Абақұқ 1:1—17
1 Абақұқ* пайғамбардың аянда алған хабары:
2 Уа, Ехоба*, қашанғы көмек сұраймын,Ал сен құлақ салар емессің+?
Қашанғы зорлық-зомбылықтан қорғауыңды сұраймын,Ал сен араша түсер емессің+?
3 Неге мені зұлымдықты көруге мәжбүр етесің?
Неге қысымшылыққа шыдап отырсың?
Неге көз алдымда қырып-жою, зорлық-зомбылық болып жатыр?
Неге ұрыс-керіс пен қақтығыс көбейіп кетті?
4 Сондықтан заңның күші жоқ,Әділдік ешқашан жүзеге аспайды.
Зұлымдар әділ жандарға қысым көрсетеді,Міне, содан әділдік бұрмалануда+.
5 “Халықтарға қарап, назар аударыңдар!
Таңғала қарап, аңтарылып тұрып қалыңдар.
Өйткені сендердің күндеріңде бір жайт орын алады,Бұл жайлы біреу айтса, сенбес едіңдер+.
6 Міне, мен халдейлерді жіберемін+.
Олар — қатыгез әрі қызба халық.
Өзгелердің үйлерін басып алу үшін,Ұлан-ғайыр жерлермен зымырап өте шығады+.
7 Олар — қорқынышты да айбарлы,Өз әділдігі мен билігін орнататын халық+.
8 Аттары қабыланнан да жүйрік,Түнде жортқан қасқырдан да жауыз+.
Тұяқтары жерге тимей,Соғыс аттары алыстан шауып келеді.
Олар жемтігіне шүйліккен бүркіттей зулайды+.
9 Бәрі де зорлық жасауға бел буған+.
Бірігіп алға ұмтылғаны шығыстың желіндей+,Олар тұтқындарды құм көсеп алғандай жинайды.
10 Патшаларды келеке-мазақ етіп,Лауазымды адамдарды келемеждейді+.
Әрбір бекіністің үстінен күліп+,Үйінді жасап, оны басып алады.
11 Олар соққан желдей осы елден өте шығады,Бірақ күш-қуаттарын өз құдайына телігені*+ үшін айыпты болады+”.
12 Уа, Ехоба, сен мәңгіліктен келе жатқан Құдай+ емессің бе?
Құдайым, Киелі Құдайым, сен ешқашан өлмейсің*+.
Уа, Ехоба, оларды үкіміңді орындату үшін тағайындадың.
Жартасым+ менің, оларды бізді жазалау үшін белгіледің+.
13 Сенің көзің тым таза, сондықтан озбырлыққа қарап тұра алмайсың,Зұлымдыққа жаның төзбейді+.
Онда неге опасыздыққа төзудесің+?
Зұлым адам өзінен әлдеқайда әділ біреуді жұтып жатқанда, неге үндемейсің+?
14 Неге адам баласын теңіздегі балықтай,Басшысы жоқ бауырымен жорғалаушыдай еттің?
15 Жау бұлардың бәрін қармақпен іліп,Ау тастап, ұстап алуда.
Балық аулайтын торға жинап жатыр.
Сол себептен де ол мәз-мейрам болуда+.
16 Сондықтан ауына арнап құрбандық шалады,Балық аулайтын торына арнап құрбандық ұсынады*.
Өйткені солардың арқасында мол олжаға кенеліп,Нәрлі тағам ішіп-жейді.
17 Сонда қалай, ол қайта-қайта ау салып*,Халықтарды аяусыз қыра берсін бе+?
Сілтемелер
^ Мағынасы “ыстық құшақ” болса керек.
^ Бұл — Құдайдың есімі. Түсіндірмені қараңыз.
^ Мүмкін: “күш-қуаттарын өз құдайы еткені”.
^ Мүмкін: “біз ешқашан өлмейміз”.
^ Еврейдің бұл сөзі хош иісті зат түтетуді де білдіруі мүмкін.
^ Мүмкін: “семсерін суырып”.
