ەفەستىكتەرگە 1:1—23
1 قۇدايدىڭ ەركى بويىنشا ٴماسىح يسانىڭ ەلشىسى بولعان پاۋىل ٴماسىح يسانىڭ ەفەستەگى قاسيەتتى دە ادال شاكىرتتەرىنە+ جازىپ وتىر.
2 قۇداي اكەمىز بەن يەمىز يسا ٴماسىح سەندەرگە راقىمى مەن تىنىشتىعىن سيلاسىن!
3 يەمىز يسا ٴماسىحتىڭ اكەسى — قۇداي ماداقتالسىن! ول ماسىحپەن بىرلىكتەگى بىزدەرگە كيەلى رۋحى ارقىلى كوكتە ٵر الۋان باتالار بەردى+.
4 سونداي-اق ٴبىزدى ٶزىنىڭ الدىندا قاسيەتتى دە تازا بولۋىمىز+ جانە سۇيىسپەنشىلىك كورسەتۋىمىز ٷشىن، ماسىحپەن بىرلىكتە بولسىن دەپ دۇنيەنىڭ نەگىزى قالانعاننان* بۇرىن تاڭداپ الدى.
5 ول ٶز قالاۋى مەن ەركىنە ساي+، يسا ٴماسىح ارقىلى ٴبىزدى ٶزىنىڭ بالالارى+ ەتۋگە الدىن الا بەلگىلەدى+.
6 بۇنى سۇيىكتى ۇلى+ ارقىلى بىزگە كورسەتكەن راقىمى+ ماداقتالۋ ٷشىن ىستەدى.
7 قۇدايدىڭ زور راقىمىنىڭ ارقاسىندا ۇلىنىڭ قانىمەن تولەنگەن قۇن ارقىلى ازات ەتىلۋىمىزگە+، ياعني كۇنالارىمىزدىڭ كەشىرىلۋىنە جول اشىلدى+.
8 قۇداي بىزگە راقىمىن مولىنان جاۋدىردى، زور دانالىق پەن تۇسىنىك تە بەردى
9 جانە ٶزىنىڭ ەركىنە قاتىستى قاسيەتتى قۇپيانى اشتى+. بۇل قۇپيانى قۇداي ٶز قالاۋىنا ساي جۇزەگە اسىرۋدى نيەت ەتتى.
10 ونىڭ نيەتى — بەلگىلەگەن ۋاقىتى اياقتالعاندا، ىستەردى باسقارۋ، ياعني كوك پەن جەردەگىلەردىڭ ٴبارىن ٴماسىحتىڭ قول استىنا جيناۋ+. ٴيا، ول ٴبارىن سونىڭ قول استىنا جينايدى.
11 بارلىعىن ٶز ەركىنە ساي جۇزەگە اسىراتىن قۇداي ٶز نيەتى بويىنشا ٴبىزدى الدىن الا تاڭداپ العاندىقتان، ماسىحپەن بىرلىكتەگى بىزدەر دە مۇراگەر بولىپ تاعايىندالدىق+.
12 ماسىحكە ٴبىرىنشى بولىپ ٷمىت ارتقان بىزدەر ارقىلى قۇداي ماداقتالىپ، داڭقتالۋ ٷشىن وسىلاي بولدى.
13 شىندىق ٴسوزىن، ياعني قۇتقارىلاتىندارىڭ تۋرالى ىزگى حاباردى، ەستىگەننەن كەيىن، سەندەر دە وعان ٷمىت ارتتىڭدار. وعان سەنگەن سوڭ، ۋادە ەتىلگەن كيەلى رۋحپەن ٴماسىح ارقىلى سەندەرگە ٴمور باسىلدى+.
14 كيەلى رۋح — مۇرانى الاتىنىمىزدىڭ كەپىلى+. ال ٴمور باسىلۋىنىڭ ماقساتى — قۇداي ماداقتالۋ ٷشىن مەنشىكتى حالقىنىڭ+ تولەم ارقىلى+ ازات ەتىلۋى.
15 سوندىقتان يەمىز يساعا دەگەن سەنىمدەرىڭ مەن بارلىق قاسيەتتىلەرگە كورسەتىپ جاتقان سۇيىسپەنشىلىكتەرىڭ جايلى ەستىگەندە، مەن دە
16 سەندەر ٷشىن ٵردايىم قۇدايعا العىس ايتامىن. دۇعا ەتكەن سايىن سەندەردى ەسكە الىپ،
17 يەمىز يسا ٴماسىحتىڭ قۇدايى ٵرى داڭقتى اكەمىز سەندەرگە دانالىق رۋحىن بەرسە ەكەن جانە ٶزى اشىپ وتىرعان تۋرا ٴبىلىمدى تۇسىنسەڭدەر ەكەن دەپ سۇرايمىن+.
18 سونداي-اق كوكىرەك كوزدەرىڭدى* اشقان ول سەندەردى قانداي ۇمىتكە شاقىرعانىن، قاسيەتتىلەرگە مۇرا+ رەتىندە قانداي زور بايلىق بەرەتىنىن
19 جانە ونىڭ قۇدىرەتتى كۇشىنىڭ بىزدەرگە، سەنۋشىلەرگە، قالاي اسەر ەتەتىنىن+ بىلسەڭدەر ەكەن دەپ سۇرايمىن. بۇل كۇشتىڭ قانشالىقتى زور ەكەنى قۇدايدىڭ ٶز قۇدىرەتىن قالاي قولدانعانىنان كورىنەدى.
20 ول وسى كۇشىمەن ٴماسىحتى ولىمنەن قايتا ٴتىرىلتىپ، كوكتە ٶزىنىڭ وڭ جاعىنا وتىرعىزدى+.
21 سوندىقتان ول قازىرگى عانا ەمەس، سونداي-اق كەلەشەك زامانداعى* كۇللى ۇكىمەت پەن بيلىكتەن، كۇشتەن، بيلەۋشىلەردەن جانە كۇللى ەسىم اتاۋلىدان الدەقايدا جوعارى+.
22 قۇداي ٴبارىن ٴماسىحتىڭ اياعىنىڭ استىنا سالىپ، وعان باعىندىردى+، ٵرى قاۋىمنىڭ يگىلىگى ٷشىن ٴبارىنىڭ باسى ەتىپ قويدى+.
23 قاۋىم — ٴماسىحتىڭ دەنەسى+. ٴبارىن بارلىق جاعىنان تولتىراتىن ٴماسىح قاۋىمدى دا تولتىرادى.
سىلتەمەلەر
^ بۇل ادام اتا مەن حاۋا انانىڭ بالالارى تۋىلعان كەزگە نۇسقايدى.
^ سوزبە-ٴسوز «جۇرەك كوزدەرىڭدى».
^ تۇسىندىرمەنى قاراڭىز.
