ەلشىلەردىڭ ىستەرى 21:1—40
21 ولارمەن قيماي قوشتاسىپ، تەڭىزگە شىقتىق. سودان تۋرا باعىت الىپ، كوسقا ٴجۇزىپ كەلدىك. كەلەسى كۇنى رودوسقا، ال ودان كەيىن پاتاراعا باردىق.
2 سوسىن فينيكياعا جۇرەتىن كەمەنى تاپتىق تا، سوعان وتىرىپ، ٴجۇزىپ كەتتىك.
3 كيپر ارالىن سول جاعىمىزدا قالدىرىپ، سيرياعا قاراي بەتتەدىك تە، تيرگە كەلىپ توقتادىق، سەبەبى كەمە سول قالادا جۇگىن ٴتۇسىرۋ كەرەك ەدى.
4 شاكىرتتەردى ىزدەپ تاپقان سوڭ، سوندا جەتى كۇنگە ايالدادىق. الايدا كيەلى رۋحتان حابار العان ولار پاۋىلدان يەرۋساليمگە اياق باسپاۋىن قايتا-قايتا ٶتىندى+.
5 ۋاقىتىمىز اياقتالعاننان كەيىن، قالادان كەتىپ، ساپارىمىزدى جالعاستىردىق. بارلىعى، ايەلدەر مەن بالالار دا، ٴبىزدى جاعاعا دەيىن شىعارىپ سالدى. سول جەردە تىزە بۇگىپ دۇعا ەتكەن سوڭ،
6 قوش ايتىسىپ، كەمەگە وتىردىق، ال ولار ۇيلەرىنە قايتىپ كەتتى.
7 تيردەن شىعىپ، پتولەمايعا ٴجۇزىپ كەلدىك. سول جەردە باۋىرلاستارمەن جۇزدەسىپ، ولارمەن ٴبىر كۇن بولدىق.
8 كەلەسى كۇنى جولعا شىعىپ، كەسارياعا كەلىپ توقتادىق. بۇرىنىراقتا تاڭدالعان جەتى كىسىنىڭ ٴبىرى بولعان+ ىزگى حاباردى جاريالاۋشى ٴفىلىپتىڭ ۇيىنە ٴتۇسىپ، سوندا قالدىق.
9 بۇل كىسىنىڭ تۇرمىس قۇرماعان ٴتورت قىزى دا پايعامبارلىق ەتەتىن+.
10 سول جاقتا جۇرگەنىمىزگە ٴبىراز كۇن بولعاندا، ياھۋدەيادان اگاب+ ەسىمدى ٴبىر پايعامبار كەلدى.
11 قاسىمىزعا جاقىنداعان ول پاۋىلدىڭ بەلبەۋىن الىپ، ٶزىنىڭ قول-اياعىن بايلادى دا: «كيەلى رۋح بىلاي دەيدى: —ياھۋديلەر وسى بەلبەۋدىڭ يەسىن يەرۋساليمدە ٴدال وسىلاي بايلاپ+، باسقا ۇلت ادامدارىنىڭ قولىنا ۇستاپ بەرەدى+»،— دەدى.
12 وسىنى ەستىگەن ٴبىز جانە سول جەردەگى باۋىرلاستار پاۋىلدان يەرۋساليمگە بارماۋىن وتىندىك.
13 سوندا پاۋىل: «بۇلارىڭ نە؟ نەگە جىلاپ، مەنى العان بەتىمنەن قايتارماقسىڭدار؟ مەن يەمىز يسانىڭ ەسىمى ٷشىن يەرۋساليمدە قول-اياعىمدى بايلاتپاق تۇگىل، ولۋگە دە دايىنمىن+»،— دەدى.
14 ونى كوندىرە الماعان سوڭ، ٴبىز تىنىشتالىپ: «ەحوبانىڭ قالاۋى بولسىن»،— دەدىك.
15 وسى كۇندەردەن كەيىن جولعا دايىندالىپ، يەرۋساليمگە قاراي بەت الدىق.
16 كەسارياداعى كەيبىر شاكىرتتەر بىزبەن بىرگە ٴجۇرىپ، العاشقى شاكىرتتەردىڭ ٴبىرى كيپرلىك مىناسون دەگەن كىسىنىڭ ۇيىنە الىپ بارماق بولدى. ٴبىز سونىڭ ۇيىندە توقتاۋىمىز كەرەك ەدى.
17 يەرۋساليمگە كەلگەندە، باۋىرلاستار ٴبىزدى قۇشاق جايا قارسى الدى.
18 ەرتەسىنە پاۋىلمەن بىرگە جاقىپقا+ باردىق. بارلىق اقساقالدار سول جەردە جينالىپ وتىر ەكەن.
19 ولارمەن امانداسقان سوڭ، پاۋىل ٶزىنىڭ قىزمەتى ارقىلى قۇدايدىڭ وزگە ۇلت ادامدارىنىڭ اراسىندا نە ىستەگەنىن ەگجەي-تەگجەيلى ايتىپ بەردى.
20 وسىنى ەستىگەن ولار قۇدايدى ماداقتادى. كەيىن پاۋىلعا بىلاي دەدى: «باۋىرىم، سەن مىڭداعان ٴياھۋديدىڭ يەمىزدىڭ ٸزباسارى بولعانىن بىلەسىڭ. ولاردىڭ بارلىعى مۇسا زاڭىن قاتاڭ ۇستانادى+.
21 ٴبىراق ولار سەن جايلى ٵر نارسە ەستىپ ٴجۇر. اتاپ ايتقاندا، سەن وزگە ۇلت ادامدارىنىڭ اراسىندا تۇراتىن ياھۋديلەردى بالالارىن سۇندەتتەمەۋگە، ادەت-عۇرىپتاردى ورىنداماۋعا جانە مۇسا زاڭىن ۇستانباۋعا ۇيرەتىپ ٴجۇر ەكەنسىڭ+.
22 ەندى قايتەمىز؟ ولار سەنىڭ كەلگەنىڭدى ٴبارىبىر ەستيدى.
23 ەندەشە، بىلاي ىستە: ارامىزدا انت بەرگەن ٴتورت كىسى بار،
24 سولاردى ەرتىپ الىپ، بىرگە تازارۋ ٴراسىمىن جاساڭدار. سونداي-اق شاشتارىن الدىرۋلارى ٷشىن شىعىندارىن تولە. سوندا ٴبارى سەن تۋرالى ەستىگەندەرى جالعان ەكەنىن، قايتا، مۇسا زاڭىن ۇستانىپ+، دۇرىس ٴجۇرىپ-تۇراتىنىڭدى بىلەتىن بولادى.
25 ال وزگە ۇلت ادامدارىنان شىققان سەنۋشىلەرگە كەلسەك، ٴبىز ولاردىڭ پۇتتارعا شالىنعان قۇرباندىقتاردان+، قاننان+، ارام ولگەن مالدىڭ ەتىنەن+ جانە ازعىندىقتان*+ اۋلاق بولۋلارى كەرەكتىگىن جازىپ، ٶز شەشىمىمىزدى بىلدىردىك».
26 ەرتەسىنە پاۋىل الگى كىسىلەردى ەرتىپ، سولارمەن بىرگە تازارۋ ٴراسىمىن جاسادى+. ٴسۇيتىپ، تازارۋ كۇندەرىنىڭ قاشان اياقتالاتىنىن جانە اربىرىنە ارناپ قاشان قۇرباندىق شالۋ كەرەكتىگىن حابارلاۋ ٷشىن عيباداتحاناعا باردى.
27 تازارۋ ٴراسىمىنىڭ جەتىنشى كۇنى اياقتالىپ قالعاندا، ازيا* ايماعىنان كەلگەن ياھۋديلەر پاۋىلدىڭ عيباداتحانادا جۇرگەنىن كورىپ، بۇكىل جۇرتتى دۇرلىكتىردى. ولار ونى ۇستاپ الىپ:
28 «يسرايلدىكتەر، كومەكتەسىڭدەر! مىنا ادام جۇرتتىڭ ٴبارىن حالقىمىزعا جانە زاڭىمىزعا قارسى ۇيرەتىپ ٴجۇر. ول ٴتىپتى گرەكتەردى عيباداتحاناعا الىپ كەلىپ، قاسيەتتى ورىندى ارامدادى+!»— دەپ ايقايلادى.
29 ويتكەنى ولار وسىنىڭ الدىندا پاۋىلدىڭ ەفەستىك تروفيممەن+ بىرگە قالادا جۇرگەنىن كورىپ، ەندى ونى عيباداتحاناعا الىپ كەلدى دەپ ويلاپ قالعان ەدى.
30 بۇكىل قالا تولقىپ، جۇرت جان-جاقتان جۇگىرىپ كەلدى. ولار پاۋىلدى ۇستاپ الىپ، عيباداتحانادان سۇيرەپ شىعاردى. سول زاماتتا ونىڭ قاقپالارى جابىلدى.
31 ولار پاۋىلدى ولتىرمەك بولعاندا، بۇكىل يەرۋساليمدە تولقۋ بولىپ جاتقانى جايلى حابار مىڭباسىنىڭ قۇلاعىنا جەتتى.
32 ول ساربازدارى مەن ٴجۇزباسىلارىن الىپ، سولارعا قاراي جۇگىردى. جينالعان توبىر ساربازدارىن ەرتكەن مىڭباسىن كورىپ، پاۋىلدى ۇرۋىن دوعاردى.
33 مىڭباسى قاستارىنا كەلىپ، پاۋىلدى تۇتقىنعا الدى دا، ونى ەكى شىنجىرمەن بۇعاۋلاپ تاستاۋدى بۇيىردى+. سوسىن جۇرتتان ونىڭ كىم ەكەنىن جانە نە ىستەگەنىن سۇراي باستادى.
34 الايدا بىرەۋلەرى انانى ايتسا، باسقالارى مىنانى ايتىپ ايقايلاپ جاتتى. وسىنداي ابىر-سابىردان ٴجوندى ەشتەڭە ۇعا الماعان مىڭباسى ونى ساربازداردىڭ جاتاقحاناسىنا الىپ بارۋدى بۇيىردى.
35 پاۋىل باسپالداققا شىعا بەرگەندە، اشۋلى توبىر قىسىم كورسەتە باستاعاندىقتان، ساربازدار ونى كوتەرىپ جۇرۋگە ٴماجبۇر بولدى.
36 قالىڭ جۇرت سوڭدارىنان قالماي: «ونى ولتىرىڭدەر!»— دەپ ايقايلاي بەردى.
37 ساربازداردىڭ جاتاقحاناسىنا كىرگىزەيىن دەپ جاتقاندا، پاۋىل مىڭباسىنا: «سىزگە ايتار ٴسوزىم بار»،— دەدى. سوندا ول: «سەن گرەكشە سويلەيسىڭ بە؟
38 دەمەك، سەن وسىدان ٴبىراز ۋاقىت بۇرىن كوتەرىلىس ۇيىمداستىرىپ، قانجار ۇستاعان 4000 ادامدى ايدالاعا الىپ كەتكەن مىسىرلىق ەمەسسىڭ عوي؟»— دەپ سۇرادى.
39 پاۋىل بولسا: «جوق، مەن ٴياھۋديمىن+، كيليكياداعى تارس دەگەن تانىمال قالانىڭ تۇرعىنىمىن+. ماعان حالىققا ارناپ ٴسوز سويلەۋگە رۇقسات ەتۋىڭىزدى وتىنەمىن»،— دەدى دە،
40 ونىڭ رۇقساتىن العان سوڭ، باسپالداقتا تۇرىپ، حالىققا قولىمەن بەلگى بەردى. جىم-جىرت تىنىشتىق ورناعاندا، پاۋىل ەۆرەي تىلىندە+ ٴسوزىن باستادى:
سىلتەمەلەر
^ گرەكشە «پورنيا». تۇسىندىرمەنى قاراڭىز.
^ «ازيا» دەپ ريم يمپەرياسىنىڭ پروۆينسياسى جونىندە ايتىلىپ تۇر.
