Әр отбасының өз ережесі болады. Мысалы, балалары қай уақытта үйде болу керек, электронды құрылғыларды қалай қолдану керек және өздерін қалай ұстау керек дегендей.

 Сол ережелердің бірін бұзып қойсаң, не болмақ? Енді өткенді өзгерте алмайсың. Жағдай ары қарай ушығып кетпеу үшін не істей алам дейсің бе? Кел, көрейік.

•  Былай істемегенің дұрыс

•  Одан да былай істе

•  Құрдастарың не дейді?

•   Ата-анаң ережені бұзғаныңды әлі білмеген болса, артыңды жабуға барынша тырысатын шығарсың.

•   Ал егер біліп қойса, ақталып не кінәні басқа біреуге жаба салғың келетін шығар.

 Бұндай айла-амал ешқандай жақсылыққа алып келмес. Неге дейсің ғой? Өйткені болған жайтты жасыру не сылтау іздеу — нағыз балалық. Бұл әрекетіңмен ата-анаңа әлі өз ісіңе жауап бере алмайтыныңды көрсетесің.

 “Өтірік айтып ұзаққа бара алмайсың. Түбінде шындық бәрібір ашылады. Сол кезде “Әттең, басында айтқанымда ғой, ата-анам мені осылай қатты жазаламас еді” деп өкінуің мүмкін” (Диана).

•   Қатеңді мойында. “Күнәларын жасырған өркендемес” (Нақыл сөздер 28:13). Ата-анаң сенен ережелердің бәрін бұлжытпай орындайды деп күтпейді. Бірақ сенен шыншыл болады деп күтеді.

   “Шындықты ашып айтатын болсаң, ата-анаң саған анағұрлым кешіріммен қарайды. Істеген ісіңді жасырмайтын болсаң, сенің шыншыл екеніңе ата-анаңның көзі жете түседі” (Оливия).

•   Кешірім сұра. “Кішіпейіл болыңдар” (Петірдің 1-хаты 5:5). Кішіпейіл болсаң, әр нәрсені айтып ақталмай, кешірім сұрау жеңіл болады.

   “Істегенін мойындамай, жалтара беретін адам бірте-бірте өзін кінәлі сезінуден қалады. Түбінде ол бұрыс нәрселерді істеуден еш ұялмайтын болады” (Хезер).

•   Ісіңе жауап бер. Киелі кітапта: “Тәлім-тәрбие ал”,— делінген (Нақыл сөздер 8:33). Бұлқан-талқан болмай, ата-анаң қандай жаза қолданса да, оны қабылдай біл.

   “Ата-анаңның жазасына қарсы шыға беретін болсаң, жағдайың нашарлай түседі. Сондықтан өзіңе қойылған шектеулер жайлы тым көп ойлай бермей, түзетуді қабылда” (Джейсон).

•   Қайтадан сенімге кіруге тырыс. Киелі кітапта: “Бұрынғы өмір салттарыңа тән... ескі болмыстарыңнан арылыңдар”,— делінген (Ефестіктерге 4:22). Енді дұрыс жүріп-тұруға қатысты жаңа әдет қалыптастыр.

   “Әрдайым дұрыс шешім қабылдау арқылы ата-анаңа бір жасаған қателігіңді қайталағың келмейтінін дәлелдесең, түбінде олардың сеніміне қайтадан ие боласың” (Карен).

 КЕҢЕС: Өзіңнен талап етілген нәрселерден де артық істесең, саған сенім артуға болатынын көрсетесің. Мысалы, келесі жолы үйіңе қайтып бара жатқанда кешікпесең де, ата-анаңа келе жатқаныңды айтып қойсаң болады. Осылайша қайтадан олардың сеніміне ие болғың келетінін көрсетесің.