ەستەر 5:1—14
5 ەستەر ٷشىنشى كۇنى+ پاتشايىم كيىمىن كيىپ، پاتشا سارايىنىڭ ىشكى اۋلاسىنا، پاتشا وتىرعان سارايدىڭ الدىنا بارىپ تۇردى. پاتشا ٶز سارايىندا، كىرەبەرىسكە قاراما-قارسى توردە تۇرعان تاعىندا وتىرعان ەدى.
2 ول اۋلادا تۇرعان ەستەر پاتشايىمدى كورە سالىسىمەن، كەلگەنىنە ريزا بولىپ، قولىنداعى التىن اساتاياعىن سوعان قاراي سوزدى+. سوندا ەستەر جاقىنداپ كەلىپ، اساتاياعىنىڭ باسىنا قولىن تيگىزدى.
3 پاتشا وعان: «ٴيا، ەستەر پاتشايىم، قانداي ماسەلەمەن كەلدىڭ؟ قانداي ٶتىنىشىڭ بار؟ ٴتىپتى پاتشالىعىمنىڭ جارتىسىن سۇراساڭ دا، ساعان بەرىلەدى!»— دەدى.
4 ەستەر: «ەگەر پاتشا ماقۇل كورسە، بۇگىن وزىڭىزگە ارناپ دايىنداعان قوناقاسىما حامانمەن+ بىرگە كەلسەڭىز ەكەن»،— دەپ جاۋاپ قاتتى.
5 سوندا پاتشا ادامدارىنا: «ەستەردىڭ ٶتىنىشىن ورىنداۋ ٷشىن، حاماندى تەز شاقىرىڭدار»،— دەپ بۇيىردى. ٴسۇيتىپ، پاتشا مەن حامان ەستەردىڭ دايىنداعان قوناقاسىنا باردى.
6 ولار شاراپ ٸشىپ وتىرعاندا، پاتشا ەستەرگە: «قانداي تىلەگىڭ بار؟ ول ٴسوزسىز ورىندالادى. قانداي ٶتىنىشىڭ بار؟ ٴتىپتى پاتشالىعىمنىڭ جارتىسىن سۇراساڭ دا، ساعان بەرىلەدى!»— دەدى+.
7 بۇعان ەستەر: «مەنىڭ تىلەگىم مەن ٶتىنىشىم مىناۋ:
8 ەگەر پاتشانىڭ ىقىلاسىنا يە بولسام، ٵرى ول مەنىڭ تىلەگىم مەن ٶتىنىشىمدى ورىنداعىسى كەلسە، وندا پاتشا حاماندى ەرتىپ، وزدەرىڭىزگە ارناپ ازىرلەيتىن قوناقاسىما ەرتەڭ دە كەلسەڭىزدەر ەكەن. پاتشاعا ٶتىنىشىمدى ەرتەڭ ايتايىن»،— دەپ جاۋاپ بەردى.
9 سول كۇنى حامان قوناقاسىنان قۋانىپ، ٴماز-مەيرام بولىپ شىقتى. ٴبىراق پاتشا سارايىنىڭ قاقپاسىندا وتىرعان ماردوحايدى كورىپ، ونىڭ ورنىنان تۇرماعانىن ٵرى ەش قورىقپاعانىن بايقاعاندا، حامان اشۋعا بۋلىقتى+.
10 ٴبىراق ٶز-ٶزىن ۇستاپ، ۇيىنە باردى. سوسىن دوستارى مەن ايەلى زەرەشتى شاقىرتتى+.
11 حامان ولاردىڭ الدىندا ٶزىنىڭ بايلىعىنىڭ مولدىعىن، ۇلدارىنىڭ كوپتىگىن+، پاتشا ٶزىنىڭ مارتەبەسىن قالاي وسىرگەنىن جانە امىرشىلەرى مەن قىزمەتكەرلەرىنىڭ الدىندا جوعارىلاتقانىن ايتىپ ماقتاندى+.
12 سونداي-اق حامان: «بۇعان قوسا، ەستەر پاتشايىم ٶزى دايىنداعان قوناقاسىنا پاتشامەن بىرگە مەنى عانا شاقىردى+. ول مەنى پاتشامەن بىرگە ەرتەڭگى قوناقاسىنا دا شاقىردى+.
13 الايدا پاتشا سارايىنىڭ قاقپاسىنىڭ الدىندا ياھۋدي ماردوحاي وتىرعاندا، مۇنىڭ بارىنە كوڭىلىم تولمايدى»،— دەدى.
14 بۇعان ايەلى زەرەش پەن دوستارى: «بيىكتىگى 50 شىنتاق* بورەنە ورنات تا، تاڭەرتەڭ پاتشادان ماردوحايدى سوعان ٸلىپ قويۋدى سۇرا+. كەيىن پاتشامەن بىرگە قوناقاسىعا بارىپ، كوڭىلىڭدى كوتەر»،— دەدى. بۇل ۇسىنىس حامانعا ۇنادى، سودان ول بورەنە دايىنداتقىزدى.
سىلتەمەلەر
^ شامامەن 3.22 مەتر. B14 قوسىمشاسىن قاراڭىز
