ەستەر 1:1—22
1 بۇل وقيعا احاشۆەروش* پاتشانىڭ تۇسىندا بولدى. ول ٷندىستاننان ەفيوپياعا* دەيىنگى جەردى الىپ جاتقان 127 ايماقتىڭ*+ بيلەۋشىسى ەدى.
2 سول كۇندەرى احاشۆەروش پاتشا سۋزى+ بەكىنىسىندە وتىرىپ بيلىك جۇرگىزدى.
3 بيلىك قۇرۋىنىڭ ٷشىنشى جىلى ول بارلىق ٴۋازىرى مەن قىزمەتكەرلەرىنە ارناپ ۇلكەن توي جاسادى. پەرسيا+ مەن ميديا+ اسكەرىنىڭ قولباسشىلارى، بەدەلدى كىسىلەر مەن ايماق امىرشىلەرى پاتشانىڭ الدىنا كەلدى.
4 پاتشا ولارعا داڭقتى پاتشالىعىنىڭ بايلىعىن، ٶزىنىڭ زور ۇلىلىعى مەن ٴسان-سالتاناتىن كوپ كۇن بويى، 180 كۇن بويى، تاماشالاتتى.
5 وسى كۇندەر اياقتالعان سوڭ، پاتشا سۋزى بەكىنىسىندەگى ادامداردىڭ بارىنە ارناپ، ۇلىعى بار، كىشىگى بار، جەتى كۇن توي جاسادى. تويدى پاتشا سارايىنداعى باقتىڭ اۋلاسىندا وتكىزدى.
6 اۋلا زىعىر، تازا ماقتا مەن كوك ماتادان جاسالعان پەردەلەرمەن بەزەندىرىلدى. ولار قىمبات باۋلارمەن جانە كۇلگىن جىپتەرمەن ٴمارمار باعانالارداعى كۇمىس ساقينالارعا بايلاندى. قىزىل تاس*، مەرۋەرت*، اق جانە قارا ٴمارمار توسەلگەن ەدەندە التىن مەن كۇمىستەن جاسالعان ساكىلەر تۇردى.
7 شاراپ التىن توستاعاندارمەن بەرىلدى. ٵر توستاعان وزىنشە ادەمى ەدى. پاتشانىڭ ۇسىنعان شارابى، بايلىعىنا لايىقتى، اعىل-تەگىل مول بولدى.
8 ٴبىراق قالىپتاسقان ۇردىسكە كەرەعار، ەشكىم ەشكىمدى شاراپ ىشۋگە ماجبۇرلەمەدى، ويتكەنى پاتشا ساراي قىزمەتكەرلەرىنە اركىم ٶز قالاۋى بويىنشا ٸشسىن دەگەن بۇيرىق بەرگەن بولاتىن.
9 سول كەزدە استين پاتشايىم+ دا احاشۆەروش پاتشانىڭ سارايىندا ايەلدەرگە ارناپ توي وتكىزىپ جاتتى.
10 جەتىنشى كۇنى شاراپ ٸشىپ، كوڭىلى ماسايراعان احاشۆەروش پاتشا جەكە وزىنە قىزمەت ەتەتىن مەحۋمان، بيستا، حاربونا+، بيقتا، اباقتا، زەتار مەن قارقاس ەسىمدى سارايدىڭ جەتى قىزمەتكەرىنە
11 استينگە پاتشايىمنىڭ باسكيىمىن كيگىزىپ، ٶزىنىڭ الدىنا اكەلۋدى بۇيىردى. ول حالىققا جانە امىرشىلەرىنە ونىڭ سۇلۋلىعىن كورسەتپەك بولدى. ويتكەنى پاتشايىم اسا سۇلۋ ەدى.
12 الايدا استين پاتشايىم ساراي قىزمەتكەرلەرى ارقىلى بەرىلگەن پاتشا بۇيرىعىن ورىنداۋدان قايتا-قايتا باس تارتتى. بۇعان پاتشا قاتتى اشۋلانىپ، زىعىردانى قاينادى.
13 سوندا پاتشا وسىعان ۇقساس بۇرىنعى وقيعالاردان* حاباردار دانىشپاندارمەن اقىلداسپاق بولدى (ويتكەنى سول زاماندا پاتشا وسىنداي ماسەلەلەردى زاڭ مەن سوت ىسىندە بىلىكتى كىسىلەردىڭ الدىنا سالاتىن.
14 سولاردىڭ ىشىندە پەرسيا مەن ميديانىڭ وزىنە جاقىن قارشانا، شەتار، ادىمات، تارسيس، مەرەس، مارسەنا جانە مەمۋحان اتتى جەتى ٴۋازىرى+ دە بار. ولار پاتشانىڭ الدىنا كىرە الاتىن ٵرى پاتشالىقتاعى ەڭ جوعارى لاۋازىمدى كىسىلەر ەدى).
15 پاتشا ولاردان: «احاشۆەروش پاتشانىڭ ساراي قىزمەتكەرلەرى ارقىلى بەرگەن بۇيرىعىنا استين پاتشايىم مويىنسۇنبادى. سوندىقتان زاڭعا ساي ونىڭ جازاسى قانداي بولماق؟»— دەپ سۇرادى.
16 مەمۋحان سوندا پاتشانىڭ جانە ونىڭ ۋازىرلەرىنىڭ الدىندا بىلاي دەدى: «استين پاتشايىم تەك پاتشانىڭ الدىندا ەمەس، احاشۆەروش پاتشاعا باعىنىشتى كۇللى ايماقتاعى امىرشىلەر مەن حالىقتىڭ الدىندا دا ايىپتى+.
17 پاتشايىمنىڭ بۇل ٸسى بارلىق ايەلدىڭ قۇلاعىنا جەتىپ، ولار: —احاشۆەروش پاتشا استين پاتشايىمدى شاقىرتقاندا، ول كەلمەي قويعان،— دەپ، كۇيەۋلەرىن مەنسىنبەيتىن بولادى.
18 پاتشايىمنىڭ ىستەگەنى جايلى ەستىگەن پەرسيا مەن ميديا امىرشىلەرىنىڭ ايەلدەرى دە بۇگىن-اق كۇيەۋلەرىنە سولاي ىستەيتىن بولادى. سودان ەلدە مەنسىنبەۋ مەن نارازىلىق كەڭ ەتەك الادى.
19 پاتشا ماقۇل كورسە، استين پاتشايىم بۇدان بىلاي احاشۆەروش پاتشانىڭ الدىنا كەلمەسىن دەگەن جارلىق شىعارىپ، ول ەشقاشان وزگەرتۋگە بولمايتىن پەرسيا مەن ميديا زاڭىنىڭ ىشىنە جازىلىپ قويىلسىن+. سونداي-اق پاتشا ودان الدەقايدا جاقسى ايەلدى پاتشايىم ەتسىن.
20 پاتشانىڭ وسى جارلىعى كەڭ-بايتاق پاتشالىعىنا جاريالانعاندا، ايەلدەردىڭ ٴبارى كۇيەۋلەرىن، مەيلى ۇلىق نە كىشىك بولسىن، قۇرمەتتەيتىن بولادى».
21 مەمۋحاننىڭ بۇل ۇسىنىسى پاتشاعا دا، ۋازىرلەرگە دە ۇنادى. پاتشا سونىڭ ايتقانىن ىستەپ،
22 وزىنە باعىنىشتى ايماقتاردىڭ بارىنە، ٵر ايماققا ٶز قارپىندە جانە ٵر حالىققا ٶز انا تىلىندە حات جىبەردى+. وندا ٵربىر ەركەك ٶز شاڭىراعىنىڭ قوجايىنى بولىپ، ٶز حالقىنىڭ تىلىندە سويلەسىن دەگەن نۇسقاۋ جازىلعان ەدى.
سىلتەمەلەر
^ نەمەسە «احاسۋەر». بۇل ۇلى ٴدارييدىڭ (داريي گيستاسپتىڭ) بالاسى I كسەركس بولسا كەرەك.
^ نەمەسە «قۇش».
^ نەمەسە «پروۆينسيا».
^ نەمەسە «پورفير تاس».
^ نەمەسە «پەرلامۋتر». كەيبىر مولليۋسكىلەردىڭ باقالشاعىندا تۇزىلەتىن زات.
^ نەمەسە «پرەسەدەنت».
