ەستەر 3:1—15
3 وسىدان سوڭ احاشۆەروش پاتشا اگاگتىڭ+ ۇرپاعى حامەدات ۇلى حاماننىڭ مارتەبەسىن بيىكتەتىپ+، ونى ٶزىنىڭ قاسىنداعى باسقا امىرشىلەردىڭ+ بارىنەن جوعارىلاتتى.
2 پاتشا سارايىنىڭ قاقپاسىنداعى قىزمەتشىلەردىڭ ٴبارى حاماننىڭ الدىندا تىزە بۇگىپ، جەرگە باس ۇراتىن، سەبەبى پاتشا وسىلاي ەتۋدى ٵمىر ەتكەن ەدى. الايدا ماردوحاي وعان تىزە بۇككەن دە، جەرگە باس ۇرىپ تاعزىم ەتكەن دە جوق.
3 سوندا پاتشانىڭ ساراي قاقپاسىنداعى قىزمەتشىلەرى وعان: «سەن نەگە پاتشانىڭ بۇيرىعىن ورىندامايسىڭ؟»— دەدى.
4 ولار مۇنى كۇن سايىن ايتسا دا، ماردوحاي ولارعا قۇلاق اسپادى. سودان ولار ماردوحايدىڭ مۇنىسىنا توزەر مە ەكەن دەگەن ويمەن ٴبارىن حامانعا جەتكىزدى+. ماردوحاي ولارعا ٶزىنىڭ ياھۋدي ەكەنىن ايتقان بولاتىن+.
5 حامان ماردوحايدىڭ تىزە بۇگىپ، جەرگە باس ۇرماعانىن كورگەندە، اشۋعا بۋلىقتى+.
6 الايدا ماردوحايدىڭ عانا كوزىن قۇرتۋ وعان از بولىپ كورىندى، ويتكەنى الگىلەر ونىڭ قاي حالىقتان ەكەنىن ايتقان ەدى. سودان ول احاشۆەروشتىڭ بۇكىل پاتشالىعىنداعى ياھۋديلەردىڭ ٴبارىن، ماردوحايدىڭ حالقىن، جويۋدىڭ جولىن ىزدەستىردى.
7 احاشۆەروش پاتشانىڭ بيلىك قۇرۋىنىڭ ون ەكىنشى جىلىنىڭ+ ٴبىرىنشى ايىندا، نيسان* ايىندا، مۇنى جۇزەگە اسىرۋعا وڭتايلى اي مەن كۇندى انىقتاۋ ٷشىن، حاماننىڭ الدىندا پۋر، ياعني جەرەبە تاستالدى+. جەرەبە ون ەكىنشى ايعا، ادار* ايىنا، ٴتۇستى+.
8 حامان احاشۆەروش پاتشاعا: «ٴسىزدىڭ پاتشالىعىڭىزداعى باعىنىشتى ايماقتارداعى+ حالىقتاردىڭ اراسىنا بىتىراپ كەتكەن ٴبىر حالىق بار+. ولاردىڭ زاڭدارى باسقالاردىكىنەن وزگەشە، سونداي-اق پاتشانىڭ زاڭدارىنا مويىنسۇنبايدى. ولاردى بۇلاي قالدىرسا، پاتشانىڭ مۇددەسىنە زيان كەلەدى.
9 ەگەر پاتشا ماقۇل كورسە، سول حالىقتى جويۋعا قاتىستى جازباشا جارلىق شىعارسا ەكەن. ال مەن پاتشا قازىناسىنا سالۋ ٷشىن قىزمەتكەرلەرگە 10000 تالانت* كۇمىس بەرەمىن*»،— دەدى.
10 سوندا پاتشا قولىنداعى ٴمورلى جۇزىگىن شەشىپ+، اگاگتىڭ+ ۇرپاعى حامەداتتىڭ ۇلى حامانعا بەردى+. ول ياھۋديلەردىڭ قاس جاۋى ەدى.
11 حامانعا پاتشا: «كۇمىستى دە، حالىقتى دا ساعان تابىستادىم، ولارعا دۇرىس دەپ تاپقانىڭدى ىستە»،— دەدى.
12 ٴبىرىنشى ايدىڭ ون ٷشىنشى كۇنى پاتشانىڭ حاتشىلارى+ شاقىرىلدى. ٴسۇيتىپ، ولار حاماننىڭ پاتشا ساتراپتارىنا*، ايماق امىرشىلەرى مەن ٴتۇرلى حالىقتاردىڭ اكىمدەرىنە ارناعان بۇيرىقتارىن ٵربىر ايماققا ٶز قارپىندە، ٵربىر حالىققا ٶز تىلىندە جازدى+. حات احاشۆەروش پاتشانىڭ اتىنان جازىلىپ، پاتشانىڭ ٴمورلى جۇزىگىمەن بەكىتىلدى+.
13 بۇل حاتتار پاتشاعا باعىنىشتى ايماقتاردىڭ بارىنە شابارماندار ارقىلى جىبەرىلدى. حاتتا ياھۋديلەردىڭ بارلىعىن: جاسىن دا، كارىسىن دە، ايەلىن دە، بالاسىن دا — ٴبىر كۇننىڭ ىشىندە، ون ەكىنشى ايدىڭ، ياعني ادار ايىنىڭ، ون ٷشىنشى كۇنى قىرىپ-جويىپ، مال-مۇلكىن تالان-تاراجعا سالۋ تۋرالى بۇيرىق جازىلدى+.
14 سول كۇنگە حالىقتار دايىن بولۋ ٷشىن، بۇل جارلىقتىڭ كوشىرمەسى ٵربىر ايماققا زاڭ رەتىندە جىبەرىلىپ، بارشا جۇرتقا جاريالانۋ كەرەك بولدى.
15 پاتشانىڭ بۇيرىعىمەن شابارماندار تەز اتتانىپ كەتتى+. جارلىق سۋزى+ بەكىنىسىندە دە جاريالاندى. پاتشا مەن حامان شاراپ ىشۋگە وتىردى. ال سۋزى قالاسىنىڭ حالقى نە بولعانىن تۇسىنبەي ابىرجىدى.
سىلتەمەلەر
^ B15 قوسىمشاسىن قاراڭىز.
^ B15 قوسىمشاسىن قاراڭىز.
^ 1 تالانت 2.34 كيلوگرامعا تەڭ. B14 قوسىمشاسىن قاراڭىز.
^ مۇمكىن: «مەن وسى ٸستى جۇزەگە اسىراتىندار ٷشىن پاتشا قازىناسىنا 10000 تالانت كۇمىس بەرەمىن».
^ ماعىناسى «پاتشالىقتى قورعاۋشىلار». تۇسىندىرمەنى قاراڭىز.
