جاستاردىڭ ساۋالدارى
اتا-انامنىڭ سەنىمىنە يە بولۋ ٷشىن نە ىستەسەم بولادى؟
نەنى بىلگەنىڭ ٴجون؟
ساعان قانشالىقتى سەنىم ارتۋعا بولاتىنى قانشالىقتى سەنىمدى ادام ەكەنىڭە بايلانىستى. اتا-اناڭ ورناتقان تارتىپكە باعىنۋ نەسيەگە العان قارىزدى بانككە قايتارۋ سياقتى. ەگەر قارىزىڭدى ۋاقىتىلى تولەپ، سەنىمدى ادام ەكەنىڭدى كورسەتسەڭ، كوبىرەك «نەسيە»، ياعني ەركىندىك الا الاسىڭ. ال ەگەر سەنىم ارتۋعا تۇراتىن ادام بولماساڭ، اتا-اناڭ كوپ «نەسيە» بەرەدى دەپ كۇتپە.
سەنىمگە كىرۋ ٷشىن ۋاقىت قاجەت. اتا-اناڭ ساعان كوبىرەك بوستاندىق بەرسىن دەسەڭ، ٶزىڭنىڭ جاۋاپكەرشىلىكتى ادام ەكەنىڭدى كورسەت.
بولعان وقيعا: «جاسوسپىرىم كەزىمدە اتا-انام مەنەن نەنى تالاپ ەتەتىنىن جاقسى بىلسەم دە، ايتقاندارىن ىستەپ جۇرگەندەي سىڭاي تانىتىپ، جاسىرىن تۇردە ٶز بىلگەنىمدى ىستەپ ٴجۇردىم. اقىرىندا، اتا-انام ماعان سەنۋدەن قالدى. ۋاقىت وتە بۇلاي الىسقا بارمايتىنىمدى ٴتۇسىندىم. الداۋمەن كوبىرەك ەركىندىككە يە بولۋ مۇمكىن ەمەس ەكەن. سەنىمگە كىرگىڭ كەلسە، سەنىمدى ادام بولۋىڭ قاجەت» (كرەيگ).
بىلاي ىستەپ كور
قانشا قيىن بولسا دا، شىندىقتى ايت. راس، بارلىق ادام قاتەلىك جاسايدى. الايدا وتىرىك ايتىپ قاتەلىگىڭدى جاسىرساڭ، يا بولماسا كەيبىر جايتتاردى بۇگىپ، جارتىلاي شىندىقتى ايتساڭ، اتا-اناڭنىڭ سەنىمىنەن مۇلدەم ايىرىلىپ قالاسىڭ. ال ەگەر ٴبارىن قالاي بار، سولاي ايتۋدى ۇيرەنسەڭ، اتا-اناڭ قاتەلىگىڭدى مويىنداعانىڭا قاراپ، ەسەيگەنىڭدى كورەدى. سەنۋگە تۇرارلىق ادام وسىنداي بولادى.
«سەنىمنەن ايىراتىن نارسە — قاتەلىك جاساۋ ەمەس، ونى جاسىرىپ قالۋ» (اننا).
كيەلى كىتاپتا بىلاي دەلىنگەن: «بارلىق جاعدايدا ادال ٴجۇرىپ-تۇرعىمىز كەلەدى» (ەۆرەيلەرگە 13:18).
مىنا جايلى ويلانىپ كور: اتا-اناڭ قايدا بارا جاتقانىڭدى، نە ىستەيتىنىڭدى سۇراسا، ولارعا بار شىندىقتى ايتاسىڭ با؟ يا بولماسا قايدا بارعانىڭدى، نە ىستەگەنىڭدى سۇراعاندا، كەيبىر جايتتاردى بۇگىپ قالاسىڭ با؟
جاۋاپكەرشىلىكتى ادام بول. ۇيدەگى تارتىپكە باعىن. كۇندەلىكتى ٷي تىرلىكتەرىن بىردەن جاساپ تاستاۋعا تىرىس. وزىڭە تاپسىرىلعان ىستەردى ۋاقىتىلى اتقار. مەكتەپتە بەرىلگەن ٷي تاپسىرمالارىن ورىنداپ ٴجۇر. ۇيگە بەلگىلەنگەن ۋاقىتتا قايت.
«اتا-اناڭ دوستارىڭمەن كوڭىل كوتەرۋگە رۇقسات بەرىپ، كەشكى توعىزدا ۇيدە بولۋدى ايتسا، ساعات ون جارىمعا دەيىن ٴجۇرىپ الما. ايتپەسە كەلەسى جولى ولاردىڭ سەنى جىبەرۋى ەكىتالاي» (رايان).
كيەلى كىتاپتا بىلاي دەلىنگەن: «اركىمنىڭ جاۋاپكەرشىلىگى ٶز موينىندا» (عالاتتىقتارعا 6:5، سىلتەمە).
مىنا جايلى ويلانىپ كور: سەن بەلگىلەنگەن ۋاقىتتا ۇيگە كەلۋگە، وزىڭە ونشا ۇنامايتىن ۇيدەگى قانداي دا ٴبىر تارتىپكە باعىنۋعا، ٷي تىرلىكتەرىن اتقارۋعا قانشالىقتى تىرىسىپ ٴجۇرسىڭ؟
شىدامدى بول. اتا-اناڭنىڭ سەنىمىن جوعالتىپ العان بولساڭ، ولاردىڭ سەنىمىن قايتا جاۋلاۋ ٷشىن ۋاقىت قاجەت. شىداممەن كۇتۋگە دايىن بول.
«بەلگىلى ٴبىر جاسقا جەتكەنىمدە اتا-انامنىڭ ماعان كوبىرەك ىستەر سەنىپ تاپسىرماعانىن كورىپ، قاتتى كوڭىلىم ٴتۇستى. جاسىڭا جاس قوسىلعانى ەسەيۋدى بىلدىرمەيدى ەكەن. مەن اتا-انامنان سەنىمدى ادام ەكەنىمدى دالەلدەۋگە مۇمكىندىك بەرۋىن سۇرادىم. بۇعان اجەپتاۋىر ۋاقىت قاجەت بولدى، ٴبىراق مەن كوزدەگەن ماقساتىما جەتتىم. مەنىڭ تۇسىنگەنىم، سەنىمگە يە بولۋ ٷشىن قانشا جاستا بولعانىڭ ەمەس، نە ىستەيتىنىڭ ماڭىزدى ەكەن» (رەيچەل).
كيەلى كىتاپتا بىلاي دەلىنگەن: «بارلىق جاعىنان يگى ىستەرىڭمەن ۇلگى كورسەت» (تيتكە 2:7).
مىنا جايلى ويلانىپ كور: اتا-اناڭنىڭ سەنىمىنە كىرۋ ٷشىن نەمەسە سەنىمىنە قايتا يە بولۋ ٷشىن قانداي «يگى ىستەر» جاساي الاسىڭ؟
كەڭەس: ٴبارىن ٶز ۋاقىتىندا ىستەۋ، ٷي تىرلىكتەرىن اتقارۋ، ۇيگە ۋاقىتىلى قايتۋ سياقتى جايتتارعا قاتىستى ماقساتتار قوي. اتا-اناڭا نە ىستەۋگە بەل بۋعانىڭدى ايت. ولاردان سەنىمدەرىنە يە بولۋ ٷشىن نە ىستەگەنىڭدى قالايتىنىن سۇراپ كور. سونداي-اق كيەلى كىتاپتاعى: «بۇرىنعى ٶمىر سالتتارىڭا ٴتان... ەسكى بولمىستارىڭنان ارىلىڭدار»،— دەگەن كەڭەسكە ساي ارەكەت ەتۋگە بارىنشا تىرىس (ەفەستىكتەرگە 4:22). سوندا ۋاقىت وتە اتا-اناڭ جاقسى جاققا وزگەرىپ جاتقانىڭدى كورەتىن بولادى.
قىزىقتى بولار مالىمەتتەر
فلوماستەرلىك انيماسيا
كوبىرەك ەركىندىك الۋ ٷشىن نە ىستەسەم بولادى؟
مەن ەندى ەرەسەك بولدىم دەپ ويلايتىن شىعارسىڭ، ٴبىراق اتا-اناڭ بۇنىمەن كەلىسە مە؟ ولاردىڭ سەنىمىنە كىرۋ ٷشىن قانداي قادامدار جاساساڭ بولادى؟
جاستاردىڭ ساۋالدارى
ۇيدە ەرەجەلەر ورناتۋدىڭ نە قاجەتى بار؟
اتا-اناڭ ورناتقان ەرەجەلەرگە كوڭىلىڭ تولماي ٴجۇر مە؟ بۇل ماقالا دۇرىس كوزقاراس ساقتاۋعا كومەكتەسەدى.
