ەزەكيەل 44:1—31
44 ول مەنى قايتادان عيباداتحانانىڭ شىعىسقا قاراپ تۇرعان سىرتقى قاقپا عيماراتىنا الىپ كەلدى+. ول جابىق تۇر ەكەن+.
2 سوندا ەحوبا ماعان بىلاي دەدى: «بۇل قاقپا عيماراتى جابىق تۇرادى. ول ەشقاشان اشىلمايدى دا، وعان ەشبىر ادام بالاسى كىرمەيدى دە، سەبەبى بۇل جەردەن يسرايلدىڭ قۇدايى ەحوبا كىردى+. سوندىقتان ول جابىق تۇرۋ كەرەك.
3 ٴبىراق باسشى سول جەردە وتىرىپ، ەحوبانىڭ الدىندا وعان ۇسىنىلعان ناننان جەيتىن بولادى+، سەبەبى ول — باسشى. ول قاقپا عيماراتىنىڭ كىرەبەرىس ٴدالىزى ارقىلى كىرىپ، سول ارقىلى شىعادى+».
4 سوسىن ول مەنى سولتۇستىك قاقپا عيماراتى ارقىلى عيباداتحانانىڭ الدىنا اكەلدى. قاراسام، ەحوبانىڭ عيباداتحاناسى ەحوبانىڭ نۇرلى سالتاناتىنا كەنەلىپتى+. سوندا مەن ەتپەتىمنەن جىعىلا كەتتىم+.
5 ەحوبا ماعان بىلاي دەدى: «ادام ۇلى، ەحوبانىڭ عيباداتحاناسىنا قاتىستى جارلىقتار مەن زاڭدار تۋرالى ايتقاندارىمنىڭ بارىنە نازار سال، دەن قويىپ، مۇقيات تىڭدا. عيباداتحانانىڭ كىرەتىن جانە بارلىق شىعاتىن جەرلەرىنە مۇقيات دەن قوي+.
6 بۇلىكشىل يسرايل ۇيىنە حابارىمدى جەتكىز! الەمنىڭ ٵمىرشىسى ەحوبا مىنانى ايتادى: —ەي، يسرايل ٷيى، جەركەنىشتى ىستەرمەن اينالىسقاندارىڭ جەتەر!
7 سەندەر جۇرەكتەرى مەن تاندەرى سۇندەتتەلمەگەن شەتەلدىكتەردى مەنىڭ عيباداتحاناما اكەلىپ، ونى ارامداتتىڭدار. سەندەر ماعان نان، مالدىڭ مايى مەن قانىن ۇسىناسىڭدار، سويتە تۇرا، كۇللى جەركەنىشتى قىلىقتارىڭمەن كەلىسىمىمدى بۇزاسىڭدار.
8 مەنىڭ قاسيەتتى نارسەلەرىمنىڭ قامىن ويلاۋدىڭ ورنىنا+، عيباداتحانامدا اتقارۋلارىڭ ٴتيىس مىندەتتەرىڭدى وزگەلەرگە جۇكتەدىڭدەر.
9 الەمنىڭ ٵمىرشىسى ەحوبا مىنانى ايتادى: —يسرايل ەلىندە تۇرىپ جاتقان جۇرەگى مەن ٴتانى سۇندەتتەلمەگەن ەشبىر شەتەلدىكتىڭ عيباداتحاناما كىرۋىنە بولمايدى.
10 يسرايل ٷيى مەنەن تەرىس اينالىپ، جەركەنىشتى پۇتتارىنىڭ سوڭىنان ەرگەندە، لەۋىلىكتەر دە مەنەن بەزىپ كەتتى+. سول ٷشىن ولار كۇنالارىنىڭ زاردابىن تارتادى.
11 ال وسىدان كەيىن ولار قاقپا عيماراتتارىنداعى جۇمىستاردى باقىلايتىن+ ٵرى عيباداتحانامداعى جۇمىستاردى اتقاراتىن قىزمەتشىلەر بولادى. تۇگەل ورتەلەتىن جانە حالىق ٷشىن شالىناتىن قۇرباندىقتاردى سويادى، سونداي-اق جۇرت الدىندا تۇرىپ، ولارعا قىزمەت ەتەدى.
12 الەمنىڭ ٵمىرشىسى ەحوبا مىنانى ايتادى: —لەۋىلىكتەر يسرايل ٷيىنىڭ جەركەنىشتى پۇتتارىنىڭ الدىندا جۇرتقا قىزمەت ەتتى، سونداي-اق ولارعا كەدەرگى تاس بولىپ، كۇنا جاساۋلارىنا تۇرتكى بولدى+. سول ٷشىن مەن قولىمدى كوتەرىپ تۇرىپ انت ەتتىم. ولار ٶز كۇنالارىنىڭ زاردابىن تارتاتىن بولادى.
13 لەۋىلىكتەر ٴدىني قىزمەتكەر رەتىندە ماعان جاقىندامايدى. ولار مەنىڭ قاسيەتتى جانە ەڭ قاسيەتتى نارسەلەرىمە دە جولامايدى. قايتا، جاساعان جەركەنىشتى ىستەرىنىڭ ماسقارالىعىن مويىندارىمەن كوتەرەدى.
14 ال وسىدان كەيىن عيباداتحاناداعى قىزمەت پەن اتقارىلۋى ٴتيىس كۇللى جۇمىستىڭ قامىن جەۋدى سولارعا جۇكتەيمىن+.
15 ال يسرايلدىكتەر مەنەن تەرىس اينالىپ كەتكەندە، سادىق+ ۇلدارىنان تاراعان لەۋىلىك ٴدىني قىزمەتكەرلەر بولسا عيباداتحانامداعى مىندەتتەرىن اتقارۋدان تايمادى+. سوندىقتان ولار قىزمەت ەتۋ ٷشىن ماعان جاقىنداپ، الدىمدا قۇرباندىقتىڭ مايى+ مەن قانىن+ ۇسىناتىن بولادى. مۇنى ايتىپ وتىرعان — الەمنىڭ ٵمىرشىسى ەحوبا.
16 مەنىڭ عيباداتحاناما كىرەتىن دە، ماعان قىزمەت ەتۋ ٷشىن قۇرباندىق وشاعىما+ جاقىندايتىندار دا — سولار. ولار مەنىڭ الدىمدا مىندەتتەرىن اتقاراتىن بولادى+.
17 ىشكى اۋلانىڭ قاقپا عيماراتىنا كىرگەندە، ٴدىني قىزمەتكەرلەر زىعىر ماتادان كيىم كييۋلەرى كەرەك+. ىشكى اۋلانىڭ قاقپا عيماراتىندا نە اۋلانىڭ ىشىندە قىزمەتىن اتقارعاندا، ولار ۇستەرىنە ٴجۇن كيىم كيمەسىن.
18 باستارىنا زىعىر ماتادان شالما وراسىن، دامبالدارى دا زىعىر ماتادان بولسىن+. ولار تەرلەتەتىن ەشتەڭە كيمەۋلەرى كەرەك.
19 وزگە جۇرت جۇرەتىن سىرتقى اۋلاعا شىقپاس بۇرىن ولار ىشتە قىزمەت اتقارعاندا كيگەن كيىمدەرىن شەشىپ+، قاسيەتتى اس بولمەلەرگە قويسىن+. كيىمدەرىمەن جۇرتقا كيەلىلىك تاراتپاس ٷشىن، ولار كيىمدەرىن اۋىستىرۋلارى كەرەك.
20 ٴدىني قىزمەتكەرلەر شاشتارىن تاقىرلاپ الماسىن+، ۇزىن قىلىپ تا وسىرمەي، قىرقىپ ٴجۇرسىن.
21 ولارعا ىشكى اۋلاعا كىرەردە شاراپ ىشۋگە بولمايدى+.
22 سونداي-اق جەسىر نە اجىراسقان ايەلگە ۇيلەنبەسىن+، تەك يسرايلدىك پاك قىزدى نە قايتىس بولعان ٴدىني قىزمەتكەردىڭ جەسىرىن الۋىنا بولادى+.
23 ٴدىني قىزمەتكەرلەر حالقىما قاسيەتتى مەن قاسيەتتى ەمەس، كادىمگى نارسەلەردى اجىراتۋدى، سونداي-اق تازا مەن تازا ەمەس نارسەلەردى اجىراتۋدى ۇيرەتۋلەرى كەرەك+.
24 ولار سوت ىستەرىندە تورەلىك ەتىپ+، مەنىڭ شەشىمدەرىمە ساي بيلىك ايتۋلارى كەرەك+. سونداي-اق مەرەكەلەرىمە+ قاتىستى بارلىق زاڭدارىم مەن جارلىقتارىمدى ۇستانۋى جانە دەمالىس كۇنىمدى قاسيەتتى تۇتۋى ٴتيىس.
25 ارامدالىپ قالماۋ ٷشىن ولار ادامنىڭ مايىتىنە جاقىنداماسىن. ٴبىراق اكەسى نە شەشەسى، ۇلى نە قىزى، باۋىرى، يا بولماسا تۇرمىس قۇرماعان اپكە-قارىنداسىنىڭ ٴبىرى قايتىس بولسا، ارامدالۋىنا جول بەرۋىنە بولادى+.
26 ال تازارۋ ٴراسىمىن جاساعاننان كەيىن، تاعى جەتى كۇن كۇتۋ كەرەك.
27 قىزمەتىن اتقارۋ ٷشىن قاسيەتتى ورىنعا، ىشكى اۋلاعا، كىرگەن كۇنى كۇنا ٷشىن اكەلىنەتىن قۇرباندىق شالۋى ٴتيىس+. مۇنى ايتىپ وتىرعان — الەمنىڭ ٵمىرشىسى ەحوبا.
28 ولاردىڭ يەلىگى مىناۋ: مەن ٶزىم ولاردىڭ يەلىگىمىن+. يسرايلدەن ولارعا يەلىككە جەر بەرىلمەسىن، ويتكەنى ولاردىڭ يەلىگى مەنمىن.
29 ٴدىني قىزمەتكەرلەر استىق تارتۋىن+، كۇنا ٷشىن اكەلىنەتىن جانە ايىپ قۇرباندىقتارىن+ جەيتىن بولادى، يسرايلدە باعىشتالعان نارسەلەردىڭ ٴبارى دە سولارعا تيەسىلى+.
30 العاشقى ونىمدەرىڭنىڭ ٴبارى، كەز كەلگەن ساداقالارىڭ دا سولاردىكى بولادى+. سونداي-اق ۇيلەرىڭە مەنىڭ اق باتام قونۋ ٷشىن+، ديىرمەنگە تارتقان العاشقى استىق جارماسىن ٴدىني قىزمەتكەرگە بەرىڭدەر+.
31 ٴدىني قىزمەتكەرلەر ارام ولگەن نە جىرتقىش تالاعان قۇستىڭ دا، جانۋاردىڭ دا ەتىن جەمەسىن+.
