БІЗ кімдерден ажырамай жүреміз? ~ * Бізге қымбат, жақын адамдардан еш ажырағымыз келмейді ғой. Киелі жазбаларда бір адамның шынайы Құдай “Ехобадан еш ажырамағаны” айтылған. Ол адамның аты — Езекия. Ол бізге қандай үлгі қалдырды?

Езекияның балалық шағы қиын болды. Оның әкесі Яһуда патшасы Ахаз Ехобаға қызмет етпеді. Ахаз жалған құдайларға құлшылық етті. Ол кезде Езекия әлі бала еді. Әкесі кем дегенде бір ұлын, яғни Езекияның туған бауырларының бірін өлтіріп, жалған құдайдың құрметіне құрбандыққа шалды!

Әкесі Ахаз жаман істер жасаса да, Езекия Ехобаға мойынсұна берді. Қалай ойлайсың, бұл қиын болды ма? ~ Оған қиын болған болса керек. Бірақ Езекия еш берілмеді! Оған Ехобадан ажырамауға не көмектескенін және бізге не көмектесетінін білейік.

Езекия Ехобадан ажырамаған адамдар туралы білуге тырысты. Мысалы, Дәуіт туралы. Дәуіт өзінен жүздеген жыл бұрын өмір сүрсе де, Езекия ол туралы Жазбалардан оқи алды. Дәуіт: “Тіпті туған әке-шешем тастап кетсе де, Ехоба мені қабылдайды”,— деп жазған.

Ехобаның тілін алуға Дәуітке не көмектескенін байқадың ба? ~ Оның Ехобаға деген сенімі. Тілалғыш болса, Ехоба оны қолдайтынына Дәуіт сенімді болды. Ол еш күмәнданбады. Дәуіт жайлы ойланғаны Езекияға да Ехобаның тілін алып, одан еш ажырамауға көмектескені шүбәсіз. Егер Ехобаның айтқанын орындап, одан еш ажырамайтын болсаң, ол саған да көмектесетініне сенімді бол.

Ал егер сенің әкең не анаң Ехобаға қызмет етпейтін болса ше? ~ Құдай балаларға ата-анасының айтқанын тыңдаулары керек дейді. Сен де ата-анаңның тілін алуың керек. Бірақ егер ата-анаң Құдай істеме дейтін нәрсені істе десе, неге олай істегің келмейтінін түсіндір. Ұмытпа, өтірік айту, ұрлау сияқты Құдайға ұнамайтын істер істеуге болмайды. Кім не демесін, сен ең бастысы Құдайды тыңдауың керек!

Езекия тек Дәуіттен ғана емес, атасы Жотамнан да үлгі алған. Біз де Езекия сияқты бұл адамдар туралы Киелі кітаптан оқып, олардан үйрене аламыз. Олар бізге жақсы үлгі қалдырды. Сен тағы кімдерден үлгі алғың келеді? ~

Рас, Киелі кітапта Езекия, Дәуіт, Жотам және тағы басқа адамдардың қателіктер жасағаны айтылады. Дегенмен бұл адамдар Ехобаны жақсы көрген, қателіктерін мойындаған және жақсы істер істеуге тырысқан. Ал ешқашан қателік жасамаған адам Құдай Ұлы Иса ғана. Кел, ол туралы жақсылап біліп алайық та, оған ұқсауға тырысайық.