Иса Иеміздің кешкі асын енгізген кезде қасында 70 шәкіртінің болмағанына қарап, олар Исаның ықыласынан айырылып қалды не оны тастап кетті деп ойламауымыз керек. Иса жай ғана осы кешті өзінің елшілерімен өткізгісі келген.

12 елші де, 70 шәкірт те Исаның ізбасарлары болған. Алдымен, Иса шәкірттерінің ішінен он екісін таңдап, оларды “елшілер” деп атаған (Лұқа 6:12—16). Иса Ғалилеяда болғанда “12 елшісін шақырып алып,.. оларды Құдай Патшалығы туралы уағыздауға, ауруларды сауықтыруға жіберді” (Лұқа 9:1—6). Ал кейінірек Яһудеяда жүргенде, Иса “70 шәкіртін таңдап алып, оларды... екі-екіден жіберді” (Лұқа 9:51; 10:1). Демек, әртүрлі жерлерде Исаның ізгі хабарды уағыздайтын шәкірттері болған.

Исаның шәкірттері болған яһудилер, өз отбасыларымен бірге болса керек, әлі де жыл сайын Құтқарылу мейрамын тойлайтын (Мұс. 2-ж. 12:6—11, 17—20). Өлетін уақыты таяғанда, Иса осы мейрамды атап өту үшін елшілерімен бірге Иерусалимге келді. Бірақ ол Яһудеядағы, Ғалилеядағы, Переядағы барлық шәкірттерін шақырып жатпады. Иса бұл ерекше кешті тек елшілерімен ғана өткізгісі келген болса керек. Ол елшілеріне былай деген: “Азап шегерімнің алдында осы Құтқарылу мейрамының асын сендермен жеуді қатты қалаған едім” (Лұқа 22:15).

Исаның бұл қалауы өте орынды еді. Өйткені ол “дүниені күнәдан арылтатын Құдайдың Тоқтысы” ретінде жанын құрбан еткелі жатыр еді (Жох. 1:29). Құдайға арналған құрбандықтардың бәрі Иерусалимде шалынғандықтан, ол да осы қалада өлмек-тін. Исраилдіктер Мысырдан азат болған түні жеген тоқтымен салыстырғанда, Исаның өлімі анағұрлым ұлы бостандыққа жеткізбек еді (Қор. 1-х. 5:7, 8). Исаның өлімінен кейін 12 елші мәсіхшілер қауымының іргетасы болмақ еді (Ефес. 2:20—22). Көңіл бұратын жайт, киелі қала Иерусалимнің “12 іргетасы бар, әрі оларға Тоқтының 12 елшісінің 12 есімі жазылған” (Аян 21:10—14). Бұдан көретініміздей, бұл адал елшілер Құдай ниетінің орындалуында маңызды рөл атқармақ еді. Сондықтан Исаның ең соңғы Құтқарылу мейрамын, кейін артынша атап өткен Иеміздің кешкі асын неге 12 елшісімен атап өткісі келгені түсінікті-ақ.

Бұл маңызды кеште 70 шәкірт те, Исаның басқа шәкірттері де болған жоқ. Бірақ адал болып қалса, Иса енгізген Иеміздің кешкі асының игілігін олар да көрмек еді. Алдағы уақытта да майланған мәсіхшілердің бәрі Иса сол түні елшілермен жасасқан келісімге қосылмақ еді (Лұқа 22:29, 30).