ەزەكيەل 38:1—23
38 ەحوبا تاعى دا ماعان ٴسوزىن ارناپ بىلاي دەدى:
2 «ادام ۇلى، ٴجۇزىڭدى ماگوگ جەرىندەگى گوگقا+ — مەشەح پەن تۇبالدىڭ+ باس بيلەۋشىسىنە — بۇر دا، سوعان قارسى پايعامبارلىق ەتىپ+،
3 حابارىمدى جەتكىز. الەمنىڭ ٵمىرشىسى ەحوبا مىنانى ايتادى: —ەي، گوگ، مەشەح پەن تۇبالدىڭ باس بيلەۋشىسى، ٴبىلىپ قوي، مەن ساعان قارسى شىعامىن!
4 مەن سەنى كەرى اينالدىرىپ، جاق سۇيەگىڭە قارماق سالامىن دا+، كۇللى جاساعىڭمەن+، اتتارىڭمەن، ٴساندى كيىنگەن سالت اتتىلارىڭمەن، ۇلكەندى-كىشىلى قالقان ۇستاعان ٵرى سەمسەرمەن سوعىسا بىلەتىن بار اسكەرىڭمەن قوسا تارتىپ اكەلىپ، شايقاسقا اتتاندىرامىن.
5 پەرسيا، ەفيوپيا مەن پۋتتىڭ+ باستارىنا دۋلىعا كيىپ، قولدارىنا شاعىن قالقان ۇستاعان كۇللى جاساعى دا سولارمەن بىرگە اتتانادى.
6 گومەر مەن ونىڭ بار جاساعى، سولتۇستىكتىڭ قيىر تۇكپىرىنەن كەلگەن توعارما+ ۇرپاقتارىنىڭ كۇللى ساربازدارى — وسى قالىڭ قول سەنىمەن بىرگە شايقاسقا شىعادى+.
7 ٶزىڭ دە، قاسىڭا جينالعان بار جاساعىڭ دا دايىن بولىڭدار! ولاردى ۇرىسقا سەن باستاپ اپاراسىڭ!
8 ٴبىرتالاي ۋاقىت وتكەن سوڭ مەن سەنى شاقىرامىن. اقىرىندا، كوپ جىلداردان كەيىن سەن يسرايل ەلىنە شابۋىل جاسايسىڭ. ونىڭ حالقى سەمسەرمەن قىرعىنعا ۇشىراعاننان كەيىن قالپىنا كەلگەن ٵرى ٴتۇرلى حالىقتاردىڭ اراسىنان شىعىپ، ۇزاق ۋاقىت بويى قاڭىراپ بوس جاتقان يسرايل تاۋلارىنا جينالعان ەدى. بۇل ەلدىڭ حالقى وزگە حالىقتاردىڭ اراسىنان جيناپ اكەلىنىپ، قاۋىپسىز ٶمىر ٴسۇرىپ جاتقان بولاتىن+.
9 سەن ولارعا قارسى كۇللى اسكەرىڭمەن، قالىڭ ٴنوپىر حالقىڭمەن داۋىلداي گۋىلدەپ كەلىپ، جەرلەرىن بۇلتتاي قاپتايسىڭ.
10 الەمنىڭ ٵمىرشىسى ەحوبا مىنانى ايتادى: —سول كۇنى كوڭىلىڭە ٴبىر وي ۇيالاپ، زۇلىم جوسپار قۇراسىڭ دا:
11 «قورعانسىز جاتقان ەلدى مەكەندەرگە شابۋىل جاسايمىن+. ەش الاڭداماي، قاۋىپسىزدىكتە ٶمىر كەشىپ جاتقان حالىققا تاپ بەرەمىن. ولاردىڭ ٴبارى قابىرعامەن قورشالماعان، ىسىرمالى قاقپالارى دا جوق مەكەندەردە تۇرىپ جاتىر ەكەن»،— دەيسىڭ.
12 سەنىڭ كوكسەگەنىڭ — كەزىندە قاڭىراپ جاتقان، ال قازىر تۇرعىندارى بار جەرلەرگە+ شابۋىل جاساپ، توناۋ، ولجاعا قارىق بولۋ. بۇل جەرلەردىڭ تۇرعىندارى حالىقتار اراسىنان جيناپ اكەلىنگەن ەدى+. ولار ەندى مول داۋلەت پەن دۇنيە-مۇلىككە يە بولىپ+، جەردىڭ قاق ورتاسىندا ٶمىر ٴسۇرىپ جاتىر.
13 شەبا+، دەدان+ جانە ٴتارسيستىڭ+ ساۋداگەرلەرى مەن بارلىق ساربازدارى* ساعان: «سەن توناپ، ولجاعا قارىق بولۋ ٷشىن شابۋىلعا اتتانباقسىڭ با؟ اسكەرىڭدى التىن-كۇمىس ولجالاتۋ ٷشىن، بايلىق پەن دۇنيە-مۇلىككە يە بولىپ، مول ولجاعا باتۋ ٷشىن جينادىڭ با؟»— دەيتىن بولادى.
14 سوندىقتان، ادام ۇلى، پايعامبارلىق ەتىپ، گوگقا حابارىمدى جەتكىز! الەمنىڭ ٵمىرشىسى ەحوبا مىنانى ايتادى: —سول كۇنى حالقىم يسرايلدىڭ قاۋىپسىزدىكتە ٶمىر ٴسۇرىپ جاتقانى سەنىڭ نازارىڭنان تىس قالماسى ٴسوزسىز+.
15 سەن شەتىنەن اتقا مىنگەن كۇللى حالقىڭمەن — بۇكىل اسكەرىڭمەن، جەر قايىستىرعان قولمەن+ — ٶز جەرىڭنەن، سولتۇستىكتىڭ قيىر تۇكپىرىنەن اتتاناسىڭ+.
16 حالقىم يسرايلگە قارسى جەردى جاۋىپ قالاتىن بۇلت سياقتى كەلەسىڭ. سوڭعى كۇندەردە مەن سەنى ٶز جەرىمە قارسى شىعارامىن+. سوندا سەن ارقىلى، ەي، گوگ، ۇلتتاردىڭ كوزىنشە كيەلىلىگىمدى پاش ەتەمىن دە، ولار مەنىڭ كىم ەكەنىمدى بىلەتىن بولادى+.
17 الەمنىڭ ٵمىرشىسى ەحوبا بىلاي دەيدى: ەجەلگى زاماندا مەن قىزمەتشىلەرىم — يسرايل پايعامبارلارى ارقىلى حالقىما كىمنىڭ قارسى شىعاتىنىن ايتقانمىن، سول سەن ەمەسسىڭ بە؟! بۇل جايلى قىزمەتشىلەرىم كوپ جىلدار بويى پايعامبارلىق ەتتى.
18 الەمنىڭ ٵمىرشىسى ەحوبا بىلاي دەيدى: —سول كۇنى، گوگ يسرايل ەلىنە شابۋىلداعان كۇنى، مەنىڭ قاھارىم وتتاي لاۋلايدى+.
19 مەن قۇلشىنا، قاھارىمنىڭ وتى جالىنداپ سويلەيمىن. سوندا يسرايل ەلىندە جەر قاتتى سىلكىنەدى.
20 مەن تەڭىزدەگى بالىقتاردى، اۋەدەگى قۇستاردى، دالاداعى جابايى اڭدار مەن جەردە قىبىرلاپ جۇرگەن كۇللى باۋىرىمەن جورعالاۋشىلاردى جانە جەر بەتىندەگى ادام اتاۋلىنى قالتىراتىپ-دىرىلدەتەمىن. تاۋلاردى قۇلاتىپ+، جارتاستاردى قيراتامىن، قابىرعا اتاۋلىنى دا جەرمەن-جەكسەن ەتەمىن.
21 الەمنىڭ ٵمىرشىسى ەحوبا مىنانى ايتادى: —مەن كۇللى تاۋلارىمدا گوگتىڭ باسىنا سەمسەر ۇيىرەمىن، ساربازداردىڭ سەمسەرلەرىن ٴبىر-بىرىنە قارسى قويامىن+.
22 ۇكىمىمدى جۇزەگە اسىرىپ، ونى ىندەت+ پەن قاندى قىرعىنعا ۇشىراتامىن. وزىنە دە، جاساعى مەن قالىڭ حالقىنا دا قۇيىندى نوسەر، بۇرشاق+، وت+ پەن كۇكىرت+ جاۋدىرامىن+.
23 وسىلايشا كوپتەگەن ۇلتتاردىڭ كوزىنشە داڭقىمدى اسىرامىن، كيەلىلىگىمدى پاش ەتەمىن ٵرى ٶزىمنىڭ كىم ەكەنىمدى تانىتامىن. سوندا ولار مەنىڭ ەحوبا ەكەنىمدى بىلەتىن بولادى».
سىلتەمەلەر
^ نەمەسە «ابدان ارىستاندارى».