ەستەر 6:1—14
-
پاتشانىڭ ماردوحايعا سي-سياپات كورسەتۋى (1—14)
6 سول ٴتۇنى پاتشانىڭ ۇيقىسى قاشتى. ول جىلناما كىتابىن+ الدىرتىپ، داۋىستاپ وقىتتى.
2 وقۋ بارىسىندا احاشۆەروش پاتشانى ٶلتىرۋدى ويلاستىرعان ەكى ساراي قىزمەتكەرىنىڭ، بەكتان مەن تەرەش دەگەن قاقپا كۇزەتشىلەرىنىڭ، قاسكۇنەمدىگىن ماردوحايدىڭ قالاي اشكەرە ەتكەنى بەلگىلى بولدى+.
3 سوندا پاتشا: «وسى ٷشىن ماردوحايعا قانداي قۇرمەت پەن سي-سياپات كورسەتىلدى؟»— دەپ سۇرادى. پاتشانىڭ جەكە قىزمەتشىلەرى: «وعان ەشتەڭە كورسەتىلگەن جوق»،— دەپ جاۋاپ بەردى.
4 كەيىنىرەك پاتشا: «اۋلادا كىم بار؟»— دەپ سۇرادى. سول كەزدە پاتشا سارايىنىڭ سىرتقى اۋلاسىندا حامان تۇرعان ەدى+. ول پاتشاعا ٶزى دايىنداعان بورەنەگە ماردوحايدى ٸلۋ جايلى ايتۋعا كەلگەن بولاتىن+.
5 قىزمەتشىلەرى پاتشاعا: «اۋلادا حامان+ تۇر»،— دەپ ايتتى. پاتشا: «كىرسىن!» — دەدى.
6 حامان ىشكە كىرگەندە، پاتشا ودان: «پاتشا قۇرمەت كورسەتكىسى كەلگەن ادامعا نە ىستەلۋ كەرەك؟»— دەپ سۇرادى. سوندا حامان ىشىنەن: «پاتشا مەنەن باسقا كىمگە قۇرمەت كورسەتەر دەيسىڭ؟!»— دەپ ويلادى+.
7 ٴسۇيتىپ، پاتشاعا بىلاي دەدى: «پاتشا قۇرمەت كورسەتكىسى كەلگەن ادامعا بىلاي ىستەلىنسىن:
8 پاتشانىڭ ٴساندى كيىمى+ جانە باسىنا پاتشا اشەكەيى كيگىزىلگەن تۇلپارى اكەلىنسىن دە،
9 ولار پاتشانىڭ بەدەلدى امىرشىلەرىنىڭ بىرىنە بەرىلسىن. سودان قىزمەتشىلەر پاتشا قۇرمەت كورسەتكىسى كەلگەن ادامعا الگى كيىمدى كيگىزىپ، تۇلپارعا مىنگىزىپ، قالا الاڭىمەن جەتەلەپ الىپ ٴجۇرسىن. سونداي-اق ونىڭ الدىندا ٴجۇرىپ: —پاتشا قۇرمەت كورسەتكىسى كەلگەن ادامعا وسىلاي جاسالادى!— دەپ جار سالسىن+».
10 سوندا پاتشا حامانعا: «وندا تەزدەت، ٴساندى كيىم مەن تۇلپاردى الىپ، پاتشا سارايىنىڭ قاقپاسىنىڭ الدىندا وتىرعان ماردوحايعا وسى ايتقاندارىڭنىڭ ٴبارىن جاسا، بىردە-بىرەۋىن قالدىرما»،— دەپ تاپسىردى.
11 حامان ٴساندى كيىم مەن تۇلپاردى اكەلدى دە، ماردوحايدىڭ+ ۇستىنە كيىمدى كيگىزىپ، تۇلپارعا مىنگىزىپ، قالا الاڭىمەن جەتەلەپ الىپ ٴجۇردى. سونداي-اق الدىندا ٴجۇرىپ: «پاتشا قۇرمەت كورسەتكىسى كەلگەن ادامعا وسىلاي جاسالادى!»— دەپ جار سالدى.
12 بۇدان كەيىن ماردوحاي پاتشانىڭ قاقپاسىنا قايتىپ كەلدى. ال حامان قايعىرىپ، باسىن بۇركەپ الىپ، اسىعىس ۇيىنە كەتتى.
13 ول ايەلى زەرەش+ پەن دوستارىنا وزىمەن بولعان جايتتى بايانداپ بەردى. سوندا اقىلگويلەرى مەن ايەلى زەرەش وعان: «سەنەن جوعارىلاي باستاعان ماردوحاي ياھۋدي تۇقىمىنان بولسا، وندا سەن ونى جەڭە المايسىڭ، ونىڭ الدىندا ٴسوزسىز قۇلايسىڭ!»— دەدى.
14 ولار ٵلى سويلەسىپ تۇرعاندا، پاتشانىڭ ساراي قىزمەتكەرلەرى كەلىپ، حاماندى اسىقتىرىپ، ەستەردىڭ دايىنداعان قوناقاسىنا الىپ كەتتى+.
