ەحوبا كۋاگەرلەرى تابيعي اپاتتان زارداپ شەككەندەرگە كومەكتەسە مە؟
ٴيا، ەحوبا كۋاگەرلەرى تابيعي اپاتتىڭ قۇرباندارىنا ٴجيى قول ۇشىن بەرەدى. ٴبىز ەحوبا كۋاگەرلەرىنە دە، كۋاگەر ەمەستەرگە دە كومەكتەسەمىز. وسىلاي كيەلى جازباداعى «مۇمكىندىك باردا بارىنە، اسىرەسە سەنىمى ٴبىر باۋىرلاستارعا، جاقسىلىق جاساي بەرەيىك» دەگەن نۇسقاۋعا ساي ارەكەت ەتەمىز. سونداي-اق اپاتتان زارداپ شەككەندەر اسىرەسە ەموسيونالدىق جانە رۋحاني كومەكتى قاجەت ەتەتىندىكتەن، وسى جاعىنان دا قول ۇشىن بەرۋگە تىرىسامىز (قورىنتتىقتارعا 2-حات 1:3، 4).
كومەكتى ۇيىمداستىرۋ
تابيعي اپاتتان سوڭ، جەرگىلىكتى قاۋىمداعى جاۋاپتى ەر كىسىلەر (اقساقالدار) ٶز قاۋىم مۇشەلەرىمەن بايلانىسىپ، ولاردىڭ امان-ەسەندىگىن جانە قانداي كومەككە ٴزارۋ ەكەنىن انىقتايدى. سوسىن ولار جيناعان مالىمەتتەرىن جانە العاشىندا قانداي كومەك كورسەتىلگەنىن ەحوبا كۋاگەرلەرىنىڭ جەرگىلىكتى فيليالىنا حابارلايدى.
ەگەر جەرگىلىكتى قاۋىمداردىڭ قاجەتتى كومەكتى كورسەتۋگە شامالارى كەلمەي جاتسا، ەحوبا كۋاگەرلەرىنىڭ باسقارۋشى كەڭەسى ولارعا جاردەمدەسەدى. وسىلاي ولار اشتىق كەزىندە ٴبىر-بىرىنە قول ۇشىن بەرگەن قۇدايدىڭ ەرتەدەگى قىزمەتشىلەرىنە ەلىكتەيدى (قورىنتتىقتارعا 1-حات 16:1—4). كومەك بەرۋ ٸسىن ۇيىمداستىرۋ جانە باسقارۋ ٷشىن، جەرگىلىكتى فيليال كومەك كورسەتۋ كوميتەتتەرىن قۇرادى. باسقا اۋماقتاعى كۋاگەرلەر دە جاردەم بەرۋ ٷشىن، ٶز ەرىكتەرىمەن ۋاقىتتارىن جانە قارجى-قاراجاتىن بولەدى (ناقىل سوزدەر 17:17).
قارجى
ەحوبا كۋاگەرلەرىنىڭ فيليالدارىنا جىبەرىلەتىن ساداقالاردى پايدالانۋدىڭ ٴبىر جولى — تابيعي اپاتتان زارداپ شەككەندەرگە كومەكتەسۋ (ەلشىلەردىڭ ىستەرى 11:27—30؛ قورىنتتىقتارعا 2-حات 8:13—15). كومەك ٸسىن ەرىكتى قىزمەتشىلەر تەگىن اتقاراتىندىقتان، بولىنگەن قارجى ادمينيستراسيالىق شىعىندارعا ەمەس، قاجەتتى كومەككە عانا كەتەدى. ٴبىز بارلىق ساداقالارعا مەيلىنشە ىقتياتپىز (قورىنتتىقتارعا 2-حات 8:20).
قوسىمشا قاراڭىز
ٴبىز جونىندە
ەحوبا كۋاگەرلەرىنىڭ كەلۋىن ٶتىنۋ
كيەلى كىتاپقا قاتىستى سۇراقتارىڭىزدىڭ جاۋابىن الىڭىز نەمەسە ەحوبا كۋاگەرلەرى جايلى كوبىرەك ٴبىلىڭىز.