ەزەكيەل 36:1—38
36 ادام ۇلى، يسرايل تاۋلارىنا مىنا پايعامبارلىقتى جەتكىز: —ەي، يسرايل تاۋلارى، ەحوبانىڭ ٴسوزىن تىڭداپ الىڭدار!
2 الەمنىڭ ٵمىرشىسى ەحوبا مىنانى ايتادى: —جاۋ سەندەرگە: «ساۋاپ، وزىڭە دە سول كەرەك! ەندى ەجەلگى تاۋ-توبەلەر ٴبىزدىڭ يەلىگىمىزگە تيەدى+!»— دەيدى.
3 سوندىقتان پايعامبارلىق ەتىپ، ولارعا حابارىمدى جەتكىز! الەمنىڭ ٵمىرشىسى ەحوبا مىنانى ايتادى: —جاۋ سەندەردى وزگە حالىقتاردىڭ مەنشىگىنە اينالدىرعىسى كەلىپ، قاڭىراتىپ بوس قالدىردى، جان-جاقتان شابۋىلدادى. جۇرت سەندەردى ٴسوز ەتىپ، جالا جاپتى+.
4 سول ٷشىن، ەي، يسرايل تاۋلارى، الەمنىڭ ٵمىرشىسى ەحوبانىڭ سوزىنە قۇلاق سالىڭدار! الەمنىڭ ٵمىرشىسى ەحوبانىڭ تاۋ-توبەلەرگە، وزەندەر مەن اڭعارلارعا، قاڭىراپ بوس قالعان ۇيىندىلەر+ مەن اينالاسىنداعى حالىقتار تالان-تاراج ەتكەن ٵرى مازاق قىلعان+ ەلسىز قالالارعا ايتقان سوزدەرىن تىڭداڭدار.
5 بۇلارعا الەمنىڭ ٵمىرشىسى ەحوبا بىلاي دەيدى: —مەن وزگە حالىقتار مەن كۇللى ەدوم ەلىنە قاتتى قاھارلانا سويلەيمىن+. سەبەبى ولار مەنىڭ جەرىمنىڭ جايلاۋلارىن مەنشىكتەپ، توناۋ ٷشىن، ونى جۇرەكتەرى جارىلا قۋانىپ، تابالاپ+، يەمدەنىپ الدى+.
6 سوندىقتان يسرايل ەلىنە قاتىستى پايعامبارلىق ەتىپ، تاۋ-توبەلەرگە، وزەندەر مەن اڭعارلارعا ٴسوزىمدى جەتكىز. الەمنىڭ ٵمىرشىسى ەحوبا مىنانى ايتادى: —سەندەردى وزگە حالىقتار قورلاعانى ٷشىن+ مەن ىزالانا، قاھارىم لاۋلاپ سويلەيمىن.
7 الەمنىڭ ٵمىرشىسى ەحوبا بىلاي دەيدى: —مەن قولىمدى كوتەرىپ تۇرىپ، اينالالارىڭداعى حالىقتاردىڭ وزدەرى ماسقارا بولادى دەپ انت ەتەمىن+.
8 ال سەندەر، يسرايل تاۋلارى، اعاشتارىڭنىڭ بۇتاقتارى جايقالىپ، حالقىما جەمىس بەرەسىڭدەر+، سەبەبى ولار كوپ ۇزاماي قايتا ورالادى.
9 مەن سەندەرمەن بىرگەمىن، مەن سەندەرگە وڭ كوزىممەن قارايمىن. سوندا توپىراقتارىڭ وڭدەلىپ، وعان تۇقىم سەبىلەدى.
10 سەندەرگە قالىڭ ەلدى، بۇكىل يسرايل ٷيىن، مەكەندەتەمىن. قالالارعا تۇرعىندار قونىستانىپ+، ۇيىندىلەر قايتا تۇرعىزىلادى+.
11 ٴيا، سەندەردەگى حالىقتىڭ دا، مالدىڭ دا سانىن كوبەيتەمىن+. ولار ٶسىپ-ٶنىپ كوبەيەدى. وسىلاي سەندەردە بۇرىنعى كەزدەگىدەي ادامدار قونىستانىپ+، بۇرىنعىدان دا وركەندەي تۇسەسىڭدەر+. سوندا مەنىڭ ەحوبا ەكەنىمدى بىلەتىن بولاسىڭدار+.
12 حالقىم يسرايل ۇستەرىڭمەن ٴجۇرىپ، سەندەردى ٶز يەلىگىنە الادى+. سەندەر سولاردىڭ مۇرالىق مەنشىگىنە اينالاسىڭدار، ٵرى ولاردى بۇدان بىلاي بالالارىنان ايىرمايتىن بولاسىڭدار+.
13 الەمنىڭ ٵمىرشىسى ەحوبا مىنانى ايتادى: —ولار: «سەن حالىقتى جالماپ، وزىڭدەگى ۇلتتاردى بالالارىنان ايىراتىن جەرسىڭ»،— دەگەن ەدى.
14 سوندىقتان سەن بۇدان بىلاي حالىقتاردى جالماپ، وزىڭدەگى ۇلتتاردى بالالارىنان ايىرمايتىن بولاسىڭ. مۇنى ايتىپ وتىرعان — الەمنىڭ ٵمىرشىسى ەحوبا.
15 سەنى ۇلتتارعا قورلاتىپ، حالىقتارعا مازاقتاتىپ قويمايمىن+. ال سەن ەندىگارى وزىڭدەگى ۇلتتاردىڭ سۇرىنۋىنە تۇرتكى بولمايسىڭ. مۇنى ايتىپ وتىرعان — الەمنىڭ ٵمىرشىسى ەحوبا».
16 ەحوبا تاعى دا ماعان ٴسوزىن ارناپ بىلاي دەدى:
17 «ادام ۇلى، يسرايل ٷيى ٶز جەرىندە تۇرعاندا، ىستەگەن ىستەرى، جاساعان قىلىقتارىمەن ونى ارامدادى+. ولاردىڭ ىستەرى مەن ٷشىن ايەلدىڭ ەتەككىرى سياقتى لاس ەدى+.
18 وسى جەردە قان توككەندەرى جانە جەركەنىشتى پۇتتارىمەن+ ونى ارامداعاندارى ٷشىن مەن ولارعا قاھارىمدى توكتىم+.
19 ولاردى ەل-ەلگە، جەر-جەرگە بىتىراتىپ جىبەردىم+. مەن ولارعا ىستەگەن ىستەرى مەن جاساعان قىلىقتارىنا ساي ۇكىم شىعاردىم.
20 ٴبىراق سول ەلدەرگە كەلگەندەرىندە، جۇرت: «مىنالار ەحوبانىڭ حالقى، ٴبىراق ٶز جەرلەرىن تاستاپ كەتۋگە ٴماجبۇر بولدى»،— دەپ، مەنىڭ كيەلى ەسىمىمدى قورلادى+.
21 سوندىقتان مەن يسرايل ٷيى وزدەرى بارعان حالىقتاردىڭ اراسىندا قور قىلعان كيەلى ەسىمىمدى قورعايمىن+.
22 يسرايل ۇيىنە حابارىمدى جەتكىز! الەمنىڭ ٵمىرشىسى ەحوبا مىنانى ايتادى: —ەي، يسرايل ٷيى، مەن سەندەر ٷشىن ەمەس، ٶزىمنىڭ كيەلى ەسىمىم ٷشىن ارەكەت ەتىپ جاتىرمىن. ونى سەندەر وزدەرىڭ بارعان حالىقتاردىڭ اراسىندا قور قىلعان ەدىڭدەر+.
23 ال مەن سەندەر حالىقتاردىڭ اراسىندا قور قىلعان ۇلى ەسىمىمدى مىندەتتى تۇردە كيەلى ەتەمىن+. سولاردىڭ كوزىنشە سەندەردىڭ ارالارىڭدا كيەلىلىگىمدى پاش ەتكەنىمدە، ولار مەنىڭ ەحوبا ەكەنىمدى بىلەتىن بولادى+. مۇنى ايتىپ وتىرعان — الەمنىڭ ٵمىرشىسى ەحوبا.
24 سەندەردى حالىقتار اراسىنان الىپ شىعىپ، ەل-ەلدەن جيناپ الامىن دا، ٶز جەرلەرىڭە اكەلەمىن+.
25 ۇستەرىڭە تازا سۋ بۇركىپ، تازا قىلامىن+. سەندەردى بارلىق ارامدىقتارىڭ مەن جەركەنىشتى پۇتتارىڭنان+ تازارتامىن+.
26 مەن سەندەرگە جاڭا جۇرەك بەرەمىن+، جاڭا رۋح تا دارىتامىن+. تاستاي قاتتى جۇرەكتەرىڭنىڭ+ ورنىنا ەتتەي جۇمساق جۇرەك* بەرەمىن.
27 بويلارىڭا ٶز رۋحىمدى دارىتامىن. وسىلاي جارلىقتارىمدى ورىنداپ+، شەشىمدەرىمدى ۇستاناتىنداي ەتەمىن.
28 سوندا سەندەر ٶزىم اتا-بابالارىڭا بەرگەن جەردە مەكەندەپ، مەنىڭ حالقىم بولاسىڭدار، ال مەن سەندەردىڭ قۇدايلارىڭ بولامىن+.
29 مەن سەندەردى بارلىق ارامدىقتارىڭنان قۇتقارامىن. ٴداندى داقىلدارعا مول بولىپ ٶسىپ شىعۋدى بۇيىرىپ، سەندەردى اشتىققا ۇشىراتپايمىن+.
30 ەندى قايتىپ اشارشىلىققا ۇشىراپ، باسقا حالىقتاردىڭ اراسىندا ماسقارا بولماۋلارىڭ ٷشىن، اعاشتاردىڭ جەمىستەرى مەن ەگىستىكتەردىڭ ٶنىمىن مول قىلامىن+.
31 سوندا زۇلىم ىستەرىڭ مەن جامان قىلىقتارىڭدى ەستەرىڭە الىپ، كىنالارىڭ مەن جەركەنىشتى ىستەرىڭ ٷشىن ٶز-وزدەرىڭنەن جيرەنەتىن بولاسىڭدار+.
32 ٴبىراق مىنانى ٴبىلىپ قويىڭدار: مەن مۇنى سەندەر ٷشىن ىستەپ جاتقان جوقپىن+. ەي، يسرايل ٷيى، سەندەر جاساعان قىلىقتارىڭا ۇيالىپ، جەر بولاسىڭدار. مۇنى ايتىپ وتىرعان — الەمنىڭ ٵمىرشىسى ەحوبا.
33 الەمنىڭ ٵمىرشىسى ەحوبا مىنانى ايتادى: —سەندەردى بار كىنالارىڭنان تازارتقان كۇنى قالالارىڭدى قايتادان قونىستاندىرىپ+، ۇيىندىلەرىڭدى قايتا تۇرعىزامىن+.
34 سول جولمەن جۇرگەندەردىڭ ٴبارى قاراپ وتەتىن ەلسىز قالعان جەر قايتا وڭدەلەدى.
35 سوندا جۇرت: «قاڭىراپ قالعان جەر ەدەم+ باعىنداي بولىپ كەتىپتى، ۇيىندىگە اينالىپ، بوس قالىپ، قيراپ جاتقان قالالار ەندى ەل مەكەندەيتىن بەكىنىستى قالالارعا اينالىپتى»+،— دەيتىن بولادى.
36 سول كەزدە اينالالارىڭدا قالعان حالىقتار مەن، ەحوبا، قيراپ قالعاندى قايتا تۇرعىزىپ، قاڭىراپ قالعان جەردى گۇلدەندىرگەنىمدى بىلەتىن بولادى. مۇنى ايتقان دا، جۇزەگە اسىرعان دا، مەن، ەحوبا+.
37 الەمنىڭ ٵمىرشىسى ەحوبا مىنانى ايتادى: —يسرايل ٷيىنىڭ وتىنىشىنە قۇلاق اسىپ، حالقىن وتارداعى قويلار سياقتى كوبەيتەمىن.
38 يەرۋساليم مەيرام كەزىندە+ كوپتەگەن قاسيەتتىلەرگە، وتارلارعا* تولاتىنداي، قيراپ جاتقان قالالار دا ادامدارعا تولادى+. سوندا ولار مەنىڭ ەحوبا ەكەنىمدى بىلەتىن بولادى».
سىلتەمەلەر
^ ياعني قۇدايدىڭ باسشىلىعىنا مويىنسۇنۋعا دايىن جۇرەك.
^ مۇمكىن: «قۇرباندىققا شالىناتىن وتارلارعا».
