2023 жылдың 20 мамырында Басқарушы кеңестің мүшесі Марк Сандерсон бауырлас Нунавуттың (Канада) Икалуит қаласында Патшалық сарайын бағыштау баяндамасын айтты. Бұл кездесуге 44 адам жүзбе-жүз, ал 388 адам бейнеконференция арқылы қатысты. Нунавут жер бетіндегі халқы ең аз шоғырланған елді мекендердің бірі болып саналады, 1 837 000 км² жерді 40 000-нан да аз адам мекендейді. jw.org сайтымызда айтылғандай, Патшалық сарайын соғу үшін бауырластарымыз көптеген қиындықтарға кезіккен еді. Осы алыс аумаққа алғаш келген жанкешті Куәгерлер суық ауа райына да, жер бедерінің ерекшеліктеріне де қарамастан жергілікті тұрғындарға ізгі хабарды жеткізді. Бағышталу бағдарламасында сол бауырластардың жанқиярлықтары мен табандылықтарына ерекше назар аударылды.

1976 жылы Маргарет Галли бауырлас қазір Нунавут деп аталатын мекенге 2052 шақырым қашықтықта жатқан Монреальдан (Квебек) көшіп келеді. Ол үлкен, құнарсыз осы аумаққа уағыздау үшін келген бірінші Куәгер еді. Сол жылы аудандық бақылаушы болып қызмет етіп жүрген Ханс Пинтер бауырлас әйелі Минервамен бірге Маргарет бауырласты жігерлендіру үшін, онымен қызметтесу үшін Нунавутқа бір аптаға арнайы сапармен келеді.

1983 жылы бір топ құлшынысты Куәгер Икалуитке келеді. Олардың жабыла атқарған қызметтерінің арқасында жергілікті тұрғындар арасынан бір отбасы шомылдыру рәсімінен өтеді. Келесі 20 жыл бойы Патшалықтың құлшынысты жариялаушылары ізгі хабарды уағыздау үшін осы алыс аумаққа келіп жүреді. Нәтижесінде 2008 жылы Икалуитте топ құрылады. 2010 жылы осы шағын топ қауым болып, кездесулерін мектептің спортзалында өткізіп жүреді. Ал 2022 жылдың қазан айында Патшалық сарайы соғылып біткенде, бауырластардың қуанышында шек болмады.

Арнайы ізашарлар мен басқа да жариялаушылар Икалуиттен бөлек, Нунавуттың басқа да шалғай аумақтарында уағыздады. Олардың арасында Джоэл Террьен мен әйелі Шерил болды. Олар Икалуиттен батысқа қарай 1329 шақырым жерде орналасқан Бейкер Лейкке көшіп барады. Джоэл бауырлас былай дейді: “Суық ауа райына, аумақтың алыстығы мен кеткен шығындарға қарамастан осы жаққа көшіп келгеніміз сол құрбандықтарға татыды. Бейкер Лейктің тұрғындары бізді жылы қарсы алғанда, Ехобаның бізге жар екенін анық сездік. Осы жақтың адамдарына Киелі кітаптағы хабарды жеткізуге мүмкіндік болғанына өте ризамыз”.

Бейкер Лейкте тұратын Джозеф Утатнак деген кісі Патшалық жайлы ізгі хабарға қызығушылық танытады. Кейін ол Джоэл бауырласпен Киелі кітапты зерттеп, 2021 жылы шомылдыру рәсімінен өтеді. Қазір Джозеф бауырлас Бейкер Лейктегі жалғыз Куәгер. Ол Патшалық сарайының бағышталу бағдарламасы 2023 жылдың мамыр айында Икалуит қаласында өтетінін білгенде, бағдарламаға қатысу үшін барын салады. Сол бағдарламада Джозеф бауырлас шомылдыру рәсімінен өткелі бері бауырластарымен Патшалық сарайында алғаш рет көріседі. Ол былай деді: “Патшалық сарайын көргенде таңғалып қалдым. Құрылысқа атсалысқан бауырластардың көбісі басқа жақтан келген, бұл жердің ауа райына үйренбеген. Бірақ олар Ехобаны және адамдарды қатты жақсы көргендіктен, осы жаққа келуге дайын болды”.

Қазіргі таңда солтүстік аумақтардағы 178 бауырласымыз 4 қауымда қызмет етеді. Олардың біреуі Нунавутта, екеуі Солтүстік-батыс аймақтарда, тағы біреуі Юконда орналасқан. Бұл аумақтар Канаданың территориясының шамамен 40 пайызын алып жатыр. Канаданың солтүстігінде жатқан шалғай аймақтардың ауасы ызғарлы, жету қиын болғандықтан, ол жақтың адамдарына бару оңай бола бермейді. Соған қарамастан сол адамдарға құлшыныспен ізгі хабарды айтып жүрген бауырластарымыздың ерен еңбегін бағалаймыз (Елшілердің істері 1:8).