ەلشىلەردىڭ ىستەرى 12:1—25
12 سول ۋاقىتتارى يرود* پاتشا قاۋىمنىڭ كەيبىر مۇشەلەرىنە زورلىق-زومبىلىق كورسەتە باستادى+.
2 ول جوحاننىڭ اعاسى جاقىپتى+ سەمسەرمەن شاۋىپ ٶلتىرتتى+.
3 مۇنىسى ياھۋديلەرگە ۇناعانىن بايقاعان ول پەتىردى دە تۇتقىندادى. (بۇل اشىماعان نان مەيرامى* كۇندەرى ەدى+.)
4 پەتىردى ۇستاپ العان سوڭ، يرود ونى تۇرمەگە قاماتتى+ دا، ٵربىرى ٴتورت ساربازدان تۇراتىن ٴتورت توپقا كەزەكپەن كۇزەتتىرىپ قويدى. ٴسۇيتىپ، ونى قۇتقارىلۋ مەيرامىنان* كەيىن سوتتاۋ ٷشىن حالىق الدىنا شىعارماق بولدى.
5 پەتىر تۇرمەدە جاتقاندا، قاۋىم ول ٷشىن قۇدايعا جان-تانىمەن دۇعا ەتۋمەن بولدى+.
6 يرود پەتىردى حالىق الدىنا شىعارار الدىنداعى ٴتۇنى ول ەكى ساربازدىڭ ورتاسىندا ەكى شىنجىرمەن بۇعاۋلى كۇيدە ۇيىقتاپ جاتقان ەدى. تۇرمە اۋزىندا دا ساقشىلار تۇردى.
7 ٴبىر كەزدە ەحوبانىڭ پەرىشتەسى پايدا بولىپ+، قاپاستىڭ ٸشى جارقىراپ كەتتى. ول پەتىردى بۇيىرىنەن ٴتۇرتىپ وياتىپ: «تەزىرەك تۇر!»— دەدى. سوندا ونىڭ قولىنداعى شىنجىرلارى سىپىرىلىپ ٴتۇستى+.
8 پەرىشتە وعان: «كيىنىپ، ساندالىڭدى بايلا»،— دەدى. پەتىر ايتقانىن ىستەگەننەن كەيىن، پەرىشتە: «جامىلعىڭدى كيىپ، ماعان ەر»،— دەدى.
9 پەتىر قاپاستان شىعىپ، وعان ىلەستى. ٴبىراق پەرىشتەنىڭ ىستەگەنى وڭىندە بولىپ جاتقانىن بىلمەدى، ول ايان كورىپ تۇرمىن دەپ ويلاعان ەدى.
10 ەكەۋى ٴبىرىنشى كۇزەتتەن، سوسىن ەكىنشىسىنەن ٶتىپ، قالاعا شىعاتىن تەمىر قاقپاعا جاقىنداعاندا، قاقپا وزدىگىنەن اشىلىپ كەتتى. ەكەۋى سىرتقا شىعىپ، ٴبىر كوشەمەن ٴجۇرىپ بارا جاتقاندا، كەنەتتەن پەرىشتە ونى قالدىرىپ كەتتى.
11 پەتىر ەسىن جيىپ: «ەحوبا ٶز پەرىشتەسىن جىبەرىپ، مەنى يرودتىڭ قولىنان جانە ياھۋديلەر كۇتكەن بارلىق نارسەدەن قۇتقارعانىن+ ەندى شىنىمەن ٴتۇسىندىم»،— دەدى.
12 پەتىر وسىنى تۇسىنگەن سوڭ، جوحاننىڭ (ونى مارقا+ دەپ تە اتايتىن) اناسى ٴماريامنىڭ ۇيىنە باردى. سول جەردە ٴبىراز باۋىرلاس جينالىپ، دۇعا ەتىپ جاتقان ەدى.
13 پەتىر قاقپانى ۇرعاندا، رودا ەسىمدى قىزمەتشى قىز شىقتى.
14 رودا ونىڭ داۋسىن تانىپ، قۋانعاننان قاقپانى اشپاي ۇيگە جۇگىرىپ كىردى دە، پەتىردىڭ كەلىپ تۇرعانىن حابارلادى.
15 ۇيدەگىلەر بولسا: «ەسىڭنەن اداسقان شىعارسىڭ»،— دەدى. ٴبىراق ول مۇنىڭ راس ەكەنىن ايتىپ تۇرىپ الدى. سوندا ولار: «ەندەشە، بۇل — ونىڭ پەرىشتەسى»،— دەستى.
16 ال پەتىر قاقپانى ۇرىپ تۇرا بەردى. ولار قاقپانى اشتى دا، پەتىردى كورىپ قاتتى تاڭعالدى.
17 ول بولسا قولىمەن بەلگى بەرىپ، باۋىرلاستاردى تىنىشتاندىرعان سوڭ، ەحوبانىڭ تۇرمەدەن ٶزىن قالاي الىپ شىققانىن ەگجەي-تەگجەيلى بايانداپ بەردى. كەيىن: «بۇل جايتتى جاقىپقا+ جانە وزگە باۋىرلاستارعا جەتكىزىڭدەر»،— دەدى دە، باسقا جاققا جول تارتتى.
18 تاڭ اتا ساربازدار پەتىردىڭ قايدا كەتكەنىن بىلمەي، قاتتى دۇربەلەڭگە ٴتۇستى.
19 يرود ونى قانشا ىزدەستىرسە دە، تاپپاي قويدى. سودان ساقشىلاردى تەرگەدى دە، ولاردى الىپ كەتىپ، جازالاۋدى بۇيىردى+. سوسىن يرود ياھۋدەيادان كەسارياعا بارىپ، سوندا ٴبىراز ۋاقىت ايالدادى.
20 يرود تير مەن سيدون تۇرعىندارىنا اشۋلى ەدى. سوندىقتان ولار ٶزارا كەلىسىپ، يرودقا كەلدى. ٴسۇيتىپ، ونىڭ ٷي ىشىنە قارايتىن بلاستى وزدەرىنە كومەكتەسۋگە كوندىرگەن سوڭ، ولار پاتشادان تاتۋلاسۋدى ٶتىندى، ويتكەنى ەلدەرى پاتشانىڭ ەلىنەن ازىق-تۇلىك الىپ تۇراتىن.
21 بەلگىلەنگەن كۇنى يرود ۇستىنە پاتشا كيىمىن كيىپ، تورەلىك ورنىنا وتىرىپ، حالىققا ارناپ ٴسوز سويلەدى.
22 سوندا جينالعان جۇرت: «بۇل — ادامنىڭ ەمەس، قۇدايدىڭ داۋسى!»— دەپ ايقايلاي باستادى.
23 قۇدايعا تيەسىلى ماداقتى قابىل العانى ٷشىن ەحوبانىڭ پەرىشتەسى ونى سول ساتتە-اق اۋرۋعا شالدىقتىردى: ول قۇرتتارعا جەم بولىپ ٶلدى.
24 ال ەحوبانىڭ ٴسوزى ودان ٵرى تاراپ، سەنۋشىلەردىڭ سانى كوبەيە بەردى+.
25 يەرۋساليمدەگى جاردەممەن بايلانىستى ىستەرىن اياقتاعان سوڭ+، بارنابا+ مەن ساۋل مارقا دەپ تە اتالاتىن جوحاندى ەرتىپ+، كەيىن قايتتى.
