالقىمدى مىسىردان سولاردىڭ كوزىنشە الىپ شىققان ەدىم+.
15 سونداي-اق ٶزىم بەرەمىن دەگەن اعى مەن بالى اعىل-تەگىل مول جەردى+ (ول — جەر اتاۋلىنىڭ ەڭ شۇرايلىسى ەدى) ٴشول دالادا بولعاندارىندا ولارعا بەرمەۋدى انت ەتتىم+.
16 سەبەبى ولار مەنىڭ شەشىمدەرىمنەن باس تارتتى. بار جۇرەكتەرىمەن جەركەنىشتى پۇتتارىنا بەرىلگەندىكتەن+، جارلىقتارىمدى ۇستانبادى، دەمالىس كۇندەرىمدى دە ارامدادى.
17 ٴبىراق جانىم اشىپ، ولاردى جويمادىم، ٴشول دالادا قۇرتىپ جىبەرمەدىم.
18 ولاردىڭ بالالارىنا ٴشول دالادا+: —اتا-بابالارىڭنىڭ ەرەجەلەرىمەن جۇرمەڭدەر+، شەشىمدەرىن دە ۇستانباڭدار، جەركەنىشتى پۇتتارىمەن وزدەرىڭدى ارامداماڭدار.
19 مەن قۇدايلارىڭ ەحوبامىن. مەنىڭ جارلىقتارىمدى ورىنداپ، شەشىمدەرىمدى ۇستانىپ جۇرىڭدەر+.
20 دەمالىس كۇنىمدى قاسيەتتى دەپ ەسەپتەڭدەر+، سوندا بۇل مەنىڭ ٶز قۇدايلارىڭ ەحوبا ەكەنىمدى بىلۋلەرىڭ ٷشىن ارامىزداعى بەلگى بولادى+،— دەدىم.
21 ٴشول دالادا بۇلار دا ماعان قارسى بۇلىك شىعارىپ+، جارلىقتارىمدى ورىندامادى، شەشىمدەرىمدى دە ۇستانبادى (سولاردى ۇستانعان ادام ٶمىر سۇرەر ەدى). ولار دەمالىس كۇنىمدى ارامدادى. سوندىقتان مەن اشۋىمنىڭ تيەگىن اعىتىپ، ٴشول دالادا ولارعا بار قاھارىمدى توگەمىن دەپ انت ەتتىم+.
22 ٴبىراق وزگە حالىقتاردىڭ الدىندا ەسىمىم ارامدالماۋ ٷشىن+ ولاي ەتپەدىم+. ويتكەنى مەن ولاردى سول حالىقتاردىڭ الدىندا الىپ شىققان ەدىم.
23 سونداي-اق ٴشول دالادا مەن ولاردى حالىقتاردىڭ اراسىنا بىتىراتىپ، ەل-ەلگە تاراتىپ جىبەرەمىن دەپ انت ەتتىم+.
24 سەبەبى ولار مەنىڭ شەشىمدەرىمدى ۇستانبادى، جارلىقتارىمدى دا ورىندامادى+ ٵرى دەمالىس كۇنىمدى ارامدادى. مۇنىسىمەن قويماي، اتا-بابالارىنىڭ جەركەنىشتى پۇتتارىنىڭ سوڭىنان ەرىپ كەتتى+.
25 مەن ولاردىڭ جاقسىلىققا اپارمايتىن ەرەجەلەر مەن ومىرگە باستاي المايتىن شەشىمدەردى ۇستانۋلارىنا جول بەردىم+.
26 تۇڭعىش بالالارىن وتقا تاستاپ+، قۇرباندىققا بەرۋلەرى ارقىلى وزدەرىن ارامداۋلارىنا دا جول بەردىم. مۇنى ولاردى ويران قىلۋ ٷشىن ٵرى مەنىڭ ەحوبا ەكەنىمدى بىلۋلەرى ٷشىن ىستەدىم.
27 سوندىقتان، ادام ۇلى، يسرايل ۇيىنە حابارىمدى جەتكىز! الەمنىڭ ٵمىرشىسى ەحوبا مىنانى ايتادى: —اتا-بابالارىڭ وپاسىزدىق جاساپ، مەنى باسقا دا جولدارمەن قورلاعان ەدى.
28 مەن ولاردى ٶزىم بەرەمىن دەپ ۋادە ەتكەن جەرگە الىپ كەلدىم+. ٴبىراق ولار سونداعى بيىكتەۋ توبەلەر مەن جايقالعان اعاشتاردى كورىپ+، سول جەرلەردە قۇرباندىقتارى مەن مەنى قورلايتىن تارتۋلارىن ۇسىنا باستادى. تىنىشتاندىراتىن حوش ٴيىستى قۇرباندىقتار مەن سۇيىق تارتۋلار دا ۇسىناتىن بولدى.
29 سوندا ولاردان: —وزدەرىڭ بارىپ جۇرگەن عيبادات توبەسىنىڭ ٴمانى نەدە؟— دەپ سۇرادىم. (سول توبە ٵلى كۇنگە دەيىن عيبادات توبەسى دەپ اتالادى+.)
30 سوندىقتان يسرايل ۇيىنە حابارىمدى جەتكىز! الەمنىڭ ٵمىرشىسى ەحوبا مىنانى ايتادى: —اتا-بابالارىڭنىڭ جەركەنىشتى پۇتتارىمەن ازعىندىق جاساپ، سەندەر دە سولار سياقتى وزدەرىڭدى ارامداپ جۇرسىڭدەر مە+؟
31 جەركەنىشتى پۇتتارىڭا قۇرباندىق رەتىندە ۇلدارىڭدى وتقا تاستاپ، ٵلى كۇنگە دەيىن وزدەرىڭدى ارامداپ جۇرسىڭدەر عوي+؟! وسىلارىڭا قاراماستان، ەي، يسرايل ٷيى، سەندەردىڭ سۇراقتارىڭا جاۋاپ بەرۋىم كەرەك پە+؟ ٶز اتىممەن انت ەتەمىن*، مەن سەندەردىڭ سۇراقتارىڭا جاۋاپ بەرمەيمىن+! مۇنى ايتىپ وتىرعان — الەمنىڭ ٵمىرشىسى ەحوبا.
32 سەندەر: —اعاش پەن تاسقا تابىناتىن حالىقتارداي، وزگە ۇلتتارداي بولايىق،— دەپ ويلايسىڭدار+. ٴبىراق بۇلارىڭ جۇزەگە اسپايدى.
33 ٶز اتىممەن انت ەتەمىن*، سەندەرگە ٶزىم پاتشا بولامىن. سەندەردى جازالاۋ ٷشىن قۇدىرەتتى ٵرى كۇشتى قولىمدى سوزىپ، قاھارىمدى توگەمىن+. مۇنى ايتىپ وتىرعان — الەمنىڭ ٵمىرشىسى ەحوبا.
34 مەن سەندەردى قۇدىرەتتى دە كۇشتى قولىممەن ٵرى زور قاھارىممەن بىتىراتىپ جىبەرگەن حالىقتار مەن ەلدەردىڭ اراسىنان جيناپ اكەلەمىن+.
35 سەندەردى حالىقتاردىڭ ٴشول دالاسىنا اكەلىپ، سول جەردە سەندەرمەن بەتپە-بەت كەلىپ سوتتاسامىن+.
36 اتا-بابالارىڭمەن مىسىر ەلىنىڭ ٴشول دالاسىندا سوتتاسقانىمداي، سەندەرمەن دە سوتتاسامىن. مۇنى ايتىپ وتىرعان — الەمنىڭ ٵمىرشىسى ەحوبا.
37 سەندەردى قويشىنىڭ اساتاياعىنىڭ استىنان وتكىزىپ+، كەلىسىم جاساسامىن.
38 ارالارىڭنان بۇلىكشىلەر مەن زاڭ بۇزۋشىلاردى الاستاتامىن+. ولاردى جاتجەرلىك كىرمە رەتىندە تۇرىپ جاتقان ەلدەن الىپ شىعامىن، ٴبىراق ولار يسرايل جەرىنە كەلمەيدى+. سوندا سەندەر مەنىڭ ەحوبا ەكەنىمدى بىلەتىن بولاسىڭدار.
39 ال ساعان، ەي، يسرايل ٷيى، الەمنىڭ ٵمىرشىسى ەحوبا مىنانى ايتادى: —ٴارقايسىسىڭ وزدەرىڭنىڭ جەركەنىشتى پۇتتارىڭا بارىپ، سولارعا تابىنىڭدار+. ٴبىراق كەيىن بۇلارىڭنىڭ زاردابىن تارتاسىڭدار. سوندا بۇدان بىلاي قۇرباندىقتارىڭمەن دە، جەركەنىشتى پۇتتارىڭمەن دە مەنىڭ كيەلى ەسىمىمدى قورلاي المايسىڭدار+.
40 سەبەبى مەنىڭ كيەلى تاۋىمدا، يسرايلدىڭ بيىك تاۋىندا+، كۇللى يسرايل ٷيى سول ەلدە تۇگەلدەي ماعان قىزمەت ەتەتىن بولادى+. سول جەردە ولارعا ىقىلاسىمدى ٴتۇسىرىپ، ساداقالارى مەن ەڭ جاقسى سي-تارتۋلارىن — بارلىق قاسيەتتى نارسەلەرىن قابىل الامىن+. بۇنى ايتىپ وتىرعان — الەمنىڭ ٵمىرشىسى ەحوبا.
41 سەندەردى ٶزىم بىتىراتىپ جىبەرگەن حالىقتار مەن ەلدەردىڭ اراسىنان جيناپ اكەلگەنىمدە+، وزىمە ۇنامدى حوش ٴيىستى قۇرباندىقتارىڭدى قابىلداپ، سەندەرگە ىقىلاسىمدى تۇسىرەمىن. وسى ارقىلى باسقا حالىقتاردىڭ الدىندا ٶزىمنىڭ كيەلى ەكەنىمدى كورسەتەمىن+.
42 سەندەردى اتا-بابالارىڭا بەرەمىن دەپ انت ەتكەن جەرگە، يسرايل جەرىنە اكەلگەنىمدە+، مەنىڭ ەحوبا ەكەنىمدى بىلەتىن بولاسىڭدار+.
43 سول جەردە وزدەرىڭدى ارامداعان ٴجۇرىس-تۇرىستارىڭ مەن بارلىق ىستەرىڭدى ەستەرىڭە الىپ+، جاساعان سول جامان ىستەرىڭ ٷشىن ٶز-وزدەرىڭنەن جيرەنەسىڭدەر+.
44 سوندا، ەي، يسرايل ٷيى، سەندەردىڭ جامان قىلىقتارىڭ مەن بۇزىلعاندىقتارىڭا قاراي ەمەس، ٶز اتىما ساي ارەكەت ەتكەنىمدە، مەنىڭ ەحوبا ەكەنىمدى بىلەتىن بولاسىڭدار+. مۇنى ايتىپ وتىرعان — الەمنىڭ ٵمىرشىسى ەحوبا».
45 ەحوبا تاعى دا ماعان ٴسوزىن ارناپ بىلاي دەدى:
46 «ادام ۇلى، ٴجۇزىڭدى وڭتۇستىككە بۇرىپ، وعان قارسى سويلە. وڭتۇستىكتەگى ورمانعا قارسى پايعامبارلىق ٴسوز ايت.
47 وڭتۇستىكتەگى ورمان ەحوبانىڭ ٴسوزىن تىڭداسىن! الەمنىڭ ٵمىرشىسى ەحوبا مىنانى ايتادى: —مەن ساعان لاپىلداعان وت قويامىن دا+، ول سەندەگى اعاشتاردىڭ ٴبارىن — جاسىلىن دا، قۋراعانىن دا — جالماپ قويادى. سول لاۋلاعان وت وشپەي+، وڭتۇستىكتەن سولتۇستىككە دەيىنگى بارلىق ادامنىڭ بەتىن كۇيدىرىپ جىبەرەدى.
48 سوندا بارشا حالىق وسى وتتى تۇتاتقان مەن، ەحوبا، ەكەنىمدى، سوندىقتان دا ونىڭ ەش وشپەيتىنىن بىلەتىن بولادى+».
49 سول كەزدە مەن: «ۋا، الەمنىڭ ٵمىرشىسى ەحوبا! ولار مەنى بار بولعانى استارلى اڭگىمەلەر قۇراستىرىپ ٴجۇر دەپ ويلايدى»،— دەدىم.
سىلتەمەلەر
^ نەمەسە «ٶزىمنىڭ ٴتىرى ەكەنىمدەي حاق ٴسوزىم».
^ سوزبە-ٴسوز «قولىمدى جوعارى كوتەردىم».
^ ياعني يسرايلگە.
^ نەمەسە «ٶزىمنىڭ ٴتىرى ەكەنىمدەي حاق ٴسوزىم».
^ نەمەسە «ٶزىمنىڭ ٴتىرى ەكەنىمدەي حاق ٴسوزىم».