ەلشىلەردىڭ ىستەرى 19:1—41
19 اپوللوس+ قورىنتتا بولعاندا، پاۋىل ازيانىڭ تەڭىزدەن شالعاي جاتقان ايماقتارىن ارالاپ، ەفەسكە+ كەلدى. سوندا ٴبىراز شاكىرتتەردى تاۋىپ،
2 ولاردان: «يسانىڭ ٸزباسارى بولعاندا كيەلى رۋحتى قابىلدادىڭدار ما؟»+— دەپ سۇرادى. «ٴبىز كيەلى رۋح تۋرالى ەستىگەن ەمەسپىز»،— دەدى ولار.
3 سوندا پاۋىل: «قانداي شومىلدىرۋ راسىمىنەن وتكەن ەدىڭدەر؟»— دەپ سۇراعاندا، ولار: «جاقيانىڭ راسىمىنەن»،— دەپ جاۋاپ بەردى+.
4 پاۋىل بىلاي دەدى: «جاقيا حالىقتى وكىنۋدىڭ بەلگىسى رەتىندە شومىلدىرۋ راسىمىنەن وتكىزگەندە+، ولاردى وزىنەن كەيىن كەلە جاتقان كىسىگە+، ياعني يساعا، سەنۋگە شاقىردى».
5 مۇنى ەستىگەن شاكىرتتەر يەمىز يسانىڭ اتىنان شومىلدىرۋ راسىمىنەن ٶتتى.
6 پاۋىل ۇستەرىنە قولىن قويعاندا، ولار كيەلى رۋحقا كەنەلدى دە+، وزگە تىلدەردە سويلەدى، ٵرى پايعامبارلىق ەتە باستادى+.
7 سول جەردە باس-اياعى 12 ادام بولدى.
8 پاۋىل ٷش اي بويى ٴماجىلىسحاناعا بارىپ+، باتىلدىقپەن باياندامالار ايتىپ ٴجۇردى، ٵرى قۇداي پاتشالىعى تۋرالى بۇلتارتپاس دالەلدەر كەلتىرە وتىرىپ پىكىر الىستى+.
9 الايدا كەيبىرەۋلەر سەنگىلەرى كەلمەي قاسارىسىپ، جۇرت الدىندا وسى جولدى* قارالاي باستادى+. سوندا پاۋىل شاكىرتتەردى ەرتىپ، سول ارادان كەتىپ قالدى+. كەيىن ول كۇن سايىن تيراننىڭ ٴدارىسحاناسىندا باياندامالار ايتىپ ٴجۇردى.
10 بۇل ەكى جىلعا جالعاسىپ، ازيا* ايماعىندا تۇراتىنداردىڭ ٴبارى: ياھۋديلەر دە، گرەكتەر دە — يەمىزدىڭ ٴسوزىن ەستىدى.
11 قۇداي پاۋىل ارقىلى زور قۇدىرەتتى ىستەر جاسادى+.
12 ٴتىپتى ونىڭ الجاپقىشى مەن بەتورامالىن ناۋقاستارعا اپارعاندا+، ولار ايىعىپ كەتتى جانە جىندار بويلارىنان شىقتى+.
13 ەل ارالاپ، ادامداردان جىنداردى شىعارىپ جۇرگەن كەيبىر ياھۋديلەر دە يەمىز يسانىڭ اتىن قولدانباق بولىپ، بويىندا جىنى بارلارعا: «پاۋىل ۋاعىزداپ جۇرگەن يسانىڭ اتىنان بۇيىرامىن»+،— دەپ ايتىپ ٴجۇردى.
14 سكەۋا ەسىمدى ياھۋديلەردىڭ جوعارعى ٴدىني قىزمەتكەرىنىڭ جەتى ۇلى دا وسىلاي ەتەتىن.
15 ٴبىراق جىن ولارعا: «يسانى بىلەمىن+، پاۋىلدى دا تانيمىن+، ال سەندەر كىمسىڭدەر؟»— دەدى.
16 وسىنى ايتقان سوڭ، بويىندا جىنى بار ادام ولارعا قاراي اتىلىپ، بارلىعىن جەڭىپ شىقتى. جاراقاتتانعان ولار ۇيدەن جالاڭاش كۇيى قاشا جونەلدى.
17 بۇل جايت ەفەستەگى ياھۋديلەر مەن گرەكتەردىڭ بارلىعىنا ٴمالىم بولىپ، بويلارىن ۇرەي بيلەدى. ال يەمىز يسانىڭ ەسىمى ماداقتالا بەردى.
18 يسانىڭ ٸزباسارى بولعانداردىڭ كوبى كەلىپ، كۇناكار ەكەندەرىن اشىق مويىنداپ، جاساعان زۇلىمدىقتارىن ايتىپ جاتتى.
19 سونداي-اق سيقىرلىقپەن اينالىسقان كوپتەگەن ادامدار كىتاپتارىن اكەلىپ، جۇرتتىڭ كوزىنشە ورتەپ جىبەردى+. ولاردىڭ قۇنىن ەسەپتەگەندە، 50000 كۇمىس اقشا بولىپ شىقتى.
20 وسىلايشا ەحوبانىڭ ٴسوزى زور قارقىنمەن تاراپ، ىقپالى ارتا بەردى+.
21 وسى وقيعالاردان كەيىن پاۋىل ماكەدونيا+ مەن احايا ارقىلى ٶتىپ، يەرۋساليمگە بارۋدى ۇيعاردى+. «سوندا بولعان سوڭ، ريمگە دە بارۋىم كەرەك+»،— دەدى ول.
22 وزىنە قولعابىس ەتكەن تىموتە+ مەن ەراستى+ ماكەدونياعا جىبەرگەننەن كەيىن، پاۋىل ازيا ايماعىندا ٴبىراز ۋاقىتقا كىدىردى.
23 سول ۋاقىتتا وسى جولعا+ بايلانىستى ۇلكەن تولقۋ بولدى+.
24 دەمەتىر ەسىمدى كۇمىس زەرگەرى كۇمىستەن ارتەميدا ٴتاڭىرىنىڭ كىشكەنتاي عيباداتحانالارىن جاساپ، زەرگەرلەرگە كوپ كىرىس اكەلەتىن+.
25 ول زەرگەرلەردى جانە وسى ىسپەن اينالىساتىن وزگە دە ادامداردى جيناپ الىپ، بىلاي دەدى: «جىگىتتەر، وسى كاسىپتىڭ ارقاسىندا تابىس تاۋىپ جاتقانىمىزدى جاقسى بىلەسىڭدەر.
26 سونداي-اق پاۋىل دەگەن كىسىنىڭ ەفەستە+ عانا ەمەس، ازيا ايماعىنىڭ باسىم بولىگىندە قولدان جاسالعان قۇدايلاردىڭ شىن مانىندە قۇداي ەمەس ەكەنىن ايتىپ، كوپ ادامدى باسقا كوزقاراستى ۇستانۋعا يلاندىرعانىن دا كورىپ، ەستىدىڭدەر+.
27 ٴبىزدىڭ كاسىبىمىزدىڭ جاقساتىنا عانا قاۋىپ ٴتونىپ تۇرعان جوق، سونداي-اق قۇدىرەتتى ايەل ٴتاڭىر ارتەميدانىڭ عيباداتحاناسىنىڭ بەدەلى ٴتۇسىپ، ازيا مەن بۇكىل دۇنيەجۇزى قۇرمەت تۇتاتىن ۇلىلىعى دا اياقاستى بولماق».
28 بۇنى ەستىگەندەردىڭ بويىن اشۋ كەرنەپ: «ەفەستىكتەردىڭ ارتەميداسى قۇدىرەتتى!»— دەپ ايقايلاي باستادى.
29 سودان بۇكىل قالا دۇرلىگىپ، پاۋىلدىڭ ماكەدوندىق سەرىكتەرى گاي مەن ارىستارقتى+ سۇيرەپ، تەاترعا لاپ قويدى.
30 پاۋىل توبىر اراسىنا بارماق بولعاندا، شاكىرتتەر بۇعان جول بەرمەدى.
31 ٴتىپتى پاۋىلعا دوستىق سىڭاي تانىتقان كەيبىر ويىن-ساۋىق ۇيىمداستىرۋشىلار وعان حابار جىبەرىپ، تەاترعا بارىپ ٶمىرىن قاتەرگە تىكپەۋىن ٶتىندى.
32 ال جينالعانداردىڭ كەيبىرى ٴبىر نارسەنى ايتسا، وزگەسى باسقانى ايتىپ ايقايلاپ جاتتى. كوبىسى نە ٷشىن كەلگەندەرىن بىلمەي، ابىر-سابىر بولدى.
33 سودان ياھۋديلەر ەسكەندىردى توبىردىڭ ىشىنەن يتەرىپ العا شىعاردى. ال ەسكەندىر جۇرتقا ٴسوز سويلەمەك بولىپ، قولىمەن بەلگى بەردى.
34 الايدا ونىڭ ياھۋدي ەكەنىن بىلگەن جۇرت شامامەن ەكى ساعات بويى: «ەفەستىكتەردىڭ ارتەميداسى قۇدىرەتتى!»— دەپ ٴبارى بىرگە ايقايلاپ تۇردى.
35 اقىرىندا، قالا اكىمى توبىردى تىنىشتاندىرىپ، بىلاي دەدى: «ەفەستىكتەر، قۇدىرەتتى ارتەميدانىڭ عيباداتحاناسىن جانە كوكتەن تۇسكەن بەينەنى ساقتايتىن قالا ەفەس ەكەنىن كىم بىلمەيدى؟!
36 بۇعان ەش داۋ جوق بولعاندىقتان، سەندەردىڭ سابىر ساقتاپ، ەش اعاتتىق ىستەمەگەندەرىڭ دۇرىس.
37 ويتكەنى سەندەر اكەلگەن مىنا ادامدار عيباداتحانانى توناعان جوق، ايەل تاڭىرىمىزگە دە ٴتىل تيگىزبەدى.
38 ال ەگەر دەمەتىر+ مەن كۇمىس زەرگەرلەرىنىڭ ولارعا تاعار ايىبى بولسا، بۇل ٷشىن سوت جۇرگىزىلەتىن كۇندەر مەن ايماق امىرشىلەرى* بار. ارىز-شاعىمدارىن سوندا اپارسىن.
39 ال بۇدان باسقا ماسەلەلەرىڭ بولسا، ول زاڭدى جينالىستا شەشىلەدى.
40 بۇگىنگى وقيعا ٷشىن بىزگە كوتەرىلىس ۇيىمداستىردى دەگەن ايىپ تاعىلۋى مۇمكىن، ويتكەنى مۇنداي تارتىپسىزدىكتى تۇسىندىرەتىن ٴبىزدىڭ ەش سەبەبىمىز جوق».
41 قالا اكىمى وسىنى ايتتى دا، جينالعان جۇرتتى تاراتىپ جىبەردى.
سىلتەمەلەر
^ بۇل يسانىڭ ٸزباسارلارى ۇستانعان جولعا نۇسقايدى.
^ «ازيا» دەپ ريم يمپەرياسىنىڭ پروۆينسياسى جونىندە ايتىلىپ تۇر.
^ نەمەسە «پروكونسۋلدار». تۇسىندىرمەدەگى «پروكونسۋل» ٴسوزىن قاراڭىز.
