ەزەكيەل 23:1—49
23 ەحوبا تاعى دا ماعان ٴسوزىن ارناپ بىلاي دەدى:
2 «ادام ۇلى، ٴبىر انادان تۋعان اپالى-ٴسىڭلىلى ەكى ايەل بولىپتى+.
3 ولار جاستايىنان مىسىر ەلىندە جەزوكشەلىككە سالىنىپتى+. سول جەردە مىسىرلىقتار ولاردىڭ توستەرىن قىسىپ، بالعىن كەۋدەلەرىن ايمالاپتى.
4 ۇلكەنىنىڭ اتى وحولا*، كىشىسىنىكى وحوليبا* ەدى. ولار مەندىك بولىپ، ۇل-قىزدار تۋىپ بەرگەن بولاتىن. وحولا ساماريانى+، وحوليبا يەرۋساليمدى بەينەلەيدى.
5 وحولا مەندىك بولا تۇرا، جەزوكشەلىككە سالىنىپ+، ٴناپسىقۇمار اشىنالارىنا+، كورشى اسسيريالىقتارعا+، اڭسارى اۋىپ كەتتى.
6 ولار كوك ٴتۇستى كيىم كيگەن باسشىلار مەن اكىمدەر، شەتىنەن ات قۇلاعىندا وينايتىن جىگىتتەر ەدى.
7 ول اسسيريانىڭ مەنمىن دەگەن ەركەكتەرىمەن جەزوكشەلىككە سالىنىپ، اڭسارى اۋعان سول ەركەكتەردىڭ جەركەنىشتى پۇتتارىمەن ٶزىن ارامداي بەردى+.
8 وحولا مىسىردا اينالىسقان جەزوكشەلىگىن قويمادى. ويتكەنى جاستايىنان مىسىرلىقتار ونىمەن جاتىپ، پاك ٴتوسىن ايمالاپ، قۇمارىنان شىعاتىن+.
9 سوندىقتان مەن ونى ٶزىنىڭ اڭسارى اۋعان ٴناپسىقۇمار اشىنالارىنىڭ، اسسيريا ۇلدارىنىڭ، قولىنا بەردىم+.
10 ولار وحولانى تىرداي جالاڭاش قالدىرىپ+، ۇل-قىزدارىن تارتىپ الدى+، ال ٶزىن سەمسەرمەن شاۋىپ ٶلتىردى. ول اتى شۋلى ايەلگە اينالدى، ٵرى وعان شىعارىلعان ۇكىم جۇزەگە اسىرىلدى.
11 مۇنى كورگەن وحوليبا اپكەسىنەن بەتەر تويىمسىز قۇمارلىققا بەرىلىپ، جەزوكشەلىگى ونىكىنەن اسىپ ٴتۇستى+.
12 ونىڭ اڭسارى كورشىلەس اسسيريا ۇلدارىنا اۋدى+. ولار ٴساندى كيىم كيگەن، ات قۇلاعىندا وينايتىن باسشىلار مەن اكىمدەر، شەتىنەن كورىكتى جىگىتتەر ەدى.
13 وسىلاي وحوليبا دا ٶزىن ارامداعاندا، مەن اپالى-ٴسىڭلىلى ەكەۋىنىڭ دە ٴبىر جولعا تۇسكەنىن كوردىم+.
14 وحوليبا دۋالعا ويىلىپ سالىنىپ، قىزىل تۇسكە بويالعان حالدەيلەردىڭ بەينەلەرىن كورگەندە، جەزوكشەلىكپەن بۇرىنعىسىنان دا كوپ اينالىساتىن بولدى.
15 سۋرەتتەردە بەلدەرىنە بەلبەۋ، باستارىنا ٴبىر ۇشى سالبىراپ تۇراتىنداي ەتىپ شالما وراعان، تۇرلەرى ساربازدارعا ۇقسايتىن ٵرى بارلىعى حالدەي ەلىندە تۋعان بابىلدىقتار بەينەلەنگەن ەدى.
16 وحوليبا ولاردى كورە سالا، سولارعا اڭسارى اۋىپ، حالدەي ەلىنە حابارشىلار جىبەردى+.
17 سوندا بابىلدىقتار كەلىپ، توسەگىنە جاتىپ، قۇمارلىقتارىمەن ونى ارامدادى. وسىلاي ارامدالعان سوڭ، وحوليبا ولاردان جيرەنە تەرىس اينالدى.
18 ول شىمىرىكپەستەن جەزوكشەلىكپەن اينالىسىپ، ٴتانىن جالاڭاشتاعاندا+، كەزىندە اپكەسىنەن قالاي جيرەنە ٴجۇزىمدى بۇرسام، بۇدان دا سولاي ٴجۇزىمدى بۇردىم+.
19 ول بولسا جاس كەزىندە مىسىر ەلىندە اينالىسقان جەزوكشەلىگىن ەسىنە الىپ+، ودان بەتەر ازعىندىققا سالىندى+.
20 ول اتالىق مۇشەلەرى ەسەكتىكىندەي، جىنىس مۇشەلەرى ايعىردىكىندەي ەركەكتەردىڭ كانيزاكتارىنا ۇقساپ، سولارعا قۇمارتا اڭسارى اۋدى.
21 سەن جاستىق شاعىڭدا مىسىردا جاساعان سوراقىلىعىڭدى ساعىنا اڭسادىڭ+. سول كەزدە مىسىرلىقتار سەنىڭ بالعىن ٴتوسىڭدى ايمالاعان ەدى+.
22 سوندىقتان، ەي، وحوليبا، الەمنىڭ ٵمىرشىسى ەحوبا مىنانى ايتادى: —ٴبىلىپ قوي، ٶزىڭ جيرەنە تەرىس اينالعان اشىنالارىڭدى ساعان قارسى شىعارىپ+، ولاردى شارتاراپتان جيناپ اكەلەمىن+.
23 كۇللى بابىلدىقتار+ مەن حالدەيلەردى+، پەحود+، شوعا مەن قوعانىڭ ەر-ازاماتتارىن، سونداي-اق بارلىق اسسيريالىقتاردى اكەلەمىن. ولاردىڭ بارلىعى شەتىنەن كورىكتى جىگىتتەر، باسشىلار مەن اكىمدەر، تاڭداۋلى ساربازدار، ٴبارى دە ات قۇلاعىندا وينايدى.
24 جاۋ ساعان قارسى سوعىس اربالارىنىڭ دوڭگەلەكتەرىن ساتىرلاتىپ، قالىڭ قولمەن اتتانادى. ولار قولدارىنا ۇلكەندى-كىشىلى قالقان ۇستاپ، باستارىنا دۋلىعا كيىپ كەلەدى دە، سەنى قورشاۋعا الادى. مەن ولارعا بيلىك بەرەمىن، سوندا ولار ساعان ٶز زاڭدارىنا ساي ۇكىم شىعارادى+.
25 مەن ساعان قاھارىمدى توككەندە، ولار سەنى ايامايدى: مۇرنىڭ مەن قۇلاقتارىڭدى كەسىپ الادى؛ امان قالعان تۇرعىندارىڭ سەمسەردەن ولەدى؛ ۇل-قىزدارىڭدى تارتىپ اكەتەدى، ال بۇدان قالعانداردى ٶرت جالمايدى+.
26 ولار ۇستىڭدەگى كيىمىڭدى سىپىرىپ تاستايدى+، ادەمى اشەكەيلەرىڭدى تارتىپ الادى+.
27 وسىلاي مىسىر ەلىندە جۇرگەن كەزدەن بەرى جاساپ كەلە جاتقان سوراقى قىلىقتارىڭ مەن جەزوكشەلىگىڭدى+ تىيامىن+. ەندى قايتىپ ولارعا قارامايتىن بولاسىڭ، مىسىردى ەسىڭە دە المايسىڭ.
28 سەبەبى الەمنىڭ ٵمىرشىسى ەحوبا مىنانى ايتادى: —ٴبىلىپ قوي، مەن سەنى ٶزىڭ جەك كورىپ، جيرەنە تەرىس اينالعانداردىڭ قولىنا بەرەمىن+.
29 ولار سەنى جەك كورىپ، ماڭداي تەرىڭمەن تاپقان بار مۇلكىڭدى تارتىپ الادى دا+، ٶزىڭدى جالاڭاش قالدىرادى. سوندا سەنىڭ ماسقارا ازعىندىعىڭ دا، سوراقىلىعىڭ مەن جەزوكشەلىگىڭ دە ٴمالىم بولادى+.
30 ويتكەنى سەن جەزوكشە سياقتى، باسقا حالىقتاردىڭ سوڭىنان قالماي+، ٶزىڭدى سولاردىڭ جەركەنىشتى پۇتتارىمەن ارامدادىڭ+.
31 سەن اپكەڭنىڭ جولىنا ٴتۇستىڭ+، سول ٷشىن قولىڭا سونىڭ توستاعانىن ۇستاتامىن+.
32 الەمنىڭ ٵمىرشىسى ەحوبا مىنانى ايتادى:
—سەن اپكەڭنىڭ توستاعانىنان، ىشىنە كوپ سياتىن شۇڭعىل دا ۇلكەن توستاعاننان ىشەسىڭ+.
ٴسۇيتىپ، بارشاعا كەلەكە-مازاق بولاسىڭ+.
33 سەن اپكەڭ ساماريانىڭ توستاعانىنان تويعانشا ٸشىپ ماس بولىپ، قايعى-قاسىرەت شەگەسىڭ.
قاڭىراپ بوس قالعان كۇيىڭدى كورگەن جۇرت شوشىناتىن بولادى.
34 الەمنىڭ ٵمىرشىسى ەحوبا بىلاي دەيدى:
—سەن سول توستاعاننان ٸشىپ تاۋىساسىڭ+، ونىڭ سىنىقتارىن كەمىرەسىڭ، كەۋدەڭدى جۇلىپ تاستايسىڭ.
سەبەبى مۇنى مەن ايتىپ وتىرمىن.
35 الەمنىڭ ٵمىرشىسى ەحوبا مىنانى ايتادى: —مەنى ۇمىتىپ، مۇلدەم ەلەمەي قويعانىڭ ٷشىن+ سەن سوراقى قىلىقتارىڭ مەن جەزوكشەلىگىڭنىڭ زاردابىن تارتاسىڭ».
36 بۇدان كەيىن ەحوبا ماعان بىلاي دەدى: «ادام ۇلى، سەن وحولا مەن وحوليباعا+ شىعارىلعان ۇكىمدى جاريالاپ، جەركەنىشتى ىستەرىن اشكەرەلەيسىڭ بە؟
37 ويتكەنى ولار نەكە ادالدىعىن بۇزدى+، قولدارىن دا قانعا مالدى. ولار جەركەنىشتى پۇتتارمەن نەكە ادالدىعىن بۇزىپ قانا قويعان جوق، ماعان تۋىپ بەرگەن ۇلدارىن سول پۇتتارىنا تاماق بولسىن دەپ، وتقا جاقتى+.
38 بۇعان قوسا، ٴدال وسىلاردى ىستەگەن كۇنى مەنىڭ عيباداتحانامدى جانە دەمالىس كۇنىمدى ارامدايتىن.
39 جەركەنىشتى پۇتتارىنا ٶز ۇلدارىن قۇرباندىققا شالعان+ كۇنى مەنىڭ عيباداتحانامدى ارامداۋعا كەلەتىن+. ولار مەنىڭ ۇيىمدە وسىلاي ىستەيتىن.
40 مۇنىسىمەن قويماي، حابارشى جىبەرىپ، الىستان ەركەكتەر شاقىرتاتىن+. ال ولار كەلگەندە، ەي، وحوليبا، سەن جۋىنىپ-شايىنىپ، كوزىڭدى بوياپ، اشەكەيلەرىڭدى تاعىنىپ وتىراتىنسىڭ+.
41 كەرەمەت ادەمى توسەككە جايعاسىپ+، الدىنا داستارقان جايىپ+، ۇستىنە مەنىڭ حوش ٴيىستى زاتتارىم+ مەن مايىمدى قوياتىنسىڭ+.
42 سول جەردە ەرىككەن ەركەكتەردىڭ دابىرلاعان داۋسى ەستىلەتىن، ارالارىندا ٴشول دالادان شاقىرىلعان ماسكۇنەمدەر دە بار ەدى. ولار وسى اپالى-ٴسىڭلىلى ەكى ايەلدىڭ قولدارىنا بىلەزىك، باستارىنا ادەمى ٴتاج كيگىزەتىن.
43 سوندا مەن نەكە ادالدىعىن بۇزۋدان ابدەن ازىپ-توزعان سول ايەل تۋرالى: —ول ٴبارىبىر جەزوكشەلىگىن قويمايدى،— دەدىم.
44 ولار جەزوكشە ايەلگە كەلگەندەي وعان كەلە بەرەتىن. سوراقىلىق جاساۋعا قۇنىققان سول ەكى ايەلگە، وحولا مەن وحوليباعا، ولار وسىلاي كەلەتىن.
45 ٴبىراق ادىلەتتى كىسىلەر وعان نەكە ادالدىعىن بۇزۋشى ٵرى قانىشەر+ ايەلگە لايىق ۇكىم شىعارادى+. ويتكەنى ول ەكەۋى — نەكە ادالدىعىن بۇزۋشى، ٵرى قولدارى قانعا مالىنعان+.
46 الەمنىڭ ٵمىرشىسى ەحوبا مىنانى ايتادى: —ولارعا قارسى قالىڭ قول اتتانادى دا، تالان-تاراج ەتىپ، ادام شوشىرلىق كۇيگە تۇسىرەدى+.
47 جاۋ ولارعا تاس اتقىلاپ+، سەمسەرمەن شاۋىپ ولتىرەدى. ۇل-قىزدارىن دا قىرىپ+، ۇيلەرىن ورتەپ جىبەرەدى+.
48 وسىلاي مەن سەنىڭ بۇل ەلدەگى سوراقى قىلىقتارىڭدى تىيامىن. سوندا بۇل ايەل اتاۋلىعا ساباق بولىپ، ولار سەنىڭ سوراقى قىلىقتارىڭا ەلىكتەمەيتىن بولادى+.
49 جاۋ سوراقى قىلىقتارىڭ مەن جەركەنىشتى پۇتتارمەن جاساعان كۇنالارىڭنىڭ زاردابىن تارتقىزادى. سول كەزدە سەن مەنىڭ الەمنىڭ ٵمىرشىسى ەحوبا ەكەنىمدى بىلەتىن بولاسىڭ+».
