• Ата-анаңның қайсысымен жиі ұрсысып қаласың?

  • Әке

  • Ана

• Қаншалықты жиі ұрсысасыңдар?

  • Өте сирек

  • Анда-санда

  • Жиі

• Келіспеушілікті тез шешесіңдер ме?

  • Иә, тез шешіп, татуласып кетеміз

  • Иә, бірақ ол үшін әбден айқайласып аламыз

  • Жоқ, айқайлассақ та, бір келісімге келмейміз

Ата-анаңмен тіл табысу мүмкін еместей болып көрінсе, олар жағдайды түзету үшін бір нәрсе істеу керек деп ойлайтын шығарсың. Алайда келіспеушіліктің болуына я оның дау-дамайға ұласуына жол бермеу үшін сенің не істей алатыныңды қарастырып көрейік. Алдымен, мынаны біліп алайық...

• Ойлау қабілеті. Өсе келе сен балаша ойлауды қойып, тереңірек ойлана бастайсың. Сонымен қатар өзіңнің қандай да бір көзқарастарың қалыптаса бастайды, ал солардың кейбірі ата-анаңдікіне қайшы келуі мүмкін. Бірақ Киелі кітапта: “Әке-шешеңді құрметте”,— деген кеңес жазылған (Мұсаның 2-жазбасы 20:12).

  Өмір шындығы: Дауласпай-ақ өз пікіріңді білдіру — ақыл-парасатты қажет ететін нағыз өнер.

• Еркіндік. Өсе келе ата-анаң саған көбірек еркіндік беретін шығар. Бірақ берілген еркіндікті азсынсаң не оған қалаған уақытта қол жеткізбесең, міне, сол кезде араларыңда қиындық туындауы мүмкін. Алайда Киелі кітапта: “Ата-аналарыңа мойынсұныңдар”,— деген кеңес жазылған (Ефестіктерге 6:1).

  Өмір шындығы: Ата-анаң саған қанша еркіндік беретіні көбіне қазіргі еркіндігіңді қалай пайдаланатыныңа байланысты.

• Өз тарапыңнан күш сал. Туындаған түсініспеушілік үшін бар кінәні ата-анаңа артқанша, татуласу үшін өзіңнің не істей алатының жайлы ойланып көр. Джеффри есімді жас жігіт бұған қатысты былай дейді: “Кейде ата-анаңның не дегені емес, сенің мұны қалай қабылдағаның жағдайды ушықтырып жіберуі мүмкін. Мұндайда сабырлықпен сөйлесең, келіспеушіліктің тігісін жатқызып жібересің”.

  Киелі кітап кеңесі: “Қолдарыңнан келгенше, барлық адамдармен тату болыңдар” (Римдіктерге 12:18).

• Тыңдай біл. “Бұл мен үшін қиынның қиыны”,— деп бөліседі 17 жасар Саманта. Ол сөзін былай деп жалғады: “Бірақ бір байқағаным — ата-анаңды тыңдасаң, олар да сені тыңдауға дайын болады”.

  Киелі кітап кеңесі: “Тыңдауға жүйрік, сөйлеуге... баяу бол” (Жақып 1:19).

• Бір командада болыңдар. Келіспеушілікке спорт тұрғысынан қарап көр. Мысалы, теннис ойынын алайық. Тордың арғы жағындағы қарсыласың ата-анаң емес, туындаған мәселе болсын. Адам есімді жігіт былай дейді: “Түсініспеушілік туындағанда, ата-ана да, бала да негізінен бір мақсатты көздейді: бала өзінің қамын ойлайды, ата-ана да баласына жақсы болса екен дейді”.

  Киелі кітап кеңесі: “Өзара тату болуға... ықпал ететіннің бәрін істейік” (Римдіктерге 14:19).

• Түсінікпен қара. “Ата-аналардың өз қиындықтары бар. Оларға да жиі дәл біздікіндей үлкен қиындықтарды шешуге тура келеді. Осыны есімде ұстағаным көп көмектеседі”,— дейді Сара деген жасөспірім қыз. Ал Карла деген қыз былай дейді: “Мен кейде өзімді әке-шешемнің орнына қойып көремін. “Өзімнің балам болып, тура осындай жағдайға кезіксем, не істер едім? Балам үшін ең дұрысы не болар еді?” деп ойланамын”.

  Киелі кітап кеңесі: “Тек өз мүдделеріңді емес, басқалардың да мүддесін ойлаңдар” (Філіпіліктерге 2:4).

• Тілалғыш бол. Негізінен, Киелі кітаптың талабы сол (Қолостықтарға 3:20). Тілалғыш болсаң, жағдайыңды әлдеқайда жеңілдетесің. “Ата-анамның айтқанын тыңдасам, стресс те аз болады. Олар мен үшін талай құрбандыққа барды, сондықтан сол жақсылықтарын ең болмағанда осылай қайтарғым келеді”,— дейді Карэн есімді қыз. Рас, ата-анаңның тілін алсаң, келіспеушіліктің алдын аласың.

  Киелі кітап кеңесі: “Отын жоқ жерде от өшер” (Нақыл сөздер 26:20).

Көмек. Ата-анаңмен әңгімелесу қиындау болып жатса, айтқың келген сөзіңді қағаз бетіне түсір немесе хабарлама жазып жібер. Алиса есімді жасөспірім қыз былай деп бөлісті: “Көңіл-күйім жоқ болып тұрған кездерде, мен осылай істеймін. Сонда айқайлап жібермеймін және артынан өкінетіндей ештеңе айтып қоймаймын”.