ەشۋا 22:1—34
22 وسىدان كەيىن ەشۋا رۋبەندىكتەر، عادتىقتار مەن ماناسا رۋىنىڭ جارتىسىن شاقىرىپ الىپ،
2 بىلاي دەدى: «سەندەر ەحوبانىڭ قىزمەتشىسى مۇسانىڭ بۇيرىقتارىن ەكى ەتپەدىڭدەر+، مەنىڭ دە ايتقاندارىما مويىنسۇنىپ، بۇيىرعانىمنىڭ ٴبارىن ورىندادىڭدار+.
3 بۇگىنگە دەيىن، وسىنشاما ۋاقىت بويى، باۋىرلارىڭدى تاستاماي+، قۇدايلارىڭ ەحوبانىڭ جۇكتەگەن مىندەتىن ورىنداپ كەلدىڭدەر+.
4 مىنە، ەندى ەحوبا قۇدايلارىڭ ۋادەسىنە ساي باۋىرلارىڭا تىنىشتىق سيلادى+. سول سەبەپتەن ٶز شاتىرلارىڭا، ەحوبانىڭ قىزمەتشىسى مۇسا يورداننىڭ ارعى بەتىندە* وزدەرىڭە يەلىك ەتۋگە بەرگەن جەرگە قايتىڭدار+.
5 تەك ەحوبانىڭ قىزمەتشىسى مۇسا ۇستانۋدى تاپسىرعان بۇيرىقتار مەن زاڭدى مۇقيات ورىنداپ+، قۇدايلارىڭ ەحوبانى سۇيىڭدەر+، ونىڭ بارلىق جولدارىمەن جۇرىڭدەر+، وسيەتتەرىن ورىنداڭدار+، ودان ايىرىلماڭدار+، ٵرى بار جۇرەكتەرىڭمەن جانە بۇكىل جان-تاندەرىڭمەن+ وعان قىزمەت ەتىڭدەر+».
6 وسىلاي ەشۋا ولارعا باتاسىن بەرىپ، جوندەرىنە جىبەردى. سودان ولار شاتىرلارىنا تاراستى.
7 ماناسا رۋىنىڭ جارتىسىنا مۇسا باشاننان مۇرالى يەلىك بەرگەن ەدى+، ال ەكىنشى جارتىسىنا ەشۋا يورداننىڭ باتىسىنداعى باۋىرلارىنىڭ اراسىنان جەر بەردى+. ەشۋا ولاردى جونەلتىپ جاتىپ، بىلاي دەپ باتاسىن بەردى:
8 «شاتىرلارىڭا زور بايلىقپەن، ٷيىر-ٷيىر، وتار-وتار مالمەن، كۇمىس، التىن، مىس، تەمىر جانە كوپ كيىم-كەشەكپەن ورالىڭدار+. جاۋدان تۇسكەن ولجادان ۇلەستەرىڭدى الىپ، باۋىرلارىڭمەن بولىسىڭدەر+».
9 سوسىن رۋبەن مەن عاد رۋى جانە ماناسا رۋىنىڭ جارتىسى وزگە يسرايلدىكتەرمەن قوشتاسىپ، قاناحانداعى شيلودان عالاقاتقا+، ەحوبانىڭ مۇسا ارقىلى بەرگەن نۇسقاۋىنا ساي يەلىك ەتكەن جەرلەرىنە قايتتى+.
10 ولار قاناحان جەرىندەگى يوردان وڭىرىنە كەلگەندە، يورداننىڭ جاعاسىندا ەڭسەلى ەتىپ قۇرباندىق وشاعىن جاسادى.
11 ٴبىراز ۋاقىتتان كەيىن قالعان يسرايلدىكتەرگە «رۋبەن مەن عاد رۋى جانە ماناسا رۋىنىڭ جارتىسى قاناحان جەرىنىڭ شەگاراسىندا، يسرايلدىكتەر يەمدەنگەن يورداننىڭ باتىس وڭىرىندە، قۇرباندىق وشاعىن جاساپتى» دەگەن حابار جەتتى+.
12 مۇنى ەستىگەندە، يسرايلدىكتەردىڭ بۇكىل قاۋىمى ولارمەن سوعىسۋ ٷشىن شيلودا+ باس قوستى.
13 ٴسۇيتىپ، ولار عالاقات جەرىندەگى رۋبەن مەن عاد رۋىنا جانە ماناسا رۋىنىڭ جارتىسىنا ٴدىني قىزمەتكەر ەلازاردىڭ ۇلى پىنەحەستى+،
14 سونداي-اق ون اۋلەتباسىن، ياعني يسرايلدىڭ ٵر رۋىنان ٴبىر-ٴبىر اۋلەتباسىن جىبەردى. ولاردىڭ ٴارقايسىسى مىڭداعان يسرايلدىكتەردىڭ اراسىنداعى اۋلەتباسى ەدى+.
15 ولار عالاقات جەرىندەگى رۋبەن مەن عاد رۋىنا جانە ماناسا رۋىنىڭ جارتىسىنا كەلىپ، مىنانى ايتتى:
16 «ەحوبانىڭ بۇكىل قاۋىمى بىلاي دەپ جاتىر: —قالاي عانا يسرايلدىڭ قۇدايىنا قارسى وپاسىزدىق جاسادىڭدار+؟ نەگە ەحوباعا مويىنسۇنباي، قۇرباندىق وشاعىن جاساپ، ەحوباعا قارسى شىقتىڭدار+؟
17 پەعوردا كۇناعا باتقانىمىز از بولدى ما؟ سول ٷشىن ەحوبانىڭ قاۋىمى پالەگە ۇشىراسا دا+، كۇنامىزدەن ٵلى تازارعان جوقپىز عوي.
18 سەندەر بولساڭدار ەحوباعا مويىنسۇنباي، جولىنان تايماقسىڭدار. بۇگىن ەحوباعا قارسى بۇلىك شىعارساڭدار، ەرتەڭ ول بۇكىل يسرايل قاۋىمىنا قاھارىن توگەدى+.
19 يەلىكتەرىڭدەگى جەردى ارام دەپ ەسەپتەسەڭدەر، ەحوبانىڭ كيەلى شاتىرى تۇرعان+ ەحوبانىڭ يەلىگىندەگى جەرگە+، ٴبىزدىڭ ارامىزعا كەلىپ تۇرىڭدار. ٴبىراق وزدەرىڭە قۇدايىمىز ەحوبانىكىنەن باسقا قۇرباندىق وشاعىن جاساپ، ەحوباعا قارسى بۇلىك شىعارماڭدار، ٴبىزدى دە بۇلىكشى ەتپەڭدەر+.
20 زاراح ۇلى احان+ جويىلۋعا ٴتيىس زاتتاردان الىپ وپاسىزدىق جاساعاندا، كۇللى يسرايل قاۋىمى قاھارعا ۇشىراعان جوق پا ەدى+؟ كۇناسىنىڭ كەسىرىنەن ونىڭ ٶزى عانا ەمەس، باسقالار دا وپات بولدى+».
21 يسرايل رۋلارىنىڭ مىڭباسىلارىنا رۋبەن مەن عاد رۋى جانە ماناسا رۋىنىڭ جارتىسى بىلاي دەپ جاۋاپ بەردى+:
22 «قۇدايلاردىڭ قۇدايى* ەحوبا، قۇدايلاردىڭ قۇدايى ەحوبا+ ٴبارىن بىلەدى، يسرايل دە بىلەتىن بولادى! ەحوباعا قارسى بۇلىك شىعارىپ وپاسىزدىق جاساساق، بۇگىن ٴبىزدى امان قالدىرماسىن!
23 ەحوباعا مويىنسۇنباي، جولىنان تايىپ، تۇگەل ورتەلەتىن، استىق جانە تاتۋلىق قۇرباندىعىن ۇسىنۋ ٷشىن وزىمىزگە قۇرباندىق وشاعىن جاساعان بولساق، ەحوبا ٴبىزدى جازالاسىن+.
24 ٴبىراق ٴبىز بۇنى ٶز ۇلدارىمىزدىڭ كەلەشەگىن ويلاپ ىستەدىك. سەندەردىڭ ۇلدارىڭ ولارعا: —يسرايلدىڭ قۇدايى ەحوبادا نەلەرىڭ بار؟
25 رۋبەندىكتەر مەن عادتىقتار، ٴبىزدىڭ ارامىزعا ەحوبا يورداندى شەگارا ەتىپ قويعان. ەحوبادا سەندەردىڭ ەش ۇلەستەرىڭ جوق،— دەسە قايتەمىز؟ سەندەردىڭ ۇلدارىڭا بولا ٴبىزدىڭ ۇلدارىمىز ەحوبادان قورقۋدان قالادى عوي.
26 سوندىقتان ٴبىز بىلاي دەدىك: —وزىمىزگە قۇرباندىق وشاعىن جاسايىق. ٴبىراق ونى تۇگەل ورتەلەتىن نە باسقا قۇرباندىق شالۋ ٷشىن ەمەس،
27 ٴبىز بەن سەندەرگە جانە كەلەشەك ۇرپاقتارىمىزعا كۋا بولسىن دەپ جاسايىق+. وسىلايشا ول ٴبىزدىڭ دە ەحوباعا تۇگەل ورتەلەتىن، تاتۋلىق جانە باسقا دا قۇرباندىقتار ۇسىنىپ+، وعان قىزمەت ەتەتىنىمىزگە كۋا بولماق. سوندا سەندەردىڭ ۇرپاقتارىڭ كەلەشەكتە: —ەحوبادا سەندەردىڭ ەش ۇلەستەرىڭ جوق،— دەمەيتىن بولادى.
28 ٴسۇيتىپ، ٴبىز بىلاي دەدىك: —ولار بولاشاقتا بىزگە جانە كەيىنگى ۇرپاقتارىمىزعا وسىلاي دەسە: —قاراڭدار، ەحوبانىڭ قۇرباندىق وشاعىنا ۇقسايتىن مىناۋ قۇرباندىق وشاعىن اكەلەرىمىز جاساعان. ولار بۇنى تۇگەل ورتەلەتىن نە باسقا قۇرباندىقتار شالۋ ٷشىن ەمەس، ٴبىز بەن سەندەرگە كۋا بولسىن دەپ جاسادى،— دەپ جاۋاپ بەرەمىز.
29 قۇدايىمىز ەحوبانىڭ شاتىرىنىڭ الدىندا تۇرعان قۇرباندىق وشاعىنان باسقا قۇرباندىق وشاعىن جاساپ، وندا تۇگەل ورتەلەتىن، استىق جانە باسقا دا قۇرباندىقتار ۇسىنىپ+، ەحوباعا قارسى ادەيى بۇلىك شىعارۋ نە ەحوباعا مويىنسۇنباۋ ويىمىزدا دا بولعان جوق+!»
30 رۋبەن، عاد جانە ماناسا رۋىنىڭ ايتقان سوزدەرىن ٴدىني قىزمەتكەر پىنەحەس، قاۋىم باسشىلارى مەن يسرايل رۋلارىنىڭ مىڭباسىلارى ەستىگەندە، بۇل ولارعا ۇنادى+.
31 سوندا رۋبەن، عاد جانە ماناسا ۇرپاقتارىنا ٴدىني قىزمەتكەر ەلازار ۇلى پىنەحەس: «ەحوبانىڭ ارامىزدا ەكەنىنە بۇگىن كوزىمىز جەتتى. ويتكەنى ەحوباعا وپاسىزدىق جاساعان جوقسىڭدار. سەندەر بۇگىن يسرايلدىكتەردى ەحوبانىڭ جازاسىنان امان الىپ قالدىڭدار»،— دەدى.
32 ٴدىني قىزمەتكەر ەلازار ۇلى پىنەحەس پەن باسشىلار عالاقات جەرىندەگى رۋبەندىكتەر مەن عادتىقتاردان قاناحان جەرىندە قالعان يسرايلدىكتەرگە كەلىپ، بولعان جايتتى ايتىپ بەردى.
33 يسرايلدىكتەرگە ەستىگەندەرى ۇناپ، ولار قۇدايدى ماداقتادى، ٵرى رۋبەن جانە عاد رۋىمەن سوعىسىپ، جەرىن قاڭىراتىپ بوس قالدىرۋ جونىندە بۇدان بىلاي ٴسوز قوزعامايتىن بولدى.
34 ال رۋبەندىكتەر مەن عادتىقتار بولسا قۇرباندىق وشاعىنا ات قويدى*، سەبەبى ولار: «بۇل — ٴبارىمىز ٷشىن ەحوبانىڭ شىنايى قۇداي ەكەنىنىڭ كۋاسى»،— دەدى.
سىلتەمەلەر
^ ياعني يورداننىڭ شىعىسىنداعى.
^ ياعني باسقا قۇدايلاردان جوعارى تۇرعان قۇداي.
^ بەرىلگەن تۇسىندىرمەگە قاراعاندا، قۇرباندىق ورنىنا «كۋا» دەگەن ات قويىلسا كەرەك.
